Read Nzema Gyɛ 40 Bible Online

Gyɛ 40 - Nzema bible

Gyɛ 40

¹Mɔɔ Safohyenle Nɛbuzaladan dwulale Gyɛlɛmaya wɔ Releema la, Ɛdɛnkɛma dendɛle hilele ye. Mekɛ ne anu ɛnee Gyɛlɛmaya boka Gyɛlusalɛmma nee Dwudama mɔɔ bɛgua bɛ anga bɛ nee bɛ ɛlɛkɔ nlɔnu wɔ Babelonia la anwo.

²Sinzavolɛma safohyenle ne vale Gyɛlɛmaya hɔle ahane na ɔhanle ɔhilele ye kɛ, “Ɛdɛnkɛma, wɔ Nyamenle ne hanle kɛ ɔmaa munzule ɛhye ara azɛlɛ ye azo,

³amgba yemaa yeyɛ zɔhane na yeyɛ mɔɔ ɔzele la. Kɛmɔ bɛyɛle ɛtane bɛtiale Ɛdɛnkɛma na bɛandie ɔ ne la yɛɛ yemaa ɛhye ɛzi bɛ nwo zo a.

⁴Nea, melɛye anga ne mɔɔ gua ɛ sa la ɛnɛ kenle ye. Saa ɛnea na ɔle kpalɛ kɛ ɛ nee me kɛhɔ Babelonia a, ɛnee maa yɛhɔ na mebanlea wɔ gyɛlɛɛnye. Saa ɛnea noko na ɔnle kpalɛ kɛ ɛ nee me kɛhɔ Babelonia a, ɛnee mmaba. Nea, azɛlɛ ne amuala a la ɛkɛ ne tɛtɛtɛlɛlɛ la, tɛnla ɛleka biala mɔɔ ɛnea a ɔle kpalɛ na ɔfɛta kɛ ɛtɛnla la.”

⁵Nɛbuzaladan hanle hilele Gyɛlɛmaya kɛ, “Saa ɛkulo kɛ ɛtɛnla ɛke a ɛnee sia na ɛ nee Hyeefan anlɔnra Gɛdalaya, Ahaekam ara nrenya ne ɛhɔdɛnla. Gɛdalaya a Babelonia belemgbunli ne ɛyɛ ye amɛnlado kɛ ɔnlea Dwuda azuamgbole ne mɔ azo a. Ɛ nee ye nee menli ne ɛhɔdɛnla, anzɛɛ ɛleka biala mɔɔ ɛkulo kɛ ɛkɔtɛnla la, kɔdɛnla.” Akee ɔmanle Gyɛlɛmaya aleɛ nee ahyɛlɛdeɛ na ɔmanle ɔhɔle.

⁶Yemɔti Gyɛlɛmaya hɔle Ahaekam ara nrenya Gɛdalaya anwo ɛkɛ wɔ Mezepa, na ɔ nee ye nee menli mɔɔ bɛgyakyi bɛ azɛlɛ ne azo la hɔdɛnlanle.

⁷ Dwuda ɛlɔnema safohyenlema mɔɔ wɔ azua azua ne mɔ azo la nee menli ne dele kɛ Babelonia belemgbunli ne ɛva Ahaekam ara nrenya Gɛdalaya ɛyɛ amɛnlado wɔ maanle ne anu kɛ ɔnlea mrenya, mraalɛ nee ngakula, ehyianvolɛma kpalɛ kpalɛ mɔɔ wɔ maanle ne anu mɔɔ bɛanva bɛ bɛangɔ nlɔnu wɔ Babelonia la anwo zo.

⁸Yemɔti bɛ muala bɛrale Gɛdalaya ɛkɛ wɔ Mezepa. Safohyenlema ne mɔ ɛne: Nɛtanaya ara nrenya Yehyemeeyɛle, Kalia amra mrenya Dwoheenan nee Dwɔnatan, Tanehumɛte ara nrenya Sɛlaya, Yifae mɔɔ vi Nɛtɔfa la amra mrenya ne mɔ, yɛɛ Gyɛzanaya mɔɔ vi Meeyaka la.

⁹Hyeefan anlɔnra Gɛdalaya, Ahaekam ara nrenya ne hakyele bɛ nee bɛ menli ne mɔ kɛ, “Bɛmmasulo kɛ bɛkɛzonle Babeloniama. Bɛdɛnla maanle ye anu, bɛzonle Babelonia belemgbunli ne na ɔkɛyɛ boɛ ɔkɛmaa bɛ.

¹⁰Na mame, mebadɛnla Mezepa na meagyinla bɛ ti wɔ yɛ nee Babeloniama mɔɔ kɛra yɛ ɛkɛ la avinli. Bɛdɛnla bɛ azua mɔɔ bɛwɔ zo la azo, bɛboɔboa nwanye, vanye ma, yɛɛ ɔlivi nwole nloa bɛzie ɛkɛ.”

¹¹Dwuuma mɔɔ wɔ Mowabe, Amɔn, Yidɔm, yɛɛ maanle gyɛne gyɛne nu la dele kɛ Babelonia belemgbunli ne ɛmaa Dwuuma bie mɔ ɛha Dwuda maanle ne anu na yeyɛ Gɛdalaya amɛnlado kɛ ɔnlea bɛ nwo zo.

¹²Yemɔti Dwuuma mɔɔ ɛnee bɛvoa bɛ bɛhɔgua maanle gyɛne gyɛne zo la amuala ziale rale Dwuda azɛlɛ zo, wɔ Gɛdalaya anwo ɛkɛ wɔ Mezepa. Bɛraboɔboale nwanye nee vanye ma dɔɔnwo anloa.

¹³Akee Kalia ara nrenya Dwoheenan nee safohyenle mgbanyinli mɔɔ wɔ azua azua ne mɔ azo la

¹⁴rale Gɛdalaya anwo ɛkɛ wɔ Mezepa. Bɛbizale ye kɛ, “Asoo ɛze kɛ Amɔle Belemgbunli Beeyalese ɛzoa Nɛtanaya ara nrenya Yehyemeeyɛle kɛ ɔrahu wɔ?” Noko Gɛdalaya anlie bɛ edwɛkɛ ne anli.

¹⁵Akee Kalia ara nrenya Dwoheenan dule Gɛdalaya azukue wɔ Mezepa kɛ, “Maa me adenle maa mengɔngu Yehyemeeyɛle na awie ɛnrɛnwu ye. Duzu ati a ɔwɔ kɛ Yehyemeeyɛle ku wɔ, na Dwuuma mɔɔ ɛ nee bɛ de la kɔsɔɔti kɛbɔ asande, na bɛ bo zo kɛminli bɔkɔɔ ɛ?”

¹⁶Na Gɛdalaya buale Dwoheenan kɛ, “Mmakɔyɛ deɛ ɛhye, ɔluakɛ edwɛkɛ ne mɔɔ ɛlɛka ye wɔ Yehyemeeyɛle anwo la ɛnle nɔhalɛ.”