Read Nzema Gyɛ 30 Bible Online

Gyɛ 30 - Nzema bible

Gyɛ 30

¹Ɛdɛnkɛma, Yizilayɛ Nyamenle ne dendɛle hilele Gyɛlɛmaya,

²ɔse, “Kɛlɛ edwɛkɛ mɔɔ medame Ɛdɛnkɛma meha mehile wɔ la amuala wɔ buluku nu.

³Ɔluakɛ mekɛ bara mɔɔ mebava me menli Yizilayɛma nee Dwudama agyadeɛ meazia meamaa bɛ a. Mebava bɛ meazia meara azɛlɛ ne mɔɔ menvale memanle bɛ ze mɔ la azo na bɛava bɛayɛ bɛ ɛdeɛ. Medame Ɛdɛnkɛma a mese a.”

⁴Edwɛkɛ mɔɔ Ɛdɛnkɛma hanle ye wɔ Yizilayɛma nee Dwudama anwo la ɛne:

⁵Ɔse, “Yɛde ɛzulolɛ nee anyezota ɛdeanlɛ na yɛnde anzonudwolɛ edwɛkɛ.

⁶Akee biza, na nea. Asoo nrenya kola nrenzɛ wo ralɛ? Na duzu ati a menwu kɛ nrenya biala ɛva ɔ sa ɛzɔ ɔ nze kɛ raalɛ mɔɔ ɛvo awolɛ zo la ɛ? Duzu ati a nrenya biala anyunlu ɛdo ɛ?

⁷Bɛ gyakɔ! Ɔluakɛ kenle zɔhane yɛ ɛzulolɛ kpole; kenle biala nee ye ɛnzɛ. Ɔle nyanenwunlɛ mekɛ ɔmaa Yizilayɛma, noko bɛbalie bɛ bɛavi nuhua.”

⁸Tumivolɛ Ɛdɛnkɛma se, “Mekɛ zɔhane mebabubu gyɛnvayile ne mɔ mɔɔ gua bɛ kɔme zo la, mebaye bɛ kɔme kpomgbolo na bɛanyɛ ahanra bɛammaa nyɛvolɛ bieko.

⁹Bɛbazonle medame, Ɛdɛnkɛma bɛ Nyamenle ne, nee Devidi abo zo sonla ne mɔɔ mebaye ye meamaa bɛ kɛ ɔli belemgbunli la.

¹⁰ “O me sonvolɛ Gyekɔbo abo zo amra, bɛmmasulo, O Yizilayɛma, bɛmmamaa bɛ ahonle tu; bɛnlea, mebalie bɛ meavi moa moa lɔ, mebalie bɛ bo zo amra meavi maanle ne mɔɔ bɛyɛ ahanra wɔ nu la anu. Yizilayɛma bazia ara sua nu, bɛ nwo badɔ bɛ, bɛ nzo nu adwo bɛ, na awie biala ɛnrɛha bɛ ɛzulolɛ.

¹¹Ɔluakɛ me nee bɛ lua kɛ medie bɛ ngoane; mebazɛkye maanle maanle mɔɔ memkpondenle bɛ zo la kɔsɔɔti, na bɛmɛ, menrɛbɔ bɛ bo zo; bɛnrɛva bɛ nwo dwɔɔ ɛdeɛ, noko mebazuzu meadea bɛ. Medame Ɛdɛnkɛma a mese a.”

¹²Ɛdɛnkɛma hanle zɔle zolɛ kɛ, “Bɛ ɛbodalɛ ne ɛnlɛ ayile, yɛɛ bɛ nganlɛ ne mɔ ɛdukue mgbole.

¹³Awie ɛnle ɛkɛ mɔɔ nea bɛ a, bɛ nganlɛ ne mɔ ɛnlɛ ayile, bɛ nwo ɛnrɛza.

¹⁴Bɛ kulovolɛma kɔsɔɔti arɛle ɛvi bɛ; bɛndwenle bɛ nwo ekyii bɔbɔ, ɔluakɛ me nee bɛ ɛli ye kɛ kpɔvolɛma. Medea bɛ kpole kpalɛ kɛ metea me kpɔvolɛ la, ɔboalekɛ bɛ fɔlɛlilɛ ɛyɛ kpole, bɛ ɛtane ne mɔ ɛbo zolɛ.

¹⁵Duzu ati a bɛsu bɛ ɛbodalɛ ne anwo ɛ? Bɛ anwofofolɛ ne ɛnlɛ ayile. Medame a medea bɛ zɔhane a, ɔboalekɛ bɛ fɔlɛlilɛ ɛyɛ kpole, bɛ ɛtane ne mɔ akee ɛbo zolɛ.

¹⁶Yemɔti menli mɔɔ kɛzɛkye bɛ la, bɛbazɛkye bɛdabɛ, yɛɛ bɛbahye bɛ kpɔvolɛma amuala nuokɛ; menli mɔɔ kɛkpokpo bɛ la, bɛkɛkpokpo bɛdabɛ, yɛɛ menli mɔɔ kɛve bɛ anwonyia la, mebamaa bɛave bɛdabɛ bɛ ɛdeɛ.

¹⁷Mebayɛ bɛ nganlɛ ne mɔ ayile, na meamaa bɛ nwo aza. Medame Ɛdɛnkɛma a mese a, ɔboalekɛ bɛ kpɔvolɛma ɛlɛka kɛ, ‘Zayɔn ɛyɛ mgbane, ɛnɛ awie ɛndwenle ɔ nwo.’ ”

¹⁸Ɛdɛnkɛma se, “Bɛnlea, mebava Yizilayɛma azɛlɛ ne meazia meamaa bɛ, na meanwu bɛ anwunvɔne wɔ bɛ tɛnlabelɛ nu; bɛbakyekye Gyɛlusalɛm bieko wɔ ɔ bo zo ne, na bɛazi suakunlu ne wɔ ɔ bo zo dɛba ne ala.

¹⁹Bɛdabɛ mɔɔ bɛde suakpole ne azo la bado moyɛlɛ edwɛne, bɛbadeɛdea nu anyelielɛ nu. Mebamaa bɛ nwo azo, bɛ nwo ɛnrɛha ekyi. Mebamaa bɛanyia bɛ nyunlu, bɛnrɛyɛ koahweabanema.

²⁰Bɛ mra bayɛ kɛ bɛ dɛba ne ala la, mebamaa bɛ maanle ne agyinla, na meadea menli mɔɔ sisi bɛ la amuala.

²¹Bɛ nuhua bie a bali belemgbunli a, bɛ maanlebuvolɛ ne bavi bɛdabɛ bɛ avinli. Mebamaa yeabikye me, yɛɛ ɔbabikye me, ɔluakɛ awie biala ɔdaye ɔnrɛhola ɔnrɛbikye me. Medame Ɛdɛnkɛma a mese a.

²²Bɛbayɛ me menli, na mebayɛ bɛ Nyamenle.”

²³Bɛnlea, Ɛdɛnkɛma ɛya ne le ahumu! Ɔlɛtu kɛ ahumuakyima, na ɔbaragua atisesebɛma ati zo.

²⁴Ɛdɛnkɛma ɛya kpole ne ɛnrɛdwo, kyesɛ yeyɛ mɔɔ yedwenle nwolɛ la amuala yewie. Kenle bie bɛbade ɛhye mɔ abo.