Read Nzema Gyɛ 37 Bible Online

Gyɛ 37 - Nzema bible

Gyɛ 37

¹ Babelonia Belemgbunli Nɛbukadenɛza ziele Gyɛhɔyakem ara nrenya Kɔnaya ahane na ɔvale Dwosaya ara nrenya Zɛdikaya ɔziele belemgbunli wɔ Dwuda.

²Na Zɛdikaya, ye sonvolɛma, yɛɛ Dwudama amuala, biala andie Ɛdɛnkɛma edwɛkɛ ne mɔɔ ɔluale Nyamenle Kpɔmanvolɛ Gyɛlɛmaya anwo zo ɔhanle ɔhilele bɛ la.

³Belemgbunli Zɛdikaya zoanle Hyɛlimaya ara nrenya Gyɛhukale nee Meeyasaya ara Sɛlɛvolɛ Zɛfanaya wɔ Gyɛlɛmaya anwo ɛkɛ manle bɛhɔzele ye kɛ, “Sɛlɛ Ɛdɛnkɛma yɛ Nyamenle ne maa yɛ.”

⁴Mekɛ zɔhane ɛnee Gyɛlɛmaya nee menli ne kɔ ba, ɛnee bɛtɛtole ye efiade.

⁵Yigyibiti belemgbunli ne ɛlɔnema ne yele bɛ nwo Yigyibiti, na mɔɔ Babelonia ɛlɔnema mɔɔ ɛnee ɛbɛnra ɛyia Gyɛlusalɛm kɛ bɛko bɛava la dele bɛ nganeɛ la, bɛhwenle bɛ nzi.

⁶Akee Ɛdɛnkɛma zele Gyɛlɛmaya kɛ,

⁷“Medame Ɛdɛnkɛma, Yizilayɛ Nyamenle ne, mese: Ka kile Dwuda Belemgbunli Zɛdikaya mɔɔ manle ɛyɛle nzɛlɛlɛ ne la kɛ, Yigyibiti belemgbunli ne ɛlɔnema ne mɔɔ rale baboa bɛ la ɛlɛsia ahɔ Yigyibiti, bɛ maanle nu.

⁸Babelonia ɛlɔnema ne bazia ara arateta suakpole ye bieko aho ava, na bɛado senle zolɛ bɛayela ye.

⁹Medame Ɛdɛnkɛma, mese: Bɛmmabɛlɛbɛla bɛ nwo bɛdwenle kɛ Babeloniama ne mɔ ɛnrɛra; bɛbara.

¹⁰Saa kanza bɔbɔ bɛfo Babeloniama anwo zo, bɛbɔ bɛ bo zo, na ɔka menli mɔɔ ɛbodɛboda gua azua nu la a, bɛbadwazo bɛava senle bɛarayela suakpole ye. Medame Ɛdɛnkɛma a mese a.”

¹¹Mɔɔ Yigyibiti belemgbunli ne ɛlɔnema ne ɛlɛba la, Babelonia ɛlɔnema ne vi Gyɛlusalɛm yele bɛ nwo.

¹²Yemɔti Gyɛlɛmaya dule ɔ bo wɔ Gyɛlusalɛm kɛ ɔkɔ Bɛngyaman maanzinli nu yeahɔlie ye afoa nu agyadeɛ ɛdeɛ ne.

¹³Mɔɔ ɔdwule Bɛngyaman Anlenkɛ Kpole ne anloa la, Hananaya anlɔnra nrenya Ayelaegya mɔɔ ɔ ze a le Hyɛlimaya la zɔle ye na ɔzele ye kɛ, “Ɛlɛnriandi wɔava ɛ nwo wɔahɔmaa Babeloniama!”

¹⁴Gyɛlɛmaya buale ye kɛ, “Ɔnle nɔhalɛ, menriandi menva me nwo mengɔmaa Babeloniama.” Noko Ayelaegya andie mɔɔ ɔhanle ɔhilele ye la. Ɔzɔle ye nu ɔ nee ye hɔle mgbanyima ne mɔ anyunlu.

¹⁵Mgbanyima ne mɔ vale Gyɛlɛmaya anwo ɛya kpole na bɛmanle bɛbole ye na bɛdole ye efiade wɔ kɛlɛhɛlɛvolɛ Dwɔnatan sua nu mɔɔ bɛva ɛkɛ ne bɛyɛ ɛleka mɔɔ bɛgua menli efiade la.

¹⁶Bɛvale Gyɛlɛmaya bɛhɔdole azɛlɛ bo efiade ɛdeɛ ne anu toonwo ɔhyɛle kpalɛ.

¹⁷Nzinlii Belemgbunli Zɛdikaya zoanle manle bɛhɔvale ye. Ɔvale ye ɔhɔle ahane na ɔbizale ye saa Ɛdɛnkɛma ɛha edwɛkɛ bie a. Gyɛlɛmaya buale kɛ, “Ɛhɛe, yeha edwɛkɛ. Ɛdɛnkɛma se bɛbaye wɔ bɛamaa Babelonia belemgbunli ne.”

¹⁸Eza Gyɛlɛmaya bizale Belemgbunli Zɛdikaya kɛ, “Duzu ɛtane a meyɛ wɔ, wɔ mgbanyima anzɛɛ menli ɛhye mɔ, mɔɔ yemɔti bɛhye me bɛdo efiade a?

¹⁹Na wɔ Nyamenle kpɔmanvolɛma mɔɔ hanle Nyamenle nrɛlaleɛ hilele wɔ la wɔ nienwu? Bɛmɛ a bɛzele wɔ kɛ Babelonia belemgbunli ne ɛnrɛva konle ɛnrɛradoa wɔ anzɛɛ azɛlɛ ɛhye azo amra a.

²⁰O Nana, mebodo wɔ, tie me. Tie me modolɛ, mmamaa bɛkɔto me efiade bieko wɔ kɛlɛhɛlɛvolɛ Dwɔnatan sua nu. Bɛto me efiade bieko a mebawu.”

²¹Yemɔti Belemgbunli Zɛdikaya manle bɛyele Gyɛlɛmaya bɛhɔdole suakunlu sinzavolɛma ne anwo ɛkɛ ne. Kenle ko biala bɛdie kpanwo kunguma ko wɔ menli mɔɔ to kpanwo la ɛkɛ ne bɛbɛlɛ ye. Bɛlɛ ye zɔhane toonwo ɔhɔkpulale mekɛ mɔɔ suakpole ne azo kpanwo kɔsɔɔti wiele la. Yemɔti Gyɛlɛmaya hale suakunlu sinzavolɛma ne mɔ anwo ɛkɛ.