Read Nzema Gyɛ 51 Bible Online

Gyɛ 51 - Nzema bible

Gyɛ 51

¹Ɛdɛnkɛma se, “Bɛnlea, mebamaa sɛkyevolɛ bie anwosesebɛ meamaa yearaho yeatia Babelonia maanle ne nee menli mɔɔ wɔ nuhua la.

²Mebazoa menli Babelonia meamaa bɛahɔhegye maanle ne. Saa munzule kenle ne dwu a, menli vi kodoka biala anu bara ɔ nwo zo, na Babelonia azɛlɛ ne badɔ mgbane.

³Bɛmmamaa kovolɛ ne kpo ye ɛda ne, yɛɛ bɛmmamaa ɔnyia adenle ɔgyela ye mbulahɛba ne. Bɛmmagyakyi ye mgbavolɛ ne mɔ bie; bɛhu ye ɛlɔnema ne bɛbɔ bɛ bo zo.

⁴Bɛbodɛboda bɛ, bɛhu bɛ bɛgua Babelonia guabile ne mɔ azo,

⁵ɔluakɛ Yizilayɛ nee Dwuda ɛyɛ ɛtane dɔɔnwo ɛtia Yizilayɛ Nwuanzanwuanza Ko ne, noko akee medame Tumivolɛ Ɛdɛnkɛma, metɛkpole bɛ.

⁶Bɛnriandi bɛvi Babelonia. Awie biala ɛnriandi ɛlie ye ngoane. Bɛmmadie Babeloniama ɛtane nwo ewule bɛwu, ɔluakɛ mekɛ ɛhye a mefa meadea bɛ wɔ ɛtane mɔɔ bɛyɛ me la anwo a.

⁷ Ɛnee Babelonia le ezukoa nvutuke kɔpo mɔɔ melɛ ye me sa nu, mɔɔ ewiade maanle maanle muala no nuhua a. Maanle maanle nlonle nuhua na biala ati hanle ɔ nwo.

⁸Babelonia ɛdu ɛdɔ arɛlevilɛ nu ɛbubu. Bɛzu ye ɛ! Bɛva ayile ɛnlome bɛkpuda ye, wɔannea a, ɔ nwo kɛza.

⁹ Na nyɛvolɛ mɔɔ wɔ maanle ne anu la hanle kɛ, ‘Ɛnee yɛkulo kɛ yɛyɛ Babelonia ayile; yɛyɛle biala na ɔ nwo anza. Bɛkpo ye, awie biala ɛhɔ ye maanle nu, ɔluakɛ Babelonia ndeanlɛ ne ɛyɛ kpole.’ ”

¹⁰Ɛdɛnkɛma ɛbua yɛ benle, yemɔti bɛmaa yɛhɔbɔ debie mɔɔ Ɛdɛnkɛma yɛ Nyamenle ne ɛyɛ la nolo wɔ Gyɛlusalɛm.

¹¹“Bɛzi atwɛ ne mɔ! Bɛgyela bɛ enyinlike ne mɔ!” Ɛdɛnkɛma ɛne. Yemaa Medea arelemgbunli anwosesebɛ, ɔluakɛ yeva yezie ɔ nyunlu kɛ ɔsɛkye Babelonia, yeava yeali mɔɔ bɛyɛle bɛtiale ye Ɛzonlenlɛ Sua ne la anwo nzenralɛ.

¹²Ɔse, “Bɛyɛ sɛkɛlɛneɛ bɛhile kɛ bɛka Babelɔn bane ne mɔ bɛagua. Bɛmaa sinzavolɛma anwo ɛzo; bɛmaa menli ɛhɔzinza na bie mɔ ɛhɔ nzia, ɔluakɛ medame Ɛdɛnkɛma, mehyehyɛ na meyɛ debie mɔɔ menzele kɛ mebava meayɛ Babeloniama la.

¹³ O bɛmɛ mɔɔ bɛzua azule dɔɔnwo, mɔɔ nuhua le anwonyia ngome la, bɛ awieleɛ ɛra; bɛpɛ bɛ ɛbɛla nyɛma ne azo.

¹⁴Medame Tumivolɛ Ɛdɛnkɛma meha medame me ngome me nwo kɛ: Mebamaa menli abu Babelonia kɛ abɛbɛ kpolane, na bɛ ne babo ɛ nwo zo; bɛbayɛ alɛra mɔɔ kile kɛ bɛli konim la.”

¹⁵Ɛdɛnkɛma vale ye tumi bɔle azɛlɛ ye, ye nrɛlɛbɛ a ɔvale ɔbɔle ewiade a, yɛɛ ye ndelebɛbo a ɔvale ɔbɔle anwomanyunlu a.

