Read Nzema Gyɛ 32 Bible Online

Gyɛ 32 - Nzema bible

Gyɛ 32

¹Mekɛ mɔɔ Dwuda Belemgbunli Zɛdikaya lile ɛvolɛ bulu wɔ ebia zo la, Ɛdɛnkɛma dendɛle hilele Gyɛlɛmaya. Ɛvolɛ zɔhane ala ɛnee Babelonia Belemgbunli Nɛbukadenɛza ɔdaye yeli ɛvolɛ bulu nee mɔtwɛ wɔ ebia zo.

²Mekɛ ne anu, ɛnee Babelonia belemgbunli ne ɛlɔnema ɛva konle ɛradoa Gyɛlusalɛmma, na bɛbɛnra bɛyia suakpole ne, na bɛha Nyamenle kpɔmanvolɛ Gyɛlɛmaya bɛwula Dwuda belemgbunli ne sinzavolɛma sua nu wɔ belemgbunli ne suakunlu ɛkɛ.

³Ɔluakɛ ɛnee Dwuda Belemgbunli Zɛdikaya ɛhye ye ɛdo efiade. Ɔse, “Gyɛlɛmaya, duzu ati a wɔha Nyamenle nrɛlaleɛ wɔtia yɛ ɛ? Ɛse, ‘Ɛdɛnkɛma se: Bɛnlea, mebava suakpole ɛhye meamaa Babelonia belemgbunli ne, na ɔbava suakpole ne.

⁴Dwuda Belemgbunli Zɛdikaya ɛnrɛvi ɛsalɛ. Bɛbahye ye bɛahɔmaa Babelonia belemgbunli ne, na ɔ nee ye bɛ mu nwiɔ bɛ nye bayɛ nna na ɔ nee ye adendɛ.

⁵Babelonia belemgbunli ne bava Zɛdikaya ahɔ Babelonia kɔkpula mekɛ mɔɔ medame Ɛdɛnkɛma menwɔhɔkpɔla ye la; saa ɔ nee Babelɔnoma ko biala a ɔnrɛhola bɛ.’ ”

⁶Gyɛlɛmaya hanle kɛ, “Ɛdɛnkɛma zele me kɛ,

⁷‘Gyɛlɛmaya, ɛ wuvuanyi Hyalɛm ara nrenya Hanamili baraha ahile wɔ kɛ: Tɔ me azɛlɛ ne mɔɔ wɔ Anato la, ɔluakɛ wɔmɔ a ɛlɛ nwolɛ adenle ɛtɔ a.’

⁸Kɛmɔ Ɛdɛnkɛma zele me ala la, me diema Hanamili rale me nwo ɛkɛ wɔ belemgbunli sinzavolɛma sua nu ɛkɛ, na ɔzele me kɛ, ‘Tɔ me azɛlɛ ne mɔɔ wɔ Anato mɔɔ wɔ Bɛngyaman azɛlɛ zo la, ɔluakɛ wɔmɔ a ɛlɛ nwolɛ adenle kɛ ɛtɔ a. Zɔhane ati tɔ azɛlɛ ne maa ɔrali ɛ sa nu.’ Yemɔti menliele edwɛkɛ ne mendole nuhua kɛ Ɛdɛnkɛma a ɛdendɛ ɛhile me a.

⁹Mendɔle azɛlɛ ne mɔɔ wɔ Anato la dwɛtɛ fufule bulu nee nsuu wɔ Hanamili asa anu.

¹⁰Menvale me sa menwulale ngyehyɛlɛ kɛlata ne abo, menzɔle ɔ nloa, menli lile nwolɛ daselɛ, na bɛzuzule ezukoa ne tone nu bɛmanle ye.

¹¹Akee menvale azɛlɛ ne anwo ngyehyɛlɛ kɛlata ne mɔɔ kile kɛ bɛsi bɛtɔ azɛlɛ, na bɛzɔ ɔ nloa, boka ngyehyɛlɛ kɛlata ko ne ala bie, mɔɔ bɛanzɔ ɔ nloa la

¹²memanle Nilaya ara nrenya Bɛlɛke. Bɛlɛke le Masaya anlɔnra. Menvale ngɛlata ne mɔ memanle ye wɔ me diema Hanamili, dasevolɛma mɔɔ wɔ azɛlɛ ne ɛdɔlɛ nwo la, yɛɛ Dwuuma mɔɔ ɛnee wɔ belemgbunli sinzavolɛma sua nu ɛkɛ ne bie la kɔsɔɔti anyunlu.

¹³Menganle mengilele Bɛlɛke wɔ bɛ muala bɛ nyunlu ɛkɛ ne kɛ,

¹⁴‘Tumivolɛ Ɛdɛnkɛma, Yizilayɛ Nyamenle ne se: Fa ngyehyɛlɛ nwiɔ ɛhye mɔ, ko ɛhye mɔɔ bɛzɔ ɔ nloa, nee ɛhye mɔɔ bɛtɛsɔle ɔ nloa la amu nwiɔ gua ɛyɛba nu, amaa bɛahyɛ kpalɛ.

