Read Nzema Gyɛ 49 Bible Online

Gyɛ 49 - Nzema bible

Gyɛ 49

¹ Edwɛkɛ mɔɔ Ɛdɛnkɛma hanle ye wɔ Amɔnoma anwo la ɛne: Ɔse, “Yizilayɛ ɛnlɛ mrenya ɔ? Ɔnlɛ mɔɔ ko die ɔ ti ɔ? Kɛ ɔyɛ mɔɔ Bozonle Melekɔm ɛzonlenlɛ ɛva Gaade maanzinli ne na ye menli ɛhɔdɛnla azuamgbole ne mɔ azo ɛ?

²Bɛnlea, mekɛ ɛlɛba mɔɔ mebamaa konle azi Amɔnoma suakpole Relaba azo abɔ ye, na ye namunamu ne mɔ ayela adɔ nzonle. Yizilayɛma baza menli mɔɔ liele bɛ azɛlɛ ne bɛ sa nu la alie bɛ debie, medame Ɛdɛnkɛma a mese a.

³O Hɛhyebɔnoma, bɛye awolɛ, ɔluakɛ Eyae ɛbɔ! Relaba mraalɛ, bɛzu! Bɛva ɛrele bɛheda, bɛzu bɛkpɔsa, ɔluakɛ bɛbava bɛ bozonle Melekɔm, ye ahɔmenle yɛɛ bɛ mgbanyima ne mɔ amuala bɛahɔ nlɔnu.

⁴Bɛmɛ mɔɔ bɛnze Nyamenle, duzu ati a bɛfa bɛ mbɔnza ne mɔ bɛtu bɛ nwo ɛ? Bɛva bɛ rɛle bɛwula bɛ anwonyia nu na bɛka kɛ, ‘Nwane a kɛhola kɛva konle kɛradoa yɛ a?’

⁵Bɛnlea, mebamaa bɛanwu ɛzulolɛ, medame Tumivolɛ, Awulae Nyamenle a mese a. Menli mɔɔ zuozua bɛ la bahile bɛ ɛzulolɛ, avoa bɛ, yɛɛ awie ɛnle ɛkɛ mɔɔ kɛboɔboa menli mɔɔ kɛnriandi la anloa a.

⁶“Noko nzinlii mebamaa Amɔnoma akpazi bieko. Medame Ɛdɛnkɛma a mese a.”

⁷Edwɛkɛ mɔɔ Tumivolɛ Ɛdɛnkɛma hanle ye wɔ Yidɔm anwo la ɛne: Ɔse, “Nrɛlɛbɛ ɛwie Yidɔm ɔ? Adile bieko ɛnle ɛkɛ mɔɔ tu folɛ ɔ? Bɛ nrɛlɛbɛ ne ɛwie ɔ?

⁸O Didanema, bɛnriandi bɛzia bɛhɔvea azɛlɛ bo, ɔluakɛ mekɛ mɔɔ mefa meadea Yisɔ abo zo amra la ɛdwu.

⁹Saa ɛdevolɛma radele ma wɔ bɛ avule nu a, anrɛɛ bɛnrɛgyakyi mgbɛpɛlɛ ɔ? Saa nwule ba ɛya nu nɔɔzo a, bɛnva mɔɔ saa bɛ di la ala ɔ?

¹⁰Noko mekpa Yisɔ anwo ɛdanlɛ wienyi memaa ye feabelɛ ne mɔ ɛla ali; ɔngola ɔnvea ɔ nwo bieko. Bɛzɛkye ɔ mra, ɔ mediema mrenya, yɛɛ ɔ gɔnwo mɔ; ɔnlɛ awie bieko.

¹¹Gyakyi wɔ nrisa ne mɔ maa me na mebanlea bɛ; maa wɔ ahunlanvolɛ mraalɛ ɛva bɛ ti ɛzɔ me.”

¹²“Medame Ɛdɛnkɛma, mese: Saa menli mɔɔ ɔnle kɛ bɛno nyane kɔpo ne anu la ɛnlo nuhua a, ɛnee ɛdwenle kɛ wɔmɔ, ɔkɛkpa ɛ ti ɔ? Ɛnrɛva ɛ nwo dwɔɔ, ɔwɔ kɛ ɛno nyane kɔpo ne anu bie.

¹³Medame Ɛdɛnkɛma, meka, meka kɛ, Bɔzela bayɛ ɛzulolɛ ɛleka, ndeanlɛ ɛleka, ɛleka mgbane bie, yɛɛ munzule ɛleka; ye azuamgbole ne mɔ amuala badɔ mgbane mɔɔ bɛnrɛdwazo bieko ɛlɛ a.”

¹⁴Mede Ɛdɛnkɛma nrɛlaleɛ ne. Yezoa sonla yemaa yeraha yehile maanle maanle ne mɔ kɛ, “Bɛbɛza, bɛhɔteta Yidɔm! Bɛdwazo bɛhɔ konle.

¹⁵Bɛnlea, mebamaa bɛayɛ ekyi wɔ maanle maanle avinli, na menli akpo bɛ.

¹⁶Bɛ nwo ɛzulolɛ ne mɔɔ bɛka nee bɛ adubɛnwo ne ɛbɛlɛbɛla bɛ. Bɛde bodane adokule nu wɔ boka zo anwuma, noko saa bɛyɛ bɛ azua anwuma kɛ kɔleɛ bɔbɔ a, mebadwula bɛ aze. Medame Ɛdɛnkɛma a mese a.

¹⁷“Yidɔm bayɛ ɛleka ɛzulolɛ. Awie biala mɔɔ kɛze ɛkɛ ne la ahonle badu, yɛɛ ɛzɛkyelɛ mɔɔ yezɛkye la bamaa yeabɔ mgbatike.

¹⁸ Ɔbayɛ kɛ mɔɔ bɛzɛkyele Sodɔm nee Gomɔla nee azuamgbole mɔɔ boka bɛ la, awie ɛnrɛdɛnla zolɛ, yɛɛ awie ɛnrɛze ɛkɛ ɛlɛ.

¹⁹Kɛmɔ awenade vi Dwɔdan kpɔkɛ nu finde ba mboane kpolane nwo zo a bɛnriandi la, zɔhane ala a mebamaa bɛanriandi bɛavi Yidɔm a, na mebaye sonla mɔɔ mekulo la meamaa yeazie suakpole ne. Nwane a nee me sɛ a? Nwane a kɛhola nee me kɛdwudwu a? Belemgbunli boni a kɛhola me nyunlu gyinla a?

²⁰Yemɔti bɛdie ngyehyɛlɛ mɔɔ medame Ɛdɛnkɛma meyɛ meatia Yidɔm, yɛɛ debie mɔɔ mevua kɛ mefa meayɛ suakpole Timan azo amra la. Bɛbahwenle bɛ ngakula ngyikyi ne mɔ bɔbɔ aze bɛahɔ. Nɔhalɛ, ɔbayɛ ɛzulolɛ.

²¹Bɛ azedɔlɛ ne bamaa azɛlɛ ye akpusu, yɛɛ bɛbade bɛ ɛzunlɛ wɔ Akaba Ebolo ne anu nehane.

²²Bɛnlea, awie bamaa ɔ nwo zo na yeadu faa kɛ kɔleɛ, yearadɛlɛ ɔ ndɛba yeabila Bɔzela, na Yidɔm katakyiema ɛbolɛ bade kɛ raalɛ mɔɔ ɛvo awolɛ zo la.”

²³ Edwɛkɛ mɔɔ fane Dɛmasekɛse anwo la ɛne. Ɔse, “Heematema nee Aapadema adwenle ɛzɛkye, ɔboalekɛ bɛde amaneɛ ɛtane. Ɛzulolɛ ɛha bɛ ɛmaa bɛyɛ begyebegye kɛ nyevile mɔɔ ɛzɛkye na ɔngua la.

²⁴Dɛmasekɛse ɛyɛ bɛtɛɛ zɛhae. Ɔyɛle kɛ ɔnriandi na ɔ nye zo danle ye. Nyane nee alɔbɔlɛ ɛkyekye ye kɛ raalɛ mɔɔ ɛvo awolɛ zo la.

²⁵Suakpole mɔɔ ɛlie duma totohyia na anyelielɛ wɔ zo la, ɛnɛ menli arɛle ɛvi ye bɔkɔɔ.

²⁶Yemɔti ye mgbavolɛ mɔɔ wɔ zolɛ la badɔ amolɛ nu wɔ bɛ ɛleka kpatawienyi ne mɔ, yɛɛ bɛbahu ye ɛlɔnema ne amuala kenle ko ne. Medame Tumivolɛ Ɛdɛnkɛma a mese a.

