Read Nzema Gyɛ 46 Bible Online

Gyɛ 46 - Nzema bible

Gyɛ 46

¹Ɛdɛnkɛma hanle maanle maanle ne mɔ anwo edwɛkɛ hilele Gyɛlɛmaya.

²Ɔbɔle ɔ bo wɔ Yigyibiti anwo zo, ɔhanle Belemgbunli Niko ɛlɔnema mɔɔ ɛnee gua Azule Yufileti ne anloa wɔ Kaakimehye, na Babelonia Belemgbunli Nɛbukadenɛza ɛli bɛ nwo zo konim wɔ mekɛ mɔɔ Dwosaya ara nrenya Gyɛhɔyakem ɛli ɛvolɛ nna wɔ Dwuda belemgbunli ebia ne azo la anwo edwɛkɛ.

³“Bɛsesa bɛ enyinlike ne mɔ na bɛhɔ konle nloa!

⁴Bɛziezie mgbɔnwɔ ne mɔ, O mgbɔnwɔkavoma, bɛvo bɛ mgbɔnwɔ ne mɔ azo! Bɛva bɛ mbulalɛ ahyɛlɛ na bɛrasolo! Bɛzi bɛ atwɛ ne mɔ, bɛva bɛ mbulahɛba ne mɔ bɛgyela!

⁵“Ɛdɛnkɛma se: Duzu a menwu ye a? Ɛzulolɛ ɛha bɛ, ɛmaa bɛzia bɛ nzi. Bɛ ɛlɔnema ne ɛli akoatɔ, bɛgua ndwɛlɛ aze, bɛndo bɛ nye bɛ nzi, ɛzulolɛ wɔ ɛleka biala.

⁶Mɔɔ anwo yɛ ndɛ la ɛngola nriandi; ɛlɔne nu katakyiema ɛnvi ɛsalɛ. Bɛdu koti na bɛdu bɛgua Azule Yufileti ne anloa wɔ sɔlɔ lɔ.

⁷Nwane a ɛlɛmaa ɔ nwo zo kɛ Azule Naele ne, kɛ azule mɔɔ ɛyi ɛbu aze la?

⁸Yigyibiti dwazo kɛ azule Naele, ɔle kɛ azule mɔɔ ɛyi ɛbu aze la. Ɔhanle kɛ, ‘Mebayi meava ewiade; mebazɛkye azuamgbole nee zolɛ ezuavolɛ.’

⁹O mgbɔnwɔ, bɛluo, O konle ehwili, bɛbili! Bɛva ɛlɔnema ne bɛhɔ: Sudan nee Lebea mrenya mɔɔ dedɛ enyinlike, Ledea mrenya mɔɔ ze ɛda to la.”

¹⁰Kenle ne le medame Tumivolɛ Awulae Nyamenle me kenle, ɔle nzenralɛlilɛ kenle; mebali me kpɔvolɛma nzenralɛ. Dadeɛ bali bɛ antɛnlɛma; bɛ mogya bavɔ ye soonwu, ɔluakɛ Tumivolɛ Awulae Nyamenle bɔ azu wɔ sɔlɔ maanle nu, wɔ Azule Yufileti ne anloa.

¹¹O Yigyibitima, bɛhɔ Geleade bɛhɔkpondɛ ayile! Bɛyɛ ayile dɔɔnwo, noko bɛtɛtele kpɔkɛ.

¹²Maanle maanle ɛde wɔ anyiemgbabɔlɛ, awie biala ɛde wɔ ɛzunlɛ, ɔluakɛ ɛlɔnenli katakyie ɛfofo ɔ gɔnwo anwo zo; bɛ mu nwiɔ bɛdu bɛgua.

¹³ Babelonia Belemgbunli Nɛbukadenɛza ɛzɛkyelɛ mɔɔ ɔba yearazɛkye Yigyibiti la anwo edwɛkɛ mɔɔ Ɛdɛnkɛma hanle hilele Gyɛlɛmaya la ɛne:

¹⁴“Bɛha ye wɔ Yigyibiti, na bɛbɔ ye nolo wɔ Megedɔlo; bɛbɔ ye nolo wɔ Mɛmefese yɛɛ Tapanehizi, bɛha kɛ, ‘Bɛdwazo bɛboɔboa bɛ nwo, ɔluakɛ bɛ muala bɛbawu konle nu.’

¹⁵Duzu ati a bɛ amonle kpole Epese ɛnriandi ɛ? Duzu ati a bɛ ɛnlankɛ nyinli ananze ne angola gyinla ɛ? ɔboalekɛ Ɛdɛnkɛma dele ye aze.

