Read Nzema Gyɛ 26 Bible Online

Gyɛ 26 - Nzema bible

Gyɛ 26

¹ Mekɛ mɔɔ Dwuda Belemgbunli Dwosaya ara Gyɛhɔyakem bɔle ye belemgbunli ɛlilɛ bo la,

²Ɛdɛnkɛma dendɛle hilele me. Ɔse; “Kɔgyinla Ɛdɛnkɛma Ɛzonlenlɛ Sua ne alie ne anwo, na ka nrɛlaleɛ ɛhye mɔɔ meva memaa wɔ la amuala kile menli mɔɔ vi Dwuda azuamgbole ne mɔ azo basonle Ɛdɛnkɛma la amuala; mmagyakyi kpɔkɛ ko bɔbɔ.

³Wɔannea a ɔkɛyɛ kɛ menli ne badie na awie biala ahwe ɔ nwo avi ye ɛtane nwo. Saa bɛyɛ ɛhye a mebagyakyi ɛzɛkyelɛ mɔɔ bɛ ɛtane ne mɔ ati mevua kɛ mesɛkye bɛ la.

⁴“Ka kile bɛ kɛ, ‘Ɛdɛnkɛma se: Saa bɛnrɛdie me ne, bɛnrɛli me mɛla mɔɔ meva memaa bɛ la azo,

⁵na bɛnrɛdie mɔɔ me sonvolɛma, Nyamenle kpɔmanvolɛma mɔɔ mezoa bɛ ndɛndɛ la ɛlɛka ahile bɛ la a,

⁶ mebayɛ Ɛzonlenlɛ Sua ɛhye kɛ mɔɔ menyɛle Hyaelo la, na meayɛ suakpole ɛhye mgbane meamaa maanle maanle kɔsɔɔti ahyi ye.’ ”

⁷Sɛlɛvolɛma nee Nyamenle kpɔmanvolɛma nee menli ne amuala dele kɛ Gyɛlɛmaya ɛlɛka edwɛkɛ ɛhye mɔ wɔ Ɛdɛnkɛma Ɛzonlenlɛ Sua ne anu.

⁸Na mɔɔ Gyɛlɛmaya wiele edwɛkɛ mɔɔ Ɛdɛnkɛma kulo kɛ ɔka ɔkile menli ne amuala la ka la, sɛlɛvolɛma, Nyamenle kpɔmanvolɛma, yɛɛ menli ne kɔsɔɔti nwinwinle ye, hyele ye na bɛzele ye kɛ, “Yɛku wɔ!

⁹Duzu ati a wɔva Ɛdɛnkɛma duma wɔha nrɛlaleɛ kɛ Ɛzonlenlɛ Sua ɛhye bayɛ kɛ Hyaelo, na suakpole ɛhye ayɛ suadu, mɔɔ awie fee ɛnrɛdɛnla zolɛ a?” Menli ne kɔsɔɔti bɔle yiale Gyɛlɛmaya wɔ Ɛdɛnkɛma Ɛzonlenlɛ Sua ne anu.

¹⁰Mekɛ mɔɔ Dwuda mgbanyima ne mɔ dele edwɛkɛ ɛhye mɔ la, bɛvi suakunlu bɛrale Ɛdɛnkɛma Ɛzonlenlɛ Sua ne anu na bɛradɛnlanle aze wɔ Anlenkɛ Fofolɛ ne anloa.

¹¹Sɛlɛvolɛma ne nee Nyamenle kpɔmanvolɛma ne mɔ hanle hilele mgbanyima ne nee menli ne mɔ kɔsɔɔti kɛ, “Ɔwɔ kɛ bɛku nrenya ɛhye, ɔboalekɛ yeha Ɛdɛnkɛma nrɛlaleɛ yetia suakpole ɛhye, kɛmɔ bɛdabɛ bɛde ye bɛ nzo nu la.”

¹²Na Gyɛlɛmaya dendɛle zele mgbanyima ne nee menli ne amuala kɛ, “Ɛdɛnkɛma a zoanle me kɛ menga edwɛkɛ biala mɔɔ bɛde kɛ meha wɔ Ɛzonlenlɛ Sua ye nee suakpole ye anwo la mengile bɛ a.