¹⁵Ɔluakɛ Tumivolɛ Ɛdɛnkɛma, Yizilayɛ Nyamenle ne ɛha kɛ bɛbazia bɛadɔ azua, ɛya, yɛɛ vanye egyinli wɔ azɛlɛ ɛhye azo.’ ”

¹⁶Mɔɔ menvale azɛlɛ ne anwo kɛlata ne memanle Nilaya ara nrenya Bɛlɛke la, nzinlii menyɛle nzɛlɛlɛ menzɛlɛle Ɛdɛnkɛma kɛ, “Awulae Nyamenle,

¹⁷wɔmɔ yɛɛ wɔva wɔ tumi kpole ne nee wɔ anwosesebɛ wɔbɔ anwuma nee aze a!

¹⁸Debie biala ɛnyɛ se ɛmmaa wɔ, yɛɛ ɛkile wɔ ɛhulolɛ kpundii ne ɛkile menli pemgbenleamgbe, na ɛtea menli wɔ bɛ ze mɔ ɛtane ti. O Nyamenle Bedevinli mɔɔ ɛle kpole, mɔɔ wɔ duma a le Tumivolɛ Ɛdɛnkɛma la,

¹⁹wɔ nrɛlɛbɛ le kpole yɛɛ ɛyɛ ninyɛne mgbole. Ɛnwu menli ndenle kɔsɔɔti anu na ɛnea bɛ ɛbɛlabɔlɛ ne ɛtua biala kakɛ, kɛmɔ ye ndenle ne mɔ de la.

²⁰Wɔyɛ sɛkɛlɛneɛ nee nwanwane ninyɛne wɔ Yigyibiti azɛlɛ zo ɛlɛ, yɛɛ ɛtɛyɛ ye ɛnɛ noko wɔ Yizilayɛma nee menli kɔsɔɔti avinli, na wɔlie duma wɔmaa ɛ nwo wɔ ewiade, kɛmɔ ɛnɛ ɔde la.

²¹Ɛluale sɛkɛlɛneɛ nee nwanwane ninyɛne ɛyɛlɛ zo ɛvale wɔ tumi ɛsalɛ kpole ne ɛyele wɔ menli Yizilayɛma ɛvile Yigyibiti.

²²Akee ɛvale azɛlɛ ɛhye mɔɔ kye aleɛ la ɛmanle bɛ, kɛmɔ ɛvale ɛbɔle bɛ ze mɔ ɛwɔkɛ kɛ ɛkɛva ɛkɛmaa bɛ la.

²³Yizilayɛma radɛnlanle azɛlɛ ye azo, na bɛandie ɛ ne yɛɛ bɛanli wɔ mɛla ne mɔ azo. Mɔɔ ɛzele bɛ kɛ bɛyɛ la, bɛanyɛ nuhua ko bɔbɔ. Yemɔti a wɔmaa anwubɛnyunlu ɛhye ɛdo bɛ la.

²⁴“Bɛnlea, Babeloniama ɛbɛnra suakpole ye ɛyia kɛ bɛko bɛava, na ɔlua konle, ɛhɔne, yɛɛ ewulenzane ti bɛbali suakpole ye anwo zo konim. Edwɛkɛ ne mɔɔ ɛhanle ɛdole ɛkɛ ne la ɛyɛ zɔhane, kɛmɔ ɛ nye dua ye la.

²⁵Noko, O Awulae Nyamenle, ɛdawɔ yɛɛ ɛzele me kɛ, ‘Su ezukoa tɔ azɛlɛ ne maa menli ɛli nwolɛ daselɛ a. Noko akee bɛye suakpole ne bɛmaa Babeloniama kɛ bɛho bɛva.’ ”

²⁶Ɛdɛnkɛma zele Gyɛlɛmaya kɛ,

²⁷“Nea, mame a mele Ɛdɛnkɛma, menli kɔsɔɔti bɛ Nyamenle ne a; debie biala ɛmbo me nwo zo.

²⁸ Yemɔti, medame Ɛdɛnkɛma, mese: Mefa suakpole ɛhye meamaa Babelonia Belemgbunli Nɛbukadenɛza meamaa yeaho yeava.

²⁹Babeloniama mɔɔ nee suakpole ye azo amra ɛlɛko la barado senle suakpole ye azo ayela ye, nee azua mɔɔ bɛkpu ɛyɛlɛ wɔ zolɛ bɛmaa bozonle Beeyale ne, na bɛva nza bɛye ɛdɛne zolɛ bɛmaa nyamenle gyɛne gyɛne bɛva bɛha me ɛya la.

³⁰Ɔvi tete, Yizilayɛma nee Dwudama ɛtɛyɛle debie kpalɛ biala ɛlɛ, kɛ ɛtane ala a bɛyɛ bɛtia me a. Yizilayɛma ɛtɛbɔle ɛbɛla kpalɛ biala kɛ bɛ sa anloa gyima ala a bɛfa bɛka me ɛya a.

