Read Nzema Gyɛ 28 Bible Online

Gyɛ 28 - Nzema bible

Gyɛ 28

¹ Mɔɔ Dwuda Belemgbunli Zɛdikaya bɔle ɔ bo kɛ ɔdi ebia la, ye ɛvolɛ nna ne ala anu, siane nnu ne anu, Azɛ ara nrenya Hananaya mɔɔ le Nyamenle Kpɔmanvolɛ mɔɔ vi Gebɛyɔn la hanle edwɛkɛ ɛhye hilele Gyɛlɛmaya wɔ Ɛdɛnkɛma Ɛzonlenlɛ Sua ne anu. Ɔhanle ɔhilele Gyɛlɛmaya wɔ sɛlɛvolɛma nee menli ne kɔsɔɔti anyunlu ɛkɛ ne kɛ,

²“Medame Tumivolɛ Ɛdɛnkɛma, Yizilayɛ Nyamenle ne, mebubu Babelonia belemgbunli ne gyɛnvayile ne anu.

³Ɔkadwu ɛvolɛ nwiɔ la ɛnee meva ɛzonlenlɛ ninyɛne ne mɔ mɔɔ Babelonia Belemgbunli Nɛbukadenɛza vale vi ɛke hɔle Babelonia la mezia mera Ɛzonlenlɛ Sua ɛhye anu wɔ Gyɛlusalɛm ɛke.

⁴Eza mebava Gyɛhɔyakem ara nrenya Gyɛhɔyakɛn, Dwuda belemgbunli ne, nee menli mɔɔ bɛhyele bɛ Dwuda bɛhɔle nlɔnu wɔ Babelonia la amuala meazia meara, ɔluakɛ mebabubu Babelonia belemgbunli ne gyɛnvayile ne. Medame Ɛdɛnkɛma a mese a.”

⁵Akee Nyamenle Kpɔmanvolɛ Gyɛlɛmaya hanle hilele Nyamenle Kpɔmanvolɛ Hananaya wɔ sɛlɛvolɛma nee menli mɔɔ wɔ Ɛdɛnkɛma Ɛzonlenlɛ Sua ne anu la kɔsɔɔti kɛ,

⁶“Amen! Ɛdɛnkɛma ɛmaa ɔyɛ zɔhane. Ɛdɛnkɛma ɛmaa edwɛkɛ ne mɔɔ wɔha la ɛyɛ zɔhane, na ɔva ɛzonlenlɛ ninyɛne ne mɔ nee menli mɔɔ bɛhyele bɛ bɛhɔle nlɔnu la kɔsɔɔti ɔrɛla.

⁷Noko tie edwɛkɛ ɛhye mɔɔ melɛka meahile wɔ nee menli ne kɔsɔɔti la.

⁸Ɔvi tete, Nyamenle kpɔmanvolɛma mɔɔ lumua ɛdawɔ nee medame yɛ nyunlu la hanle Nyamenle nrɛlaleɛ mɔɔ fane konle, ɛhɔne, yɛɛ ewulenzane nwo la tiale maanle maanle dɔɔnwo nee arelemgbunli mgbole.

⁹Nyamenle kpɔmanvolɛ mɔɔ ka anzonudwolɛ nwo nrɛlaleɛ la, saa ye edwɛkɛ ne yɛ zɔhane a, menli ne balie ado nu kɛ amgba Ɛdɛnkɛma a ɛzoa ye a.”

¹⁰Akee Nyamenle Kpɔmanvolɛ Hananaya yele gyɛnvayile ne wɔ Nyamenle Kpɔmanvolɛ Gyɛlɛmaya akɔme, na ɔbubule nuhua.

¹¹Na Hananaya dendɛle wɔ menli ne amuala anyunlu ɛkɛ zele kɛ, “Ɛdɛnkɛma se: Ɛvolɛ nwiɔ mekɛ nu, kɛ mebazi meabubu Babelonia Belemgbunli Nɛbukadenɛza gyɛnvayile ne mɔɔ gua maanle maanle kɔsɔɔti akɔme la ɛne.” Na Nyamenle Kpɔmanvolɛ Gyɛlɛmaya hɔle ye ɛleka bie.

¹²Mɔɔ Nyamenle Kpɔmanvolɛ Hananaya bubule gyɛnvayile ne mɔɔ la Nyamenle Kpɔmanvolɛ Gyɛlɛmaya akɔme la, nzinlii Ɛdɛnkɛma dendɛle hilele Gyɛlɛmaya kɛ, “Kɔ kɔha kile Hananaya kɛ:

¹³‘Ɛdɛnkɛma se: Wɔbubu mbaka gyɛnvayile nu, na mebayɛ mbulalɛ gyɛnvayile meazie bɛ bo zo.

¹⁴Ɔluakɛ medame Tumivolɛ Ɛdɛnkɛma, Yizilayɛ Nyamenle ne, mese: Meva akɛlɛzonlenlɛ mbulalɛ gyɛnvayile megua maanle maanle ɛhye mɔ kɔsɔɔti akɔme kɛ bɛzonle Babelonia Belemgbunli Nɛbukadenɛza, yɛɛ bɛbazonle ye noko, ɔluakɛ meva ɛbɔ nu nanemgbole kɔsɔɔti bɔbɔ memaa ye kɛ bɛzonle ye.’ ”

¹⁵Na Gyɛlɛmaya zele Nyamenle Kpɔmanvolɛ Hananaya kɛ, “Hananaya, tie, Ɛdɛnkɛma ɛtɛsoanle wɔ, yɛɛ wɔbɔ adalɛ wɔhile menli ɛhye mɔ wɔmaa bɛlie bɛli.

¹⁶Yemɔti Ɛdɛnkɛma se, ‘Nea, mebaye wɔ meavi azɛlɛ ye azo. Ɛvolɛ ɛhye anu ala, ɛbawu, ɔboalekɛ wɔbɔ adalɛ wɔmaa menli ne ɛde Ɛdɛnkɛma anwo atua.’ ”

¹⁷Na ɛvolɛ ko ne ala anu, ye siane nsuu ne anu, Nyamenle Kpɔmanvolɛ Hananaya wule.