Read Nzema Gyɛ 36 Bible Online

Gyɛ 36 - Nzema bible

Gyɛ 36

¹ Mɔɔ Dwuda Belemgbunli Dwosaya ara nrenya Gyɛhɔyakem lile ɛvolɛ nna wɔ ebia zo la Ɛdɛnkɛma hanle nrɛlaleɛ ɛhye hilele Gyɛlɛmaya.

²Ɔse, “Fa nwoma na bɔ ye Belemgbunli Dwosaya mekɛ zo kɛlɛ edwɛkɛ mɔɔ meha mehile wɔ, mɔɔ tia Yizilayɛ, Dwuda, yɛɛ maanle maanle kɔsɔɔti toonwo mɔɔ badwu ɛnɛ la.

³Ɔkɛyɛ kɛ saa Dwudama te kɛ mebazi meazɛkye bɛ la a, bɛ nuhua ko biala bagyakyi ɛtaneyɛlɛ, na meava bɛ amumuyɛ nee bɛ ɛtane ne mɔ meahyɛ bɛ.”

⁴Yemɔti Gyɛlɛmaya vɛlɛle Nilaya ara nrenya Bɛlɛke, na ɔhanle nrɛlaleɛ mɔɔ Ɛdɛnkɛma ɛha ɛhile ye la kɔsɔɔti ɔmanle Bɛlɛke hɛlɛle bɛ nwoma zo.

⁵Akee Gyɛlɛmaya zele Bɛlɛke kɛ, “Bɛdua me kɛ memmakɔ Ɛdɛnkɛma Ɛzonlenlɛ Sua ne anu bieko.

⁶Yemɔti ɔwɔ kɛ ɛkɔ ɛkɛ ne kenle mɔɔ bɛlɛkye ɛhɔne la, ɛkɔkenga Ɛdɛnkɛma nrɛlaleɛ ne mɔɔ meha memaa wɔhɛlɛ la ɛkile menli ne kɔsɔɔti. Eza kenga kile Dwudama mɔɔ vi bɛ azua zo kɛra la amuala.

⁷Ɔkɛyɛ kɛ Ɛdɛnkɛma badie bɛ modolɛ nzɛlɛlɛ ne, na biala ahwe ɔ nwo avi ɛtane nwo, ɔluakɛ ɛya mɔɔ Ɛdɛnkɛma ɛva wɔ menli ɛhye mɔ anwo la le kpole.”

⁸Na Nilaya ara nrenya Bɛlɛke yɛle debie biala, kɛmɔ Nyamenle Kpɔmanvolɛ Gyɛlɛmaya zele ye kɛ ɔgenga Ɛdɛnkɛma nrɛlaleɛ ne mɔɔ wɔ nwoma ne azo, wɔ Ɛdɛnkɛma Ɛzonlenlɛ Sua ne anu la.

⁹Dwuda Belemgbunli Dwosaya ara nrenya Gyɛhɔyakem lile ɛvolɛ nnu wɔ ebia zo la, ye siane ngɔnla ne anu, Gyɛlusalɛmma kɔsɔɔti nee menli mɔɔ vi Dwuda azua azua zo la rale Gyɛlusalɛm rahyele ɛhɔne zɛlɛle Ɛdɛnkɛma anwunvɔnezelɛ.

¹⁰Na Bɛlɛke gengale Gyɛlɛmaya edwɛkɛ ne mɔɔ wɔ nwoma ne anu la hilele menli mɔɔ rayiale Ɛdɛnkɛma Ɛzonlenlɛ Sua ne anu la amuala. Ɔgengale ye wɔ kɛlɛhɛlɛvolɛ Hyeefan ara nrenya Gɛmalaya ekpumgbunli ɛdeɛ ne anu a ɔhilele bɛ a. Sua ekpumgbunli zɔhane wɔ Ɛdɛnkɛma Ɛzonlenlɛ Sua ne Anlenkɛ Kpole Fofolɛ ne anwuma.

