Read Nzema Gyɛ 33 Bible Online

Gyɛ 33 - Nzema bible

Gyɛ 33

¹Ɛdɛnkɛma dendɛle hilele Gyɛlɛmaya bieko wɔ mekɛ mɔɔ ɛnee ɔtɛda efiade wɔ belemgbunli sinzavolɛma sua nu ɛkɛ ne la.

²Ɔse, “Medame Ɛdɛnkɛma mɔɔ membɔle azɛlɛ ye, menzieziele ye gyɛlɛɛnye, na me duma a le Ɛdɛnkɛma la, mese:

³Bɛzu bɛvɛlɛ me, na mebalie zolɛ; mebaha ninyɛne mgbole nee mɔɔ vea mɔɔ bɛtɛnwunle bɛ ɛlɛ la anwo edwɛkɛ meahile bɛ.

⁴Ɔluakɛ medame Ɛdɛnkɛma, Yizilayɛ Nyamenle, mɔɔ melɛka wɔ azua mɔɔ wɔ suakpole ɛhye azo nee Dwuda arelemgbunli azua ne mɔ mɔɔ bɛbubu bɛ kɛ bɛfa bɛalie bɛ nwo wɔ ɛlɔnema mɔɔ ɛbɛnra ɛyia bɛ la asa anu la ɛne:

⁵Babeloniama ɛlɛba aravo suakpole ye azo aho; bɛbagyakyi menli dɔɔnwo mɔɔ meva bɛ nwo ɛya la ati bɛhu bɛ la avunli wɔ kpalɛ ne mɔ azo, ɔboalekɛ menli ne amumuyɛ ti, meva me nye mevea suakpole ɛhye.

⁶Noko akee bɛnlea, mebayɛ suakpole ne ayile meamaa ɔ nwo aza; mebayɛ menli ne ayile meamaa bɛakpazi kpole kpalɛ; mebabɔ bɛ nwo bane na suakpole ɛhye ara ye dɛba ne anu bieko; mebamaa menli ne akpazi na meamaa bɛanyia anzonudwolɛ.

⁷Mebamaa Dwudama nee Yizilayɛma akpazi, na bɛayɛ kɛ mɔɔ anrɛɛ dɛba ne bɛde la.

⁸Mebava bɛ ɛtane mɔɔ bɛyɛ me nee me nwo atua mɔɔ bɛde la kɔsɔɔti meahyɛ bɛ, na meade bɛ nwo.

⁹Na Gyɛlusalɛm bayɛ anyelielɛ, ayɛlɛyelɛ, yɛɛ anyunlunyia ɛleka amaa me wɔ maanle maanle kɔsɔɔti anye zo. Maanle biala mɔɔ bade kpalɛ mɔɔ meyɛ memaa suakpole ye la bazulo, ɔ nwo awozo ye wɔ nyele mɔɔ meyɛ memaa ye nee ɛkpazilɛ mɔɔ memaa suakpole ne ɛkpazi la ati.”

¹⁰Ɛdɛnkɛma se, “Ɛke mɔɔ bɛlɛka kɛ, ‘Yezɛkye, sonla anzɛɛ nane ɛnle zolɛ,’ ɛhɛe, wɔ Dwuda azuamgbole ne mɔ nee Gyɛlusalɛm kpalɛ ne mɔ azo mɔɔ ɛyɛ nyanyoo, mɔɔ bɛnnwu anloma nee akɔlɛ la, bɛbade kɛ

¹¹ eza bɛ nye ɛlie na bɛlɛdi fɛlɛko; bɛbade atɔfolɛ nrenya ne nee atɔfolɛ raalɛ ne ane; yɛɛ bɛbade edwɛndolɛma ane kɛ bɛlɛfa moyɛlɛ azubɔdeɛ bɛara Ɛdɛnkɛma Ɛzonlenlɛ Sua ne anu. Bɛbaha kɛ: ‘Bɛva moyɛlɛ bɛmaa Tumivolɛ Ɛdɛnkɛma, ɔluakɛ Ɛdɛnkɛma le kpalɛ, ye ɛhulolɛ kpundii ne wɔ ɛkɛ dahuu.’ Ɔluakɛ mebamaa maanle ne azia akpazi. Medame Ɛdɛnkɛma a mese a.” 118.1; 136.1

¹²Tumivolɛ Ɛdɛnkɛma se, “Mboaneneavolɛma bava bɛ mboane azia ara ɛke mɔɔ ɛdɔ mgbane, mɔɔ sonla ɛnde zolɛ ɛleka biala yɛɛ nane ɛnle zolɛ la bɛamaa bɛaradidi.