¹⁶Saa ɔtendɛ a anwomanyunlu nzule di tufonyia, ɔmaa amungu dwazo aleɛabo ɛleka biala. Ezule tɔ a ɔmaa ɔfede, na ɔmaa anwoma vi ye anwomazielɛ ɛleka ne tu.

¹⁷Awie biala le koasea, ɔnlɛ adwenle. Ezukoa nvutuke dwinvolɛ biala mmonle ananze adwinli ne gua ɔ nyunlu aze, ye ananze ne mɔ le mɛlɛbɛla, ɛnwomenle fee ɛnle bɛ nu.

¹⁸Bɛle ninyɛne avunli, gyima mgbane; bɛ ndeanlɛ mekɛ dwu a bɛ bo zo baminli bɔkɔɔ.

¹⁹Gyekɔbo Nyamenle ne ɛnle zɔ, ɔluakɛ yemɔ a ɔbɔle ninyɛne kɔsɔɔti a. Yizilayɛ abusua ekpunli ne le ye agyadeɛ, ye duma a le Tumivolɛ Ɛdɛnkɛma.

²⁰Ɛdɛnkɛma se, “Babelonia, ɛle me hamenle nee me akodeɛ, mefa wɔ mebubu maanle maanle, mefa wɔ mesɛkye arelemgbunli maanle,

²¹mefa wɔ mebubu ɛkpɔnwɔ nee ye kavolɛ, mefa wɔ megelegele konle ehwili ne nee ye kavolɛ ne,

²²mefa wɔ meku mrenya nee mraalɛ, mefa wɔ meku mrelera nee ngakula, mefa wɔ meku mgbavolɛ nee mbɛlɛra,

²³mefa wɔ meku mboaneneavolɛ nee ye mboane, mefa wɔ meku ɛyazonlɛnli nee menli mɔɔ boka ɔ nwo la, mefa wɔ metu amɛnladoma nee safohyenlema.”

²⁴Ɛdɛnkɛma se, “Mebadua Babelonia nee menli mɔɔ de Babelonia la kakɛ wɔ amumuyɛ mɔɔ bɛyɛ ye wɔ Gyɛlusalɛm la anwo.

²⁵O Boka sɛkyevo, mɔɔ sɛkye ewiade, mebava me sa meazie ɛ nwo, meahundo wɔ meado aze, na meamaa wɔayela wɔadɔ nzonle.

²⁶Bɛnrɛva ɛ bo zo bolɛ ko bɔbɔ bɛnrɛzie sua mgbɛne zo, yɛɛ bɛnrɛva bie bɛnrɛwula sua adiabo, ɛbayɛ mgbane bɔkɔɔ. Medame Ɛdɛnkɛma a mese a.

²⁷“Bɛvola fɛlɛnra wɔ azɛlɛ ne azo. Bɛwu aweɛne tendenle ne anu wɔ maanle maanle ne mɔ avinli, bɛboɔboa bɛ nloa na bɛhɔho bɛtia ye. Arelalate, Menae, yɛɛ Ahyikinaze, bɛbɛza na bɛ nee Babelonia ɛhɔho. Bɛye safohyenlema kpanyinli bɛmaa ɔli ɛlɔnema ne ati. Bɛmaa mgbɔnwɔ anwo ɛzo kɛ abɛbɛ kpolane.

²⁸Bɛmaa Midea arelemgbunli, bɛ amɛnladoma, bɛ mgbanyima, yɛɛ maanle biala mɔɔ bɛsie la anu amra amuala ɛva bɛ ɛlɔnema nee ye ɛraho.

²⁹Azɛlɛ ye te nyane na ɔkpusu, ɔluakɛ medame Ɛdɛnkɛma melɛdi Babelonia ɛbɔlɛ nwo ngyehyɛlɛ ne azo. Mehyehyɛ kɛ mebɔ Babelonia, meado azɛlɛ ne mgbane mɔɔ awie ɛndɛnla zolɛ a.

³⁰Babelonia katakyiema ɛgyakyi konle na bɛhɔvea bɛ aranemgbole ne mɔ anu. Bɛ anwosesebɛ ɛwie ɛmaa bɛyɛ kɛ mraalɛ. Senle la ye azua ne mɔ anu, bɛ nlenkɛ mgbole nzi mbulalɛ ne mɔ anu ɛbubu.

³¹Menli nriandi di akɔneaba kɛ bɛkabɔ Babelonia belemgbunli ne amaneɛ kɛ bɛva ye suakpole ne bɔkɔɔ.

³²Kpɔvolɛ ɛlɔnema ne ɛva azupɛlɛ ɛleka ne mɔ na bɛdo senle wɔ suakpole ne aranemgbole ne mɔ anu. Babelonia ɛlɔnema ne mɔ anye zo ɛda bɛ.

