Read Nzema Gyɛ 27 Bible Online

Gyɛ 27 - Nzema bible

Gyɛ 27

¹Mɔɔ Dwosaya ara nrenya Zɛdikaya bɔle ebialilɛ bo wɔ Dwuda la, Ɛdɛnkɛma hanle nrɛlaleɛ ɛhye hilele Gyɛlɛmaya.

²Ɔse, “Fa nwoma ndenrɛndenra nee mbaka yɛ gyɛnvayile gyela ɛ kɔme.

³Na dua soanvolɛma mɔɔ ɛra Dwuda Belemgbunli Zɛdikaya anwo ɛkɛ ne la anwo zo fa nrɛlaleɛ kɔmaa Yidɔm, Mowabe, Amɔn, Taya, yɛɛ Saedɛn arelemgbunli ne mɔ kɛ,

⁴medame Tumivolɛ Ɛdɛnkɛma, Yizilayɛ Nyamenle ne, mese: Bɛze bɛ menle mɔ kɛ

⁵medame me tumi nee me anwosesebɛ zo a melua mebɔ ewiade ye nee menli nee nane mɔɔ wɔ nu la a, na mefa memaa awie biala mɔɔ mekulo la.

⁶Meva me azɛlɛ ɛhye amuala memaa me sonvolɛ Nɛbukadenɛza, Babelonia belemgbunli ne, yɛɛ meva nane kɔsɔɔti memaa ye kɛ bɛzonle ye.

⁷Maanle maanle kɔsɔɔti bazonle ye, bɛazonle ɔ ra, yɛɛ ye anlɔnra, kɔkpula mekɛ mɔɔ ɔdaye ye maanle ne kɛbɔ la. Mekɛ ne, maanle maanle nee arelemgbunli mgbole bava ye ayɛ bɛ akɛlɛ.

⁸“Maanle anzɛɛ belemgbunli biala mɔɔ anzonle Babelonia Belemgbunli Nɛbukadenɛza ɛhye, anva ye gyɛnvayile ne ando ɔ kɔme zo la, mebalua Nɛbukadenɛza anwo zo meava konle, ɛhɔne yɛɛ ewulenzane meadea ye toonwo meabɔ ɔ bo zo.

⁹Yemɔti bɛmmatie bɛ Nyamenle kpɔmanvolɛma, bɛ menli mɔɔ tendɛ nwomenle nloa azo, bɛ menli mɔɔ ka ɛlalɛ, bɛ menli mɔɔ bɔ munzule anzɛɛ bɛ menli mɔɔ bɔ bayivolɛ ɛbɛla mɔɔ ɛlɛka ahile bɛ kɛ, ‘Bɛmmasonle Babelonia belemgbunli ne’ la.

¹⁰Ɔluakɛ adalɛ Nyamenle nrɛlaleɛ a bɛlɛka bɛahile bɛ la, na ye awieleɛ, mebadu bɛ na meavoa bɛ meavi bɛ azɛlɛ ye azo, na meabɔ bɛ bo zo.

¹¹Na maanle biala mɔɔ kɛva Babelonia belemgbunli gyɛnvayile ne kɛdo ɔ kɔme zo, na ɔkɛzonle ye la, mebamaa yeadɛnla ye azɛlɛ ne azo yeadidi zolɛ. Medame Ɛdɛnkɛma a mese a.”

¹²Menganle edwɛkɛ ko ne ala mengilele Dwuda Belemgbunli Zɛdikaya kɛ, “Ɛdɛnkɛma se bɛva Babelonia belemgbunli ne gyɛnvayile ne bɛdo bɛ kɔme zo, na bɛzonle ye nee ye menli ne na bɛnyia ngoane.

¹³Duzu ati a ɛtɛnla ɛkɛ ne wɔamaa konle, ɛhɔne, yɛɛ ewulenzane azɛkye wɔ nee wɔ menli ne, kɛmɔ Ɛdɛnkɛma ɛha mɔɔ fane maanle mɔɔ anzonle Babelonia belemgbunli ne la anwo la ɛ?

¹⁴Bɛmmatie Nyamenle kpɔmanvolɛma edwɛkɛ mɔɔ bɛlɛka bɛahile bɛ kɛ, ‘Bɛmmasonle Babelonia belemgbunli ne’ la, ɔluakɛ ɔle adalɛ Nyamenle nrɛlaleɛ.

¹⁵Medame Ɛdɛnkɛma, metɛsoanle bɛ, noko bɛlɛfa me duma bɛaha Nyamenle nrɛlaleɛ, yemɔti mebavoa bɛ nee Nyamenle kpɔmanvolɛma mɔɔ ɛlɛbɔ adalɛ ahile bɛ la amuala na meabɔ bɛ bo zo.”

¹⁶Akee menganle mengilele sɛlɛvolɛma nee menli ne amuala kɛ, “Ɛdɛnkɛma se: Bɛmmatie mɔɔ bɛ Nyamenle kpɔmanvolɛma ɛlɛka kɛ ɔnrɛhyɛ biala bɛbava Ɛzonlenlɛ Sua ne anu ɛzonlenlɛ ninyɛne ne mɔ bɛvi Babelonia bɛazia bɛara la, ɔluakɛ ɔle adalɛ bɛlɛbɔ bɛahile bɛ.

¹⁷Bɛmmatie bɛ; bɛzonle Babelonia belemgbunli ne na bɛnyia ngoane. Duzu ati a ɔwɔ kɛ suakpole ɛhye bɔ a?

¹⁸Saa amgba bɛle Nyamenle kpɔmanvolɛma, na bɛ sa ka Nyamenle nrɛlaleɛ a, ɛnee bɛzɛlɛ bɛbiza medame, Tumivolɛ Ɛdɛnkɛma kɛ memmamaa bɛfa ɛzonlenlɛ ninyɛne ne mɔ mɔɔ ɛha Ɛdɛnkɛma Ɛzonlenlɛ Sua ne anu nee ninyɛne mɔɔ wɔ Dwuda belemgbunli suakunlu ɛkɛ ne, yɛɛ mɔɔ wɔ Gyɛlusalɛm la bɛkɔ Babelonia.”

¹⁹(Mekɛ mɔɔ Belemgbunli Nɛbukadenɛza vale Dwuda mgbanyima hɔle Babelonia la, ɔgyakyile kɔbele mpila ne mɔ, kɔbele angola ne, ehwili ne mɔ, yɛɛ Ɛzonlenlɛ Sua ne anu ninyɛne ne bie mɔ ɛkɛ.)

²¹“Bɛdie mɔɔ medame, Tumivolɛ Ɛdɛnkɛma, Yizilayɛ Nyamenle ne, melɛka ye wɔ ɛzonlenlɛ ninyɛne mɔɔ bɛgyakyile bɛ wɔ Ɛzonlenlɛ Sua ne anu nee belemgbunli suakunlu ɛkɛ ne nee mɔɔ wɔ Gyɛlusalɛm la anwo la ɛne.

²²Bɛbazoa bɛ kɔsɔɔti bɛahɔ Babelonia, na bɛbaha lɔ kɔkpula mekɛ mɔɔ mekpondɛ la kolaa na meamaa bɛava bɛ bɛazia bɛara ɛke. Medame Ɛdɛnkɛma a mese a.”