Read Nzema Gyɛ 31 Bible Online

Gyɛ 31 - Nzema bible

Gyɛ 31

¹Ɛdɛnkɛma se, “Mekɛ zɔhane, mebayɛ Yizilayɛ mbusua ekpunli ekpunli ne mɔ kɔsɔɔti bɛ Nyamenle, na bɛdabɛ noko bɛbayɛ me menli.

²Menwunle menli mɔɔ andɔ konle nu la anwunvɔne wɔ fienemgbole ne anu, yɛɛ mɔɔ Yizilayɛma kpondɛ ɛnwomenlelielɛ la,

³mevi moa moa menvindele bɛ. Mehulo bɛ ɛhulolɛ mɔɔ ɛnlɛ awieleɛ la, yemɔti metɛdi nɔhalɛ metɛmaa bɛ.

⁴O Yizilayɛma, mebatete bɛ, na bɛbanyi. Bɛbasesa bɛ ahenle ne mɔ bieko, yɛɛ bɛbazi agole bɛ nye alie.

⁵Eza bɛbayɛ vanye egyinli wɔ Samɛlea awoka ne mɔ azo; menli mɔɔ balua ma ne la bali ye nzoleɛ ne bie.

⁶Ɛhɛe, mekɛ badwu mɔɔ sinzavolɛma bagyinla Yifelaem adea nu avɛlɛ kɛ, ‘Bɛdwazo bɛmaa yɛhɔ Ɛdɛnkɛma yɛ Nyamenle ne ɛkɛ wɔ Zayɔn.’ ”

⁷Ɛdɛnkɛma se, “Bɛva anyelielɛ bɛdea nu bɛdo edwɛne bɛmaa Yizilayɛ, bɛdeɛdea nu kɛ ɔde maanle maanle kɔsɔɔti anwo zo; bɛbɔ nolo, bɛdo ayɛlɛyelɛ edwɛne bɛze kɛ, ‘Ɛdɛnkɛma ɛlie ye menli Yizilayɛma mɔɔ ɛha la.’

⁸Bɛnlea, me nee bie mɔ vi sɔlɔ maanle nu bara, me nee bie mɔ vi maanle ti nee maanle bo bara, anyenzinlirama nee abuburama bara bie, nrenzɛvolɛma nee bɛdabɛ mɔɔ bɛde awolɛ zo la amuala bara bie; bɛle maanle mumua a bɛbazia bɛara ɛke a.

⁹Yizilayɛma bava ɛzunlɛ ara, mebakyekye bɛ rɛle, meava bɛ meazia meara sua nu, mebava bɛ measianle azudenle nloa, bɛbalua ademgbole fɔɔnwo mɔɔ bɛnrɛdu koti nu la anu, ɔluakɛ mele selɛ memaa Yizilayɛ, yɛɛ me belamunli ralɛ nrenya a le Yifelaem.

¹⁰O maanle maanle kɔsɔɔti, bɛdie me, na bɛbɔ me edwɛkɛ ne nolo wɔ moa moa maanle nu kɛ, ‘Sonla ne mɔɔ kpondenle Yizilayɛma la baboɔboa bɛ nloa, na ɔbanlea bɛ kɛ mboaneneavolɛ nea ye mboane la.’

¹¹Ɔluakɛ medame Ɛdɛnkɛma, mekpɔne Yizilayɛma, na melie bɛ mevi menli mɔɔ anwo yɛ se la asa anu.

¹²Bɛbara bɛarado edwɛne anyelielɛ nu wɔ Zayɔn Boka, bɛ nye balie Ɛdɛnkɛma ahunlunyele ne anwo, bɛ nye balie abɛlɛ, nwanye nee nwole, yɛɛ mboane mralɛ nee nlankɛ mralɛ ne mɔ anwo. Bɛ ɛbɛlabɔlɛ bayɛ kɛ tola nu ninyɛne mɔɔ bɛgugua zolɛ nzule la, bɛ nwo ɛnrɛhyele bɛ bieko.

¹³Mbɛlɛra bazi agole na bɛ nye alie, mgbavolɛ nee mgbanyinli anye balie. Mebamaa bɛ ɛzunlɛ ahakyi anyelielɛ, mebakyekye bɛ rɛle, na bɛagyakyi nyanelilɛ bɛali fɛlɛko.

