Read Nzema Gyɛ 34 Bible Online

Gyɛ 34 - Nzema bible

Gyɛ 34

¹ Ɛdɛnkɛma dendɛle hilele Gyɛlɛmaya wɔ mekɛ mɔɔ Babelonia Belemgbunli Nɛbukadenɛza nee ye ɛlɔnema amuala, nee maanle maanle mɔɔ wɔ ɔ bo la amuala ɛlɔnema ɛlɛko atia Gyɛlusalɛm nee azuamgbole mɔɔ zuozua ye la.

²Ɛdɛnkɛma, Yizilayɛ Nyamenle ne zele kɛ, “Gyɛlɛmaya, kɔha kile Dwuda Belemgbunli Zɛdikaya kɛ mese: Mefa suakpole ɛhye meamaa Babelonia belemgbunli ne meamaa yeado senle zolɛ yeayela ye.

³Na wɔmɔ Zɛdikaya, ɛnrɛvi ɛsalɛ; bɛbahye wɔ bɛahɔmaa Babelonia belemgbunli ne. Ɛ nee ye bɛ mu nwiɔ bɛ nye bayɛ nna na ɛ nee ye adendɛ; na ɔbava wɔ yeahɔ Babelonia.

⁴O Dwuda Belemgbunli Zɛdikaya, tie edwɛkɛ mɔɔ medame Ɛdɛnkɛma melɛka ye ɛ nwo la. Ɛnrɛwu dadeɛ nloa.

⁵Ɛbawu anzonudwolɛ nu. Na bɛbakpumgbu wɔ ayile evuanlɛ kɛ mɔmoane bɛkpumgbunle ɛ ze mɔ mɔɔ lumuale lile ebia ne la na bɛazu bɛaye awolɛ kɛ, ‘Aa, yɛ menle!’ Medame Ɛdɛnkɛma yɛɛ meha a.”

⁶Nyamenle kpɔmanvolɛ Gyɛlɛmaya hanle edwɛkɛ ɛhye kɔsɔɔti hilele Dwuda Belemgbunli Zɛdikaya wɔ Gyɛlusalɛm.

⁷Mekɛ ne anu ɛnee Babelonia belemgbunli ne ɛlɔnema nee Gyɛlusalɛm nee Dwuda azuamgbole mɔɔ ɛha la azo amra gua konle zo. Azuamgbole ne mɔ a le Leekehye nee Azikaa mɔɔ bɛhye nwolɛ ɛhane la.

⁸Ɛdɛnkɛma dendɛle hilele Gyɛlɛmaya bieko. Mekɛ ne anu ɛnee Belemgbunli Zɛdikaya nee Gyɛlusalɛmma amuala ɛyɛ ahanra ɛdwulalɛ nwo ngyehyɛlɛ na bɛbɔ ye nolo.

⁹Ɔwɔ kɛ awie biala dwula ye Hibulu ahanra mɔɔ sonle ye la. Saa kanranli ne le nrenya o, ɔle raalɛ o, ɔwɔ kɛ ɔdwula ye, yɛɛ ɔnle kɛ bɛ biala kye ɔ diema Dwuunli yɛ ye kanranli.

¹⁰Menli ne nee bɛ mgbanyima ne mɔ kɔsɔɔti liele ngyehyɛlɛ ne dole nu kɛ ɔwɔ kɛ awie biala dwula ye ahanra mrenya anzɛɛ mraalɛ mɔɔ bɛnyɛ bɛ ahanra bieko ɛlɛ a. Yemɔti bɛdwulale bɛ.

¹¹Noko nzinlii bɛnyianle adwenle fofolɛ, bɛziale bɛ nzi bɛhyele mrenya nee mraalɛ mɔɔ ɛnee bɛdwula bɛ la na bɛyɛle bɛ ahanra.

