Read Nzema Gyɛ 35 Bible Online

Gyɛ 35 - Nzema bible

Gyɛ 35

¹Ɛdɛnkɛma dendɛle hilele me wɔ mekɛ mɔɔ Dwuda Belemgbunli Dwosaya ara nrenya Gyɛhɔyakem de ebia ne azo la. Ɔse,

²“Gyɛlɛmaya, kɔ Rilikabema ɛkɛ ne, ɛ nee bɛ ɛhɔdendɛ, na fa bɛ bɛla Ɛdɛnkɛma Ɛzonlenlɛ Sua ne ekpumgbunli ne mɔ ko anu, na maa bɛ nwanye bɛnlo.”

³Yemɔti menvale Habazenaya anlɔnra Gyeeyazanaya mɔɔ ɔ ze bɛfɛlɛ ye Gyɛlɛmaya la, ɔ mediema mrenya, ɔ mra mrenya ne mɔ amuala, yɛɛ Rilikabema amuala membale.

⁴Menvale bɛ mengɔle Yegedalaya ara nrenya, Nyamenle Kpɔmanvolɛ Heenan ekpumgbunli ne anu wɔ Ɛdɛnkɛma Ɛzonlenlɛ Sua ne anu. Sua ɛhye zua suakunlu mgbanyima ne mɔ sua ɛdeɛ ne, yɛɛ ɔwɔ Hyalɛm ara nrenya Meeyasaya mɔɔ le anlenkɛ sinzavolɛ la sua ɛdeɛ ne anwuma.

⁵Akee menvale agbɔ mɔɔ nwanye ɛyiyi bɛ tetɛkɛɛ la nee nwolɛ ahɔpo menziele bɛ nyunlu ɛkɛ, na menzele bɛ kɛ, “Bɛnlo nwanye.”

⁶Na bɛbuale kɛ, “Yɛnrɛnlo nwanye biala, ɔboalekɛ yɛ nlenya Rilikabe bɔle yɛ ze Dwɔnadabe kɔkɔ kɛ, ‘Bɛdabɛ o, bɛ bo zo amra o, biala mmafa nwanye ka ɔ nloa ɛlɛ;

⁷bɛmmasisi azua, bɛmmadua aleɛ, bɛmmadua vanye anzɛɛ bɛmmayɛ vanye egyinli. Bɛdɛnla ndanlɛ azua nu dahuu, amaa bɛadɛnla azɛlɛ ye azo bɛahyɛ.’

⁸Yɛyɛ tieyɛ yɛmaa yɛ ze Dwɔnadabe, (Rilikabe ara nrenya ne), wɔ edwɛkɛ ne mɔɔ ɔhanle ɔhilele yɛ kɛ yɛmmano nwanye ɛlɛ, yɛdayɛ o, yɛ mraalɛ o, yɛ mra mrenya nee yɛ mra mraalɛ o, yɛ muala yɛmmano,

⁹yɛɛ yɛmmasisi azua yɛda nu la anwo. Yɛnlɛ vanye egyinli, yɛnlɛ ɛya na yeayɛ ma.

¹⁰Yɛde ndanlɛ azua nu yɛɛ yɛyɛ mɔɔ yɛ ze Dwɔnadabe Zele yɛ la kɔsɔɔti.

¹¹Na mekɛ mɔɔ Babelonia Belemgbunli Nɛbukadenɛza ravale maanle ne la yɛzele kɛ, ‘Bɛmaa yɛhɔ Gyɛlusalɛm na anrɛɛ Babelonia nee Selea ɛlɔnema kɛgyegye yɛ.’ Yemɔti a yɛde Gyɛlusalɛm ɛnɛ la.”

¹²Akee Ɛdɛnkɛma dendɛle hilele Gyɛlɛmaya.

¹³Ɔse, “Medame Tumivolɛ Ɛdɛnkɛma, Yizilayɛ Nyamenle ne, mese: Kɔbiza Dwudama nee Gyɛlusalɛmma kɛ bɛnrɛde folɛ yɛɛ bɛnrɛdie me ne ɔ?

¹⁴Rilikabe ara nrenya Dwɔnadabe mɛla mɔɔ vale manle ɔ mra ne mɔ kɛ bɛmmano nza la, bɛli zolɛ toonwo a yeradwu ɛnɛ a. Ɔluakɛ bɛyɛ tieyɛ bɛmaa bɛ ze. Medame Ɛdɛnkɛma, medendɛ mehile bɛ toonwo, na bɛanva.

¹⁵Mezoa me sonvolɛma, Nyamenle kpɔmanvolɛma bɛ nwo mekɛ dɔɔnwo kɛ bɛraze bɛ kɛ, ‘Bɛgyakyi nyɛleɛ ɛtane ɛtane ne mɔ; awie biala ɛhakyi ye subane. Bɛmmakɔdi nyamenle gyɛne gyɛne nzi bɛsonle bɛ, na bɛkɛdɛnla azɛlɛ ne mɔɔ menvale memanle bɛ nee bɛ ze mɔ la azo.’ Noko bɛandie me ne.

¹⁶Rilikabe ara Dwɔnadabe amra ne mɔ ɛli edwɛkɛ mɔɔ bɛ ze hanle hilele bɛ la azo, na bɛmɛ, bɛandie me ne.

¹⁷Ɔlua ɛhye ati, medame Tumivolɛ Ɛdɛnkɛma, Yizilayɛ Nyamenle ne, mese, mebamaa munzule biala mɔɔ meha kɛ memaa yeado Dwudama nee Gyɛlusalɛmma amuala la ado bɛ, ɔboalekɛ medendɛ mehile bɛ, na bɛandie, mevɛlɛ bɛ, na bɛanzulo.”

¹⁸Na Gyɛlɛmaya zele Rilikabema kɛ, “Tumivolɛ Ɛdɛnkɛma, Yizilayɛ Nyamenle ne se, ‘Kɛmɔ bɛdie bɛ ze Dwɔnadabe ane, bɛli ye mɛla ne amuala azo, bɛyɛ mɔɔ ɔzele bɛ la amuala la ati,

¹⁹medame, Tumivolɛ Ɛdɛnkɛma, Yizilayɛ Nyamenle ne, mese: Rilikabe ara Dwɔnadabe abo zo ralɛ nrenya bazonle me dahuu.’ ”