¹⁴Mebamaa sɛlɛvolɛma ne anyia aleɛ dɔɔnwo, na me menli ne akunlu badwo me ahunlunyele ne anwo. Medame Ɛdɛnkɛma a mese a.”

¹⁵ Ɛdɛnkɛma se, “Mede ɛnelɛ bie wɔ Releema, ɔle awolɛyelɛ nee alɔbɔlɛ ɛzunlɛ, Relahyɛle ɛlɛsu ɔ mra, ɔ mra ne mɔ ɛwie wu, yemɔti bɛkpɔda ye a ɔndie.

¹⁶Na medame Ɛdɛnkɛma, mese: Gyakyi ɛzunlɛ na kyikyi ɛ nye anwo. Ɔluakɛ wɔ ɛvɛlɛ ɛnrɛyɛ gyɛne; bɛvi kpɔvolɛma maanle nu bɛbara. Medame Ɛdɛnkɛma a mese a.

¹⁷Ɛlɛ anyelazo kenle bie, ɛ mra ne mɔ bazia ara sua nu. Medame Ɛdɛnkɛma a mese a.

¹⁸“Mede kɛ Yizilayɛma[9] ɛlɛdi nyane aha kɛ, ‘Ɛnee yɛle kɛ ɛnlankɛ ralɛ mɔɔ anye abo sɔ la, na wɔmɔ, ɛyɛle yɛ abɛbɛ, fa yɛ kɔ sua nu maa yɛkpazi, ɔluakɛ wɔmɔ a ɛle Ɛdɛnkɛma yɛ Nyamenle a.

¹⁹Yɛkpole wɔ la, nzinlii yɛnlunle yɛ nwo, Ɛdeanle yɛ la, akee yɛnwunle adenle ne. Nyiane hunle yɛ, yɛ nyunlu guale aze, ɔboalekɛ yɛyɛle ɛtane yɛ ngakula nu.’

²⁰“Yizilayɛ, ɛle me ra nrenya mɔɔ mekulo wɔ, ɛle ralɛ nrenya mɔɔ ɛla me ahonle nwo. Mekɛ biala mɔɔ menwɔva ɛ nwo ɛya la, ɛnee ɛ nwo adwenle gyi me adwenle nu. Yemɔti me nwo dɔ wɔ; nɔhalɛ, mebanwu wɔ anwunvɔne. Medame Ɛdɛnkɛma a mese a.

²¹Yɛ sɛkɛlɛneɛ fa yɛ adenle ne nzonlɛ, yɛ ye mɔɔ ɛ nye ɛnvo ye la; nea ademgbole ne mɔɔ ɛluale nu ɛhɔle la boɛ. O Yizilayɛma, bɛzia bɛrɛla, bɛrɛla bɛ azuamgbole mɔɔ bɛvi zolɛ bɛhɔle la azo.

²²Yizilayɛma mɔɔ ɛnlɛ diedi a, bɛsie kenlenzu? Memaa debie ngakyile ɛzi ewiade ye: raalɛ bawowa nrenya.”

²³Tumivolɛ Ɛdɛnkɛma, Yizilayɛ Nyamenle ne se, “Saa memaa me menli ne kpazi bieko a, bɛbaha wɔ Dwuda maanle ne anu azuamgbole ne mɔ azo kɛ, ‘Ɛdɛnkɛma ɛyila wɔ, O Boka nwuanzanwuanza, tenleneyɛlɛ tɛnlabelɛ.’

²⁴Menli mɔɔ badɛnla Dwuda maanle ne anu azuamgbole ne mɔ azo la bayɛ ko. Bɛbayɛ ɛyazonlɛma nee mboaneneavolɛma mɔɔ lɛ nyɛmoa a.

²⁵Mebamaa awie biala mɔɔ ɛvɛ la alie ye ɛnwomenle, na meamaa mɔɔ ɛhɔne ɛhu ye ɛmaa ɔ nwo ɛbɛlɛ ye la aleɛ.”

²⁶Ɔdwule ɛke la, mendunwuele na membukele me nye, na me nye liele me nafelɛ ne anwo.

²⁷Ɛdɛnkɛma se, “Mekɛ bie bara mɔɔ mebamaa Dwuda nee Yizilayɛ maanle nu ayɛ menli nee nane ngome a.