¹¹Mɔɔ bɛgengale Ɛdɛnkɛma edwɛkɛ ne amuala na Hyeefan anlɔnra Maekaya, Gɛmalaya ara nrenya ne dele la,

¹²ɔhɔle belemgbunli suakunlu ɛkɛ, kɛlɛhɛlɛvolɛ ne ekpumgbunli ɛdeɛ ne anu. Ɛnee suakunlu mgbanyima ne mɔ ɛyia ɛkɛ ne. Bɛmɛ a le Yilaehyama, kɛlɛhɛlɛvolɛ ne; Dɛlaya, ɔ ze a le Hyɛmaya; Ɛleneetan, ɔ ze a le Akebɔ; Gɛmalaya, ɔ ze a le Hyeefan; Zɛdikaya, ɔ ze a le Hananaya; yɛɛ mgbanyima ne mɔ amuala.

¹³Maekaya hanle edwɛkɛ mɔɔ ɔdele wɔ nwoma ne mɔɔ Bɛlɛke gengale hilele menli ne la anu la amuala hilele mgbanyima ne mɔ.

¹⁴Mgbanyima ne mɔ zoanle Gyɛhudae kɛ ɔhɔze Bɛlɛke kɛ ɔva nwoma ne mɔɔ ɔgengale nuhua edwɛkɛ ɔhilele menli ne la ɔrɛla. Gyɛhudae le Kuhyae angabɛnzo. Kuhyae wole Hyɛlimaya, Hyɛlimaya wole Nɛtanaya mɔɔ wole Gyɛhudae la. Na Bɛlɛke vale nwoma ne rale.

¹⁵Mgbanyima ne mɔ hanle hilele ye kɛ, “Tɛnla aze na kenga kile yɛ.” Yemɔti Bɛlɛke dɛnlanle aze na ɔgengale ɔhilele bɛ.

¹⁶Mɔɔ mgbanyima ne mɔ dele nwoma ne anu edwɛkɛ ne amuala la, ɛzulolɛ hanle bɛ na bɛnleɛnleanle bɛ nyunlu. Na bɛhanle bɛhilele Bɛlɛke kɛ, “Ɔwɔ kɛ edwɛkɛ ɛhye kɔsɔɔti kɔda belemgbunli anyunlu.”

¹⁷Bɛbizale Bɛlɛke kɛ, “Ɛnee kɛ ɛzile ɛ sa hanle edwɛkɛ ɛhye mɔ amuala ɛhɛlɛle ɛ? Ɛnee Gyɛlɛmaya a hanle ɛhye mɔ kɔsɔɔti hilele wɔ manle ɛhɛlɛle a?”

¹⁸Bɛlɛke buale bɛ kɛ, “Edwɛkɛ kpɔkɛ ko biala mɔɔ mehɛlɛ wɔ nwoma ye anu la vi Gyɛlɛmaya anloa anu.”

¹⁹Akee bɛzele ye kɛ, “Bɛlɛke, ɛ nee Gyɛlɛmaya bɛhɔkpondɛ ɛleka bɛvea. Bɛmmamaa awie nwu bɛ nzi adenle.”

²⁰Suakunlu mgbanyima ne mɔ gyakyile nwoma ne wɔ kɛlɛhɛlɛvolɛ Yilaehyama ekpumgbunli ne anu, na bɛwolole suakunlu ɛkɛ ne na bɛvale edwɛkɛ ne kɔsɔɔti bɛhɔbɔle belemgbunli ne amaneɛ.

²¹Belemgbunli ne zoanle Gyɛhudae manle ɔhɔvale nwoma ne wɔ kɛlɛhɛlɛvolɛ Yilaehyama ekpumgbunli ne anu rale, na ɔgengale ɔhilele belemgbunli nee mgbanyima mɔɔ ɛyia ɔ nwo ɛkɛ la amuala.

²²Siane ngɔnla ne anu a ɛhye zile a, yɛɛ mekɛ zɔhane le fɔsɛlɛ mekɛ, yemɔti ɛnee belemgbunli ne ɛradɛnla senle nwo wɔ suakunlu ɛkɛ ne, ye ɛyɛlɛ mekɛ sua ne anu.