¹²Akee Ɛdɛnkɛma dendɛle hilele Gyɛlɛmaya. Ɔse,

¹³“Medame Ɛdɛnkɛma, Yizilayɛ Nyamenle ne, mese: Mekɛ mɔɔ menyele bɛ nlenya mɔ menvile akɛlɛzonlenlɛ nu menvile Yigyibiti azɛlɛ zo la, me nee bɛ yɛle ngyekyeleɛ na menzele kɛ,

¹⁴ ɛvolɛ nsuu biala awie biala mɔɔ ɛdɔ ɔ diema Hibulunli kɛ ɔle kanra na yezonle ye ɛvolɛ nsia la, ɔwɔ kɛ gyakyi ye bɔkɔɔ maa ɔfa ɔ nwo ɔdi. Noko bɛ nlenya mɔ andie me ne anzɛɛ bɛampili me bɔbɔ.

¹⁵Kenle nsa ye, bɛnlunle bɛ nwo na bɛyɛle debie bɛmanle ɔzɔle me nye. Bɛyɛle kɛ bɛdwula bɛ mediema ahanra ne mɔ, na bɛyɛle nwolɛ ngyekyeleɛ wɔ me Ɛzonlenlɛ Sua ne anu.

¹⁶Nzinlii bɛnyianle adwenle ngakyile na bɛguale me duma ne anwo evinli. Bɛ nuhua ko biala ziale ɔ nzi hyele ye ahanra mrenya nee mraalɛ wɔ mekɛ mɔɔ ɛnee bɛnyia bɛ ti kɛmɔ bɛkpondɛ la ɔ nee bɛ rale na bɛrayɛle ye ahanra bieko.

¹⁷Ɔlua ɛhye ati, medame Ɛdɛnkɛma, mese: Bɛandie me edwɛkɛ. Mɔɔ bɛkyekyele bɛhyele ɔ bo kɛ bɛdwula bɛ mediema ahanra ne mɔ la, bɛtulu ye. Yemɔti bɛnlea, mame, medwula bɛmɛ kɛ bɛli bɛ ti; medwula bɛ kɛ bɛhɔwu konle nu, anwonyane nu, yɛɛ ɛhɔne nu. Medame Ɛdɛnkɛma a mese a. Debie mɔɔ mebava meayɛ bɛ la, ewiade ye anu, maanle biala mɔɔ kɛde la, ɛzulolɛ baha ye.

¹⁸Menli ne mɔɔ tulule me ngyekyeleɛ ne na bɛanli bɛ ɛwɔkɛ mɔɔ bɛbɔle wɔ me nyunlu la azo la, mebayɛ bɛ kɛ Dwuda nee Gyɛlusalɛm mgbanyima, suakunlu mbɔlɔba mgbanyinli, sɛlɛvolɛma yɛɛ menli mɔɔ wɔ maanle ne anu la kɔsɔɔti yɛle ɛnlankɛ ralɛ ne la. Bɛkpukele ɛnlankɛ ralɛ ne anu nwiɔ na bɛluale ye avinli bɛyɛle ngyekyeleɛ.

²⁰Mebaye bɛ meamaa bɛ kpɔvolɛma nee menli mɔɔ ɛlɛkpondɛ bɛ ahu bɛ la. Bɛ avunli bayɛ anwomanyunlu nloma nee ɛbɔ nu nane aleɛ.

²¹Mebaye Dwuda Belemgbunli Zɛdikaya nee ye mgbanyima meamaa bɛ kpɔvolɛma nee menli mɔɔ kpondɛ bɛ ahu bɛ la. Mebaye bɛ meamaa Babelonia belemgbunli ne ɛlɔnema mɔɔ kɛkala ɛhwe bɛ nzi la.

²²Bɛnlea, mebamaa adenle, na bɛbara suakpole ye azo bieko; bɛ nee ezuavolɛ ne baho, bɛbava suakpole ye na bɛado senle zolɛ bɛayela ye. Mebamaa Dwuda azuamgbole ne mɔ ayɛ azuadu. Medame Ɛdɛnkɛma a mese a.”