²⁸Na ɔbara kɛ, kɛmɔ menlea bɛ memaa bɛdudu bɛ na bɛbubu bɛ bɛgua, bɛbutu maanle ne anye aze, bɛzɛkyezɛkye ninyɛne, na munzule ɛdo bɛ la, zɔhane ala yɛɛ mebanlea bɛ meamaa bɛasisi azua na bɛalua ninyɛne a.

²⁹ Mekɛ ne anu menli ɛnrɛha ye bieko kɛ, ‘Egya mɔ lile vanye ma nyinyianlera, na bɛ mra agye ɛnyia nwolɛ.’

³⁰Awie biala bawu ɔ ti anwo ɛtane mɔɔ yeyɛ la anwo ewule. Awie mɔɔ kɛli vanye ma nyinyianlera la, ɔdaye mumua ne ɔ gye a banyia a. Medame Ɛdɛnkɛma a mese a.”

³¹ Ɛdɛnkɛma se, “Mekɛ bie bara mɔɔ me nee Yizilayɛma nee Dwudama bayɛ ngyekyeleɛ fofolɛ a.

³²Ngyekyeleɛ ɛhye ɛnrɛyɛ kɛ mɔɔ me nee bɛ ze mɔ vi Yigyibiti ba la me nee bɛ yɛle la. Ɛnee mele kɛ kunli memaa bɛ, noko bɛanli me ngyekyeleɛ zɔhane azo.

³³ Ngyekyeleɛ ne mɔɔ me nee Yizilayɛma bayɛ la ɛne: Mebava me mɛla ne meawula bɛ nuhua, mebahɛlɛ ye bɛ ahonle nu; mebayɛ bɛ Nyamenle, na bɛdabɛ noko bɛayɛ me menli.

³⁴ Bɛ nuhua biala ɛnrɛhilehile ɔ gɔnwo anzɛɛ ɛnrɛze adiema kɛ, ‘Maa mengile wɔ Nyamenle,’ ɔluakɛ bɛ kɔsɔɔti, kpanyinli o, kakula o, bɛbanwu me. Mebava bɛ ɛtane meahyɛ bɛ, yɛɛ menrɛhakye bɛ ɛtane ne mɔ mɔɔ bɛyɛ la bieko. Medame Ɛdɛnkɛma a mese a.”

³⁵Ɛdɛnkɛma mɔɔ maa ewia fi alehyenlɛ nu, ɔmaa siane nee nwɔlɔra ta aledwolɛ nu, mɔɔ ɔka nyevile ne anu ɔmaa ye azɛlɛkye kulu, mɔɔ ye duma a le Tumivolɛ Ɛdɛnkɛma la se,

³⁶“Saa ewiade ɛhye mɔɔ mebɔ, mɔɔ gyi kpundii la kɔ awieleɛ, na ɔfi me nye zo bɔkɔɔ a, yɛɛ Yizilayɛma abo zo amra ɛnrɛyɛ maanle bieko me nye zo dahuu a.”

³⁷Ɛdɛnkɛma se, “Saa bɛkɛhola bɛkɛzuzu anwomanyunlu, bɛkɛdudu azɛlɛ ye adiabo ne bɛkɛnlea a, anrɛɛ mebazɛkye Yizilayɛma abo zo amra kɔsɔɔti wɔ mɔɔ bɛyɛ la anwo.”

³⁸Ɛdɛnkɛma se, “Mekɛ bara, na bɛbakyekye me suakpole Gyɛlusalɛm bieko, ɔvi Hananili Tawa ne anwo yeahɔkpula Muleɛ Anlenkɛ Kpole ne anwo.

³⁹Ɛweɛne ne bala ɛkɛ ne fɔɔnwo toonwo yeahɔdwu boka Galɛbe na yeabele yeahɔdwu Gowa.

⁴⁰Bɔnza ne anu amuala, ɔvi ɛleka mɔɔ bɛsie avunli, ɛleka mɔɔ bɛgua ewula, nee azɛlɛ ne mɔɔ la azudenle Kedelɔn ne anzi mɔɔ kɔdwu Ɛkpɔnwɔ Anlenkɛ Kpole ne anwo wɔ aduduleɛ afoa nu la kɔsɔɔti bayɛ ɛleka nwuanzanwuanza amaa me. Bɛnrɛzɛkye suakpole ne bieko ɛlɛ.”