Read Nzema Gyɛ 23 Bible Online

Gyɛ 23 - Nzema bible

Gyɛ 23

¹Ɛdɛnkɛma se, “Munzule ɛha mboaneneavolɛma mɔɔ sɛkye me mboane ne mɔ mɔɔ wɔ me adidileka ne, na bɛbɔ bɛ asande la.”

²Ɛdɛnkɛma, Yizilayɛ Nyamenle ne ɛha mboaneneavolɛma mɔɔ nea ye mboane ne mɔ la anwo edwɛkɛ kɛ, “Bɛnnea me mboane ne mɔ boɛ, bɛvoa bɛ, bɛmaa bɛzande. Bɛnlea, mebadea bɛ wɔ bɛ ɛtane ne mɔ ati.

³Akee mebaboɔboa me mboane ne mɔ mɔɔ ɛha azuamgbole ne mɔ kɔsɔɔti azo, ɛleka mɔɔ memanle bɛhɔguale la anloa mearagua ɛleka ko, wɔ tunli ko anu, na bɛbada, bɛ nwo azo.

⁴Mebamaa bɛ mboaneneavolɛma mɔɔ banlea bɛ kpalɛ la; bɛnrɛzulo bieko, bɛ ahonle ɛnrɛdu, yɛɛ kokye ɛnrɛminli. Medame Ɛdɛnkɛma a mese a.

⁵ “Bɛnlea, mekɛ ɛlɛba mɔɔ mebamaa tenlene Ɛhane akpakye Devidi sua nu. Ɔbali belemgbunli na ɔ nee ye menli ne adɛnla nrɛlɛbɛ nu, yeali edwɛkɛ pɛlepɛle nee tenlene nu wɔ azɛlɛ ne azo.

⁶Wɔ ye mekɛ zo, Dwudama banyia bɛ ti na Yizilayɛma anwo adɔ bɛ. Duma mɔɔ bɛbava bɛavɛlɛ ye la a le, ‘Ɛdɛnkɛma le tenlenenli.’

⁷“Yemɔti bɛnlea, mekɛ ɛlɛba mɔɔ menli ɛnrɛha kɛ, ‘Tease Ɛdɛnkɛma mɔɔ yele Yizilayɛma vile Yigyibiti azɛlɛ zo la ati.’

⁸Mɔɔ bɛbaha la a le ‘Tease Ɛdɛnkɛma mɔɔ yele Yizilayɛma mɔɔ ɛha la vile sɔlɔ maanle ne nee maanle ngakyile kɔsɔɔti, ɛleka mɔɔ ɔvoanle bɛ ɔhɔle la anu rale la ati.’ Na akee bɛbadɛnla bɛdabɛ bɛ azɛlɛ zo. Medame Ɛdɛnkɛma a mese a.”

⁹Me ahonle mɔɔ la me kunlu la ɛbɔndɔ, me mbowule kɔsɔɔti ɛlɛwozo. Meyɛ kɛ sonla mɔɔ ɛbo nza la; ɔlua Ɛdɛnkɛma nee ye edwɛkɛ nwuanzanwuanza ne ati, meyɛ kɛ sonla mɔɔ nza ɛgya ye la.

¹⁰Awuvolɛvalɛma ɛyi azɛlɛ ye; bɛ nwo munzule ɛzɛkye azɛlɛ ne, yɛɛ fienemgbole nu adidileka ɛwe. Bɛ subane ɛnle kpalɛ, yɛɛ bɛfa bɛ anwosesebɛ bɛsisi awie mɔ.

¹¹Ɛdɛnkɛma se, “Nyamenle kpɔmanvolɛma nee sɛlɛvolɛma ɛnze Nyamenle; menwu kɛ bɛdi ɛtane wɔ me Ɛzonlenlɛ Sua ne bɔbɔ anu.

¹²Zɔhane ati bɛ ndenle ne mɔ anu bayɛ siselesisele, ayɛ awozinli; bɛbaheha bɛ bɛahɔ nuhua bɛamaa bɛadu bɛagua, ɔluakɛ mebamaa munzule ara bɛ nwo zo wɔ mekɛ mɔɔ metea bɛ la.

¹³Menwu ayahanlɛ debie bie wɔ Samɛlea Nyamenle kpɔmanvolɛma anwo: bɛdendɛle bozonle Beeyale anloa azo, bɛvale bɛminlinle me menli Yizilayɛma.

