Read Nzema Gyɛ 4 Bible Online

Gyɛ 4 - Nzema bible

Gyɛ 4

¹Ɛdɛnkɛma se, “O Yizilayɛma, saa bɛkulo kɛ bɛsia bɛbatoa me a, ɛnee bɛzia bɛrɛla. Saa bɛfuandi ninyɛne mɔɔ le me kyibadeɛ la bɛgua, na bɛdi nɔhalɛ bɛmaa me,

²na bɛka ndane kɛ, ‘Meka Ɛdɛnkɛma’ nɔhalɛ nu, pɛlepɛle nu, nee tenlene nu a, ɛnee bɛhakye kɛ maanle maanle baze me kɛ menyila bɛ, na bɛbaye me ayɛlɛ.”

³ Ɔluakɛ Ɛdɛnkɛma ɛlɛka ahile menli mɔɔ wɔ Dwuda nee Gyɛlusalɛm la kɛ, “Dwudama nee Gyɛlusalɛmma, bɛzo bɛ ɛya ne, bɛmmadua ma ne wɔ mbowule nu.

⁴Bɛmɛ Dwudama nee Gyɛlusalɛmma, bɛdu bɛ nwo bɛmaa medame Ɛdɛnkɛma, na bɛde bɛ ahonle nu, anrɛɛ bɛ ninyɛmunli ne mɔ mɔɔ bɛyɛ la ati, me ɛya ne bazɔ kɛ senle, na awie biala ɛnrɛhola ye nua.”

⁵Bɛha ye wɔ Dwuda, na bɛbɔ ye nolo wɔ Gyɛlusalɛm kɛ, “Bɛwu aweɛne tendenle ne anu wɔ maanle ne anu; bɛdeɛdea nu kpole bɛha ye kɛ, ‘Bɛboɔboa bɛ nloa, bɛmaa yɛhɔ azuamgbole ne mɔ mɔɔ bɛbɔ nwolɛ bane la azo!’

⁶Bɛva Zayɔn adenle zo! Bɛnriandi bɛlie bɛ ngoane, bɛmmasi aze, ɔluakɛ me nee munzule nee ɛzɛkyelɛ vi sɔlɔ ɛlɛba.

⁷Awenade vi kpɔkɛ ne abo ɛvinde, maanle maanle sɛkyevo ne ɛzi nu; ɔvi ɛleka mɔɔ ɔwɔ la yevinde kɛ ɔkayɛ yeamaa bɛ azɛlɛ ne adɔ mgbane; bɛ azuamgbole ne mɔ babɔ, awie biala ɛnrɛha.

⁸Ɛhye ati bɛheda ɛrele, bɛzu bɛye awolɛ, ɔluakɛ Ɛdɛnkɛma ɛya kpole ne ɛtɛfile yɛ nwo zo.”

⁹Ɛdɛnkɛma se, “Kenle zɔhane, belemgbunli nee ye mgbanyima ɛnrɛnyia akɛnrazilɛ; edwɛkɛ ne bayɛ sɛlɛvolɛma ɛzulolɛ na yeazi Nyamenle kpɔmanvolɛma anwo.”

¹⁰Na menganle kɛ, “Aa Awulae Nyamenle, wɔbɛlɛbɛla menli ɛhye mɔ nee Gyɛlusalɛmma bɔkɔɔ! Ɛse, ‘Ɔbayɛ boɛ’, noko kɛkala, dadeɛ deda bɛ kɔmenzia.”

¹¹Mekɛ zɔhane bɛbaze menli ɛhye mɔ nee Gyɛlusalɛmma kɛ, “Anwoma wuluwulu bie vi ɛsɛlɛ ne azo lɔ ɛlɛbɔ ara me menli ne anwo zo. Ɔnle anwoma bɛtɛɛ mɔɔ ɛlɛba arahegye yeaye abonle yeavi ma nu a.

¹²Anwoma mɔɔ mebamaa yeara la anu yɛ se kpole kpalɛ. Medame Ɛdɛnkɛma a mefa meadea me menli ne a.”

¹³Bɛnlea, kpɔvolɛ ne ɛlɛba kɛ amungu. Ye konle ehwili ne mɔ le kɛ ahumuakyima, yɛɛ ye mgbɔnwɔ ne mɔ anwo yɛ ndɛ tɛla ahɔleɛ. Yɛminli ala ɛne! Yɛ bo zo ɛbɔ bɔkɔɔ!

¹⁴O Gyɛlusalɛm, ye ɛtane fi wɔ ahonle nu, amaa bɛalie wɔ ngoane. Bɛfa ɛtaneyɛlɛ adwenle bɛazie bɛ adwenle nu toonwo yeahɔdwu kenlenzu?

