Read Nzema Gyɛ 52 Bible Online

Gyɛ 52 - Nzema bible

Gyɛ 52

¹Zɛdikaya lile ɛvolɛ abulanwiɔ nee ko la yɛɛ ɔbɔle ɔ bo kɛ ɔdi Dwuda belemgbunli wɔ Gyɛlusalɛm a. Ɔdɛnlanle ebia ne azo ɛvolɛ bulu nee ko. Ɔ nli a le Gyɛlɛmaya mɔɔ vi Lebena la ara raalɛ Hamutale.

²Zɛdikaya yɛle ɛtane tiale Ɛdɛnkɛma kɛmɔ Belemgbunli Gyɛhɔyakem yɛle la.

³Nɔhalɛ, ɔlua ɛya mɔɔ Ɛdɛnkɛma vale wɔ Gyɛlusalɛmma nee Dwudama anwo la ati ɔvoanle bɛ ɔvile ɔ nye zo. Na Zɛdikaya dele Babelonia Belemgbunli Nɛbukadenɛza anwo atua.

⁴ Yemɔti Zɛdikaya lile ɛvolɛ ngɔnla wɔ ebia ne azo la, ye siane bulu ne, na ye kenle bulu ne azo, Babelonia Belemgbunli Nɛbukadenɛza vale ye ɛlɔnema kɔsɔɔti radoale Gyɛlusalɛmma kɛ ɔ nee bɛ ko. Bɛbɛnrale bɛyiale Gyɛlusalɛm, na bɛyɛle bɛ azokoɛleɛ wɔ Gyɛlusalɛm kandiba, na bɛhuohuanle ɛnwea suakpole ne bane ne mɔ anwo.

⁵Bɛguale ɛkɛ bɛnwinwinle Gyɛlusalɛm toonwo ɔhɔkpulale mekɛ mɔɔ Zɛdikaya lile ɛvolɛ bulu nee ko wɔ ebia ne azo la.

⁶Ɛvolɛ ne ala anu, siane nna ne na ye kenle ngɔnla ne azo, ɛnee ɛhɔne mɔɔ ɛra suakpole ne azo la le kpole kpalɛ. Ