Read Nzema Gyɛ 22 Bible Online

Gyɛ 22 - Nzema bible

Gyɛ 22

¹Ɛdɛnkɛma zele me kɛ, “Kɔ Dwuda belemgbunli ne suakunlu ɛkɛ ne na ka kile awuke ne anu amra kɛ:

²Dwuda belemgbunli, mɔɔ ɛde Belemgbunli Devidi ebia zo a, ɛdawɔ, wɔ sonvolɛma nee wɔ maanlema amuala mɔɔ wɔ suakpole ye azo la, bɛdie!

³Ɛdɛnkɛma se: Bɛli pɛlepɛle na bɛyɛ mɔɔ le fɔɔnwo la, na bɛlie menli mɔɔ bɛlɛwua bɛ, bɛakpokpo bɛ la bɛvi nzisima asa anu. Bɛmmayɛ nyɛvolɛ, nrisa nee mraalɛ ne mɔ ɛtane anzɛɛ bɛmmakile bɛ nyane. Bɛmmaka awie mɔɔ ɛnze nwolɛ bie la mogya bɛgua azɛlɛ ɛhye azo.

⁴Ɔluakɛ saa bɛdi mɔɔ meha la azo nɔhalɛ nu a, belemgbunlililɛ ne bayɛ bɛmɛ Devidi abo zo amra ɛdeɛ dahuu. Bɛ arelemgbunli, bɛ mgbanyima nee bɛ maanlema badɛnla ehwili nu nee mgbɔnwɔ zo dahuu.

⁵ Na saa bɛanli me edwɛkɛ zo a, meka medame me ngome me nwo kɛ awuke ɛhye babɔ. Medame Ɛdɛnkɛma a mese a.”

⁶Ɔluakɛ Ɛdɛnkɛma se, “Me nye zo, Dwuda maanle ne, Geleade maanle ne, yɛɛ Lɛbanɔn Boka, bɛ ngɛnlɛma sɛ, noko mebazɛkye Dwuda maanle ne meayɛ ye ɛsɛlɛ na meamaa maanle ne anu azuamgbole ayɛ azuadu.

⁷Mebamaa menli ava konle ninyɛne arazɛkye maanle ne. Bɛbaha maanle ne anu sida mbaka ngɛnlɛma ne mɔ bɛagua na bɛayela bɛ.

⁸“Ɛhye anzi nyɛvolɛ dɔɔnwo vi maanle maanle zo baraze ɛkɛ na bɛbaha bɛahile bɛ nwo ngoko kɛ, ‘Duzu ati a Ɛdɛnkɛma ɛdea suakpole ɛhye zɛhae ɛ?’

⁹Na bɛbabua kɛ, ‘Ɔboalekɛ bɛkpole Ɛdɛnkɛma bɛ Nyamenle ne ngyekyeleɛ ne na bɛzonlenle nyamenle gyɛne gyɛne.’ ”

¹⁰Dwudama, bɛmmasu mɔɔ ɛwu la, yɛɛ bɛmmadi ɔ nwo nyane; na bɛzu mɔɔ bɛ nee ye ɛlɛkɔ la kpalɛ, ɔluakɛ ɔnrɛzia ɔnrɛra bieko, ɔnrɛranwu ye maanle ye anu bieko.

¹¹ Ɔluakɛ mɔɔ Ɛdɛnkɛma ka ye wɔ Belemgbunli Dwosaya ara nrenya Dwowahaze[6] mɔɔ lile ɔ ze agya, dɛnlanle ebia ne azo la anwo la ɛne. Ɔse, “Ɛhɔlɛ mɔɔ yehɔ la, ɔnrɛzia ɔnrɛra bieko.

¹²Ɔbawu ɛleka mɔɔ bɛhye ye nuokɛ bɛhɔ la, ɔ nye ɛnrɛnwu azɛlɛ ɛhye azo bieko.”

¹³Munzule ɛha sonla ne mɔɔ ɛnlua nɔhalɛ adenle zo ɛnzi sua na ɔfa mɔguazo adenle zo ɔsi ye anwuma ekpumgbunli ne mɔ la; munzule ɛha sonla ne mɔɔ maa ɔ gɔnwo mɔ yɛ agyili gyima na ɔndua bɛ kakɛ la.

¹⁴Munzule ɛha sonla ne mɔɔ ka kɛ, “Mesi me sua kpole ko mɔɔ lɛ anwuma ekpumgbunli mgbole”, na ɔkɛduodua ye nvɛnzɛlɛ mɔɔ bɛva sida adaboa bɛbobɔ, na ɔkɛha ye ayile kɔkɔlɛ la.

¹⁵Ɛdwenle kɛ saa ɛfa sida mbaka ɛsisi azua a, ɛnee ɛle belemgbunli kpalɛ ɔ? Asoo ɛ ze lile, nlonle na ɔlile pɛlepɛle, ɔbɔle tenlene ɛbɛla? Ɛnee noko ye debie biala hɔle zolɛ manle ye.

