Read Nzema Gyɛ 2 Bible Online

Gyɛ 2 - Nzema bible

Gyɛ 2

¹Ɛdɛnkɛma zele me kɛ,

²“Kɔha kile Gyɛlusalɛmma kɛ Ɛdɛnkɛma se, ‘Mekakye wɔ ngakula nu nɔhalɛlilɛ ne, ɛhulole me kɛ atɔfolɛ raalɛ la, ɛdoale me wɔ fienemgbole ne anu, azɛlɛ mɔɔ bɛtɛduale debie biala zolɛ la azo.

³Ɛnee Yizilayɛ anwo te wɔ medame Ɛdɛnkɛma me nyunlu, Ɔle me bɛyɔba ma mɔɔ lumua a. Awie biala mɔɔ lile bie la lile fɔlɛ; munzule dole ye, Medame Ɛdɛnkɛma a mese a.’ ”

⁴Gyekɔbo abo zo amra nee Yizilayɛ mbusua ekpunli ekpunli ne mɔ amuala, bɛdie Ɛdɛnkɛma nrɛlaleɛ ne.

⁵Kɛ Ɛdɛnkɛma se la ɛne: “Duzu ɛtane a bɛ ze mɔ nwunle ye me nwo, mɔɔ yemɔti bɛnriandile me, bɛhɔzonlenle mmonle mɔɔ nvasoɛ biala ɛnle bɛ nwo zo, na bɛdabɛ bɛyɛle mgbane a?

⁶Bɛambiza kɛ, ‘Ɛdɛnkɛma mɔɔ yele yɛ vile Yigyibiti, Ɛdɛnkɛma mɔɔ vale yɛ pɛle fienemgbole ne, azɛlɛ mɔɔ le ɛsɛlɛ nee ahuma ahuma, mɔɔ ezule ɛndɔ zo na awozinli kabii ɛva ye, mɔɔ awie ɛnva zo, yɛɛ awie ɛnde zo la wɔ nienwu?’

⁷Menvale bɛ membale azɛlɛ mɔɔ aleɛ ɛbu zo la azo kɛ bɛrali zolɛ aleɛ nee ninyɛne kpalɛ kɔsɔɔti. Na bɛrale la, bɛvale evinli bɛhanle me azɛlɛ ne, na bɛmanle me agyadeɛ ne yɛle kyibadeɛ.

⁸Sɛlɛvolɛma ne mɔ ambiza kɛ, ‘Ɛdɛnkɛma wɔ nienwu?’ Bɛdabɛ mɔɔ bɛnea mɛla ne azo la ɛnze me. Menli mɔɔ bu maanle ne la tietiale me mɛla ne mɔ azo; Nyamenle kpɔmanvolɛma hanle bozonle Beeyale nrɛlaleɛ na bɛzonlenle ninyɛne mɔɔ anwo ɛnlɛ nvasoɛ la.

⁹“Yemɔti, medame Ɛdɛnkɛma, mese me nee bɛ ɛnyia ye, yɛɛ me nee bɛ bo zo amra banyia ye.

¹⁰Bɛhɔ Saepelɛse ɛnweazo bɛhɔnlea, anzɛɛ bɛzoa awie Kidaa bɛmaa ɔhɔnlea ɛkɛ kpalɛ saa debie zɛhae bie ɛzi ɛkɛ ɛlɛ a.

¹¹Maanle biala ɛtɛkakyile ye nyamenle ne mɔ mɔɔ ɛnle nyamenle bɔbɔ la, noko me menli ne ɛva bɛ anyunlunyia ɛlie debie mɔɔ nvasoɛ ɛnle zo la.”

¹²Ɛdɛnkɛma se, “O anwumaneamra, bɛmaa ɔzi bɛ nwo, ɔyɛ bɛ nwanwane, na bɛ nwo ɛbubu bɛ.

¹³Ɔluakɛ me menli ne ɛyɛ ɛtane nwiɔ: bɛkpo me, bɛ ngoane nzubula ne, na bɛdabɛ bɛhɔbɔ bɛ bula ɛdeɛ, bula mɔɔ ɛbolo, mɔɔ ngoane nzule ɛngola ɛngyinla nu.