²⁷Mebado senle wɔ Dɛmasekɛse bane ne anu na ɔbazɔ yeava Belemgbunli Bɛneheedade suakunlu ɛkɛ, yeazɛkye ye aranemgbole ne mɔ.”

²⁸Mɔɔ fane Kidaa nee Heezɔ maanle ne mɔ mɔɔ Belemgbunli Nɛbukadenɛza honle vale bɛ la anwo la, kɛ Ɛdɛnkɛma se la ɛne, “Bɛdwazo, bɛhɔ Kidaama anwo zo! Bɛzɛkye menli mɔɔ de aduduleɛ la!

²⁹Bɛlie bɛ ndanlɛ azua nee bɛ nyɛmoa, bɛ mgbɛnu ndanlɛ, bɛ anwoneɛ yɛɛ bɛ afunlumu ne mɔ kɔsɔɔti bɛhɔ. Menli baze bɛ kɛ, ‘Ɛzulolɛ ɛra ɛleka biala.’

³⁰“O Heezɔma! Bɛnriandi bɛhɔ moa bɛhɔvea kuma bie anu, medame Ɛdɛnkɛma a mese a. Ɔluakɛ Babelonia Belemgbunli Nɛbukadenɛza ɛva bɛ nwo adwenle na yebɔ kpɔkɛ kɛ ɔsɛkye bɛ.

³¹Yemɔti ɔlɛka yeahile ye ɛlɔnema ne kɛ, ‘Bɛdwazo bɛmaa yɛhɔvo maanle ne mɔɔ de boɛ na awie ɛngola ye gyegye la anwo zo. Ɔnlɛ nlenkɛ mgbole yɛɛ mbulalɛ ɛngua ye nlenkɛ mgbole nzi. Bɛ ngome a bɛde a.’

³²“Bɛ afunlumu ne mɔ bayɛ afedeɛ, bɛbahyɛ bɛ nlankɛ bɛava. Mebakponde bɛdabɛ mɔɔ bɛpepɛ bɛ ti enrinli ne azo la, na meamaa maanle maanle mɔɔ zuozua bɛ la agyegye bɛ. Medame Ɛdɛnkɛma a mese a.

³³Heezɔ badɔ mgbane, ɔbayɛ ɛleka mɔɔ ɛzonlɛ ɛnrɛkpa ɛkɛ ɛlɛ a. Awie ɛnrɛdɛnla ɛkɛ bieko ɛlɛ.”

³⁴Ɛdɛnkɛma dendɛle hilele Gyɛlɛmaya wɔ Yilam anwo, wɔ mekɛ mɔɔ Dwuda Belemgbunli Zɛdikaya bɔle ebialilɛ bo la.

³⁵Ɔzele kɛ, “Gyɛlɛmaya, medame Tumivolɛ Ɛdɛnkɛma, mebabubu Yilamma ɛda ne mɔɔ maa bɛdwe kpole la anu.

³⁶Mebamaa anwoma vi sɔlɔ, nyiakɛ, aduduleɛ, yɛɛ adɔleɛ adu Yilam suakpole ne azo. Mebado ezuavolɛ ne meakponde anwoma nna zɔhane mɔ anu. Maanle biala ɛnle ɛkɛ mɔɔ menli mɔɔ bɛbavoa bɛ Yilam la bie ɛnrɛhɔdwu nu a.

³⁷Mebamaa Yilamma azulo bɛ kpɔvolɛma, mebamaa bɛazulo menli mɔɔ kpondɛ bɛ ahu bɛ la. Me ɛya ne ɛyɛ kpole, yemɔti mebamaa munzule kpole ado bɛ. Medame Ɛdɛnkɛma a mese a. Mebamaa konle ado bɛ toonwo kɔkpula kɛ menwɔwie bɛ muala ku la.

³⁸Akee mebahu Yilam belemgbunli ne nee ye mbganyima ne mɔ na medame Ɛdɛnkɛma meali belemgbunli wɔ ɛkɛ. Medame Ɛdɛnkɛma a mese a.

³⁹Noko nzinlii mebamaa Yilamma akpazi bieko. Medame Ɛdɛnkɛma a mese a.”