¹⁶Saa ɔlile pɛlepɛle ɔmanle ehyianvolɛma, yeambua menli mɔɔ ehyia la mgbɔvondɛne a ɛnee ɔle kpalɛ. Medame Ɛdɛnkɛma, mese, kɛ me ɛnwunlɛ de la ɛne.

¹⁷Na wɔmɔ, ɛlɛ ɛnyelɛ nee ahonle mɔɔ ɛfa ɛwua menli ɛnyia ɛ nwo, ɛfa ɛka menli mɔɔ ɛnze nwolɛ bie la mogya ɛgua, na ɛfa ɛsisi wɔ menli ne, ɛyɛ bɛ amumuyɛ.

¹⁸ Zɔhane ati Ɛdɛnkɛma ɛha Dwosaya ara Gyɛhɔyakem, Dwuda belemgbunli ne anwo edwɛkɛ kɛ, “Awie biala ɛnrɛzu ye kɛ, ‘ayi me diema nrenya,’ anzɛɛ ‘ayi me diema raalɛ.’ Awie biala ɛnrɛye awolɛ ɛnrɛze kɛ, ‘Me menle o,’ anzɛɛ ‘me belemgbunli o!’

¹⁹Bɛbahwenle ye aze bɛahɔvuandi ye bɛado Gyɛlusalɛm kandiba kɛmɔ bɛfuandi asoaso funli bɛto ala la.”

²⁰Gyɛlusalɛmma, bɛhɔ Lɛbanɔn bɛhɔzu, bɛhɔ Beehyan azɛlɛ zo bɛhɔzu kpalɛ; bɛhɔ Ebalem bɛhɔzu, ɔluakɛ bɛbɔ bɛ konle nu boavolɛma abo zo.

²¹Bɛkpazile la mendendɛle mengilele bɛ, na bɛhanle kɛ bɛnrɛdie. Subane ɛhye a sumunli bɛ ngakula nu bɛhile a, kɛ bɛnrɛdie me ne.

²²Anwoma ne bapia bɛ adekilevolɛma kɔsɔɔti ahɔ, na bɛahye bɛ konle nu boavolɛma nuokɛ bɛahɔ nlɔnu. Bɛ nyunlu bagua aze, nyiane ahu bɛ wɔ bɛ amumuyɛ ne mɔ mɔɔ bɛyɛ la ati.

²³O Lɛbanɔnoma, mɔɔ bɛde sida azua nu a, nyane to bɛ a ɛkponlenlɛ mɔɔ bɛbakponle la bayɛ kɛ raalɛ mɔɔ ɛhɔ ahonleɛ la.[7]

²⁴ Ɛdɛnkɛma se, “Dwuda Belemgbunli Gyɛhɔyakem ara nrenya Gyɛhɔyakɛn le me sa fema kpɔdelera zo tumi kpɔba bɔbɔ ɛdeɛ, noko sumunli kenle ala mɔɔ medame a mele tease Nyamenle la, mebakpolo wɔ meavi me sa,

²⁵na meaye wɔ meamaa menli mɔɔ ɛlɛkpondɛ wɔ ahu wɔ na ɛsulo bɛ la. Mebava wɔ meamaa Babelonia Belemgbunli Nɛbukadenɛza nee ye ɛlɔnema ne.

²⁶Mebavuandi wɔ nee ɛ nli ne mɔɔ wole wɔ la meahɔgua maanle bie mɔɔ tɛ ɛkɛ ne a bɛwole bɛ la anu. Ɛkɛ ne a bɛbawu a.

²⁷Bɛ nwo balɔ bɛ maanle nu, na bɛ nye ɛnrɛnwu ɛke bieko ɛlɛ.”

²⁸Na menganle kɛ, “Ɛnee Gyɛhɔyakɛn a ɛhakyi dwora ebule mɔɔ bɛkpo ye na awie ɛnva ye bieko la ɔ? Duzu ati a bɛvuandi ye nee ɔ mra bɛhɔgua ɛleka mɔɔ bɛnze la ɛ?”

²⁹O azɛlɛ, azɛlɛ, azɛlɛ! Tie Ɛdɛnkɛma ane!

³⁰Ɛdɛnkɛma se, “Kɛlɛ nrenya ɛhye duma kɛ yeanwo ralɛ, ɔle sonla mɔɔ ɛnrɛyɛ kpalɛ wɔ ɛbɛla nu, ɔluakɛ ɔ mra ne mɔ biala ɛnrɛli ye agya, ɛnrɛdɛnla Devidi belemgbunli ebia ne azo, ɛnrɛzie Dwuda maanle ne bieko ɛlɛ.”