¹³Mboaneneavolɛma bazie mboane wɔ azua azua zo, Dwuda nyiakɛ, maanle ne anu awoka mgbole nee ngyikyi ne mɔ azo, awoka ne mɔ abo, Bɛngyaman maanzinli nu, azua mɔɔ wɔ Gyɛlusalɛm afoa nu, yɛɛ Dwuda azuamgbole ne mɔ azo bayɛ mboane ngome. Medame Ɛdɛnkɛma a mese a.”

¹⁴ Ɛdɛnkɛma se, “Bɛnlea, mekɛ bie bara mɔɔ mebaye me ɛwɔkɛ ne mɔɔ membɔle Yizilayɛma nee Dwudama la.

¹⁵Mekɛ zɔhane anu mebamaa tenlene ɛhane afifi Devidi sua nu, na ɔbabua ndɛne pɛlepɛle nu na yeamaa tenleneyɛlɛ ara maanle ne anu.

¹⁶Mekɛ zɔhane anu Dwuda banyia ɔ ti na Gyɛlusalɛm anyia anzonudwolɛ. Na akee bɛbavɛlɛ suakpole ne ‘Ɛdɛnkɛma le Tenlenenli.’

¹⁷ Ɔluakɛ medame, Ɛdɛnkɛma, mese: Dahuu Devidi abo zo sonla a badɛnla Yizilayɛ belemgbunli ebia ne azo a,

¹⁸ yɛɛ sɛlɛvolɛma mɔɔ le Livae abo zo amra la a bazonle me, bɛava ɛyelalɛ azubɔdeɛ, bɛayela ma azubɔdeɛ, na bɛabɔ azu bɛamaa me dahuu a.”

¹⁹Ɛdɛnkɛma dendɛle hilele me: ɔse,

²⁰“Gyɛlɛmaya, saa ɛkɛhola ɛkɛzɛkye ngyekyeleɛ mɔɔ wɔ me nee alehyenlɛ nee aledwolɛ avinli na mekɛ dwu a aleɛ ɛnrɛhye yɛɛ aleɛ ɛnrɛdwo a,

²¹ɛnee noko awie kola sɛkye ngyekyeleɛ mɔɔ wɔ me nee me sonvolɛ Devidi avinli la, amaa yeannyia ɔ bo zo sonla andɛnla ye belemgbunli ebia ne azo. Zɔhane ala yɛɛ ɛnee awie kɛhola kɛzɛkye ngyekyeleɛ mɔɔ wɔ me nee me sɛlɛvolɛma mɔɔ le Livae abo zo amra avinli la, na ɔnrɛmaa bɛnrɛzonle me a.

²²Mebamaa me akɛlɛ Devidi abo zo amra nee Livae abo zo amra sɛlɛvolɛma mɔɔ sonle me la anwo azo kɛ anwomanyunlu nwɔlɔra anzɛɛ ɛnweazo anwea mɔɔ bɛtia a ɔnyɛ boɛ la.”

²³Ɛdɛnkɛma zele me kɛ,

²⁴“Gyɛlɛmaya, asoo ɛtɛtele mɔɔ menli ɛhye mɔ ɛlɛka la? Bɛse, ‘Ɛdɛnkɛma ɛkpo mbusua ekpulike nwiɔ ne mɔɔ ɔkpale nu ɔyele bɛ la.’ Nea, ɔlua ɛhye ati bɛmbu me menli ne bie, yɛɛ bɛ nye zo a, bɛnzɔho maanle bɔbɔ.

²⁵Medame Ɛdɛnkɛma, mese: Saa tɛ medame yɛɛ me nee alehyenlɛ nee aledwolɛ yɛle ngyekyeleɛ, na menyɛle mɛla mɔɔ sie anwomanyunlu nee aze la a,

²⁶ɛnee mebakpo Gyekɔbo nee me sonvolɛ Devidi abo zo amra ne mɔ, yɛɛ menrɛmaa Devidi abo zo sonla ɛnrɛzie Ebileham, Ayezeke, yɛɛ Gyekɔbo abo zo amra. Ɔluakɛ mebaze bɛ anwunvɔne na meamaa bɛakpazi.”