Read Nzema Gyɛ 50 Bible Online

Gyɛ 50 - Nzema bible

Gyɛ 50

¹Edwɛkɛ mɔɔ Ɛdɛnkɛma hanle ye wɔ suakpole Babelɔn nee ye maanlema ne anwo hilele Gyɛlɛmaya la ɛne:

²“Ka edwɛkɛ ne, bɔ ye nolo kile maanle maanle. Fola fɛlɛnra bɔ edwɛkɛ ne nolo. Mmafea zolɛ; ka kɛ, ‘Bɛho bɛva Babelɔn bɔkɔɔ. Bɛgua ye bozonle Bɛle, mɔɔ eza bɛfɛlɛ ye Maadɔko la anyunlu aze, ye ahonle ɛdu, bɛgua ye ananze ne mɔ anyunlu aze, ye mmonle ne mɔ ahonle ɛdu.’

³“Maanle bie vi sɔlɔ ɛva konle ɛradoa Babeloniama, na ɔbamaa maanle ne adɔ mgbane, awie ɛnrɛdɛnla nu, sonla o, nane o, biala vi ɛkɛ ne banriandi.”

⁴Ɛdɛnkɛma se, “Saa mekɛ zɔhane dwu a, Yizilayɛma nee Dwudama babɔ nuhua ava ɛzunlɛ ara kɛ bɛkakpondɛ Ɛdɛnkɛma bɛ Nyamenle ne.

⁵Bɛbabiza Zayɔn adenle ne na bɛahakyi bɛ nye lɔ bɛaha kɛ, ‘Bɛrɛla, bɛmaa yɛ nee Ɛdɛnkɛma ɛyɛ ngyekyeleɛ mɔɔ bɛntulu ye ɛlɛ, mɔɔ awie biala arɛle ɛnrɛvi ye ɛlɛ la.’

⁶“Me menli ne ɛyɛ kɛ mboane mɔɔ ɛminli la, bɛ neavolɛma a ɛminli bɛ a. Bɛtulu bɛ bɛmaa bɛluolua awoka ne mɔ azo. Bɛkpɔsa awoka mgbole nee ngyikyi zo, bɛnnwu bɛ tunli ne adenle.

⁷Menli mɔɔ nee mboane ne mɔ yiale la hunle bɛ lile, na bɛ kpɔvolɛma ne mɔ se, ‘Yɛnli fɔlɛ, ɔluakɛ bɛyɛ ɛtane bɛtia Ɛdɛnkɛma mɔɔ lɛ bɛ, mɔɔ bɛ ze mɔ vale bɛ ti zɔle ye la.’

⁸ “Yizilayɛma, bɛnriandi bɛvi Babeloniama avinli, bɛyɛ kɛ mbɔnkye nyinli bɛnriandi bɛli mboane ne mɔ anyunlu.

⁹Ɔluakɛ bɛnlea, melɛboɔboa menli dɔɔnwo anloa meavi sɔlɔ maanle maanle mgbole nu kɛ bɛ nee Babeloniama ɛraho, na bɛva bɛ maanle ne. Bɛle menli mɔɔ ze ɛdadolɛ nye zo kpalɛ a, bɛto ɛda a ɔnvo fee.

¹⁰Bɛbave Babelonia ninyɛne bɛali. Menli mɔɔ bave ye ninyɛne ne la banyia debie biala mɔɔ bɛkpondɛ la. Medame Ɛdɛnkɛma a mese a.”

¹¹Ɛdɛnkɛma se, “O bɛmɛ Babeloniama, bɛve me agyadeɛ bɛva, bɛ nye ɛlie kɛ ɛnlankɛ ralɛ mɔɔ asa ɛha ndile na bɛsu kɛ ɛkpɔnwɔ la.

¹²Bɛbagua bɛ nli mɔɔ wole bɛ la anyunlu aze na bɛabɔ ye anyiemgba. Ɔnrɛnyia ɔ nyunlu wɔ maanle maanle avinli; ye azɛlɛ bahwie, zolɛ ayɛ resee, yeayɛ ɛsɛlɛ.

¹³Me ɛya ne ati awie ɛnrɛdɛnla Babelɔn, azɛlɛ ne badɔ mgbane, na awie biala mɔɔ kɛze zolɛ la bali nyane, adea nuhua na yeahɔsɔ ɔ ti wɔ mɔɔ ɛzi la anwo.

¹⁴“Bɛdabɛ mɔɔ bɛto ɛda la kɔsɔɔti, bɛdwazo bɛhɔbɔ bɛyia Babelɔn. Bɛdo ɛda biala mɔɔ bɛlɛ la bɛwɔ ye, bɛmmagyakyi bie, ɔluakɛ yeyɛ ɛtane yetia medame Ɛdɛnkɛma.