²³Saa Gyɛhudae kenga edwɛkɛ ne ɛhonlone nsa mɔɔ kɔ nna la a, ɛnee belemgbunli ne ɛva dadeɛ ekyi bie ɛpɛ nwoma ne sinli ne mɔɔ edwɛkɛ ne mɔɔ bɛgenga la wɔ nu la ɛvuandi ɛdo senle ne mɔɔ ɛlɛsɔ la anu. Ɔyɛle ye zɔhane toonwo ɔyelale nwoma ne amuala.

²⁴Noko belemgbunli ne o, ye sonvolɛma ne mɔ o, biala anli nyane wɔ edwɛkɛ ne mɔɔ bɛdele la anwo, yɛɛ bɛanli nyane nretee bɔbɔ.

²⁵Ɛleneetan, Dɛlaya, yɛɛ Gɛmalaya bɔbɔ bodole belemgbunli ne kɛ ɔmmayela nwoma ne, noko belemgbunli ne andie bɛ edwɛkɛ.

²⁶Akee belemgbunli ne manle ɔ ra nrenya Gyɛlamile, Azeleɛle ara nrenya Sɛlaya, yɛɛ Abedili ara nrenya Hyɛlimaya adenle kɛ bɛhye kɛlɛhɛlɛvolɛ Bɛlɛke nee Nyamenle Kpɔmanvolɛ Gyɛlɛmaya, na Ɛdɛnkɛma vale bɛ veale.

²⁷Mɔɔ Dwuda Belemgbunli Gyɛhɔyakem yelale nwoma ne mɔɔ Gyɛlɛmaya hanle edwɛkɛ ne manle Bɛlɛke hɛlɛle zolɛ la, Ɛdɛnkɛma dendɛle hilele Gyɛlɛmaya.

²⁸Ɔse, “Gyɛlɛmaya, fa nwoma fofolɛ kɛlɛ edwɛkɛ ne mɔɔ ɛhɛlɛle ye alumua nwoma ɛdeɛ ne mɔɔ belemgbunli ne yelale ye la azo la kɔsɔɔti bieko wɔ zolɛ.

²⁹Ka kile Dwuda Belemgbunli Gyɛhɔyakem kɛ: Ɛdɛnkɛma se, ‘Wɔyela nwoma ɛhye na wɔbiza Gyɛlɛmaya kɛ, “Duzu ati a wɔhɛlɛ ye nuhua kɛ, kɛ ɔkɛyɛ biala la, Babelonia belemgbunli ne barazɛkye azɛlɛ ye na yeahu menli nee nyɛmoa mɔɔ wɔ zolɛ la amuala ɛ?”

³⁰Yemɔti, medame Ɛdɛnkɛma, mese: Ɛdawɔ Dwuda Belemgbunli Gyɛhɔyakem, ɛ bo zo sonla ɛnrɛdɛnla Devidi belemgbunli ebia ne azo ɛlɛ, yɛɛ bɛbavuandi wɔ funli ne bɛado ɛleka mɔɔ ewia bɔ ye alehyenlɛ nu na ɛbɔlɛ tɔ gua zolɛ aledwolɛ nu la.

³¹Mebadea wɔ, ɛ bo zo amra, nee wɔ sonvolɛma amuala wɔ bɛ amumuyɛ ti. Mebamaa munzule mɔɔ meha kɛ mebamaa yeado bɛdabɛ Gyɛlusalɛmma, yɛɛ Dwudama kɔsɔɔti la ado bɛ. Ɔboalekɛ mendendɛle mengilele bɛ, na bɛandie.’ ”

³²Akee Gyɛlɛmaya vale nwoma bieko manle Nilaya ara nrenya Bɛlɛke, kɛlɛhɛlɛvolɛ ne, na ɔhanle alumua edwɛkɛ ne mɔɔ wɔ nwoma ne mɔɔ Dwuda Belemgbunli Gyɛhɔyakem yelale ye la anu la amuala ɔhilele ye. Bɛlɛke hɛlɛle ɔ muala; eza ɔhɛlɛle edwɛkɛ ngakyile dɔɔnwo mɔɔ le kɛ ɛhendeɛ ne la ɔbokale nwo.