Read Nzema Gyɛ 42 Bible Online

Gyɛ 42 - Nzema bible

Gyɛ 42

¹Akee Dwuda ɛlɔnema mgbanyima ne mɔ amuala, Kalia ara nrenya Dwoheenan, Hɛhyaya ara nrenya Azalaya,[10] yɛɛ menli ne amuala, mɔɔ lɛ bie nee mɔɔ ɛnlɛ bie la

²rahanle hilele Gyɛlɛmaya kɛ, “Gyɛlɛmaya, yɛbodo wɔ, yɛ mɔɔ yɛlɛbiza la maa yɛ. Sɛlɛ Ɛdɛnkɛma wɔ Nyamenle ne maa yɛdayɛ mɔɔ yɛha la, ɔluakɛ kɛmɔ ɛdawɔ ɛkola ɛnwu ye la, yɛdayɛ menli ɛwolaa ne, akee yɛwie, yɛha ekyi bie.

³Yemɔti sɛlɛ maa Ɛdɛnkɛma wɔ Nyamenle ne ɛhile yɛ adenle mɔɔ yɛva zo, nee debie mɔɔ ɔwɔ kɛ yɛyɛ la.”

⁴Na Gyɛlɛmaya buale bɛ kɛ, “Mede, bɛnlea, mebazɛlɛ Ɛdɛnkɛma bɛ Nyamenle ne meamaa bɛ, kɛmɔ bɛbiza la, na edwɛkɛ biala mɔɔ ɔkɛze kɛ menga mengile bɛ la, mebamaa bɛade; menrɛvea bɛ edwɛkɛ mɔɔ ɔkɛha la biala anu.”

⁵Na bɛhanle bɛhilele Gyɛlɛmaya kɛ, “Saa Ɛdɛnkɛma wɔ Nyamenle ne dua ɛ nwo zo ka edwɛkɛ kile yɛ na yɛanva a, Ɛdɛnkɛma wɔ Nyamenle ne ɛli nɔhalɛ daselɛ fɔɔnwo ɛtia yɛ.

⁶Saa ɔle kpalɛ o, ɔle ɛtane o, yɛbadie Ɛdɛnkɛma yɛ Nyamenle ne mɔɔ yɛlɛsoa wɔ ɔ nwo ɛkɛ la ane, amaa saa yɛtie ɔ ne a yeayɛ boɛ yeamaa yɛ.”

⁷Ye kenle bulu ne azo Ɛdɛnkɛma dendɛle hilele Gyɛlɛmaya.

⁸Na ɔvɛlɛle Kalia ara nrenya Dwoheenan, ɛlɔnema mgbanyima mɔɔ boka ɔ nwo la amuala, yɛɛ menli mɔɔ lɛ bie nee mɔɔ ɛnlɛ bie, mɔɔ ɔ nee bɛ lua la amuala na ɔhanle ɔhilele bɛ.

⁹Ɔzele bɛ kɛ, “Kɛ Ɛdɛnkɛma, Yizilayɛ Nyamenle ne, mɔɔ bɛzoanle me kɛ menva bɛ modolɛ mengɔndo ɔ nyunlu la se la ɛne:

¹⁰Saa bɛkɛdɛnla azɛlɛ ɛhye azo a, anrɛɛ mebalua bɛ na menrɛdu bɛ; mebamaa bɛ bo adila, na menrɛzɛkye bɛ, ɔluakɛ menlu me nwo kɛ medea bɛ memaa munzule ɛdo bɛ a.

¹¹Bɛmmasulo Babelonia belemgbunli ne mɔɔ bɛsulo ye la bieko. Bɛmmasulo ye, ɔluakɛ medame Ɛdɛnkɛma, me nee bɛ lua yɛɛ mebalie bɛ meavi ɔ sa nu.

¹²Mebaze bɛ anwunvɔne, amaa ɔdaye noko yeaze bɛ anwunvɔne na yeamaa bɛadɛnla bɛdabɛ bɛ azɛlɛ ye azo. Medame Ɛdɛnkɛma a mese a.

¹³“Na saa bɛka kɛ, ‘Yɛnrɛdɛnla azɛlɛ ɛhye azo,’ na bɛtu Ɛdɛnkɛma bɛ Nyamenle ne anloa bɛto, bɛka kɛ,

¹⁴‘Kyɛkyɛ, yɛkɔ Yigyibiti; ɛkɛ ne, yɛnrɛnwu konle, yɛnrɛde aweɛne ndendenle ne, yɛnrɛhyia aleɛ nwo, na ɛkɛ ne ala a yɛkadɛnla’ a,

¹⁵ɛnee bɛmɛ Dwudama mɔɔ ɛha la, bɛdie mɔɔ medame Ɛdɛnkɛma melɛka la. Medame Tumivolɛ Ɛdɛnkɛma, Yizilayɛ Nyamenle ne, mese: Saa bɛtu bɛ gyakɛ bɛtia Yigyibiti kɛ bɛkadɛnla ɛkɛ ne a,

¹⁶konle ne mɔɔ bɛsulo ye la bado bɛ wɔ Yigyibiti azɛlɛ zo; ɛhɔne ne mɔɔ bɛsulo ye la bazi bɛ nwo zo wɔ Yigyibiti, na ɛkɛ ne a bɛbawu a.

¹⁷Menli mɔɔ kɛye bɛ nyunlu kɛ bɛkɔ Yigyibiti bɛahɔdɛnla lɔ la kɔsɔɔti badɔ dadeɛ nloa anzɛɛ ɛhɔne nu anzɛɛ ewulenzane nu. Munzule mɔɔ mebamaa yeado bɛ la, bɛ nuhua ko bɔbɔ ɛnrɛha.

¹⁸“Medame Tumivolɛ Ɛdɛnkɛma, Yizilayɛ Nyamenle ne, mese: Saa bɛkɔ Yigyibiti a mebakpokpo me ɛya ne meagua bɛ nwo zo kɛ mɔɔ memkpokpole menguale Gyɛlusalɛmma anwo zo la. Bɛbazɔho ewula wɔ menli nye zo, bɛ nwo baha ɛzulolɛ, yɛɛ bɛ duma bayɛ ɛfenle nee amowa ala menli nloa. Bɛnrɛnwu ɛke bieko.”

¹⁹Gyɛlɛmaya zele bɛ kɛ, “Ɛdɛnkɛma ɛze bɛdabɛ Dwudama mɔɔ bɛha la kɛ: ‘Bɛmmakɔ Yigyibiti.’ Bɛnwu ye wienyi kɛ mebɔ bɛ kɔkɔ wɔ ɛnɛ kenle ye.

²⁰Bɛva bɛ ngoane bɛdo nzeleba na bɛminli,[11] ɔluakɛ bɛzoanle me wɔ Ɛdɛnkɛma bɛ Nyamenle ne ɛkɛ kɛ menzɛlɛ Ɛdɛnkɛma bɛ Nyamenle ne memaa bɛ, na edwɛkɛ biala mɔɔ ɔkɛze bɛ la bɛkɛli zolɛ.

²¹Na ɛnɛ, edwɛkɛ biala mɔɔ Ɛdɛnkɛma bɛ Nyamenle zoanle me kɛ menga mengile bɛ la meha mehile bɛ, noko bɛtɛtiele ɔ ne.

²²Ɔlua ɛhye ati bɛnwu ye kɛ bɛbawu dadeɛ nloa, ɛhɔne nu anzɛɛ ewulenzane nu wɔ azɛlɛ ne mɔɔ bɛkulo kɛ bɛkɔtɛnla zolɛ la azo.”