Read Nzema Gyɛ 29 Bible Online

Gyɛ 29 - Nzema bible

Gyɛ 29

¹ Nyamenle Kpɔmanvolɛ Gyɛlɛmaya hɛlɛle kɛlata wɔ Gyɛlusalɛm hɔmanle sɛlɛvolɛma, Nyamenle kpɔmanvolɛma, maanle mgbanyima, yɛɛ menli mɔɔ boka bɛ a Nɛbukadenɛza hyele bɛ vi Gyɛlusalɛm hɔle nlɔnu wɔ Babelonia la.

²Mekɛ mɔɔ ɛnee bɛhye Belemgbunli Gyɛhɔyakɛn, belemgbunli ne ɔ nli, suakunlu ɛkɛ ne mbɔlɔba mgbanyinli, Dwuda nee Gyɛlusalɛm maanle mgbanyima, dwinvolɛma nee mbulalɛ nee ezukoa dwinvolɛma wɔ Gyɛlusalɛm bɛhɔ nlɔnu la yɛɛ Gyɛlɛmaya hɛlɛle kɛlata ne a.

³Hyeefan ara nrenya Ɛleesa nee Helekaya ara nrenya Gɛmalaya a vale kɛlata ne hɔle a. Ɛnee Dwuda Belemgbunli Zɛdikaya ɛzoa bɛ Belemgbunli Nɛbukadenɛza anwo ɛkɛ wɔ Babelonia. Kɛlata ne se:

⁴“Tumivolɛ Ɛdɛnkɛma, Yizilayɛ Nyamenle ne ɛlɛse menli mɔɔ ɔmanle bɛhyele bɛ Gyɛlusalɛm bɛhɔle nlɔnu wɔ Babelonia la kɛ

⁵bɛsisi azua bɛdɛnla nu, bɛyɛ tola na bɛli nuhua bɛyɔba ne mɔ.

⁶Bɛgya mraalɛ na bɛwo mralɛ mraalɛ nee mrenya. Bɛgya mraalɛ bɛmaa bɛ mra mrenya, na bɛva bɛ mra mraalɛ bɛmaa agyalɛ. Bɛyɛ ɛhye bɛwo mralɛ mrenya nee mralɛ mraalɛ na bɛ nwo azo na bɛ nwo anga ekyi.

⁷Bɛkpondɛ suakpole ne mɔɔ memaa bɛhɔ zolɛ nlɔnu la boɛyɛlɛ na bɛzɛlɛ Ɛdɛnkɛma moalɛ bɛmaa ye, amaa bɛdabɛ noko kpalɛ adoa bɛ.

⁸Tumivolɛ Ɛdɛnkɛma, Yizilayɛ Nyamenle ne se: Bɛmmamaa bɛ Nyamenle kpɔmanvolɛma nee bɛ menli mɔɔ tendɛ nwomenle nloa azo mɔɔ wɔ bɛ avinli la bɛlɛbɛla bɛ, yɛɛ bɛmmatie bɛ ɛlalɛ mɔɔ bɛka la;

⁹bɛlɛbɔ me duma bɛaha adalɛ Nyamenle nrɛlaleɛ bɛahile bɛ, metɛsoanle bɛ. Medame Ɛdɛnkɛma a mese a.”

¹⁰ Ɛdɛnkɛma se: “Saa bɛdi ɛvolɛ abulasuu wɔ Babelonia a, mebarakpɔla bɛ, mebali me ɛwɔkɛ zo na meava bɛ meazia meara bɛ maanle nu,

¹¹ɔluakɛ medame a meze adwenle mɔɔ meva ye bɛ nwo a. Ɔnle adwenle ɛtane, ɔle adwenle kpalɛ mɔɔ bamaa bɛakpazi, bɛ tɛnlabelɛ nu ayɛ boɛ na bɛanyia anyelazo.

¹²Akee bɛbazonle me, na bɛara ɛke bɛarayɛ nzɛlɛlɛ, na mebadie bɛ.

¹³ Bɛbakpondɛ me, na bɛbanwu me. Saa bɛfa bɛ ahonle muala bɛkpondɛ me a, bɛbanwu me.

¹⁴Mebaye bɛ meavi maanle maanle ne mɔ azo ɛleka biala mɔɔ bɛwɔ, yɛɛ ɛleka biala mɔɔ memkpondenle bɛ la meara Gyɛlusalɛm, na meava bɛ debie biala meazia meamaa bɛ. Medame Ɛdɛnkɛma a mese a.

¹⁵“Bɛdabɛ bɛha kɛ, ‘Ɛdɛnkɛma ɛmaa yɛ Nyamenle kpɔmanvolɛma wɔ Babelonia.’

¹⁶Bɛdie mɔɔ medame Ɛdɛnkɛma melɛka ye wɔ belemgbunli ne mɔɔ de Devidi belemgbunli ebia ne azo, nee suakpole ye azo amra amuala mɔɔ le bɛ nwo amra mɔɔ bɛangye bɛ bɛangɔ nlɔnu ne bie la anwo la.

¹⁷Medame Tumivolɛ Ɛdɛnkɛma mese: Bɛnlea, mefa konle, ɛhɔne, yɛɛ ewulenzane meado bɛ nwo. Mebamaa bɛayɛ kɛ feege ma mɔɔ ɛkpɔlɔ mɔɔ bɛdi a ɔnyɛ boɛ la.

