Read Nzema Gyɛ 41 Bible Online

Gyɛ 41 - Nzema bible

Gyɛ 41

¹ Ɛvolɛ ne ala anu, siane nsuu ne anu, Nɛtanaya ara nrenya Yehyemeeyɛle nee menli bulu bie rale Gɛdalaya anwo ɛkɛ wɔ Mezepa. Yehyemeeyɛle ɔ nlenya a le Yilaehyama mɔɔ vi belemgbunli ne abusua nu, na ɔle belemgbunli mgbanyima ne mɔ bie la. Ɔrale ye kɛ, mɔɔ bɛ muala bɛlɛdi debie la,

²Yehyemeeyɛle nee menli bulu ne dwazole Gɛdalaya anwo zo, bɛhwenle bɛ dadeɛ ne mɔ bɛhunle ye. Gɛdalaya a Babelonia belemgbunli ne ɛyɛ ye amɛnlado wɔ Dwuu maanle ne anu a.

³Eza Yehyemeeyɛle hunle Dwuuma mɔɔ nee Gɛdalaya de Mezepa la, nee Babelonia ɛlɔnema mɔɔ ɛnee wɔ ɛkɛ la amuala.

⁴Kɔdiawu edwɛkɛ ɛhye zile la, ye alehyenlɛ nu mɔɔ ɛnee awie ɛtɛtele kɛ bɛhu Gɛdalaya la,

⁵menli abulatwɛ vi Hyikɛm, Hyaelo, yɛɛ Samɛlea rale kɛ bɛlɛ ma azubɔdeɛ nee ɛyɛlɛ bɛba Ɛdɛnkɛma Ɛzonlenlɛ Sua ne anu. Ɛnee menli zɔhane mɔ ɛkpa bɛ kɛsa, ɛsuosua bɛ adɛladeɛ nu, na bɛbodɛboda bɛ nwo.

⁶Yehyemeeyɛle vale ɛzunlɛ vi Mezepa rayiale bɛ adenle. Ɔradole bɛ la ɔhanle ɔhilele bɛ kɛ, “Bɛrɛla bɛranlea Ahaekam ara nrenya Gɛdalaya.”

⁷Bɛrale suakpole ne azo la, Nɛtanaya ara nrenya ne nee menli bulu ne mɔɔ boka ɔ nwo la zɔle bɛ hunle bɛ na bɛvuandinle bɛ bɛguale bula nu.

⁸Na menli bulu mɔɔ boka abulatwɛ ne anwo la hanle hilele Yehyemeeyɛle kɛ, “Mmaku yɛ na yɛlɛ hwiiti, baale, ɔlivi nwole, yɛɛ wolɛ wɔ yɛ ɛya ne mɔ anu.” Yemɔti Yehyemeeyɛle angu bɛ amboka ɛhendeɛ ne mɔ anwo.

⁹Yehyemeeyɛle zoale menli mɔɔ ɔhunle bɛ la avunli ne mɔ amuala guale Belemgbunli Esa bula kpole ne mɔɔ ɔbɔle la anu ɔmanle ɔyile. Belemgbunli Esa bɔle bula ɛhye kɛ ɔfa yeabɔ ɔ nwo bane wɔ mekɛ mɔɔ Yizilayɛ Belemgbunli Beeyahya dwazole ɔ nwo zo kɛ ɔ nee ye ko la.

¹⁰Akee Yehyemeeyɛle hyele menli mɔɔ ɛnee ɛha Mezepa la amuala nee belemgbunli ne amra mraalɛ ne mɔ mɔɔ Babelonia sinzavolɛma Safohyenle Nɛbuzaladan vale bɛ wulale Ahaekam ara nrenya Gɛdalaya asa anu kɛ ɔzie bɛ la nuokɛ na ɔvale bɛ ɔzile nu kɛ ɔ nee bɛ kɔ Amɔn azɛlɛ zo.

¹¹Kalia ara nrenya Dwoheenan nee ɛlɔnema mgbanyinli ne mɔ dele ɛtane mɔɔ Yehyemeeyɛle ɛli kɔsɔɔti la.

¹²Yemɔti bɛvale bɛ ɛlɔnema ne amuala bɛdoale ye kɛ bɛ nee ye kaho, na bɛhɔdole ye wɔ Gebɛyɔn azule kpole ne anloa.

¹³Mɔɔ menli mɔɔ nee Yehyemeeyɛle lua la nwunle Dwoheenan nee ɛlɔnema mgbanyinli ne mɔ kɛ bɛlɛba la, bɛlile fɛlɛko.

¹⁴Yemɔti menli mɔɔ Yehyemeeyɛle ɛhye bɛ nuokɛ ɔ nee bɛ ɛlɛkɔ Amɔn la amuala ziale bɛ nzi doale Dwoheenan.

¹⁵Na Yehyemeeyɛle wolole Dwoheenan asa abo na ɔ nee ye ɛlɔnema ne mɔ anu mɔtwɛ pɛle lile Amɔn azɛlɛ zo.

¹⁶Akee Dwoheenan nee ɛlɔnema mgbanyima ne mɔ amuala vale menli mɔɔ Yehyemeeyɛle hunle Gɛdalaya wɔ Mezepa la ɔhyele bɛ nuokɛ la vi Gebɛyɔn ziale. Bɛle sogyama, mraalɛ, ngakula yɛɛ sonvolɛma.

¹⁷Na bɛhɔle bɛhɔdɛnlanle Kyemeham mɔɔ zua Bɛtelɛhɛm la. Bɛnyianle adwenle kɛ Babeloniama ati bɛkɔ Yigyibiti,

¹⁸ɔluakɛ ɛnee bɛzulo bɛ, ɔboalekɛ Yehyemeeyɛle ɛhu Gɛdalaya mɔɔ Babelonia belemgbunli yɛle ye amɛnlado kɛ ɔnlea maanle ne azo la.