Read Nzema Gyɛ 25 Bible Online

Gyɛ 25 - Nzema bible

Gyɛ 25

¹ Dwuda Belemgbunli Gyɛhɔyakem, Dwosaya ara nrenya ne dɛnlanle ebia zo la, ye ɛvolɛ nna ne anu, Ɛdɛnkɛma dendɛle hilele Gyɛlɛmaya wɔ Dwudama amuala anwo. Mekɛ ne anu ɛnee Babelonia Belemgbunli Nɛbukadenɛza ɛli ɛvolɛ ko wɔ ebia zo.

²Ɔhanle ɔhilele Gyɛlusalɛmma nee Dwudama amuala kɛ,

³“Ye ɛvolɛ abulanwiɔ nee nsa ɛne, ɔvi mekɛ mɔɔ bɛvale Emɔn ara nrenya Dwosaya bɛziele belemgbunli wɔ Dwuda la, ye ɛvolɛ bulu nee nsa ne azo, yɛɛ Ɛdɛnkɛma dendɛle hilele me a, na meha mehile bɛ toonwo a yeradwu ɛnɛ a, noko bɛandie.

⁴Ɛdɛnkɛma soa ye kpɔmanvolɛma la ɛnee ɔsoa bɛ, noko bɛangyea bɛ nzo kɛ bɛtie.

⁵Nyamenle kpɔmanvolɛma ne ka kile bɛ kɛ: Awie biala ɛgyakyi amumuyɛ nee ɛtane ɛyɛlɛ na ɔdɛnla azɛlɛ ne mɔɔ Ɛdɛnkɛma ɛva ɛmaa bɛ nee bɛ ze mɔ dɛbadɛba kɛ ɔle bɛ ɛdeɛ la azo dahuu.

⁶Bɛmmadi nyamenle gyɛne gyɛne nzi, bɛyeyɛ bɛ, bɛsonle bɛ, yɛɛ bɛmmafa bɛ sa anloa adwinli bɛka me ɛya. Na saa bɛanyɛ ɛhye mɔ a, mebamaa bɛ nwo adɔ bɛ.

⁷Noko bɛmɛ, bɛandie me ne; bɛva bɛ sa anloa adwinli bɛha me ɛya bɛmaa ngyegyelɛ ɛdo bɛ.

⁸“Yemɔti, medame Tumivolɛ Ɛdɛnkɛma, mese: Kɛmɔ bɛandie me ne la,

⁹bɛnlea, meto me sa meavɛlɛ sɔlɔ mbusua ekpunli ne mɔ amuala nee me sonvolɛ Babelonia Belemgbunli Nɛbukadenɛza, meamaa bɛ nee azɛlɛ ɛhye azo amra nee maanle maanle mɔɔ zuozua ye la amuala anu amra araho. Mebazɛkye maanle ɛhye nee maanle maanle mɔɔ zuozua ye la bɔkɔɔ mɔɔ awie dwu nu a ɔbɔ mgbatike, na meagua bɛ nyunlu aze mɔɔ ɛnlɛ awieleɛ a.

¹⁰ Eza mebamaa bɛ fɛlɛkolilɛ nee bɛ anyelielɛ abɔ bɛ, bɛnrɛlie atɔfolɛ bieko; bɛnrɛzɔ kɛnlaneɛ, yɛɛ bɛnrɛde ɛdibolɛ ne.

¹¹ Azɛlɛ ɛhye kɔsɔɔti bazɛkye ayɛ mgbane, na maanle maanle ɛhye mɔ azonle Babelonia belemgbunli ne ɛvolɛ abulasuu.

¹²Ɛvolɛ abulasuu ne anzi, mebadea Babeloniama nee bɛ belemgbunli ne wɔ bɛ ɛtane ti; Babelonia maanle ne bayɛ maanle mgbane mɔɔ ɛnrɛdwazo bieko ɛlɛ a, medame Ɛdɛnkɛma a mese a.