¹⁵Ɛnelɛ bie ɛlɛka ye wɔ Dan na ɔlɛbɔ munzule bie mɔɔ bara la nolo wɔ Yifelaem Boka.

¹⁶Bɛbɔ maanle maanle ne mɔ kɔkɔ kɛ ɔlɛba; bɛha bɛhile Gyɛlusalɛm kɛ kpɔvolɛma vi moa moa ɛlɛba. Bɛbadea bɛagua Dwuda azuamgbole ne mɔ anwo zo.

¹⁷Bɛbabɛnra bɛayia Gyɛlusalɛm kɛ sinzavoma mɔɔ ɛlɛsinza egyinli la, ɔboalekɛ bɛde me nwo atua. Medame Ɛdɛnkɛma a mese a.

¹⁸Dwuda, wɔ ndenle mɔɔ ɛlua nu nee wɔ nyɛleɛ a ɛmaa ɛhye ɛra ɛ nwo zo a. Wɔ awieleɛ ne ala ɛne, wɔ awieleɛ ɛyɛ ɛnwonle, na yeha wɔ dedee yeha wɔ ahonle mɔɔ la ɛ kunlu la.

¹⁹Nyane ne! Mengola nyane ne anu sɔ! Me ɛbolɛ! Me ɛbolɛ ɛlɛte! Me ahonle ɛlɛnriandi me kunlu. Mengola koonwu yɛ. Mete aweɛne tendenle ne ane, ɔkile kɛ konle ɛlɛba.

²⁰Anwubɛnyunlu doa anwubɛnyunlu, maanle ne ɛbɔ bɔkɔɔ. Arɛlevilɛ nu, me ndanlɛ azua ne mɔ ɛzɛkye; me mgbɛnu ndanlɛ ne mɔ ɛtete nzokanzoka.

²¹Menea konle fɛlɛnra ne meahɔdwu kenlenzu, na mendie aweɛne tendenle ne ane ɔhɔdwu kenlenzu?

²²Ɛdɛnkɛma se, “Me menli ne le ahɔnwɔne; bɛnze me. Bɛle ngakula ahoasea; bɛnlɛ ndelebɛbo. Bɛbe ɛtaneyɛlɛ nu, na kpalɛ, bɛnze ye yɛ.”

²³Meneanle azɛlɛ ye azo, na nea, ɛnee yedɔ mgbane, ɛhwee ɛnle zo; meneanle anwuma, na anwumaneamra anda.

²⁴Meneanle awoka ne mɔ azo, na nea, ɛnee bɛlɛkpusu, awoka ngyikyi ne mɔ amuala ɛlɛsi ngosi.[1]

²⁵Meneanle, na nea, sonla ɛnle ɛkɛ, nloma kɔsɔɔti ɛdu ɛhɔ.

²⁶Meneanle, na nea, azɛlɛ kɛnlɛma ne mɔɔ kye aleɛ la ɛhakyi ɛsɛlɛ; ye azuamgbole ne mɔ amuala ɛyɛ azuadu. ɔlua Ɛdɛnkɛma ɛya kpole ne ati.

²⁷Ɛdɛnkɛma se, “Mebazɛkye azɛlɛ ne, noko menrɛzɛkye ye bɔkɔɔ.

²⁸Azɛlɛ baye awolɛ; anwomanyunlu balu. Meha, mebɔ ye kpɔkɛ, menrɛze anwunvɔne yɛɛ menrɛhakyi me nloa.”

²⁹Saa bɛte ɛlɔne ɛkpɔnwɔkavoma nee ɛdatovoma ane a, suakpole biala azo amra bagua ɛbɔ nu; bie mɔ bagua mbowule nu; bie mɔ bavo ahɔgua awolɛ zo. Azuamgbole ne mɔ kɔsɔɔti badɔ mgbane, awie biala ɛnrɛdɛnla zolɛ bieko.

³⁰O Gyɛlusalɛm, wɔdɔ mgbane! Duzu ati a ɛheda arelemgbunli ɛdanlɛ kɔkɔlɛ ɛ? Duzu ati a ɛfa ezukoa nvutuke anwoneɛ ɛsiezie ɛ nwo, na ɛto ɛ nye anzi ɛ? Ɛlɛsiezie ɛ nwo mgbane! Wɔ kulovolɛma ɛkpo wɔ; bɛlɛkpondɛ wɔ bɛahu wɔ.

³¹Mendele ɛdeanlɛ kɛ raalɛ mɔɔ ɛvo awolɛ zo, mendele ɛkponlenlɛ kɛ raalɛ mɔɔ ɛlɛwo ye belamunli ralɛ la. Gyɛlusalɛm a ɛzu ɛha nu la, yedɛlɛ ɔ sa nu, ɔse, “Mewu O! Medɔ kɔdiawuma asa anu.”