¹⁴ Menwu debie ɛzulolɛ bie wɔ Gyɛlusalɛm Nyamenle kpɔmanvolɛma avinli: bɛto awuvolɛvalɛ mɛla ne, bɛbɔ adalɛ, bɛsi amumuyɛma adua, yemɔti biala ɛngyakyi amumuyɛ ɛyɛlɛ; bɛ kɔsɔɔti bɛyɛ kɛ Sodɔmma nee Gomɔlama wɔ me nye zo.

¹⁵“Yemɔti, medame Tumivolɛ Ɛdɛnkɛma, meka ɛhye wɔ Nyamenle kpɔmanvolɛma anwo: Bɛnlea, mebamaa bɛali aleɛ ɛnwonle, meamaa bɛ nzule pɔezen bɛanlo, ɔboalekɛ Gyɛlusalɛm Nyamenle kpɔmanvolɛma ɛmmaa menli ne ɛnzonle Nyamenle wɔ maanle ne anu.”

¹⁶Tumivolɛ Ɛdɛnkɛma se, “Bɛmmatie Nyamenle kpɔmanvolɛma nrɛlaleɛ ne mɔɔ bɛka bɛkile bɛ la. Bɛbɔ bɛ ti anu bɛka ɛnyelɛzodeɛnwunlɛ edwɛkɛ bɛkile bɛ, bɛmaa bɛnyia anyelazo mɔɔ kenle bie ɛlɛ ɔnrɛyɛ zɔhane, na tɛ mame Ɛdɛnkɛma a meva mezoa bɛ la.

¹⁷Bɛka bɛkile menli mɔɔ ɛndie me ne la kɛ, ‘Debie biala bayɛ boɛ!’ yɛɛ bɛka bɛkile awie biala mɔɔ yɛ mɔɔ ɔdaye ɔ kunlu dwo nwolɛ la kɛ, ‘Munzule biala ɛnrɛdo wɔ.’ ”

¹⁸Menganle kɛ, “Nyamenle kpɔmanvolɛma ɛhye mɔ anu boni a nee Ɛdɛnkɛma ɛdu agyinla, ɛnwu ye na yede anzɛɛ yedie ye, na yeli ye edwɛkɛ zo a?

¹⁹Bɛnlea, Ɛdɛnkɛma ɛya ne ɛlɛtu kpole kɛ ahumuakyima. Ɔbahɔgua ye wɔ amumuyɛma ati zo.

²⁰Ɛdɛnkɛma ɛya ne ɛnrɛdwo, kyesɛ yeyɛ mɔɔ gyi ɔ nye zo la. Kenle bie bɛbade ɔ bo kpalɛ.”

²¹Ɛdɛnkɛma zele kɛ, “Meanzoa Nyamenle kpɔmanvolɛma ne mɔ, noko bɛhɔle. Meanga edwɛkɛ biala meangile bɛ, noko bɛhɔhanle nrɛlaleɛ.

²²Saa bɛ nee me dule agyinla a, anrɛɛ bɛhanle me nrɛlaleɛ ne bɛhilele me menli ne; anrɛɛ bɛmanle bɛvile ndenle ɛtane ne mɔ azo na bɛhwenle bɛ nwo bɛvile bɛ nyɛleɛ ɛtane ne mɔ anwo.

²³“Bɛdwenle kɛ mele Nyamenle mɔɔ ɛbikye me a yɛɛ menwu wɔ a, na ɛwɔ moa a mennwu wɔ?

²⁴Asoo sonla kola fea ɔ nwo mɔɔ mengola mennwu ye a? Medame Ɛdɛnkɛma, mese, mewɔ ɛleka kɔsɔɔti, anwuma o, aze o.

²⁵Mede adalɛ mɔɔ Nyamenle kpɔmanvolɛma fa me duma bɔ, ka bɛ nrɛlaleɛ ne la. Bɛse, ‘Meha ɛlalɛ, meha ɛlalɛ’

²⁶Kenlenzu a Nyamenle kpɔmanvolɛma ɛhye mɔ kɛgyakyi adalɛ nrɛlaleɛ ɛhanlɛ a? Bɛbɔ bɛ ti anu bɛka nrɛlaleɛ biala bɛfa bɛbɛlɛbɛla bɛdabɛ bɛ ngome bɛ nwo.

²⁷Bɛdwenle kɛ bɛfa bɛ ɛlalɛ ne mɔɔ bɛka bɛkile bɛ nwo ngoko la bɛabɛlɛbɛla me menli ne bɛamaa bɛ rɛle avi me duma ne, kɛmɔ bɛ ze mɔ arɛle vile me duma ne na bɛzonlenle bozonle Beeyale ne la.

