Read Nzema Gyɛ 19 Bible Online

Gyɛ 19 - Nzema bible

Gyɛ 19

¹Ɛdɛnkɛma zele me kɛ, “Kɔdɔ dwora, na fa menli ne mgbanyima ne mɔ bie nee sɛlɛvolɛma mgbanyima ne mɔ bie,

² na ɛ nee bɛ ɛpe Foandɛkɛ Anlenkɛ Kpole ne anu ɛhɔ Henɛm Bɔnza, na ka me nrɛlaleɛ ne kile bɛ.

³Ka kile bɛ kɛ: Tumivolɛ Ɛdɛnkɛma, Yizilayɛ Nyamenle ne se, ‘Dwuda arelemgbunli nee Gyɛlusalɛm ezuavolɛ, bɛdie. Bɛnlea, melɛmaa munzule kpole bie arado bɛ mɔɔ awie biala mɔɔ kɛde la anwo babubu ye a.

⁴Ɔboalekɛ menli ne ɛkpo me ɛva evinli ɛha Gyɛlusalɛm ɛke. Bɛkpu ɛyɛlɛ ɛke bɛmaa nyamenle gyɛne gyɛne mɔɔ bɛ ze mɔ o, bɛdabɛ o, Dwuda arelemgbunli o, bɛ biala ɛnze bɛ la. Eza bɛha menli mɔɔ ɛnze nwolɛ bie la mogya bɛgua ɛke,

⁵ bɛzi azukponle bɛmaa bɛ bozonle Beeyale ne na bɛyela bɛ mra ɛke bɛbɔ ɛyelalɛ azu bɛmaa ye. Nyɛleɛ zɛhae, tɛ me yɛɛ menzele bɛ anzɛɛ menlile ye mɛla memanle bɛ a, yɛɛ nwolɛ adwenle amba me ti anu bɔbɔ.

⁶Yemɔti bɛnlea, mekɛ ɛlɛba mɔɔ medame Ɛdɛnkɛma mese: Bɛnrɛvɛlɛ azɛlɛ ɛhye Tofɛte anzɛɛ Henɛm Bɔnza bieko; bɛbavɛlɛ ye Ahunleɛ Bɔnza.

⁷Ɛke a mebazɛkye adwenle ngyehyɛlɛ biala mɔɔ Dwudama nee Gyɛlusalɛmma ɛhyehyɛ la. Mebamaa bɛ kpɔvolɛma nee menli mɔɔ kpondɛ bɛ la asa adɔ bɛ nwo zo ahu bɛ. Mebamaa anwomanyunlu nloma nee ɛbɔ nu nanemgbole ali bɛ avunli.

⁸Mebazɛkye suakpole ɛhye meamaa menli azulo ɛkɛ. Awie biala mɔɔ kɛze ɛke la akunlu badu na yeahɔsɔ ɔ ti, ɔluakɛ mebazɛkye ye meamaa yeayɛ ɛzulolɛ.

⁹Kpɔvolɛma babɔ suakpole ne ayia na bɛateta ye ɛzulolɛ nu kpole bie. Ɛhɔne bamaa menli ne apɛ bɛ nwo ahu bɛ mra mrenya nee bɛ mra mraalɛ ali; eza bɛbahu bɛ gɔnwo mɔ bɔbɔ bɛali.’ ”

¹⁰Akee Ɛdɛnkɛma zele me kɛ membɔ dwora ne wɔ menli mɔɔ me nee bɛ hɔle la anyunlu,

¹¹na menga mengile bɛ kɛ, “Tumivolɛ Ɛdɛnkɛma se: Kɛmɔ sonla gologolo nwovolɛ dwora na bɛfa ye bieko a ɔnva la, zɔhane ala yɛɛ mebagologolo menli ɛhye mɔ nee suakpole ɛhye a. Bɛbazie avunli wɔ Tofɛte, ɔboalekɛ bɛnrɛnyia azie bɛnrɛzie avunli ne mɔ zo.

¹²Kɛ medame Ɛdɛnkɛma mebayɛ ɛke la ɛne, mebamaa suakpole ɛhye nee zolɛ menli ne ayɛ kɛ Tofɛte.

¹³Azua mɔɔ wɔ Gyɛlusalɛm, Dwuda arelemgbunli azua, yɛɛ azua mɔɔ bɛkpu ɛyɛlɛ zolɛ bɛmaa anwumaneamra na bɛva nwanye bɛgua bɛbɔ azu bɛmaa nyamenle gyɛne gyɛne la, evinli ɛha bɛ kɛ Tofɛte la.”

¹⁴Akee Gyɛlɛmaya vi Tofɛte, ɛleka mɔɔ Ɛdɛnkɛma manle ɔhɔbɔle ye nrɛlaleɛ ne nolo la rale na ɔragyinlanle Ɛdɛnkɛma Ɛzonlenlɛ Sua ne alie nwo ɛkɛ na ɔhanle ɔhilele menli ne kɔsɔɔti kɛ,

¹⁵“Tumivolɛ Ɛdɛnkɛma, Yizilayɛ Nyamenle ne se: Melɛfa munzule biala mɔɔ mezuzu kɛ mefa meadea suakpole ɛhye nee azua mɔɔ zuozua ye la amuala wɔ bɛ ɛtane ne mɔ ati la meara, ɔboalekɛ bɛbɔ kpɔkɛ kɛ bɛnrɛdie me edwɛkɛ.”