¹⁸Mebava konle, ɛhɔne, yɛɛ ewulenzane meazi bɛ zo toonwo mɔɔ ewiade maanle maanle kɔsɔɔti nwu bɛ a ɛzulolɛ ka bɛ maa bɛ nwo wozo a. Bɛ nwo edwɛkɛ bayɛ amowa wɔ menli nloa, bɛ nwo baha ɛzulolɛ, menli bazi bɛ amgbu na bɛahwi bɛ nyunlu wɔ maanle biala mɔɔ menwɔvoa bɛ menwɔhɔgua nu la anu.

¹⁹Ɔboalekɛ bɛandie me kɔkɔbɔlɛ ne mɔɔ memanle me sonvolɛma, Nyamenle kpɔmanvolɛma bɔle bɛ dahudahu la. Medame Ɛdɛnkɛma a mese a.

²⁰Bɛdabɛ mɔɔ memanle bɛvi Gyɛlusalɛm bɛhɔle nlɔnu wɔ Babelonia la, bɛ kɔsɔɔti bɛdie mɔɔ medame Ɛdɛnkɛma melɛka meahile bɛ la.

²¹“Medame Tumivolɛ Ɛdɛnkɛma, Yizilayɛ Nyamenle ne, meha ɛhye noko wɔ Kolaya ara nrenya Ehabe nee Meeyasaya ara nrenya Zɛdikaya mɔɔ ɛlɛfa me duma aha adalɛ Nyamenle nrɛlaleɛ la anwo. Mese, bɛnlea, mebaye bɛ meamaa Babelonia Belemgbunli Nɛbukadenɛza, na ɔbahu bɛ wɔ bɛdabɛ bɛ nye zo.

²²Menli mɔɔ bɛhyele bɛ wɔ Gyɛlusalɛm bɛhɔle nlɔnu wɔ Babelonia la bava awa amonle kɛ, ‘Ɛdɛnkɛma ɛyɛ wɔ kɛ Zɛdikaya nee Ehabe mɔɔ Babelonia belemgbunli dondonle bɛ senle nu la.’

²³Ɔboalekɛ bɛbɔ koasea ɛbɛla wɔ Yizilayɛ. Bɛva bɛ gɔnwo mɔ mraalɛ, yɛɛ bɛva me duma bɛha Nyamenle nrɛlaleɛ bɛbɔ adalɛ wɔ mekɛ mɔɔ meanze bɛ zɔhane la. Medame a meze mɔɔ bɛyɛ la a, yɛɛ medi bɛ nyɛleɛ nwo daselɛ. Medame Ɛdɛnkɛma a mese a.”

²⁴Tumivolɛ Ɛdɛnkɛma, Yizilayɛ Nyamenle ne zele me kɛ, “Ka kile Hyɛmaya mɔɔ vi Nihɛlam la kɛ: Ɛdawɔ Hyɛmaya, wɔva wɔ duma wɔhɛlɛ ngɛlata wɔhɔmaa Gyɛlusalɛmma amuala, Sɛlɛvolɛ Meeyasaya ara nrenya Zɛfanaya yɛɛ sɛlɛvolɛma amuala kɛ,

²⁶‘Ɛdɛnkɛma ɛyɛ wɔ sɛlɛvolɛ kɛ ɛli Sɛlɛvolɛ Gyɛhɔyada agyakɛ anu, na ɛnlea ɛbɔ sɛnvolɛ biala mɔɔ kɛha Nyamenle nrɛlaleɛ wɔ Ɛdɛnkɛma Ɛzonlenlɛ Sua ne anu la kpanwu, na ɛva bulalɛ kɛba ɛgyela ɔ kɔme.

²⁷Na duzu ati a ɛtɛtwile Anatonli Gyɛlɛmaya anyunlu wɔ ye Nyamenle nrɛlaleɛ ne mɔɔ ɔlɛka yeahile bɛ la anwo ɛ?

²⁸Ɔluakɛ yehɛlɛ yɛdayɛ mɔɔ yɛwɔ Babelonia la kɛ yɛbadɛnla nlɔnu yɛahyɛ na yɛsisi azua yɛdɛnla nu, yɛyɛ egyinli, na yɛli nuhua bɛyɔba.’ ”

²⁹Sɛlɛvolɛ Zɛfanaya gengale kɛlata ɛhye hilele Gyɛlɛmaya.

³⁰Akee Ɛdɛnkɛma zele me kɛ,

³¹“Gyɛlɛmaya, soa maa bɛhɔze menli mɔɔ bɛhye bɛ bɛhɔ nlɔnu la kɔsɔɔti kɛ, ‘Edwɛkɛ mɔɔ Ɛdɛnkɛma ɛha ye wɔ Nihɛlamenli Hyɛmaya anwo la ɛne: Kɛmɔ meanzoa Hyɛmaya na yeva me duma yeha adalɛ Nyamenle nrɛlaleɛ yemaa bɛlie bɛli la ati,

³²medame Ɛdɛnkɛma, mebadea Nihɛlamenli Hyɛmaya nee ɔ bo zo amra. Ɔ nwo sonla ɛnrɛdɛnla aze na ɔ nye anwu kɛ mebazi meamaa me menli ne akpazi la, ɔboalekɛ yeha yehile menli ne kɛ bɛde me nwo atua. Medame Ɛdɛnkɛma a mese a.’ ”