¹³Munzule edwɛkɛ biala mɔɔ melua me kpɔmanvolɛ Gyɛlɛmaya anwo zo meha, mɔɔ fane maanle maanle ɛhye mɔ anwo, na bɛhɛlɛ bɛ wɔ buluku ɛhye anu la bado bɛ.

¹⁴Mebadua Babelonia kakɛ wɔ bɛ nyɛleɛ nee bɛ sa anloa gyima ti; bɛbayɛ ngɛkɛlɛ bɛamaa maanle maanle dɔɔnwo nee arelemgbunli mgbole.”

¹⁵Akee Ɛdɛnkɛma, Yizilayɛ Nyamenle ne zele me kɛ, “Gyɛlɛmaya, die nwanye dwora ɛhye, mɔɔ me ɛya ɛyi ye tɛkɛɛ la kɔmaa maanle maanle kɔsɔɔti mɔɔ menwɔzoa wɔ bɛ nwo ɛkɛ la ɛnlo.

¹⁶Bɛbanlo bɛabo, bɛayɛ tindaanwu ɔlua konle mɔɔ melɛmaa yearado bɛ la ati.”

¹⁷Yemɔti menliele dwora ne wɔ Ɛdɛnkɛma asa anu menvale mengɔmanle maanle maanle mɔɔ Ɛdɛnkɛma zoanle me bɛ nwo ɛkɛ ne la na memanle bɛnlonle Ɛdɛnkɛma ɛya ne.

¹⁸Gyɛlusalɛm nee Dwuda azuamgbole, bɛ arelemgbunli nee bɛ mgbanyima nlonle, amaa menli ne ayɛ mgbane, na azuamgbole ne mɔ ayɛ azuadu mɔɔ menli finde zolɛ a bɛbɔ mgbatike na bɛava bɛ duma bɛawa amonle, kɛmɔ ɛnɛ nee ɛnɛ ala ɔde la.

¹⁹Menli noko mɔɔ ɔwɔ kɛ no dwora ne anu bie la ɛne: Yigyibiti belemgbunli ne nee ye mbɔlɔba nee ye mgbanyima; Yigyibitima amuala nee nyɛvolɛ mɔɔ de Yigyibiti la amuala. Ɛɛze arelemgbunli kɔsɔɔti; arelemgbunli mɔɔ wɔ Filisitia azuamgbole Ahyekɛlɔn, Gaza, Ɛkelɔn azo la amuala, yɛɛ Ahyedɔdoma mɔɔ hale la. Yidɔmma, Mowabema, yɛɛ Amɔnoma amuala; arelemgbunli mɔɔ wɔ Taya nee Saedɛn la amuala; arelemgbunli mɔɔ wɔ Mɛdetɛlenia nyevile ne anloa la amuala, azuamgbole Didan, Tima, yɛɛ Bɛɛze. Menli ne mɔɔ pepɛ bɛ ti enrinli maa ɔka aze la amuala; arelemgbunli mɔɔ wɔ Areleebea la amuala; arelemgbunli mɔɔ sie mbusua ekpunli ekpunli mɔɔ wɔ ɛsɛlɛ ne azo la amuala; arelemgbunli mɔɔ wɔ Zemelae, Yilam, yɛɛ Midea la amuala; arelemgbunli mɔɔ wɔ sɔlɔ, bɛdabɛ mɔɔ bɛbikye nee bɛdabɛ mɔɔ bɛwɔ moa la amuala nlonle ye bɛ ti bɛ ti; yɛɛ arelemgbunli mɔɔ wɔ ewiade la amuala nlonle bie. Bɛno bɛwie a akee Babelonia belemgbunli ne ɔdaye ɔbanlo bie.

