Read Nzema Gyɛ 43 Bible Online

Gyɛ 43 - Nzema bible

Gyɛ 43

¹Mɔɔ Gyɛlɛmaya wiele edwɛkɛ mɔɔ Ɛdɛnkɛma bɛ Nyamenle ne vale zoanle ye kɛ ɔhɔha ɔhile menli ne kɔsɔɔti la amuala ka la,

²Hohyaya ara nrenya Azalaya, Kalia ara nrenya Dwoheenan yɛɛ mgbanyizonlema bie mɔɔ wɔ nu la amuala hanle hilele ye kɛ, “Gyɛlɛmaya, ɛlɛbɔ adalɛ. Ɛdɛnkɛma yɛ Nyamenle ne anzoa wɔ kɛ ɛraze yɛ kɛ yɛmmakɔ Yigyibiti yɛkɔtɛnla ɛkɛ.

³Nilaya ara nrenya Bɛlɛke ala a ɛli ɛwula wɔ a, amaa wɔaye yɛ wɔamaa Babeloniama wɔamaa bɛahu yɛ anzɛɛ bɛavula yɛ bɛahɔ nlɔnu wɔ Babelonia.”

⁴Yemɔti Dwoheenan, ɛlɔnema mgbanyima ne mɔ amuala, yɛɛ menli ne kɔsɔɔti andie Ɛdɛnkɛma ane kɛ bɛkɛdɛnla Dwuda maanle nu.

⁵ Dwoheenan nee ɛlɔnema mgbanyima ne mɔ amuala vale Dwudama mɔɔ ɛha, na bɛvi maanle maanle mɔɔ bɛnriandile bɛhɔguale nu la anu bɛzia bɛra la amuala hɔle Yigyibiti.

⁶Menli ne mɔ ɛne: Mrenya, mraalɛ, ngakula, arelemgbunli amra mraalɛ, menli mɔɔ ɛlɔnema Kpanyinli Nɛbuzaladan vale bɛ gyakyile Ahaekam ara nrenya Gɛdalaya, Hyeefan anlɔnra ne kɛ ɔzie bɛ la, medame Gyɛlɛmaya, yɛɛ Nilaya ara nrenya Bɛlɛke.

⁷Bɛkpole kɛ bɛnrɛdie Ɛdɛnkɛma ane, na bɛradɛnlanle Yigyibiti wɔ suakpole Tapanehizi azo.

⁸Akee Ɛdɛnkɛma zele Gyɛlɛmaya wɔ Tapanehizi kɛ,

⁹“Sesa awolɛ mgbole wulowula belekese bama ne mɔɔ wɔ Yigyibiti belemgbunli suakunlu ne mɔɔ wɔ Tapanehizi la anuhɔlɛ ne la anu wɔ Dwudama anye zo.

¹⁰Se bɛ kɛ, Tumivolɛ Ɛdɛnkɛma, Yizilayɛ Nyamenle ne se: Bɛnlea, mebazoa meamaa bɛahɔvɛlɛ Babelonia belemgbunli, me sonvolɛ Nɛbukadenɛza bɛara. Ɔbava ye belemgbunli ebia ne yearazie awolɛ ɛhye mɔ azo na yeazi ye belemgbunli ndanlɛ sua zolɛ.

¹¹Ɔbaradua Yigyibitima kakɛ. Bɛdabɛ mɔɔ bɛfɛta ewulenzane la, bɛbawu ewulenzane nu; bɛdabɛ mɔɔ ɔwɔ kɛ bɛkye bɛ nuokɛ la, bɛbahye bɛ nuokɛ, yɛɛ bɛdabɛ mɔɔ ɔwɔ kɛ bɛwu dadeɛ nloa la, bɛbawu dadeɛ nloa.

¹²Ɔbasesa Yigyibiti mmonle ne mɔ na yeatoto senle bɛ awozonle ɛzonlenlɛ azua ne mɔ anu, yeayela bɛ na yeava mmonle ne mɔ yeahɔ. Ɔbakpoa Yigyibiti evinli ne kɛ mboaneneavolɛ tudu ye tɛladeɛ nu ɛzozoa la, na ɔbazia yeahɔ anzonudwolɛ nu.

¹³Ɔbazɛkye awolɛ mpila ngakyedeɛ ne mɔ mɔɔ wɔ Hɛleɔpɔlese mɔɔ wɔ Yigyibiti la. Eza ɔbayela Yigyibiti awozonle ɛzonlenlɛ azua ne mɔ.”