Read Nzema Gyɛ 5 Bible Online

Gyɛ 5 - Nzema bible

Gyɛ 5

¹Bɛnriandi bɛli akɔneaba wɔ Gyɛlusalɛm kpalɛ ne mɔ azo! Bɛtoto bɛ nye! Bɛdabɛ bɛnlea ye bɛ nye zo! Bɛnlea gua ne mɔ azo saa bɛkɛnwu awie mɔɔ di pɛlepɛle na ɔka nɔhalɛ la a, na menva ye ɛtane mengyɛ ye.

²Bɛka ndane kɛ, “Meka Ɛdɛnkɛma” bɔbɔ ɛdeɛ, noko bɛka ndane ne adalɛ nu.

³O Ɛdɛnkɛma, wɔmɔ ɛkulo nɔhalɛ. Ɛdeanle bɛ, na yɛanyɛ bɛ nyane; ɛhanle bɛ senle, noko bɛangakyi. Bɛsolo bɔkɔɔ; bɛtɛnunle bɛ nwo.

⁴Yemɔti menganle kɛ, “Ɛhye mɔ yɛ anwunvɔne, bɛnze nrɛlɛbɛ, ɔluakɛ bɛnze Ɛdɛnkɛma adenle ne, bɛnze bɛ Nyamenle ne mɛla ne.”

⁵Mebahɔ bɛdabɛ mɔɔ tumi ne wɔ bɛ sa nu la ɛkɛ me nee bɛ ahɔdendɛ, ɔluakɛ bɛmɛ, bɛze Ɛdɛnkɛma adenle ne, bɛze bɛ Nyamenle ne mɛla ne. Noko bɛ muala bɛde nyɛma, bɛdɛla anhwe, bɛkpo kɛ bɛnrɛli ye mɛla zo.

⁶Yemɔti awenade vi kpɔkɛ nu barahu bɛ, bedi vi ɛsɛlɛ zo barazɛkye bɛ. Sobolɛ ɛhɔ bɛ azuamgbole ne mɔ anwo nzia, awie biala mɔɔ vi biala azo kɛvinde la bɛbatete ye nzokanzoka, ɔboalekɛ bɛ ɛtane ne mɔ zonle somaa, yɛɛ bɛkpo Nyamenle bɛhyɛ.

⁷Ɛdɛnkɛma bizale ye kɛ, “Kɛ ɔyɛ mɔɔ ɔwɔ kɛ mefa bɛ ɛtane mekyɛ bɛ ɛ? Bɛ menli ne ɛkpo me, na bɛzonle nyamenle gyɛne gyɛne mɔɔ ɛnle ɛkɛ la. Memanle bɛ aleɛ bɛlile bɛ ko yile la, bɛdonle awuvolɛvalɛ mɛla ne, na bɛdule bɛdoale tuutuuma.

⁸Bɛle kɛ mgbɔnwɔ nyinli mɔɔ evunle ɛwie yi, na bɛ nwo ɛlɛmenlemenle bɛ la, ko biala atiakunlu ba ɔ gɔnwo aye anwo zo.

⁹Asoo ɔnle kɛ metea bɛ wɔ nyɛleɛ ɛhye mɔ anwo, na mesenra maanle zɛhae?

¹⁰Bɛhɔzɛkye ye vanye ɛya ne, na bɛmmasɛkye bɛ bɔkɔɔ; bɛpepɛ ye ngane ne mɔ bɛgua, ɔluakɛ bɛnle Ɛdɛnkɛma ɛdeɛ.

¹¹Ɔluakɛ Yizilayɛma nee Dwudama anli nɔhalɛ ammaa me. Medame Ɛdɛnkɛma a mese a.”

¹²Yizilayɛma nee Dwudama ɛbɔ Ɛdɛnkɛma anwo adalɛ. Bɛse, “Ɔnrɛyɛ ɛhwee. Munzule biala ɛnrɛdo yɛ, konle ɛnrɛva yɛ aze, yɛɛ ɛhɔne ɛnrɛhu yɛ.

¹³Nyamenle kpɔmanvolɛma ne mɔ le anwoma ala; bɛnlɛ Ɛdɛnkɛma nrɛlaleɛ biala bɛnga. Kɛ bɛdabɛ noko bɛbayɛ ala la ɛne.”

¹⁴Yemɔti kɛ Ɛdɛnkɛma, Tumivolɛ Nyamenle ne se la ɛne, “Gyɛlɛmaya, kɛmɔ bɛha edwɛkɛ ɛhye la, memaa me edwɛkɛ ne ahakyi senle wɔ ɛ nloa anu na menli ɛhye mɔ ahakyi ɛyɛne, na senle ne ayela bɛ wee.”

