Read Nzema Gyɛ 3 Bible Online

Gyɛ 3 - Nzema bible

Gyɛ 3

¹Ɛdɛnkɛma se, “Saa ɛbɔ raalɛ ewole na ɔkɔ na nrenya fofolɛ gya ye a ɔ hu ne ɛngola ɛngya ye bieko. Saa ɔsia ɔgya ye bieko a ɛnee yeva evinli yeha azɛlɛ ne. Yizilayɛma, asoo mɔɔ bɛ nee bɛ kulovolɛma ɛbɔ tuutuu ɛbɛla la, bɛbahola bɛazia bɛara me nwo ɛkɛ ne bieko?

²Bɛnlea awoka ne mɔ azo lɔ! Nienwu yɛɛ bɛ nee bɛ ɛtɛdale a? Bɛdɛnlɛdɛnlanle adehane bɛhendɛle bɛ kulovolɛma, kɛ Arelabenli mɔɔ ɛhɔ nzia wɔ fienemgbole nu la. Bɛbɔ tuutuu ɛbɛla atisesebɛ nu wɔ azɛlɛ ne azo bɛva evinli bɛha ye.

³Yemɔti ezule ne ɛgyakyi ɛdɔlɛ, yɛɛ nyenyensuo ne ɛgyakyi ɛnyenyenlɛ. Bɛ ɛlualɛ nu kile kɛ bɛle tuutuuma, yɛɛ bɛnze nwolɛ nyiane.

⁴“Tɛ bɛmɛ a bɛvɛlɛ me kɛkala kɛ, ‘Egya, sumunli yɛ ngakula nu ɛ gɔnwo a le yɛ.

⁵Asoo ɛbava ɛya dahuu, asoo wɔ ɛya ne ɛnrɛdwo ɛlɛ?’ la. Yizilayɛma edwɛkɛ mɔɔ ɛha la ɛne, noko bɛbɔ munzule ɛbɛla biala mɔɔ bɛkulo la.”

⁶ Wɔ Belemgbunli Dwosaya mekɛ zo, Ɛdɛnkɛma zele me kɛ, “Wɔnwu debie mɔɔ Yizilayɛ, raalɛ ne mɔɔ ɛnli nɔhalɛ la ɛyɛ la? Yehɔ boka tendenle biala azo nee baka buzuu biala abo yehɔbɔ tuutuu ɛbɛla.

⁷Mendwenlenle kɛ yeyɛ ɛhye mɔ amuala bɔbɔ la ɔkɛzia ɔkɛra me nwo ɛke, na yeanzia yeamba, yɛɛ ɔ diema raalɛ Dwuda mɔɔ ɔdaye ɔnli nɔhalɛ la nwunle ye kɔsɔɔti.

⁸Yizilayɛ anli nɔhalɛ na ɔdonle awuvolɛvalɛ mɛla ne la ati membɔle ye ewole na menvoanle ye. Ɔ diema raalɛ Dwuda adalɛ ne nwunle ye, noko yeanzulo, na ɔdaye ɔhɔbɔle tuutuu ɛbɛla ne bie.

⁹Kɛmɔ tuutuu ɛlilɛ ɛnyɛ ye nyiane la ati, ɔzonlenle awolɛ nee mbaka na ɔdonle awuvolɛvalɛ mɛla ne na ɔvale evinli ɔhanle azɛlɛ ne.

¹⁰Ɛhye amuala zile, noko Yizilayɛ adiema raalɛ Dwuda ngunzi anva ye ahonle kɔsɔɔti ammaa me; ɔ nee me lile egyele zo amanie ala. Medame Ɛdɛnkɛma a mese a.”

¹¹Ɛdɛnkɛma zele me kɛ, “Yizilayɛ ɛnli nɔhalɛ, noko ɔle kpalɛ ekyii ɔtɛla Dwuda alane.

¹²Kɔ sɔlɔ nehane kɔha edwɛkɛ ɛhye kɛ, ‘Yizilayɛ mɔɔ ɛnli nɔhalɛ, sia bɛla na menrɛva ɛ nwo ɛya, ɔluakɛ mese anwunvɔne. Menrɛva ɛ nwo ɛya menrɛhɔ awieleɛ.

¹³Wɔmɔ die to nuhua kɛ ɛdi fɔlɛ kɛ ɛdele medame Ɛdɛnkɛma, wɔ Nyamenle ne anwo atua na ɛhɔle mbaka bo ɛhɔzonlenle nyamenle gyɛne gyɛne, na wɔandie me ne. Medame Ɛdɛnkɛma a mese a.

