Read Nzema Gyɛ 48 Bible Online

Gyɛ 48 - Nzema bible

Gyɛ 48

¹ Edwɛkɛ mɔɔ Tumivolɛ Ɛdɛnkɛma hanle ye wɔ Mowabe anwo la ɛne: “Bɛzu Niboma, ɔluakɛ bɛ sua ne ɛdɔ mgbane! Bɛho bɛva Keleateeyem, yebɔ anyiemgba, bɛgolo ye aranemgbole ne bɛgua ɔ nyunlu aze;

²Mowabe anyunlunyia ɛdɔ aze ɛbɔ. Bɛvale ɔ nwo adwenle ɛtane ne wɔ Hɛhyebɔn. Bɛse, ‘Bɛrɛla bɛmaa yɛbɔ ye bɔkɔɔ mɔɔ ɔnle maanle bieko a.’ O Mademɛn, ɛdawɔ noko, bɛbaha wɔ aze, bɛbava konle bɛadoa wɔ.

³Bɛdie! Bɛlɛtea Hɔloneeyem nehane kɛ, ‘Bɛlɛto maanle ye mgbane, bɛlɛsɛkye ninyɛne.’

⁴“Mowabe maanle ne ɛbɔ bɔkɔɔ; yɛte ngakula ne kɛ bɛlɛsu,

⁵ɔluakɛ mɔɔ bɛlɛfo boka ne bɛahɔ Luhete la ɛnee bɛlɛ ɛzunlɛ, ɔboalekɛ Hɔloneeyem ndololeɛ nu yɛɛ bɛde ɛzɛkyelɛ ɛzunlɛ ne a.

⁶Bɛnriandi bɛlie bɛ nwo! Bɛnriandi kɛ ɛsɛlɛ zo asoaso.

⁷“Bɛvale bɛ rɛle bɛwulale bɛ anwosesebɛ nee bɛ anwonyia nu, yemɔti bɛbavo bɛ nwo zo; bɛbava bɛ bozonle Kimɔhye, ye ahɔmenle yɛɛ bɛ mgbanyima bɛahɔ nlɔnu.

⁸Sɛkyevolɛ ne bavo suakpole biala azo, suakpole ko bɔbɔ ɛnrɛvi ɛsalɛ; ɔbazɛkye bɔnza ne, ɔbazɛkye azɛlɛ sɛsɛ ne, kɛmɔ medame Ɛdɛnkɛma meha la.

⁹Bɛmaa Mowabe ndɛbalɛ, ɔluakɛ ɔbadu yeahɔ; ye azuamgbole badɔ mgbane, awie ɛnrɛdɛnla zolɛ.”

¹⁰(Munzule ɛha sonla mɔɔ ɛnyeye ɔ ti anu ɛnyɛ Ɛdɛnkɛma gyima la! Munzule ɛha sonla mɔɔ ɛnva ye dadeɛ ne ɛnga mogya ɛngua la!)

¹¹Ɛdɛnkɛma se, “Sumunli Mowabe ngakula nu, awie ɛtɛgyegyele ye, yɛɛ ɔle kɛ nza mɔɔ ɛdɔne ɔ bo la; bɛngakyi ye bɛngua dwora gyɛne gyɛne nu. Ɔtɛkɔle nlɔnu ɛlɛ, yemɔti ɔtɛyɛ fɛ, yɛɛ ɔtɛbɔ evuanlɛ.

¹²“Yemɔti, mekɛ bie badwu mɔɔ medame Ɛdɛnkɛma mebazoa menli meamaa bɛahɔhakyi Mowabe kɛ bɛkakyi nza bɛagua dwora gyɛne nu la. Bɛbawola nza ne na bɛabobɔ dwora ne mɔ.

¹³Na Mowabe anyunlu bagua aze, ɔlua ye bozonle Kimɔhye ati, kɛmɔ Yizilayɛma anyunlu guale aze wɔ Bɛtɛle mɔɔ ɛnee bɛ rɛle wɔ ye nu la.

¹⁴Mowabema, duzu ati a bɛka kɛ, ‘Yɛmɛ ɛne, yɛle katakyiema wɔ konle nu’ ɛ?

¹⁵Mɔɔ babɔ Mowabe nee ye azuamgbole la ɛra; bɛhu bɛ mgbavolɛ ngɛnlɛma ne mɔ. Medame Belemgbunli, mɔɔ me duma a le Tumivolɛ Ɛdɛnkɛma la a mese a.

¹⁶Munzule ɛlɛba arava Mowabe, ye nyanenwunlɛ ɛbikye.

¹⁷“Bɛdabɛ mɔɔ bɛ nee Mowabe zua la, bɛzu ye, bɛdabɛ mɔɔ bɛze duma mɔɔ yelie la, bɛzu ye. Bɛha kɛ, ‘Bɛlie Mowabe belemgbunlililɛ tumi kpole ne, ye anyunlunyia tumi ne ɛbɔ aze.’

¹⁸Daebɔnoma, bɛvi bɛ anyunlunyia ɛleka ne bɛtolo bɛrakpofo azɛlɛ ketekete ye azo, ɔluakɛ sɛkyevolɛ ne mɔɔ ɛzɛkye Mowabe la ɛra bɛ nwo zo; yebubu bɛ aranemgbole ne mɔ.

¹⁹O Alowɛma! Bɛgyinla adehane ne na bɛnlea! Bɛbiza nrenya anzɛɛ raalɛ mɔɔ ɛlɛnriandi la kɛ, ‘Duzu edwɛkɛ ɔ?’

²⁰Bɛbabua kɛ, ‘Mowabe ɛbɔ, ye anyunlunyia ɛdɔ aze; bɛzu ye, bɛye ye awolɛ. Bɛbɔ ye nolo wɔ Azule Anɔn ne anloa kɛ Mowabe ɛdɔ mgbane!’

²¹“Ndeanlɛ ɛra azɛlɛ sɛsɛ ne azo na yeha azuamgbole ɛhye mɔ: Hɔlɔn, Gyaza, Mɛfeeyate,

²²Daebɔn, Nibo, Bɛte Debelateeyem,

²³Keleateeyem, Bɛtegamɛle, Bɛtemiyɔn,

²⁴Kɛleyo, Bɔzela, yɛɛ azuamgbole mɔɔ wɔ Mowabe azɛlɛ zo, mɔɔ wɔ moa moa nee mɔɔ zuozua ye la kɔsɔɔti.

²⁵Bɛha Mowabe anwosesebɛ ne aze, yɛɛ bɛzɛkye ye tumi ne, medame Ɛdɛnkɛma a mese a.”

²⁶Ɛdɛnkɛma se, “Bɛmaa Mowabe ɛbo ɛyɛ tindaanwu, ɔboalekɛ yede me nwo atua. Mowabe bave ala nu, na menli agolo ɔ nwo.

²⁷Mowabema, asoo tɛ bɛmɛ a bɛzelele Yizilayɛma la? Asoo Yizilayɛma wuale debie la ati a mekɛ biala mɔɔ bɛkɛbɔ Yizilayɛma duma la bɛkɔsɔ bɛ ti a?

²⁸“O Mowabema, bɛdu bɛvi azuamgbole ne mɔ azo! Bɛhɔdɛnla bodane ne mɔ azo! Bɛyɛ kɛ abubule mɔɔ nwo ye sane wɔ bodane tokule nloa la.

²⁹Yɛde Mowabe adubɛnwo ne nganeɛ, ɔmemaa ɔ nwo zo kpole, ɔbu ɔ nwo, ɔle mgbanyizonle yɛɛ ɔtu ɔ nloa anu.

³⁰Medame Ɛdɛnkɛma, mese: Meze ye mgbanyizonle mɔɔ wɔ ɔ nwo, ɔ nloa anu ɛdulɛ ne le mgbane, yɛɛ ye nyɛleɛ le gyɛne.

³¹Yemɔti meye Mowabe awolɛ; mesu Mowabe maanle ne amuala; mesu Kɛɛ Hilɛzema.

³²O Sebema vanye! Mesu wɔ metɛla Gyeezɛ. Wɔ vanye mbaka ngane ndendenle pɛle Nyevile Wulera[12] ne dwule Gyeezɛ. Sɛkyevolɛ ne ɛzɛkye wɔ wawaa mbaka ma nee wɔ vanye ma mɔɔ ɛbolo la.

³³Fɛlɛko nee anyelielɛ ɛvi Mowabe azɛlɛ ne mɔɔ kye aleɛ la azo. Memaa nwanye ne mɔɔ vi nwanye melahyinli ne mɔ anu twi la ɛgyakyi ɛhwinlɛ. Awie biala ɛnva anyelielɛ ɛndeɛdea nu ɛndwihwi vanye ma; ɛdeɛdeanlɛ ne ɛnle anyelielɛ ɛdeɛdeanlɛ.

³⁴“Hɛhyebɔnoma nee Ɛlɛyalima tea nu su; bɛsu bɛmaa bɛte bɛ ne moa moa wɔ Gyeehaze. Bɛ ne kɔ toonwo bɛte ye wɔ Zowaa, Hɔloneeyem, yɛɛ Ɛgelate Hyɛlehyaya lɔ. Nemelem azudenle bɔbɔ ɛsesa.

³⁵Mebadua Mowabema kpunli mɔɔ bɛmbɔ azu anzɛɛ bɛmkpu ɛyɛlɛ bɛmmaa bɛ nyamenle ne mɔ wɔ bɛ ɛzonlenlɛ ɛleka ne mɔ a. Medame Ɛdɛnkɛma a mese a.

³⁶“Yemɔti medi nyane me ahonle nu memaa Mowabema yɛɛ medi nyane me ahonle nu memaa Kɛɛ Hilɛzema, ɔluakɛ anwonyia mɔɔ bɛnyianle la amuala ɛminli.

³⁷Awie biala ɛkpa ɔ ti, ɛkpa ɔ kɛsa. Bɛbodɛboda bɛ sa anwo amuala na bɛheda ɛrele.

³⁸Debie mɔɔ bɛte ye wɔ Mowabe azua ne mɔ ati zo nee ɛleka kpatawienyi ne mɔ la ala a le awolɛyelɛ, ɔluakɛ mebɔ Mowabe kɛ buakɛ mɔɔ awie biala ɛnrɛva ye ɛnrɛyɛ ɛhwee a. Medame Ɛdɛnkɛma a mese a.

³⁹Mowabe ɛbɔ bɔkɔɔ! Tie kɛ bɛlɛye awolɛ bie a! Mowabe anyunlu ɛgua aze! Mowabe ɛyɛ agolobɛnwo maanle. Maanle maanle mɔɔ zuozua ye la kɔsɔɔti golo ɔ nwo, si ye amgbu, yeyɛ debie ɛzulolɛ bie. Medame Ɛdɛnkɛma a mese a.”

⁴⁰Kɛ medame Ɛdɛnkɛma mese la ɛne, “Bɛnlea, awie badu kɛ kɔleɛ, na yeava ɔ ndɛba yeabila Mowabe,

⁴¹yeava ye azuamgbole ne mɔ nee ye aranemgbole ne mɔ. Kenle zɔhane Mowabe ɛlɔnema ahonle badu kɛ raalɛ mɔɔ ɛvo awolɛ zo la.

⁴²Bɛbazɛkye Mowabe mɔɔ ɔnrɛyɛ maanle bieko a, ɔluakɛ yede medame Ɛdɛnkɛma, me nwo atua.

⁴³O Mowabema, ɛzulolɛ, kuma, yɛɛ ɛhane wɔ bɛ nyunlu ɛlɛkendɛ bɛ. Medame Ɛdɛnkɛma a mese a.

⁴⁴Ɛdawɔ mɔɔ ɛkɛnriandi ɛzulolɛ ne la, ɛbahɔdɔ kuma ne anu, yɛɛ ɛdawɔ mɔɔ ɛkɛvo kuma ne ɛkɛvinde file zo la, ɛbahɔdɔ ɛhane nu, ɔluakɛ medame, mebamaa ɛhye mɔ asisi Mowabema anwo zo wɔ mekɛ mɔɔ mebadea bɛ la. Medame Ɛdɛnkɛma a mese a.

⁴⁵Menli nriandi kɔtane Hɛhyebɔn, noko bɛnnyia gyinlagyakɛ, ɔboalekɛ senle ɛdɔ Hɛhyebɔn. Belemgbunli Saehɔn suakunlu ɛkɛ ne ɛlɛyela. Senle ɛzɛkye Mowabe anyunlunyia ne mɔɔ ye ɛlɔnema fa tu bɛ nwo la.

⁴⁶O Mowabema, bɛ gyakɔ! Bɛzɛkye menli ne mɔɔ sonle bozonle Kimɔhye la, na bɛhye bɛ mra mrenya nee bɛ mra mraalɛ nuokɛ bɛhɔ nlɔnu.

⁴⁷“Noko mekɛ bie bara mɔɔ mebamaa Mowabe akpazi bieko a. Medame Ɛdɛnkɛma a mese a.” Ɛnee kɛ bɛbazi bɛadea Mowabe la ɛne.