¹³Yemɔti bɛhakyi bɛ ndenle nee bɛ nyɛleɛ ne mɔ, na bɛdie Ɛdɛnkɛma bɛ Nyamenle ne ane, na ɔbava ndeanlɛ biala mɔɔ yeha kɛ ɔfa yeadea bɛ la yeahyɛ bɛ.

¹⁴Na mame, bɛnlea, mewɔ bɛ sa nu. Mɔɔ bɛkulo la, bɛva bɛyɛ me.

¹⁵Na bɛhakye kɛ, saa bɛku me a, ɛnee bɛ nee bɛ menli ne amuala ɛva munzule bɛmaa bie ɛha suakpole ɛhye nee zolɛ menli ne amuala, kɛ bɛha sonla mɔɔ ɛnze nwolɛ bie la mogya bɛgua a. Ɔluakɛ mame, ɔle nɔhalɛ kɛ Ɛdɛnkɛma a zoanle me kɛ membanga edwɛkɛ ɛhye kɔsɔɔti mengile bɛ a.”

¹⁶Mgbanyima ne nee menli ne mɔ amuala hanle hilele sɛlɛvolɛma nee Nyamenle kpɔmanvolɛma ne mɔ kɛ, “Ɔnle kɛ bɛku nrenya ɛhye, ɔboalekɛ yelua Ɛdɛnkɛma yɛ Nyamenle ne duma nu a yedendɛ yehile yɛ a.”

¹⁷Na mgbanyima ne bie mɔ dwazole hanle hilele menli mɔɔ ɛyia la amuala kɛ,

¹⁸ “Wɔ Dwuda Belemgbunli Hɛzikaya mekɛ zo, Nyamenle kpɔmanvolɛ Maeka mɔɔ vi Molɛhyɛte la hanle Nyamenle nrɛlaleɛ hilele menli ne kɔsɔɔti kɛ Tumivolɛ Ɛdɛnkɛma se, ‘Bɛbazo Zayɔn kɛ ɛya la, Gyɛlusalɛm bayɛ kɛ ewula edukue, na boka ne mɔɔ Ɛdɛnkɛma Ɛzonlenlɛ Sua ne gyi zolɛ la bayɛ kpɔkɛmile.’

¹⁹Noko Dwuda Belemgbunli Hɛzikaya nee ye ezuavolɛ ne angye ye angu ye. Mɔɔ Hɛzikaya yɛle la a le kɛ ɔkɛli Ɛdɛnkɛma eni ɔkɛzulo Ɛdɛnkɛma ɔkɛmaa Ɛdɛnkɛma kɛva ɔ nwo edwɛkɛ kɛhyɛ ye. Na Ɛdɛnkɛma nwunle ye anwunvɔne, na ɔvale ɛzɛkyelɛ ne mɔɔ anrɛɛ ɔsɛkye bɛ la ɔhyɛle bɛ. Na yɛmɛ, yɛkpondɛ yɛahwe munzule kpole yɛamaa yɛ nwo.”

²⁰(Sonla ko mɔɔ ɔdaye ɔluale Ɛdɛnkɛma duma nu ɔhanle Nyamenle nrɛlaleɛ la a le Hyɛmaya mɔɔ vi Keleate Gyialem la ara nrenya Yulaya. Ɔhanle Nyamenle nrɛlaleɛ ɔtiale suakpole ɛhye nee maanle ne, kɛmɔ Gyɛlɛmaya ɛha la.

²¹Belemgbunli Gyɛhɔyakem nee ye ɛlɔnema ne mɔ amuala, nee ye mgbanyima ne mɔ dele Yulaya edwɛkɛ ne la, belemgbunli ne nyianle adwenle kɛ ɔmaa bɛahu ye. Yulaya dele nwolɛ bie, ɔzulole, na ɔnriandile ɔhɔle Yigyibiti.

²²Na Belemgbunli Gyɛhɔyakem zoanle Akebɔ ara nrenya Ɛleneetan nee menli bie wɔ Yigyibiti,

²³bɛhɔhyele Yulaya bɛrɛlɛle ye. Belemgbunli Gyɛhɔyakem manle bɛhunle ye na bɛvuandinle ye funli ne bɛdole maanle azie ne azo.)

²⁴Na Hyeefan ara nrenya Ahaekam gyinlanle Gyɛlɛmaya anzi, yemɔti bɛanye ye bɛammaa menli ne kɛ bɛhu ye.