Read Nzema Gyɛ 47 Bible Online

Gyɛ 47 - Nzema bible

Gyɛ 47

¹ Ɛdɛnkɛma edwɛkɛ mɔɔ hanle ye wɔ Filisitiama anwo hilele Gyɛlɛmaya kolaa na Yigyibiti belemgbunli ne abɔ Gaza la ɛne.

²Ɔse: “Medame Ɛdɛnkɛma, mese: Bɛnlea! Azule ɛlɛmaa ɔ nwo zo wɔ sɔlɔ lɔ, na ɔbayɛ azule mɔɔ ye ɛzenlɛ yɛ ɛzulolɛ a. Ɔbayi yeabu azɛlɛ ye azo yeava debie biala, azuamgbole nee menli baha azule bo. Menli badea nu abiza moalɛ; aleɛabo sonla biala baye awolɛ.

³Saa bɛte mgbɔnwɔ ne mɔ agyakɛ abo, bɛte konle ehwili ne mɔ anwo alɛra ne nee bɛ gyakɛ ne mɔ ɛbililɛ ne ane a, selɛma ɛnrɛdo bɛ nye bɛ nzi ɛnrɛnlea bɛ mra, ɔboalekɛ bɛ sa nu ɛtuto bɔkɔɔ.

⁴Filisitia ɛzɛkyelɛ mekɛ ɛdwu, bɛbade boavolɛ biala mɔɔ ɛha la bɛavi Taya nee Saedɛn anwo, ɔluakɛ medame Ɛdɛnkɛma, melɛsɛkye Filisitiama mɔɔ vi Kiliti ɛnweanloa rale la amuala.

⁵Gazama ɛkpa bɛ ti, Ahyekɛlɔn abo zo ɛminli. O Anakema mɔɔ ɛha, bɛsu bɛabodɛboda bɛ nwo yeahɔdwu kenlenzu?

⁶Aa, Ɛdɛnkɛma konle dadeɛ! Kenlenzu a ɛkɛgyakyi ɛbililɛ a? Kɔvea wɔ boa ne anu, die wɔ ɛnwomenle na yɛ koonwu.

⁷Na kɛ ɔkɛzi ɔkɛla koonwu wɔ mekɛ mɔɔ Ɛdɛnkɛma ɛzie ye gyima nwo la ɛ? Gyima ne tia Ahyekɛlɔn nee menli mɔɔ de ɛnweanloa la.”