²⁸Nyamenle kpɔmanvolɛma mɔɔ ka ɛlalɛ la ɛha bɛ ɛlalɛ ne, na Nyamenle kpɔmanvolɛ mɔɔ ka me nrɛlaleɛ ne la ɛha me nrɛlaleɛ ne nɔhalɛ nu.” Ɛdɛnkɛma ɛlɛbiza kɛ, “Ɛhonle fa ye nienwu a nee awule sɛ a?”

²⁹Ɛdɛnkɛma se, “Me edwɛkɛ ne le senle, ɔle kɛ hamenle mɔɔ bɛfa bɛkpukekpuke bodane la.

³⁰Yemɔti bɛnlea, mekyi Nyamenle kpɔmanvolɛma mɔɔ wua me edwɛkɛ ne fi bɛ gɔnwo mɔ anloa fa ka bɛ nrɛlaleɛ la.

³¹Mekyi Nyamenle kpɔmanvolɛma mɔɔ fa bɛ nloa mgbane ka kɛ, ‘Ɛdɛnkɛma se, Ɛdɛnkɛma se’ la.

³²Bɛnlea, mekyi bɛdabɛ mɔɔ bɛka ɛlalɛ adalɛ na bɛfa bɛ adalɛ nee bɛ nloa anu ɛyelɛ bɛdi me menli ne adwenle na bɛminli bɛ wɔ mekɛ mɔɔ metɛsoanle bɛ, anzɛɛ metɛkilele bɛ debie kɛ bɛyɛ la. Menli ne ɛnnyia Nyamenle kpɔmanvolɛma ne mɔ nyɛleɛ ne azo nvasoɛ biala.”

³³Ɛdɛnkɛma zele me kɛ, “Saa menli ɛhye mɔ bie anzɛɛ Nyamenle kpɔmanvolɛ anzɛɛ sɛlɛvolɛ bie biza wɔ kɛ, ‘Ɛdɛnkɛma adesoa ne a le duzu’ a, ka kile ye kɛ: Mese, bɛmɛ bɛdabɛ a bɛle adesoa bɛmaa me a, na mebavuandi bɛ meagua. Medame Ɛdɛnkɛma a mese a.

³⁴Saa Nyamenle kpɔmanvolɛ, sɛlɛvolɛ anzɛɛ menli ne mɔ bie fa ɔ nloa fula edwɛkɛ agbɔkɛ, ‘Ɛdɛnkɛma adesoa’ a, mebadea ye nee ye sua nu amra.

³⁵Edwɛkɛ mɔɔ bɛha bɛhile bɛ nwo ngoko nee bɛ mediema la a le, ‘Duzu mualɛ a Ɛdɛnkɛma ɛva ɛmaa a?’ anzɛɛ ‘Duzu edwɛkɛ a Ɛdɛnkɛma ɛha a?’

³⁶Na edwɛkɛ agbɔkɛ, ‘Ɛdɛnkɛma adesoa’ ne ɛdeɛ, bɛmmabɔ zolɛ bieko, ɔluakɛ adesoa ne a le bɛdabɛ bɛ nloa edwɛkɛ. Bɛmɛ, bɛsi tease Nyamenle ne mɔɔ le Tumivolɛ Ɛdɛnkɛma, yɛ Nyamenle ne la anloa edwɛkɛ ne ati aze.

³⁷Mɔɔ ɔwɔ kɛ bɛbiza Nyamenle kpɔmanvolɛ ne la a le kɛ, ‘Duzu mualɛ a Ɛdɛnkɛma ɛva ɛmaa a?’ anzɛɛ ‘Duzu edwɛkɛ a Ɛdɛnkɛma ɛha a?’

³⁸Na saa bɛka kɛ, ‘Ɛdɛnkɛma adesoa ne’, wɔ mekɛ mɔɔ meze bɛ kɛ bɛmmaka kɛ, ‘Ɛdɛnkɛma adesoa’ la a,

³⁹mebavuandi bɛ meagua meavi me nye zo. Mebazɛkye bɛ nee suakpole ne mɔɔ menvale memanle bɛ nee bɛ ze mɔ la.

⁴⁰Mebamaa bɛ nyunlu agua aze, bɛabɔ anyiemgba mɔɔ bɛ rɛle ɛnrɛvi ye kenle bie ɛlɛ a.”