Read Nzema Gyɛ 21 Bible Online

Gyɛ 21 - Nzema bible

Gyɛ 21

¹Dwuda Belemgbunli Zɛdikaya zoanle Malekaya ara nrenya Pahyɛ nee Sɛlɛvolɛ Zɛfanaya, Meeyasaya ara nrenya ne wɔ Gyɛlɛmaya anwo ɛkɛ bɛhɔzele ye kɛ,

² “Babelonia Belemgbunli Nɛbukadenɛza ɛlɛfa konle aradoa yɛ. Yemɔti biza Ɛdɛnkɛma maa yɛ saa ɔkɛlua ye nwanwane adenle ne azo ɔkɛmaa ɔkɛgyakyi yɛ nwo zo ɛralɛ a.”

³Gyɛlɛmaya hanle hilele bɛ kɛ bɛhɔha bɛhile Zɛdikaya kɛ,

⁴“Ɛdɛnkɛma, Yizilayɛ Nyamenle ne se: Zɛdikaya, me nee wɔ ɛlɔnema ne mɔɔ nee Babelonia Belemgbunli Nɛbukadenɛza ɛlɔnema ɛlɛkɔ ahɔho la baho. Mebaboɔboa wɔ ɛlɔnema ne konle ninyɛne ne mɔ anloa wɔ suakpole ne avinli.

⁵Mebava me tumi, me anwosesebɛ, me ɛya ne, me ahonle mɔɔ ɛfutu, yɛɛ ahyi mɔɔ ɛlɛku me la me nee wɔ aho.

⁶Mebamaa ewulenzane adɔ menli nee nyɛmoa mɔɔ wɔ suakpole ne azo la avinli ahu bɛ muala.

⁷Akee mebamaa Belemgbunli Nɛbukadenɛza nee wɔ kpɔvolɛma mɔɔ kpondɛ wɔ ahu wɔ la ahye wɔ, wɔ mgbanyima yɛɛ menli mɔɔ anwu konle ne, ɛhɔne ne anzɛɛ ewulenzane ne anu la kɔsɔɔti ahu bɛ. Ɔnrɛvavi bie yɛɛ ɔnreze biala anwunvɔne yɛɛ ɔnrɛze biala alɔbɔlɛ.”

⁸Akee Ɛdɛnkɛma zele me kɛ, “Ka kile menli ne mɔ kɛ Ɛdɛnkɛma se: Meva ngoane adenle nee ewule adenle mezie bɛ nyunlu.

⁹Awie biala mɔɔ kɛdɛnla suakpole ne azo la bawu konle nu anzɛɛ ɛhɔne nu anzɛɛ ewulenzane nu. Na awie biala mɔɔ kɛhɔdane Babelonia ɛlɔnema mɔɔ ɛbɛnra ɛyia suakpole ye la, bɛnrɛhu ye. Bɛbava ye donvula ala.

¹⁰Ɔluakɛ meva me nye mezie suakpole ɛhye anwo kɛ memaa munzule ado bɛdabɛ mɔɔ bɛwɔ zolɛ la. Menrɛmaa kpalɛ ɛnrɛdo bɛ. Mebaye bɛ meamaa Babelonia belemgbunli ne na meamaa yeado senle zolɛ yeayela ye. Medame Ɛdɛnkɛma a mese a.”

¹¹Ɛdɛnkɛma zele me kɛ menga nrɛlaleɛ ɛhye mengile Dwuda suakunlu amra. Ɔse, “Bɛmɛ, Devidi abo zo amra, bɛdie Ɛdɛnkɛma edwɛkɛ ne! Ɛdɛnkɛma se: Bɛli pɛlepɛle dahuu. Bɛlie bɛdabɛ mɔɔ bɛwua bɛ bɛkpokpo bɛ la bɛvi nzisima asa anu. Saa bɛanyɛ ye zɔhane a bɛ ɛtane ne mɔ ati, me ɛya ne bara bɛ nwo zo kɛ senle, na ɔbazɔ mɔɔ bɛnua ye a ɔnrɛnlu a.

¹³Na bɛnlea, bɛmɛ Gyɛlusalɛmma mɔɔ bɛvo bɛdɛnla bɔnza ne anwuma, na bɛyɛ bɛ nwo bodane mɔɔ la azɛlɛ wienyi zo, na bɛse awie ɛnrɛhola ɛnrɛva konle ɛnrɛdoa bɛ, yɛɛ awie ɛnrɛhola ɛnrɛra ɛleka mɔɔ bɛwɔ la, medame Ɛdɛnkɛma, mese,

¹⁴mebadea bɛ wɔ bɛ ɛtane ne mɔ ati. Mebado senle wɔ bɛ suakunlu ɛkɛ, na ɔbazɔ yeayela kpɔkɛ nee debie biala mɔɔ ɛbɔ bɛ ɛyia la. Medame Ɛdɛnkɛma a mese a.”