¹⁴“ ‘Bɛmɛ mɔɔ bɛnlɛ diedi a, bɛzia bɛrɛla me nwo ɛke na bɛ menle a le me. Mebaye bɛ nuhua ko meavi suakpole biala azo na meaye menli nwiɔ meavi abusua ekpulike biala anu, na meava bɛ meara Zayɔn.

¹⁵Mebamaa bɛ neavolɛma mɔɔ tie me la na bɛava nrɛlɛbɛ nee ndelebɛbo bɛazie bɛ.

¹⁶Na saa mekɛ ne anu bɛ nwo so na bɛyɛ mɔnwo wɔ azɛlɛ ne azo a bɛanva Ɛdɛnkɛma Ngyekyeleɛ Ɛlɛka ne bɛanga edwɛkɛ bieko. Bɛnrɛdwenle nwolɛ anzɛɛ bɛnrɛhakye ye, yɛɛ bɛnrɛnwu ɛlɛka ne bɔbɔ na bɛaze kɛ bɛbobɔ ye bieko.

¹⁷Saa mekɛ zɔhane dwu a, bɛbavɛlɛ Gyɛlusalɛm “Ɛdɛnkɛma Belemgbunli Ebia.” Maanle maanle kɔsɔɔti bara me nyunlu arazonle me; bɛnrɛli bɛ ahonle ɛtane ne mɔ anzi bieko.

¹⁸Mekɛ zɔhane Dwudama baboka Yizilayɛma, na bɛ muala bɛvi sɔlɔ bɛaradɛnla azɛlɛ ne mɔɔ menvale memanle bɛ ze mɔ kɛ bɛ ɛdeɛ ɔ la azo kpɔkpɔ.’ ”

¹⁹Ɛdɛnkɛma se, “Yizilayɛ, mendwenlenle kɛ mefa wɔ meaboka me mra ne mɔ anwo, na meamaa wɔ azɛlɛ mɔɔ le anyelielɛ, azɛlɛ kɛnlɛma mɔɔ tɛla ewiade ye azɛlɛ biala. Ɛnee medwenle kɛ ɛkɛvɛlɛ me ‘Egya’, na ɛnrɛhakyi ɛ nzi ɛnrɛzi me bieko.

²⁰Nɔhalɛ, wɔyɛ kɛ yelɛ mɔɔ ɛnli nɔhalɛ ɛmmaa kunli la; wɔanli nɔhalɛ wɔammaa me, medame Ɛdɛnkɛma a mese a.”

²¹Yɛte ɛnelɛ bie boka ne azo lɔ, Yizilayɛma ɛlɛsu abodo, ɔboalekɛ bɛvo adenle ne, bɛ rɛle ɛvi Ɛdɛnkɛma bɛ Nyamenle ne.

²²Bɛzia bɛrɛla, me mra mɔɔ ɛnlɛ diedi a, mebayɛ bɛ ayile meamaa bɛali nɔhalɛ. Bɛmɛ bɛse, “Nea, yɛra wɔ ɛkɛ, ɔluakɛ wɔmɔ a ɛle Ɛdɛnkɛma yɛ Nyamenle ne a.

²³Nɔhalɛ, awoka ne mɔ le mɛlɛbɛla, awoka ne mɔ azo anyelielɛ mgbole ne mɔ amboa. Nɔhalɛ, Ɛdɛnkɛma yɛ Nyamenle ne anu yɛɛ Yizilayɛ ngoanelielɛ ne wɔ a.

²⁴Noko ɔvi yɛ ngakula nu bozonle Beeyale anwo nyiane ne ɛzonlenlɛ ɛmaa yɛ sa ɛvi nlankɛ, mboane, mralɛ mrenya nee mralɛ mraalɛ, yɛɛ debie biala mɔɔ egya mɔ hwinle bɛ ti anwo ɛhɛlɛnra kpondɛle la.

²⁵Bɛmaa yɛva yɛ nwo nyiane ne yɛhɔdɛnla yɛ aze, na yɛ anyiemgba ɛbɔ yɛ ti, ɔluakɛ yɛyɛ ɛtane yɛtia Ɛdɛnkɛma yɛ Nyamenle ne, yɛdayɛ nee yɛ ze mɔ, ɔvi yɛ ngakula nu toonwo mɔɔ yeradwu ɛnɛ la; yɛɛ yɛtɛyɛle tieyɛ yɛtɛmanle Ɛdɛnkɛma yɛ Nyamenle ne.”