¹⁶Wɔ ɛlɔnema dɔɔnwo ne ɛdu koti, ɛdu ɛgua; bɛka bɛkile bɛ nwo ngoko kɛ, ‘Bɛdwazo, bɛmaa yɛzia yɛdoa yɛ menli ne, yehɔ maanle mɔɔ bɛwole yɛ nu la anu, yɛnriandi mɔɔ sisi yɛ la dadeɛ ne.’

¹⁷“Bɛvɛlɛ Yigyibiti belemgbunli ne ‘Belemgbunli anwo alɛra mɔɔ maa ye mekɛ kpalɛ kpa ɔ ti a.’

¹⁸Medame mɔɔ me duma a le Tumivolɛ Ɛdɛnkɛma la, mele Belemgbunli, na mese: Meka, meka kɛ, awie mɔɔ kɛzua wɔ la le kɛ yezua Boka Teebɔ wɔ awoka avinli anzɛɛ Boka Kamɛle wɔ nyevile nloa.

¹⁹O Yigyibitima, bɛboɔboa bɛ nwo na bɛ nee bɛ kɔ nlɔnu! Mɛmefese badɔ mgbane, ɔbabɔ, awie ɛnrɛdɛnla zo.

²⁰Yigyibiti le ɛnlankɛ belɛ kɛnlɛma, na tunli vi sɔlɔ ɛra banlo ye.

²¹Ɛlɔnema bɔbɔ mɔɔ yebɔ bɛ ɛkpa la le kɛ nlankɛ mralɛ dɔlera. Ɛhɛe, bɛ muala bɛnriandi bɛzia bɛ nzi; bɛangyinla bɛ gyakɛ anu, ɔluakɛ bɛ awieleɛ mekɛ ɛdwu, bɛ ndeanlɛ mekɛ ɛdwu.

²²Yigyibiti twolo kɛ ɛwɔlɛ mɔɔ ɛlɛtwenle ɔ nwo ahɔ la, ɔluakɛ ye kpɔvolɛma tia kilikili ba ɔ nwo zo; bɛfa akuma bɛba ɔ nwo zo kɛ menli mɔɔ bu mbaka la.

²³Bɛbazɛkye ye kpɔkɛmile ne mɔɔ bɛwolo nu a ɔnwolo la, ɔboalekɛ bɛzonle bɛtɛla abɛbɛ, bɛtia bɛ a bɛnnwu bɛ nloa.

²⁴Yigyibitima anyunlu bagua aze, bɛbaye bɛ bɛamaa menli bie mɔɔ vi sɔlɔ la. Medame, Ɛdɛnkɛma a mese a.”

²⁵Tumivolɛ Ɛdɛnkɛma, Yizilayɛ Nyamenle ne zele kɛ, “Mebadea Tibise bozonle Amɔn ne, Yigyibiti belemgbunli ne, Yigyibitima yɛɛ bɛ awozonle ne mɔ. Mebadea Yigyibiti belemgbunli ne nee menli mɔɔ ɛva bɛ rɛle ɛwula ye nu la.

²⁶Mebaye bɛ meamaa menli mɔɔ kpondɛ bɛ ahu bɛ la. Mebava bɛ meamaa Babelonia Belemgbunli Nɛbukadenɛza nee ye safohyenlema ne. Nzinlii, menli badɛnla Yigyibiti bieko kɛ anrɛɛ mɔmoane ɔde la. Medame, Ɛdɛnkɛma a mese a.”

²⁷ “O me akɛlɛ Gyekɔbo, mmasulo. O Yizilayɛ, mmamaa wɔ ahonle tu. Mebalie wɔ meavi moa moa lɔ meara. Mebalie ɛ bo zo amra meavi ɛleka mɔɔ bɛhyele bɛ nuokɛ bɛhɔle la meara. Gyekɔbo bazia ara na ɔ nzo nu adwo ye, ɔ nwo badɔ ye, awie ɛnrɛha ye ɛzulolɛ.

²⁸O me akɛlɛ Gyekɔbo, mmasulo, me nee wɔ lua. Mebazɛkye maanle maanle mɔɔ menvoanle wɔ memanle ɛhɔle nu la kɔsɔɔti, na wɔmɔ, menrɛzɛkye wɔ. Mebazuzu meadea wɔ, ɛnrɛva ɛ nwo dwɔɔ. Medame, Ɛdɛnkɛma a mese a.”