³¹Ɔvi mekɛ mɔɔ bɛkyekyele suakpole ɛhye toonwo mɔɔ yeradwu ɛnɛ la, ɛya ala a menli mɔɔ wɔ zolɛ la ka me a. Yemɔti mebazɛkye ye meavi me nye zo

³²wɔ Yizilayɛma nee Dwudama nyɛleɛ ɛtane ɛtane ne mɔ mɔɔ bɛ arelemgbunli, bɛ maanzinli zo neavolɛma, bɛ sɛlɛvolɛma, bɛ Nyamenle kpɔmanvolɛma, Dwudama, yɛɛ Gyɛlusalɛm ezuavolɛ ɛyɛ ɛhile me, ɛva ɛha me ɛya la ati.

³³Medendɛ mehile bɛ biala, na bɛandie me ne, bɛhakyi bɛ nzi bɛzi me.

³⁴ Bɛva bɛ bɛkyi ninyɛne ne mɔ bɛziezie me Ɛzonlenlɛ Sua ne mɔɔ me duma la zolɛ la anu bɛmaa evinli ɛha ye.

³⁵ Bɛzile azukponle wɔ Henɔm Bɔnza bɛmanle bozonle Beeyale, bɛvale bɛ mra mrenya nee bɛ mra mraalɛ bɛbɔle azu zolɛ bɛmanle bɛ bozonle Molɛke. Meanzoa bɛ kɛ bɛyɛ ɛhye, yɛɛ meanga nwolɛ ɛlalɛ bɔbɔ ɛlɛ kɛ memaa bɛayɛ bɛkyi debie zɔhane na Dwudama alua zolɛ ayɛ ɛtane.”

³⁶Ɛdɛnkɛma, Yizilayɛ Nyamenle ne hanle edwɛkɛ mɔɔ fane suakpole ne anwo la hilele me na ɔzele me kɛ, “Wɔmɔ, ɛse melua konle, ɛhɔne, yɛɛ ewulenzane zo meye suakpole ye memaa Babelonia belemgbunli ne.

³⁷Akee tie ɛ, nea, mebaboɔboa bɛ nloa meavi maanle maanle mɔɔ mekɛ mɔɔ menvale ɛya kpole la memkpondenle bɛ zolɛ la kɔsɔɔti anu. Mebava bɛ meazia meara maanle ɛhye anu bieko na meamaa bɛadɛnla anzonudwolɛ nu.

³⁸Bɛbayɛ me menli, na meayɛ bɛ Nyamenle.

³⁹Mebamaa bɛ adwenle ayɛ ko, bɛ adenle ayɛ ko, amaa bɛazulo me dahuu wɔ bɛdabɛ mumua ne nee bɛ mra mɔɔ li bɛ nzi la kpalɛyɛlɛ ti.

⁴⁰Me nee bɛ bayɛ ngyekyeleɛ mɔɔ bɛntulu ye ɛlɛ la, amaa meangyakyi bɛ boɛyɛlɛ. Mebamaa bɛanwu kɛ me nwo yɛ ɛzulolɛ, amaa bɛangakyi bɛ nzi bɛanzi me.

⁴¹Me nye balie nwolɛ kɛ menwɔnlea bɛ boɛ, yɛɛ mebava me ahonle muala nee me ɛkɛla muala mearalua bɛ muala ɛke wɔ nɔhalɛlilɛ nu.

⁴²“Medame Ɛdɛnkɛma mese: Kɛ mezi memaa munzule kpole ɛhye ɛdo menli ɛhye mɔ la, zɔhane ala yɛɛ ɛwɔkɛ kpalɛ biala mɔɔ mebɔ bɛ la kɔsɔɔti bayɛ saleɛ amaa bɛ a.

⁴³Menli badɔ azɛlɛ wɔ azɛlɛ ɛhye mɔɔ bɛlɛka nwolɛ edwɛkɛ kɛ yedɔ mgbane na menli nee nane ɛnle zolɛ, na bɛva bɛmaa Babeloniama la azo.

⁴⁴Bɛbazu ezukoa bɛadɔ azɛlɛ, bɛbayɛ nwolɛ ngyehyɛlɛ ngɛlata bɛava bɛ sa bɛawula bɛ bo, bɛali nwolɛ daselɛ na bɛasosɔ bɛ nloa wɔ Bɛngyaman azɛlɛ zo. Ɛhye bara zolɛ wɔ Gyɛlusalɛm afoa nu, wɔ Dwuda azuamgbole ne mɔ azo, azuamgbole mɔɔ wɔ maanle ne anu awoka ne mɔ azo, yɛɛ Dwuda, wɔ azuamgbole mɔɔ wɔ awoka mgbole ne mɔ azo nee azuamgbole mɔɔ wɔ maanle ne nyiakɛ la azo, ɔluakɛ mebamaa menli ne akpazi bieko. Medame Ɛdɛnkɛma a mese a.”