Read Nzema Gyɛ 18 Bible Online

Gyɛ 18 - Nzema bible

Gyɛ 18

¹Ɛdɛnkɛma dendɛle hilele me.

²Ɔse, “Gyɛlɛmaya, dwazo kɔ buakɛnwovolɛ ne sua nu, na ɛkɛ ne a ɛbade nrɛlaleɛ mɔɔ mefa meazoa wɔ la a.”

³Yemɔti mendwazole mengɔle buakɛnwovolɛ ne sua nu. Ɛnee nwovolɛ ne ɛlɛfa ye ehwili ne ali adwinli.

⁴Saa nwovolɛ ne nwo buakɛ ne bie na yeanyɛ kpalɛ a, ɛnee yezɛkye ye na yeva ndɛtɛlɛ ne yenwo debie fofolɛ, kɛmɔ ɔkpondɛ ye la.

⁵Akee Ɛdɛnkɛma zele me kɛ,

⁶“O Yizilayɛma, asoo mengola menyɛ bɛ kɛmɔ buakɛnwovolɛ yɛ ye ɛva ne la ɔ? Kɛ ɛva ne si de wɔ nwovolɛ ne asa anu la, zɔhane ala a bɛde wɔ me sa nu a.

⁷Mekɛ biala mɔɔ menwɔze kɛ mebadu maanle bie meahakyi ye, mebagologolo ye anzɛɛ mebabɔ ye la,

⁸saa maanle ne anu amra twe bɛ nwo fi bɛ ɛtane mɔɔ bɛyɛ la anwo a, mebava bɛ ɛtane meahyɛ bɛ, menrɛzɛkye maanle zɔhane.

⁹Zɔhane ala yɛɛ saa mese kɛ meboa maanle bie meamaa yeakpazi, yeagyinla

¹⁰na maanle ɛhye anu amra yɛ ɛtane na bɛandie me ne a, mebagyakyi kpalɛ biala mɔɔ mezuzu ye bɛ nwo la meagua ɛkɛ a.

¹¹Yemɔti ka kile Dwudama nee Gyɛlusalɛmma kɛ medame Ɛdɛnkɛma, mese: Melɛdwenle nwolɛ mearazɛkye bɛ. Awie biala ɛhwe ɔ nwo ɛvi ye nyɛleɛ ɛtane nwo na ɔhakyi ye subane nee ye nyɛleɛ.

¹²Na bɛbabua wɔ kɛ, ‘Yɛndie wɔ edwɛkɛ biala. Yɛyɛ mɔɔ wɔ yɛ ahonle nu la; yɛɛ awie biala babɔ ɛbɛla ɛtane mɔɔ ɔdaye ɔkulo la.’ ”

¹³Zɔhane ati Ɛdɛnkɛma se, “Biza maanle maanle ne mɔ kɛ nwane a ɛde edwɛkɛ zɛhae bie ɛlɛ a? Yizilayɛma ɛyɛ bɛkyi debie ɛzulolɛ kpole kpalɛ.

¹⁴Asoo ezukɔtweaba ɛnle Lɛbanɔn awolɛ awoka ne mɔ azo? Asoo ye awoka ne mɔ azo nzule yɔlɔkɔkɔ ne mɔ we resee?

¹⁵Noko me menli ne ɛkpo me, bɛkpu ɛyɛlɛ evuanlɛ bɛmaa nyamenle gyɛne gyɛne. Bɛdu koti wɔ bɛ ɛbɛlabɔlɛ nu, bɛanlua dɛba ne adenle ne anu. Bɛluolua ahane ahane, bɛanva ademgbole nu.

¹⁶Bɛmaa bɛ maanle ne anu ɛyɛ ɛzulolɛ, menli te ye duma a bɛkpobi ye. Awie biala mɔɔ kɛva ɛkɛ ne la ahonle tu na ɔkpusu ɔ ti.

¹⁷Mebakponde bɛ kɛ aduduleɛ anwoma wɔ bɛ kpɔvolɛma anyunlu, saa bɛkɔ ɛmianlɛ nu a menrɛye me nyunlu, mebahakyi me nzi meazi bɛ.”

¹⁸Akee menli ne hanle kɛ, “Bɛmaa yɛva Gyɛlɛmaya anwo adwenle, ɔluakɛ ɔwɔ kɛ sɛlɛvolɛ a kilehile mɛla ne anu a, na nrɛlɛbɛvolɛ tu folɛ, yɛɛ Nyamenle kpɔmanvolɛ ka Nyamenle nrɛlaleɛ ne. Bɛmaa yɛdo ye ɛzonle na yɛduodua yɛ nzo wɔ ye edwɛkɛhanlɛ nwo.”

¹⁹Ɔlua ɛhye ati menyɛle nzɛlɛlɛ kɛ, “O Ɛdɛnkɛma, tie me nzɛlɛlɛ na tie me modolɛ.

²⁰Asoo bɛfa ɛtane bɛtua kpalɛ kakɛ? Noko menli ne ɛvu me nwo kuma. Kakye kɛ menzile membale ɛ nyunlu membamkpale bɛ ti kyɛlɛ kɛ ɛye wɔ ɛya ne bɛ nwo zo la.

²¹Zɔhane ati, Ɛdɛnkɛma, maa ɛhɔne ngome ɛhu bɛ mra; maa bɛwu dadeɛ nloa. Maa bɛ ye mɔ ɛyɛ mota na bɛyɛ ahunlanvolɛ. Maa anwonyane ɛbɔ mrenya ne mɔ ɛhu bɛ, na mgbavolɛ ne mɔ ɛwu konle nu.

²²Bɛvu kuma mɔɔ bɛmaa meadɔ nu a, yɛɛ bɛzuozua ngane mɔɔ bɛfa bɛahye me a. Yemɔti maa awie mɔ ɛrave bɛ nwo ninyɛne arɛlevilɛ nu, na maa ɛzunlɛ ɛdɔ bɛ awuke ne mɔ anu.

²³O Ɛdɛnkɛma, wɔmɔ, ɛze bɛ akpamo mɔɔ bɛhɔ kɛ bɛku me la. Mmafa bɛ ɛtane ɛkyɛ bɛ na ɛye bɛ ɛtane mɔɔ bɛyɛ la ɛfi ɛ nye zo. Maa bɛho bɛdɔ ɛ nyunlu na dua wɔ ɛya ne anu ɛ nee bɛ ɛli ye kpalɛ.”