³³Tumivolɛ Ɛdɛnkɛma, Yizilayɛ Nyamenle ne se, Babelonia le kɛ ma ɛwozolɛ ɛleka mɔɔ bɛlɛwozo ma ɛkɛ la. Noko ɔnrɛhyɛ biala na ɔdaye ye ɛbuhenle ne adwu.”

³⁴Babelonia Belemgbunli Nɛbukadenɛza ɛhye Gyɛlusalɛm ɛli, yedi ye motomoto, yeyɛ ye mgbane; yeme ye kɛ nane anwo ɛzulolɛ me debie la, yeli ye yemaa ɔ ko ɛyi na yekpu ye yedo.

³⁵Bɛmaa Gyɛlusalɛm ɛha kɛ, “Konle mɔɔ Babelonia ɛva ɛdoa me nee me nwo amra la ɛbu ɛzia ye. Me mogya mɔɔ yeha yegua la ɛgua ɔ ti zo.”

³⁶Yemɔti Ɛdɛnkɛma se, “Gyɛlusalɛmma, bɛnlea, mebali bɛ edwɛkɛ meamaa bɛ na meali bɛ ti nzenralɛ. Mebamaa Babelonia nyevile asesa na meamaa ye azule asesa;

³⁷Babelonia bayɛ suadu na ɛkɛ ne ayɛ ɛzonlɛ dabelɛ. Ɔbayɛ ɛleka ɛzulolɛ mɔɔ menli ɛnrɛdɛnla ɛkɛ a. Awie mɔɔ kɛhɔvinde zolɛ la babɔ mgbatike.

³⁸Bɛ muala bɛbabɔ nu bɛadea kɛ awenade na bɛazu kɛ awenade mralɛ la.

³⁹Mekɛ mɔɔ bɛ nye kɛbolo kpalɛ la, mebado bɛ ɛkponle na meamaa bɛanlo nza toonwo bɛ nye alie. Akee bɛbalafe na bɛnrɛdunwue ɛlɛ, bɛbaha nafelɛ nu. Medame Ɛdɛnkɛma a mese a.

⁴⁰Me nee bɛ bara ahunleɛ kɛ mboane mralɛ, kɛ mboane nyinli nee mbɔnkye nyinli la.”

⁴¹Ɛdɛnkɛma se, “Bɛnlea, kɛ bɛva Babelɔn mɔɔ anrɛɛ aleɛabo amra amuala bɔ ye duma la aze ɛ. Yeyɛ ɛleka ɛzulolɛ bie wɔ maanle maanle avinli.

⁴²Nyevile ɛva Babelɔn, azɛlɛkye mgbole ɛbu ɛva ɔ nwo zo.

⁴³Ye azuamgbole ne mɔ ɛbɔ. Azɛlɛ ne azo nzule ɛsesa bɔkɔɔ ɛyɛ kɛ ɛsɛlɛ, awie ɛnde azɛlɛ ne azo, yɛɛ awie ɛnze ɛkɛ.

⁴⁴Mebadea Babelonia Bozonle Bɛle[13] na meamaa yeakpu mɔɔ yeme la. Maanle maanle ɛnrɛva ɛnriandilɛ ɛnrɛra Babelonia bieko. “Babelɔn bane ne mɔ ɛde ɛgua.

⁴⁵Me menli Yizilayɛma, bɛye bɛ nwo zo wɔ Babelɔn. Awie biala ɛnriandi ɛvi me ɛya kpole ne anu ɛlie ye ngoane!

⁴⁶Bɛmmamaa bɛ ahonle tu, yɛɛ bɛmmasulo edwɛkɛ mɔɔ bɛde ye azɛlɛ ne azo la anwo. Ɛvolɛ biala bɛte konle nwo edwɛkɛ wɔ azɛlɛ ne azo kɛ belemgbunli nee ɔ gɔnwo belemgbunli ɛnyia konle.

⁴⁷Zɔhane ati mekɛ ɛlɛba mɔɔ mebadea Babelonia awozonle ne mɔ a. Bɛbagua azɛlɛ ne amuala anyunlu aze na bɛahu ye menli ne mɔ amuala bɛagua zolɛ totɔɔ.

⁴⁸ Anwuma nee aze nee ninyɛne mɔɔ wɔ nu la kɔsɔɔti bado edwɛne anyelielɛ nu agua Babelonia ati zo, ɔluakɛ menli vi sɔlɔ maanle nu a bara arazɛkye Babelonia a. Medame Ɛdɛnkɛma a mese a.

⁴⁹ Babelonia hunle ewiade menli muala, yemɔti ɔwɔ kɛ bɛbɔ ye, ɔboalekɛ ɔhunle Yizilayɛma.”