¹⁴“Yizilayɛ ɛnle kanranli; bɛwole ye dehelɛ. Na duzu ati a bɛkyi ye a?

¹⁵Awenade ne mɔ ɛkpo ye, bɛkpo ye kpole kpalɛ. Bɛmaa ye azɛlɛ ne ɛdɔ mgbane, ye azuamgbole ne mɔ ɛyɛ azuadu, menli ɛnde zo.

¹⁶Yeanga ye zɔ, Mɛmefesema nee Tapanehizima ɛdu ye belemgbunli kyɛlɛ ne.

¹⁷Yizilayɛ, ɛdawɔ a wɔmaa ɛhye ɛdo wɔ a! Ɛkpole Ɛdɛnkɛma wɔ Nyamenle ne, wɔ mekɛ mɔɔ ɛnee ɔlɛkile wɔ adenle ne la.

¹⁸Saa ɛkɔ Yigyibiti ɛkɔno Azule Naele ne bie a, duzu nvasoɛ a ɛnyia ye a? Anzɛɛ saa ɛkɔ Aselea ɛkɔno Yufileti azule ne bie a, duzu nvasoɛ a ɛnyia ye a?

¹⁹Wɔ amumuyɛ ne badua wɔ kakɛ, ɛkpolɛ mɔɔ wɔkpo me la babua wɔ ewule fɔlɛ. Nwu ye kɛ ɔle nyane nee munzule ɔmaa wɔ kɛ ɛkɛkpo Ɛdɛnkɛma wɔ Nyamenle ne; ɛnzulo me fee, Tumivolɛ Awulae Nyamenle a se a.

²⁰“Mekɛ tendenle mɔɔ ɛze ɛhɔ la, bɛdele nyɛma, bɛdɛlale anhwe, na bɛhanle kɛ, ‘Yɛnrɛzonle wɔ!’ Ɛhɛe, boka tendenle biala azo nee baka buzuu biala abo, bɛbutule kɛ tuutuu.

²¹Noko memkpale nu menyele bɛ kɛ vanye ma mɔɔ anwo le kɔlɔnwo na menluale bɛ. Na kɛ ɔyɛ mɔɔ akee bɛwie ye zɛhae, na bɛyɛ vanye nyinli ɛ?

²²Kanza bɛbia saminla evuanlɛ, na bɛbia ye dɔɔnwo bɔbɔ a, bɛ nwo ɛnrɛvie me nye zo. Awulae Nyamenle a se a.

²³Kɛ bɛkɛzi bɛkɛhola bɛkɛha kɛ, ‘Evinli ɛtɛkanle yɛ, yɛtɛsonlenle awozonle Beeyale ne mɔ’ ɛ? Bɛnlea bɛ ndenle mɔɔ bɛluale nu wɔ bɔnza ne anu, na bɛnwu mɔɔ bɛyɛ la. Bɛle kɛ afunlumu kokonyinli mɔɔ ɛde nyɛma, na ɔlɛdi ahyimango la,

²⁴bɛle kɛ asoaso kokonyinli mɔɔ fienemgbole nee ɔ nwo ɛli, na yezɔ la ati ɔlɛfunvuafunvua anwoma nu. Nwane a kɛhola kɛgogo ye a? Mɔɔ kpondɛ ye la mmagyegye ɔ nwo. Saa ye ɛvolalɛ mekɛ dwu a bɛ sa baha ye.