¹⁵Ɛdɛnkɛma se, “Yizilayɛma, memaa maanle bie anu amra arateta bɛ. Ɔle maanle dɛba yɛɛ ɔle maanle mɔɔ anwo yɛ se. Ɔle maanle mɔɔ bɛnde bɛ aneɛ, yɛɛ mɔɔ bɛka bɔbɔ la bɛnde ɔ bo.

¹⁶Bɛ ɛda mbaka boa le kɛ azie zo sɛka mɔɔ bɛbɔ bɛdo ɛkɛ ne la, yɛɛ menli ne le katakyiema.

¹⁷Bɛbali bɛ bɛyɔba ne nee bɛ aleɛ ne; bɛbahu bɛ mra mrenya nee bɛ mra mraalɛ. Bɛbahu bɛ mboane nee bɛ nlankɛ, na bɛazɛkye bɛ vanye mbaka nee bɛ feege mbaka. Bɛbabubu bɛ azuamgbole ne mɔ mɔɔ bɛbɔ nwolɛ bane na bɛ ti zɔ bɛ la.”

¹⁸Ɛdɛnkɛma se, “Gyɛlɛmaya, mekɛ ne anu menrɛzɛkye me menli ne menrɛdu bɛ bo.

¹⁹Saa wɔ menli ne biza kɛ duzu ati a Ɛdɛnkɛma yɛ Nyamenle ne ɛyɛ ninyɛne ɛhye mɔ a, ka kile bɛ kɛ, ‘Bɛkpole medame, Ɛdɛnkɛma bɛ Nyamenle ne na bɛzonlenle nyamenle gyɛne gyɛne wɔ bɛdabɛ bɛ maanle nu, yemɔti bɛbazonle nyɛvolɛ wɔ maanle mɔɔ ɛnle bɛ ɛdeɛ la anu.’ ”

²⁰Ɛdɛnkɛma se, “Ka kile Gyekɔbo abo zo amra nee Dwudama kɛ:

²¹ Bɛdie ɛhye, ahɔnwɔne mɔɔ ɛnze nrɛlɛbɛ a, mɔɔ lɛ ɛnyelɛ na bɛnnwu debie a, mɔɔ lɛ ɛnzonlɛ na bɛnde edwɛkɛ a.

²² Duzu ati a bɛnzulo me ɛ? Duzu ati a bɛgyi me nyunlu a bɛ nwo ɛnwozo bɛ a? Menvale ɛnwea mengyale nyevile ɛweɛne mɔɔ ɔngola ye bɔ tɛla ɛlɛ la. Azɛlɛkye ne mɔ bu na bɛngola bɛndɛla ɛweɛne ne, bɛkulu mgbole na bɛngola bɛnli ɛweɛne ne bɔtɛla.

²³Na bɛmɛ, bɛle menli anzosesebɛ na bɛte atua; bɛhakyi bɛ nzi bɛzi me.

²⁴Bɛnga ye bɛ ahonle nu bɔbɔ kɛ, ‘Bɛmaa yɛzulo Ɛdɛnkɛma yɛ Nyamenle ne mɔɔ tɔ ezule nee nyenyensuo wɔ bɛ ɛlobɔ nloa, na ɛbuhenle dwu a ɔmaa yɛ bɛyɔba la.’

²⁵Bɛ amumuyɛ nee bɛ ɛtane ne mɔ ɛmaa ninyɛne kpalɛ ɛkpa bɛ ti.

²⁶“Amumuyɛma wɔ me menli ne avinli. Bɛkɔ nzia kɛ menli mɔɔ sua nlomangane la. Bɛsua ngane bɛkye menli.

²⁷Bɛ azua nu ɛyɛ nwule ninyɛne ngome kɛ tunli mɔɔ nloma ɛyi ye la. Yemɔti bɛ tumi ɛyɛ kpole yɛɛ bɛnyia bɛ nwo.

²⁸Bɛdi aleɛ kpalɛ la ati bɛle mbelane tutoboo, bɛ nwo le mɛnlaanwo. Bɛ amumuyɛ ɛnlɛ awieleɛ. Bɛnze arisa ralɛ yɛɛ bɛnze sonla mɔɔ bɛlɛsisi ye la anwunvɔne.

²⁹“Asoo ɔnle kɛ metea bɛ wɔ ninyɛne ɛhye mɔ anwo, na mesenra maanle zɛhae ɔ?

³⁰Debie ɛzulolɛ ɛzi azɛlɛ ne azo.

³¹Nyamenle kpɔmanvolɛma bɔ adalɛ, yɛɛ sɛlɛvolɛma yɛ mɔɔ Nyamenle kpɔmanvolɛma kɛze bɛ la. Me menli ne die mɔɔ bɛka la to nu; bɛmkpo kɛ bɛnrɛyɛ ye zɔhane, na saa awieleɛ ne ba a duzu a bɛkɛyɛ a?”