Read Nzema Gyɛ 24 Bible Online

Gyɛ 24 - Nzema bible

Gyɛ 24

¹ Mɔɔ Babelonia Belemgbunli Nɛbukadenɛza hyele Gyɛhɔyakem ara nrenya Gyɛhɔyakɛn,[8] Dwuda belemgbunli ne, maanle mgbanyinli, yɛɛ dwinvolɛma vile Gyɛlusalɛm hɔle nlɔnu wɔ Babelonia la, Ɛdɛnkɛma yele ɛnyelɛzodeɛnwunlɛ ɛhye hilele me. Menwunle kɛ feege ahɛndɛne nwiɔ gyigyi Ɛdɛnkɛma Ɛzonlenlɛ Sua ne anyunlu ɛkɛ.

²Kɛndɛne ko anu feege ne mɔ le kpalɛ, eza bɛbolo ngɛnlɛma, na kɛndɛne ko ne mɔɔ ɛha la anu feege ɛdeɛ ne ɛnle kpalɛ fee, bɛdi a ɔnyɛ boɛ.

³Ɛdɛnkɛma bizale me kɛ, “Gyɛlɛmaya, duzu a ɛnwu ye la?” Membuale kɛ, “Feege ɔ; bie mɔ le kpalɛ, yɛɛ bie mɔ ɛnle kpalɛ fee mɔɔ bɛdi a.”

⁴Akee Ɛdɛnkɛma dendɛle hilele me. Ɔse,

⁵“Mebava Dwudama mɔɔ memaa bɛhye bɛ bɛhɔ nlɔnu wɔ Babelonia la meado feege kpalɛ ne mɔ anwo. Medame Ɛdɛnkɛma, Yizilayɛ Nyamenle a mese a.

⁶Mebanwu bɛ anwunvɔne, meava bɛ meazia meara azɛlɛ ɛhye azo. Mebazɔ bɛ meamaa bɛagyinla, menrɛmaa bɛnrɛgolo bɛnrɛgua; mebalua bɛ, menrɛdudu bɛ menrɛgua.

⁷Mebamaa bɛ ahonle meamaa bɛanwu kɛ medame a mele Ɛdɛnkɛma a; bɛbayɛ me menli na meayɛ bɛ Nyamenle, ɔluakɛ bɛbava bɛ ahonle kɔsɔɔti bɛazia bɛara me ɛkɛ.”

⁸Ɛdɛnkɛma se, “Kɛmɔ feege ɛhendeɛ ne mɔ le mgbane mgbane mɔɔ bɛdi a ɔnyɛ boɛ la, zɔhane ala a mebayɛ Dwuda Belemgbunli Zɛdikaya, ye mgbanyima nee Gyɛlusalɛmma mɔɔ ɛha azɛlɛ ɛhye azo, yɛɛ bɛdabɛ mɔɔ bɛde Yigyibiti azɛlɛ zo la a.

⁹Mebazɛkye bɛ meamaa yeayɛ maanle maanle amuala ɛzulolɛ. Menli bazi bɛ amgbu, agolo bɛ nwo, agua bɛ nyunlu aze, ava bɛ duma apɛ ɛfenle wɔ ɛleka biala mɔɔ menwɔmaa bɛkɛhɔgua bɛ la.

¹⁰Mebava konle, ɛhɔne, yɛɛ ewule meazi bɛ zo toonwo meamaa bɛ bo zo abɔ tɔɔ wɔ azɛlɛ ne mɔɔ menvale memanle bɛ nee bɛ ze mɔ la azo.”