Read Nzema Gyɛ 39 Bible Online

Gyɛ 39 - Nzema bible

Gyɛ 39

¹Mekɛ mɔɔ Dwuda Belemgbunli Zɛdikaya lile ɛvolɛ ngɔnla wɔ ebia ne azo la, ye siane bulu ne anu, Babelonia Belemgbunli Nɛbukadenɛza nee ye ɛlɔnema amuala ratetale Gyɛlusalɛm na bɛbɛnrale bɛyiale suakpole ne.

²Zɛdikaya nyianle ɛvolɛ bulu nee ko la, ye siane nna ne na ye kenle ngɔnla ne azo, bɛhanle suakpole ne bane ne mɔ bɛguale aze.

³Mɔɔ bɛvale Gyɛlusalɛm la, Babelonia belemgbunli ne mgbanyima ne mɔ kɔsɔɔti radɛnlanle Avinli Anlenkɛ Kpole ne anloa. Bɛmɛ a le Nɛgale Salizɛ, Samegaa Nibo, Relabesa Saasɛkem, yɛɛ Nɛgale Salizɛ.

⁴Dwuda Belemgbunli Zɛdikaya nee ye ɛlɔnema ne nwunle bɛ la, bɛ kɔsɔɔti bɛnriandile bɛguale ɛbɔ nu. Bɛdule bɛ bo nɔe ne bɛluale belemgbunli tola ne anu. Bɛzenle anlenkɛ kpole ne mɔɔ dua bane nwiɔ ne la anu, bɛluale bane ne avinli bɛvale bɛ ti bɛbɔle Dwɔdan Bɔnza ne anu lɔ.

⁵Na Babelonia ɛlɔnema ne voanle bɛ na bɛhɔhyele Zɛdikaya wɔ azɛlɛ sɛsɛ ne mɔɔ zua Gyɛleko la azo. Bɛvale ye bɛrɛlɛle Babelonia Belemgbunli Nɛbukadenɛza wɔ suakpole Relebela mɔɔ wɔ Heemate azɛlɛ zo la azo. Nɛbukadenɛza buale Zɛdikaya ndɛne ɛkɛ ne.

⁶Ɔhunle Zɛdikaya amra mrenya ne mɔ wɔ ɔdaye Zɛdikaya ɔ nyunlu ɛkɛ ne; eza ɔhunle Dwuda menli titile ne mɔ amuala.

⁷Akee ɔdudule Zɛdikaya anye, ɔguale ye anga kɛ bɛva ye bɛhɔ Babelonia.

⁸Babeloniama ne yelale belemgbunli ne awuke ne, bɛyelale ezuavolɛ ne mɔ azua ne mɔ na bɛbubule Gyɛlusalɛm bane ne mɔ.

⁹Na Babelonia ɛlɔnema kpanyinli Nɛbuzaladan vale menli mɔɔ hale suakpole ne azo, nee menli mɔɔ ɛva bɛ nwo ɛmaa ye dɛba la hɔle nlɔnu wɔ Babelonia.

¹⁰Ɔgyakyile Dwudama mɔɔ le ehyianvolɛma kpalɛ kpalɛ la bie mɔ wɔ maanle ne anu na ɔmanle bɛ vanye egyinli nee azɛlɛ.

¹¹Na Belemgbunli Nɛbukadenɛza zele sinzavolɛma Safohyenle Nɛbuzaladan kɛ,

¹²“Kpondɛ Gyɛlɛmaya abo zo, nea ye boɛ gyɛlɛɛnye, mmafa ɛ sa ɛka ye, na yɛ debie biala mɔɔ ɔkɛbiza wɔ la maa ye.”

¹³Yemɔti sinzavolɛma Safohyenle Nɛbuzaladan, Nɛbu Hyazeban, Nɛgale Salizɛ, yɛɛ Babelonia mgbanyima ne mɔ amuala

¹⁴zoanle manle bɛhɔvale Gyɛlɛmaya wɔ Nɛbuzaladan, sinzavolɛma sua nu ɛkɛ bɛhɔmanle bɛ. Bɛvale ye bɛwulale Hyeefan anlɔnra Gɛdalaya, Ahaekam ara nrenya ne asa anu kɛ ɔva ye ɔhɔ sua nu, na ɔnlea ye. Yemɔti ɔ nee menli ne mɔ dɛnlanle.

¹⁵Ɛdɛnkɛma dendɛle hilele Gyɛlɛmaya wɔ mekɛ mɔɔ ɔla efiade wɔ suakunlu sinzavolɛma ne ɛkɛ la. Ɔse,

¹⁶“Kɔ, kɔha kile Yibɛdemɛlɛke mɔɔ vi Sudan la kɛ Tumivolɛ Ɛdɛnkɛma, Yizilayɛ Nyamenle ne se: Kɛmɔ menzele ala la, mebamaa suakpole ɛhye abɔ, menrɛmaa ɔnrɛyɛ boɛ; kenle zɔhane, debie biala bawie ɛ nyunlu.

¹⁷Na medame Ɛdɛnkɛma, mebalie wɔ, bɛnrɛye wɔ bɛnrɛmaa menli mɔɔ ɛsulo bɛ la,

¹⁸ɔluakɛ, nɔhalɛ, mebalie wɔ, bɛnrɛhu wɔ. Ɛbavi ɛsalɛ wɔ konle ne anu, ɔboalekɛ wɔva ɛ rɛle wɔwula me nu. Medame Ɛdɛnkɛma a mese a.”