²⁷Akee Ɛdɛnkɛma zele me kɛ, “Ka kile menli ne kɛ, medame Tumivolɛ Ɛdɛnkɛma, Yizilayɛ Nyamenle ne, mese: Bɛnlo, bɛbo na bɛfefe bɛ nwo toonwo bɛdu bɛgua mɔɔ bɛndwazo bieko a, ɔboalekɛ melɛmaa konle arado bɛ.

²⁸“Saa bɛkpo kɛ bɛnrɛlie dwora ne bɛnrɛnlo me ɛya ne a, se bɛ kɛ: Tumivolɛ Ɛdɛnkɛma se, ‘Ɔwɔ kɛ bɛno!

²⁹Ɔluakɛ bɛnlea, mebɔ ɔ bo wɔ suakpole ne mɔɔ me duma la zolɛ la azo melɛsɛkye ninyɛne. Bɛdwenle kɛ bɛmɛ bɛbava bɛ nwo dwɔɔ ɔ? Kyɛkyɛ, mebadea bɛ, ɔluakɛ memaa konle adɔ ewiade amra amuala avinli. Medame Tumivolɛ Ɛdɛnkɛma a mese a.’

³⁰“Gyɛlɛmaya, ka nrɛlaleɛ ɛhye kɔsɔɔti tia menli ne kɛ: Medame Ɛdɛnkɛma, mebadea nu wɔ anwuma, mebadendɛ meavi me ɛleka nwuanzanwuanza ne; mebadea me menli ne nu kpole kpalɛ, kɛ sonla mɔɔ twihwi vanye ma nu nzule la meatia aleɛabo amra kɔsɔɔti.

³¹Me ne badwu ewiade ɛleka biala. Medame Ɛdɛnkɛma, melɛ edwɛkɛ metia ewiade amra kɔsɔɔti. Mebabua awie biala ndɛne, na meahu amumuyɛma. Medame Ɛdɛnkɛma a mese a.”

³²Tumivolɛ Ɛdɛnkɛma se munzule ɛlɛkpɔsa vi maanle zo ahɔ maanle zo. Ahumu ɛsesebɛ bie ɛlɛtu vi azɛlɛ ye ati moa moa ara.

³³Kenle zɔhane menli mɔɔ Ɛdɛnkɛma ɛhu bɛ la avunli bagua ye yɛlɛdɛdɛ, ɔvi maanle ti yeahɔdwu maanle bo. Bɛnrɛzu bɛ, bɛnrɛboɔboa bɛ nloa, yɛɛ bɛnrɛzie bɛ. Bɛbagua ye kɛ nyɛmoa ebinli wɔ azɛlɛ ye azo.

³⁴Bɛmɛ mboaneneavolɛma, bɛzu bɛye awolɛ. Bɛmɛ menli ne mgbanyima, bɛzu bɛva nzonle bɛbɔ bɛ nwo, ɔluakɛ bɛ ɛhunlɛ nee bɛ ɛzɛkyelɛ mekɛ ɛdwu; yemɔti bɛbahu bɛ kɛ mboane mɔɔ ɛlɔ la.

³⁵Mboaneneavolɛma ne ɛnrɛnyia ɛvealeka; menli ne mgbanyima ne mɔ ɛnrɛvi ɛsalɛ.

³⁶Bɛdie, mboaneneavolɛma ne mɔ ɛlɛsu; menli ne mgbanyima ne mɔ ɛlɛsu aye awolɛ! Ɔluakɛ Ɛdɛnkɛma ɛva ɛya ɛzɛkye bɛ maanle ne,

³⁷yezɛkye anzonudwolɛ menli ne bɔkɔɔ, ɔboalekɛ Ɛdɛnkɛma ɛva ɛya kpole.

³⁸Ɔlua nzisima konle konle ne mɔ ati Ɛdɛnkɛma bava ɛya kpole avinde kɛ awenade vi kpɔkɛ bo finde la yearabɔ bɛ maanle ne, na bɛ azɛlɛ ne adɔ mgbane.