Read Nzema Gyɛ 44 Bible Online

Gyɛ 44 - Nzema bible

Gyɛ 44

¹Ɛdɛnkɛma edwɛkɛ mɔɔ ɔhanle ɔhilele Gyɛlɛmaya, mɔɔ fane Dwuuma kɔsɔɔti mɔɔ de Yigyibiti azɛlɛ zo wɔ Megedɔlo, Tapanehizi, Mɛmefese, yɛɛ Yigyibiti nyiakɛ la ɛne.

²Ɔse, “Medame Tumivolɛ Ɛdɛnkɛma, Yizilayɛ Nyamenle ne, mese: Bɛnwu munzule kpole mɔɔ memaa yedo Gyɛlusalɛmma nee Dwuda azuamgbole ne mɔ la. Bɛnlea, ɛnɛ bɛyɛ azuadu, yɛɛ awie ɛnde biala azo,

³ɔboalekɛ bɛyɛle amumuyɛ na bɛhanle me ɛya. Bɛkpunle ɛyɛlɛ bɛmanle nyamenle gyɛne gyɛne mɔɔ bɛmɛ o, bɛdabɛ o, bɛ ze mɔ o, biala ɛnze bɛ la na bɛzonlenle bɛ.

⁴Menzoanle me sonvolɛma, Nyamenle kpɔmanvolɛma amuala bɛ nwo ɛkɛ ne dahuu kɛ, ‘O, bɛmmayɛ bɛkyi ninyɛne ɛhye mɔ na mekyi!’

⁵Noko bɛandie yɛɛ bɛangyakyi bɛ amumuyɛ ne mɔ ɛyɛlɛ; bɛhɔle zolɛ bɛkpunle ɛyɛlɛ bɛmanle nyamenle gyɛne gyɛne.

⁶Zɔhane ati memkpokpole me ɛya ne amuala menguale Dwuda azuamgbole ne mɔ azo yɛɛ Gyɛlusalɛm guabile ne mɔ azo, na bɛdɔ mgbane, bɛyɛ azuadu toonwo a yeradwu ɛnɛ a.

⁷“Na kɛkala, medame Tumivolɛ Ɛdɛnkɛma, Yizilayɛ Nyamenle ne, mebiza bɛ kɛ: Duzu ati a bɛbɔ munzule bɛva na bɛkulo kɛ bɛminli mrenya nee mraalɛ, bɛ nlɔma nee bɛ ngakula mɔɔ wɔ Dwuda na bɛnrɛnyia bɛ bo zo amra ɛ?

⁸Duzu ati a bɛfa bɛ sa anloa gyima bɛka me ɛya, bɛkpu ɛyɛlɛ bɛmaa Yigyibiti ɛke mɔɔ bɛradɛnla la nyamenle ne mɔ na bɛsonle bɛ, amaa meazɛkye bɛ na bɛayɛ amowa nee agolobɛnwo menli wɔ maanle maanle mɔɔ wɔ ewiade la avinli ɛ?

⁹Bɛ rɛle ɛvi bɛ ze mɔ amumuyɛ ne, Dwuda arelemgbunli nee bɛ ye mɔ amumuyɛ ne yɛɛ bɛdabɛ mumua ne nee bɛ ye mɔ amumuyɛ ne mɔɔ bɛyɛle wɔ Dwuda azɛlɛ zo nee Gyɛlusalɛm guabile ne mɔ azo la ɔ?

¹⁰Bɛtɛbɛlɛle bɛ nwo aze bɛtɛmanle me toonwo a yeradwu ɛnɛ kenle ye a, yɛɛ bɛtɛsulole me, bɛtɛdile me mɛla nee me ngyehyɛlɛ mɔɔ menvale memanle bɛ nee bɛ ze mɔ la azo.

¹¹“Yemɔti, medame Tumivolɛ Ɛdɛnkɛma, Yizilayɛ Nyamenle ne, mese: Bɛ ɛtane ne ati mebava me nye meawula bɛ nyunlu na meabɔ Dwuda bɔkɔɔ.