¹⁵Bɛdea nuhua, bɛha ye ɛleka biala kɛ Babelɔn ɛmaa ɔ sa zo; bɛgologolo ye bane ne mɔ bɛgua, ɔluakɛ, kɛ medame Ɛdɛnkɛma me nzenralɛlilɛ ne de la ɛne. Bɛli ye nzenralɛ, mɔɔ ɔyɛle la, bɛyɛ ye bie bɛzie ɔ bo zo.

¹⁶Bɛmmamaa bɛdua ma wɔ Babelɔn, yɛɛ saa ɛbuhenle ne dwu a, bɛmmamaa bɛbu bie. Kɛmɔ bɛsulo kɛ bɛ kpɔvolɛma kɛhu bɛ la ati, awie biala banriandi ahɔ ye sua zo wɔ ye maanle nu.

¹⁷“Yizilayɛma le kɛ mboane mɔɔ awenade ɛvoa bɛ ɛmaa bɛbɔ asande la. Aselea belemgbunli ne lumuale hyele bɛ lile, yɛɛ Babelonia Belemgbunli Nɛbukadenɛza ɛfufo bɛ mbowule nu.

¹⁸Ɔlua ɛhye ati, medame Tumivolɛ Ɛdɛnkɛma, Yizilayɛ Nyamenle, mese: Mebadea Babelonia belemgbunli ne nee ye maanle ne, kɛmɔ mendeanle Aselea belemgbunli ne la.

¹⁹Mebava Yizilayɛ meazia meahɔzie ye ye adidileka ne. Ɔbadidi Boka Kamɛle azo nee Beehyan maanzinli nu. Aleɛ biala mɔɔ ɔkpondɛ la ɔbanyia bie wɔ Yifelaem awoka ne mɔ azo nee Geleade.

²⁰Saa mekɛ zɔhane dwu a bɛnrɛde ɛtaneyɛlɛ nganeɛ wɔ Yizilayɛ, yɛɛ bɛnrɛnwu ɛtaneyɛlɛ wɔ Dwuda, ɔluakɛ mebava menli mɔɔ baha mɔɔ mebagyakyi bɛ la anwo edwɛkɛ meahyɛ bɛ. Medame Ɛdɛnkɛma a mese a.”

²¹Ɛdɛnkɛma se, “Bɛhɔteta Mɛlateeyemma nee Pikɔdoma bɛ nee bɛ ɛho. Bɛhu bɛ na bɛbɔ bɛ bo zo bɔkɔɔ. Bɛyɛ mɔɔ meze bɛ kɛ bɛyɛ la amuala. Medame Ɛdɛnkɛma a mese a.

²²Konle ɛdɔ azɛlɛ ne azo ɛmaa bɛzɛkye menli dɔɔnwo.

²³Babelonia ɛhakyi debie ɛzulolɛ bie wɔ maanle maanle avinli. Bɛzɔ ewiade hamenle kpole ne bɛbubu nuhua.

²⁴O Babelonia, menzuale wɔ ɛhane, ɛdɔle nuhua, noko wɔannwu ye, ɛ nee me dwudwule, wɔmaa bɛhye wɔ ɛhane nu.

²⁵Medukue ɛleka mɔɔ mesie me konle ninyɛne ne mɔ la na meye me ɛya konle ninyɛne mevinde, ɔboalekɛ medame, Tumivolɛ Awulae Nyamenle, melɛ gyima medi wɔ Babelonia azɛlɛ zo.

²⁶Bɛvi ewiade ɛleka biala bɛrɛla. Bɛrabu ye aleɛ ɛzielɛ azua ne nlenkɛ ne mɔ. Bɛhwe ye ninyɛne ne mɔ bɛhuohua bɛ kɛ ma edukue edukue. Bɛzɛkye maanle ne bɔkɔɔ, bɛmmagyakyi debie biala.

²⁷Bɛhu ye nlankɛ nyinli ne mɔ amuala, bɛhu bɛ kɔsɔɔti. Munzule ɛha bɛ, mekɛ mɔɔ bɛfa bɛadea bɛ la ɛdwu.”

²⁸(Menli vi Babelonia azɛlɛ zo nriandi ba Gyɛlusalɛm, baka kɛ Ɛdɛnkɛma, yɛ Nyamenle ne ɛzi ɛli debie mɔɔ Babeloniama vale yɛle ye Ɛzonlenlɛ Sua ne la anwo nzenralɛ la.)

²⁹“Medame Ɛdɛnkɛma, Yizilayɛ Nwuanzanwuanza Ko ne, mese: Bɛvɛlɛ menli mɔɔ ze ɛda to la bɛmaa bɛhɔ Babeloniama anwo zo. Bɛbɛnra bɛyia bɛ, bɛmmamaa ko bɔbɔ fi ɛsalɛ. Bɛdua ye kakɛ wɔ ye nyɛleɛ kɔsɔɔti mɔɔ yeyɛ la anwo, ɔboalekɛ ɔ nye anzɔ me.

