Read Nzema Gyɛ 20 Bible Online

Gyɛ 20 - Nzema bible

Gyɛ 20

¹Yimɛ ara nrenya Sɛlɛvolɛ Pahyɛ mɔɔ le kpanyinli, mɔɔ nea Ɛdɛnkɛma Ɛzonlenlɛ Sua ne la dele kɛ Gyɛlɛmaya ɛlɛka Nyamenle nrɛlaleɛ ɛhye mɔ.

²Na Pahyɛ manle bɛbole Nyamenle Kpɔmanvolɛ Gyɛlɛmaya na bɛbɔle ye kpanwu wɔ Ɛdɛnkɛma Ɛzonlenlɛ Sua ne Sɔlɔ Bɛngyaman Anlenkɛ Kpole ne anwo.

³Aleɛ hyenle na Pahyɛ dule Gyɛlɛmaya kpanwu ne la, ɔhanle ɔhilele Pahyɛ kɛ, “Ɛdɛnkɛma se bɛnvɛlɛ wɔ Pahyɛ, na bɛfɛlɛ wɔ ‘Ɛzulolɛ wɔ ɛleka biala.’

⁴Ɔluakɛ Ɛdɛnkɛma se: Mebamaa ɛ nwo aha ɛzulolɛ amaa ɛdawɔ ɛ nwo nee ɛ gɔnwo mɔ amuala. Bɛ kpɔvolɛma bahu bɛ kɔsɔɔti wɔ ɛdawɔ ɛ nye zo. Mebaye Dwudama amuala meamaa Babelonia belemgbunli ne. Ɔbahye bie mɔ nuokɛ ɔ nee bɛ ahɔ Babelonia na yeahu bie mɔ.

⁵Eza mebamaa bɛ kpɔvolɛma ava anwonyia mɔɔ wɔ suakpole ye azo la ahɔ; bɛbalie menli ne anwo ninyɛne nee bɛ agyadeɛ kɔsɔɔti bɛ sa nu. Bɛbalie Dwuda arelemgbunli gya nu ninyɛne kɔsɔɔti na bɛazoa ɔ muala bɛahɔ Babelonia.

⁶Bɛbahye ɛdawɔ Pahyɛ nee wɔ sua nu amra amuala nuokɛ bɛazoa bɛ bɛahɔ Babelonia. Nehane yɛɛ ɛ nee wɔ sua nu amra nee ɛ gɔnwo mɔ mɔɔ ɛka adalɛ nrɛlaleɛ ne ɛkile bɛ la bawu na bɛazie bɛ a.”

⁷O Ɛdɛnkɛma, wɔbɛlɛbɛla me na meannwu ɔ nzi. Wɔbo me nwo zo, ɔluakɛ ɛtɛla me anwosesebɛ. Alehyenlɛ biala me nwo yɛ ɛzelekɛ; Awie biala si me amgbu.

⁸Ɔluakɛ mekɛ biala metendɛ a metea nu, metea meka kɛ, “Konle nee ɛzɛkyelɛ ɛlɛba o!” Ɔluakɛ Ɛdɛnkɛma edwɛkɛ ne ɛmaa meyɛ mgbane alehyenlɛ biala wɔ menli nye zo.

⁹Saa meka kɛ, “Menrɛbɔ ye duma anzɛɛ menrɛbɔ ye duma menrɛdeɛdea” a; ɛnee ye edwɛkɛ ne sɔ kɛ senle yela me ahonle nu, ɔwolowolo me mbowule nu; akee meli ye me kunlu mevɛ, mengola.

¹⁰Ɔluakɛ mete menli azukuedulɛ ne; ɛzulolɛ ɛva ɛleka kɔsɔɔti. Agɔnwolɛma kpalɛ kpondɛ me azedɔlɛ, bɛse, “Tendɛ tia ye! Bɛmaa yɛdendɛ yɛtia ye! Wɔannea a ɔ nye zo bada ye, ɛnee yɛ sa ɛha ye na yɛali ye nzenralɛ.”

¹¹Na Ɛdɛnkɛma gyi me nzi, ɔle konle nu katakyie, yemɔti menli mɔɔ yɛ me kpɔdekpɔde la badu agua, bɛnrɛhola me nwo zo fo. Bɛ nzuzulɛ ɛnrɛyɛ ɛkɛ, bɛ nyunlu bagua aze kpole, na bɛ rɛle ɛnrɛvi bɛ anyiemgba ɛbɔlɛ ne ɛlɛ.

¹²O Tumivolɛ Ɛdɛnkɛma, mɔɔ sɔ tenlenema nea, mɔɔ ɛnwu sonla biala ahonle nee ye adwenle nu, maa menwu kɛ wɔli me kpɔvolɛma nzenralɛ, ɔluakɛ meva me edwɛkɛ ne memaa wɔ.

¹³Bɛdo edwɛne bɛmaa Ɛdɛnkɛma; bɛye Ɛdɛnkɛma ayɛlɛ! Yelie anwunvɔnema ngoane yevi amumuyɛma asa anu.

¹⁴ Munzule ɛha kenle ne mɔɔ bɛwole me la! Munzule ɛha kenle ne mɔɔ ɔmɔ wole me la!

¹⁵Abule ɛbu sonla ne mɔɔ rabɔle egya amaneɛ kɛ, “Bɛwo ralɛ nrenya bɛmaa wɔ” na ɔmanle ɔ nye liele la.

¹⁶Maa sonla zɔhane ɛyɛ kɛ azuamgbole mɔɔ Ɛdɛnkɛma anze bɛ anwunvɔne, na ɔbutule bɛ nye aze la. Maa ɔde ɛzunlɛ nwonlomɔ na ɔde ɛdeɛdeanlɛ ewiazo,

¹⁷ɔboalekɛ yeammaa meanga ɔmɔ akunlu meanwu. anrɛɛ ɔmɔ akunlu yɛle me azie, na ɔ ko kpole ne hale ɔ nwo.

¹⁸Duzu ati a bɛwo me, kɛ membanwu ɛvɛlɛ nee nyane, na me awieleɛ ɛyɛ anyiemgba ɛ?