²⁵Menzele bɛ kɛ: Bɛmmagua bɛ gyakɛ aze bɛtia, yɛɛ bɛmmamaa bɛ kɔmenzia we resee. Na bɛhanle kɛ, ‘Anyelazo biala ɛnle nu, ɔluakɛ yɛhulo nyɛvolɛ, yɛɛ nyɛvolɛ ala a yɛbadoa bɛ a.’ ”

²⁶Ɛdɛnkɛma se, “Kɛmɔ bɛkye awule a bɛbɔ ye anyiemgba la, zɔhane ala yɛɛ bɛbabɔ Yizilayɛma kɔsɔɔti anyiemgba a: bɛdabɛ, bɛ arelemgbunli, bɛ mgbanyima, bɛ sɛlɛvolɛma, yɛɛ bɛ Nyamenle kpɔmanvolɛma,

²⁷mɔɔ ka kile baka kɛ, ‘Ɛle me ze,’ na bɛka bɛkile bolɛ kɛ, ‘Ɛdawɔ a ɛwole me a.’ Ɔluakɛ bɛhakyi bɛ nzi bɛzi me, bɛnva bɛ nyunlu bɛmba. Na ngyegyelɛ to bɛ a ɛnee bɛse, ‘Dwazo na die yɛ.’

²⁸“Na bɛ nyamenle ne mɔ mɔɔ bɛdabɛ bɛyɛle la wɔ nienwu? Saa bɛdabɛ bɛkɛhola bɛ die a, ɛnee saa ngyegyelɛ to bɛ a bɛmaa bɛdwazo. O Dwuda, kɛ bɛ azuamgbole ne mɔ dodo de la, zɔhane ala yɛɛ bɛ nyamenle ne mɔ dodo de a.

²⁹Duzu ati a bɛtendɛ bɛtia me a? Medame Ɛdɛnkɛma mese: Bɛ muala bɛde me nwo atua.

³⁰Bɛ mra ne mɔ ɛmaa mevɛ mgbane; medea bɛ, noko bɛande folɛ. Bɛdabɛ a bɛhu bɛ Nyamenle kpɔmanvolɛma ne mɔ kɛ awenade mɔɔ asa ɛha nane la.

³¹O bɛmɛ awolɛndoazo ɛhye, bɛdie Ɛdɛnkɛma edwɛkɛ ne. Meyɛ fienemgbole memaa Yizilayɛ, anzɛɛ azɛlɛ mɔɔ awozinli kabii ɛheda zo la ɔ? Duzu ati a me menli ne se, ‘Yɛlɛ fanwodi, yɛnrɛzia yɛnrɛra ɛ nwo ɛkɛ bieko’ a?

³²Asoo bɛlɛra arɛle fi ye anwoneɛ? Asoo atɔfolɛ raalɛ arɛle fi ye atɔfolɛ ndanlɛ? Noko me menli ne arɛle ɛvi me mekɛ dɔɔnwo mɔɔ bɛngola ye tia a.

³³Bɛnwu adenle bɛkpondɛ bɛ kulovolɛma abo zo. Mraalɛ mɔɔ le amumuyɛ la bɔbɔ bɛhilehile bɛ bɛ ndenle ne mɔ.

³⁴Bɛ ndanlɛ nu le ehyianvolɛma nee menli mɔɔ ɛnze nwolɛ bie la mogya ngome, tɛ menli mɔɔ bubu nlenkɛ la mogya ɔ. “Bɛyɛ ninyɛne ɛhye mɔ amuala,

³⁵noko bɛse, ‘Menli fɔlɛ, Ɛdɛnkɛma ɛnlɛ me nwo ɛya bieko.’ Na medame Ɛdɛnkɛma, mebadea bɛ, ɔluakɛ bɛnlie bɛndo nu kɛ bɛyɛ ɛtane.

³⁶Duzu ati a bɛluolua ye ɔ nye ɔ nye, na bɛnzie bɛ ti ɛleka ko ɛ? Yigyibitima bagua bɛ nyunlu aze, kɛmɔ Aseleama guale bɛ nyunlu aze la.

³⁷Bɛbava bɛ sa bɛagua bɛ ti zo, bɛava ɛzunlɛ bɛvi Yigyibiti bɛara, ɔluakɛ mekpo menli ne mɔɔ bɛmɛ bɛva bɛ rɛle bɛwula bɛ nu la. Bɛnrɛnyia nvasoɛ biala bɛnrɛvi bɛ ɛkɛ ne.”