⁵⁰Ɛdɛnkɛma zele ye menli mɔɔ wɔ Babelonia la kɛ, “Bɛdabɛ mɔɔ bɛvi ɛsalɛ wɔ konle ne anu la, bɛhɔ, bɛmmagyinla ɛkɛ ne zɔhane! Kanza bɛwɔ moa bɔbɔ a, bɛhakye medame Ɛdɛnkɛma, na bɛhakye Gyɛlusalɛm.

⁵¹Bɛlɛka kɛ, ‘Bɛdea yɛ, bɛgua yɛ nyunlu aze, bɛbɔ yɛ anyiemgba. Bɛzɛkye yɛ anyunlunyia, ɔluakɛ nyɛvolɛ ɛrava Ɛdɛnkɛma Ɛzonlenlɛ Sua ne.’

⁵²Yemɔti, bɛnlea, mekɛ ɛlɛba mɔɔ me nee Babelonia awozonle ne mɔ bali a. Bɛdabɛ mɔɔ bɛkɛboda la kɔsɔɔti bagua azɛlɛ ne azo akponle.

⁵³Saa Babelonia fo kɔ anwuma kɔsi aranemgbole fa bɔ ɔ nwo bane bɔbɔ a, mebazoa menli meamaa bɛahɔzɛkye ye. Medame Ɛdɛnkɛma a mese a.”

⁵⁴Ɛdɛnkɛma se, “Bɛdie! Bɛlɛtea nu Babelonia lɔ! Babelonia ɛzɛkyelɛ nwo alɛra ɔ!

⁵⁵Ɔluakɛ, medame Ɛdɛnkɛma, melɛsɛkye Babelonia, meado ye mgbane, meamaa yeamua ɔ nloa katekate ne. Bɛ ɛlɔnema ane kɔ anwuma kpalɛ, na ɔdielie kɛ azule dɔɔnwo ane,

⁵⁶ɔluakɛ sɛkyevolɛ ɛra Babelɔn anwo zo. Bɛhye ye ɛlɔnema nuokɛ, bɛbubu bɛ ɛda ne mɔ anu, ɔluakɛ medame Ɛdɛnkɛma, mele Nyamenle mɔɔ metua ɛtane nwo kakɛ a, mebadea Babelonia kɛmɔ ɔfɛta la.

⁵⁷Mebamaa ye mgbanyima nee ye nrɛlɛbɛvolɛma, ye amɛnladoma, ye safohyenlema, yɛɛ ye ɛlɔnema anlo abo. Bɛbalafe mɔɔ bɛnrɛdunwue ɛlɛ a, medame Belemgbunli mɔɔ me duma a le Tumivolɛ Ɛdɛnkɛma la a mese a.”

⁵⁸Tumivolɛ Ɛdɛnkɛma se, “Bɛbaha Babelɔn bane kpole ne bɛagua, bɛbado senle ye nlenkɛ mgbole ne mɔ anu. Menli ne ɛvɛlɛ muala bayɛ mgbane, senle bazɛkye maanle maanle ne mɔ ɛvɛlɛ biala. Medame Tumivolɛ Ɛdɛnkɛma a mese a.”

⁵⁹Belemgbunli Zɛdikaya lile Dwuda ebia ne la, ye ɛvolɛ nna ne anu, Nyamenle Kpɔmanvolɛ Gyɛlɛmaya hanle edwɛkɛ hilele Sɛlaya. Sɛlaya le Zɛdikaya abɔlɔba. Ɔle Masaya anlɔnra yɛɛ ɔ ze a le Nilaya. Ɛnee Sɛlaya nee Belemgbunli Zɛdikaya ɛlɛkɔ Babelonia.

⁶⁰Gyɛlɛmaya hɛlɛle munzule mɔɔ bara Babelonia anwo zo la amuala wɔ buluku nu.

⁶¹Na ɔhanle ɔhilele Sɛlaya kɛ, “Saa ɛdwu Babelɔn a nea na kenga edwɛkɛ ɛhye mɔ amuala,

⁶²na ka kɛ, ‘O Ɛdɛnkɛma, wɔha ɛke anwo edwɛkɛ kɛ ɛbazɛkye ye mɔɔ sonla anzɛɛ nane ɛnrɛhola ɛkɛ ne tɛnla; ɔbabɔ bɔkɔɔ wɔ mekɛ mɔɔ ɛnlɛ awieleɛ.’

⁶³ Saa ɛwie buluku ɛhye kenga a, fa bolɛ boka nwo kyekye na fuandi to Azule Yufileti ne anu,

⁶⁴na ka kɛ, ‘Kɛ Babelonia bazi anloma la ɛne. Ɔnrɛdwazo bieko ɛlɛ, ɔboalekɛ melɛmaa munzule ara ɔ nwo zo.’ ” Gyɛlɛmaya edwɛkɛ ne awieleɛ ɛne.