¹²Mebamaa bɛazɛkye Dwudama mɔɔ ɛha, mɔɔ ɛva ɛzie bɛ nyunlu kɛ bɛkɔ bɛahɔdɛnla Yigyibiti la amuala. Bɛ muala bɛbawu bɛagua Yigyibiti. Bɛ muala bɛbawu konle nee ɛhɔne nu. Bɛdabɛ mɔɔ bɛlɛ bie nee bɛdabɛ mɔɔ bɛnlɛ bie la amuala bawu dadeɛ nloa nee ɛhɔne nu. Bɛbayɛ mgbane wɔ menli nye zo, bɛayɛ amowa wɔ menli nloa.

¹³Mebadea bɛdabɛ mɔɔ bɛde Yigyibiti la kɛmɔ medea Gyɛlusalɛm la. Mebava konle, ɛhɔne anzɛɛ ewulenzane a meadea bɛ a,

¹⁴amaa Dwudama mɔɔ ɛha la anu bie mɔɔ de Yigyibiti azɛlɛ zo la anvi ɛsalɛ. Bɛ nye ɛnrɛnwu Dwuda ɛlɛ, kɛmɔ bɛkpondɛ kɛ akee bɛsia bɛkɔ lɔ la, kyesɛ menli ekyi mɔɔ nriandile radanenle Dwuda la ala.”

¹⁵Na mrenya mɔɔ ze kɛ bɛ ye mɔ ɛkpu ɛyɛlɛ ɛmaa nyamenle gyɛne gyɛne, nee mraalɛ mɔɔ ɛnee gyigyi ɛkɛ ne la amuala, menli dɔɔnwo kpalɛ, boka Yizilayɛma mɔɔ de Yigyibiti nyiakɛ la hanle hilele Gyɛlɛmaya kɛ,

¹⁶“Gyɛlɛmaya, edwɛkɛ ne mɔɔ wɔlua Ɛdɛnkɛma duma nu wɔha wɔhile yɛ la, yɛnrɛdie.

¹⁷Yɛbayɛ debie biala mɔɔ yɛvua kɛ yɛyɛ la. Yɛbakpu ɛyɛlɛ yɛamaa Anwomanyunlu Belemgbunli Raalɛ ne, na yɛagua nza yɛaye ɛdɛne yɛamaa ye, kɛmɔ yɛ nee yɛ ze mɔ, yɛ arelemgbunli nee maanle mgbanyima yɛyɛle ye wɔ Dwuda azuamgbole zo nee Gyɛlusalɛm guabile ne mɔ azo la. Ɔluakɛ mekɛ zɔhane yɛnyianle aleɛ dɔɔnwo, yɛkpazile, yɛɛ munzule biala ando yɛ.

¹⁸Noko sumunli kɛ yɛduale kɛ yɛnrɛkpu ɛyɛlɛ yɛnrɛmaa Anwomanyunlu Belemgbunli Raalɛ ne yɛɛ yɛnrɛgua nza yɛnrɛye ɛdɛne yɛnrɛmaa ye la, yɛhyia debie biala anwo yɛɛ yɛ menli ne ɛwie wu wɔ konle nee ɛhɔne nu.”

¹⁹Mraalɛ ne mɔ hanle kɛ, “Mekɛ mɔɔ ɛnee yɛkpu ɛyɛlɛ, yɛgua nza yɛye ɛdɛne yɛmaa Anwomanyunlu Belemgbunli Raalɛ ne, na yɛto keeki mɔɔ yɛyɛ yɛmaa ɔsɔho ye yɛmaa ye la, yɛ hu mɔ anye liele yɛ nyɛleɛ ne anwo.”

²⁰Gyɛlɛmaya hanle hilele mrenya nee mraalɛ mɔɔ buale ye edwɛkɛ ne anwo zɛhae la kɛ,

²¹“Bɛdwenle kɛ Ɛdɛnkɛma arɛle ɛvi ɛyɛlɛ ne mɔɔ bɛkpunle ye wɔ Dwuda azuamgbole ne mɔ azo nee Gyɛlusalɛm guabile ne mɔ azo la ɔ? Bɛ nee bɛ ze mɔ, bɛ arelemgbunli, bɛ mgbanyima, yɛɛ maanle ne anu amra a bɔle zɔhane ɛbɛla ne a. Ɛdɛnkɛma tɛkakye ye kɔsɔɔti.