³⁰Yemɔti ye mgbavolɛ bawu agua ɛleka kpatawienyi ne mɔ, yɛɛ bɛbahu ye ɛlɔnema ne mɔ wɔ mekɛ zɔhane anu.

³¹“O Babelonia adubɛnwo, mekyi wɔ. Wɔ mekɛ mɔɔ mebava meadea wɔ la ɛdwu.

³²Babelonia adubɛnwo badu koti, akpo aze, na ɔnrɛnyia awie ɛnrɛdwazo ye. Mebado senle ye azuamgbole ne mɔ azo, na senle ne bayela debie biala mɔɔ ɛbɔ ɛyia ye la.

³³“Medame Tumivolɛ Ɛdɛnkɛma, mese: Bɛlɛsisi Yizilayɛma nee Dwudama kpalɛ. Menli mɔɔ hyele bɛ nuokɛ la lɛ bɛ kyengye zɛhae, bɛmmaa bɛndu bɛ gyakɛ fee.

³⁴Bɛ Kpɔnevolɛ ne anwo yɛ se, ye duma a le Tumivolɛ Ɛdɛnkɛma. Mebali bɛ edwɛkɛ meamaa bɛ na meamaa anzonudwolɛ ara azɛlɛ ne azo, na Babeloniama ɛdeɛ, menrɛmaa bɛ nwo ɛnrɛdɔ bɛ.”

³⁵Ɛdɛnkɛma se, “Bɛhu Babeloniama! Bɛhu Babelonia ezuavolɛ ne, bɛhu ye arelemgbunli nee ye nrɛlɛbɛvolɛma.

³⁶Bɛhu menli mɔɔ bɔ menli munzule la, bɛle ahɔnwɔne! Bɛhu ye ɛlɔnema, na bɛzɛkye bɛ!

³⁷Bɛhu ye mgbɔnwɔ ne mɔ, bɛzɛkye ye konle ehwili ne mɔ! Bɛhu nyɛvolɛ ɛlɔnema mɔɔ boka ye la, bɛmaa bɛyɛ kɛ mraalɛ! Bɛzɛkye ye anwonyia ne mɔ na bɛve bɛli!

³⁸Bɛmaa ewia ɛpe ye azɛlɛ ne azo, na ye azule ne mɔ ɛsesa, ɔluakɛ Babelonia le ananze maanle, menli ne anye die mmonle nwo kpalɛ!

³⁹ “Yemɔti nanemgbole, bedi, yɛɛ soholo bava Babelɔn ayɛ bɛ dabelɛ, menli ɛnrɛdɛnla ɛkɛ bieko ɛlɛ, awolɛndoazo biala anu awie ɛnrɛdɛnla ɛkɛ ɛlɛ.

⁴⁰ Kɛ menyɛle Sodɔm nee Gomɔla nee azua mɔɔ zuozua bɛ la, zɔhane ala a mebava meayɛ Babelonia a. Awie agyakɛ ba ɛnrɛtia ɛkɛ. Medame Ɛdɛnkɛma a mese a.

⁴¹“Bɛnlea, menli vi sɔlɔ ɛlɛba, maanle katakyie nee arelemgbunli dɔɔnwo vi ewiade ɛleka biala ɛlɛba.

⁴²Bɛdedɛ ɛda nee atwɛ, bɛ ti yɛ se, bɛnze anwunvɔne. Bɛdede mgbɔnwɔ zo, yɛɛ bɛ nwo soa kɛ nyevile. Bɛboɔboa bɛ nwo kɛ bɛbaho, O Babeloniama, bɛlɛba bɛ nwo zo!

⁴³Babelonia belemgbunli ne dele bɛ nganeɛ, ɔ nwo golole ye na ɔ sa nu dole. Nyane wiele ye kyekye, ɔdele nyane kɛ raalɛ mɔɔ ɛvo awolɛ zo.

⁴⁴“Kɛmɔ awenade vi Dwɔdan kpɔkɛ nu finde ba mboane kpolane nwo zo a bɛnriandi la, zɔhane ala a mebamaa bɛanriandi bɛavi Babelonia a, na mebaye sonla mɔɔ mekulo la meamaa yeazie maanle ne. Nwane a nee me sɛ a? Nwane a kɛhola nee me kɛdwudwu a? Belemgbunli boni a kɛhola me nyunlu gyinla a?

⁴⁵Yemɔti bɛdie ngyehyɛlɛ mɔɔ medame Ɛdɛnkɛma meyɛ metia Babelɔn nee debie mɔɔ mevua kɛ mefa meayɛ Babeloniama la. Bɛbahwenle bɛ ngakula ngyikyi ne mɔ aze bɛahɔ. Nɔhalɛ, ɔbayɛ ɛzulolɛ.

⁴⁶Babelɔn azedɔlɛ ne bamaa azɛlɛ ye akpusu, yɛɛ bɛbade ye ɛzunlɛ ne wɔ maanle maanle zo.”