²²Ɛdɛnkɛma ɛnrɛdɛnla ɛnrɛnlea bɛ ninyɛndane ɛyɛlɛ nee bɛ bɛkyi ninyɛne ne mɔ mɔɔ bɛyɛle la bieko. Yemɔti a bɛ azɛlɛ ne ɛdɔ mgbane, ɛyɛ ewula, ɛyɛ amowa, mɔɔ awie ɛnde zolɛ, kɛmɔ kɛkala ɔde la.

²³Bɛyɛle ɛtane kɛ bɛkpunle ɛyɛlɛ na bɛandie Ɛdɛnkɛma ane, bɛanli ye mɛla nee ye ngyehyɛlɛ ne mɔ azo yɛɛ bɛambu ye daselɛlilɛ ne mɔ la, yemɔti a munzule ɛhye ɛdo bɛ toonwo yeradwu ɛnɛ la.”

²⁴Gyɛlɛmaya zele menli ne nee mraalɛ ne mɔ kɔsɔɔti kɛ, “Dwudama mɔɔ de Yigyibiti la, bɛdie mɔɔ Ɛdɛnkɛma ɛlɛka ahile bɛ la.

²⁵Tumivolɛ Ɛdɛnkɛma, Yizilayɛ Nyamenle ne se: Bɛ nee bɛ ye mɔ bɛha kɛ bɛsonle Anwomanyunlu Belemgbunli Raalɛ ne. Bɛbɔ kpɔkɛ kɛ bɛbakpu ɛyɛlɛ bɛamaa ye, bɛagua nza bɛaye ɛdɛne bɛamaa ye. Bɛ mo. Bɛhɔ zolɛ bɛli bɛ ɛwɔkɛbɔlɛ ne mɔ azo.

²⁶Akee bɛdabɛ Dwudama mɔɔ bɛde Yigyibiti la amuala, bɛdie. Medame Ɛdɛnkɛma, meka medame me ngome me duma kpole ne kɛ Dwudanli biala mɔɔ de Yigyibiti la ɛnrɛbɔ me duma ɛnrɛze kɛ, ‘Mekɛ ala mɔɔ Ɛdɛnkɛma Nyamenle de aze la’, ɛlɛ.

²⁷Bɛnlea, bɛnrɛkpazi ɛlɛ, munzule ala a bado bɛ a. Bɛdabɛ Dwudama mɔɔ bɛpɛ bɛli Yigyibiti la amuala bawu konle nee ɛhɔne nu kɔkpula kɛ bɛ bo zo kɛbɔ bɔkɔɔ la.

²⁸Bɛdabɛ ekyi bie a bɛbavi ɛsalɛ wɔ konle nu na bɛvi Yigyibiti bɛazia bɛara Dwuda a. Na akee Dwudama mɔɔ ɛha, mɔɔ rale kɛ bɛbadɛnla Yigyibiti na bɛanyia ngoane la anwu bɛmɛ nee mame, nuhua ko mɔɔ ye edwɛkɛ le nɔhalɛ la.

²⁹Medame Ɛdɛnkɛma, mebamaa ɛhye ayɛ sɛkɛlɛneɛ amaa bɛ, mebadea bɛ wɔ ɛke ala meamaa bɛanwu kɛ me edwɛkɛ gyi kpundii kɛ munzule ala a bado bɛ a.

³⁰ Mebaye Yigyibiti Belemgbunli Hɔfela meamaa ye kpɔvolɛma mɔɔ kpondɛ ye ahu ye la. Mebayɛ ye kɛ menyɛle Dwuda Belemgbunli Zɛdikaya mɔɔ menyele ye memanle ye kpɔvolɛ Babelonia Belemgbunli Nɛbukadenɛza mɔɔ ɛnee ɛlɛkpondɛ ye ahu ye la.”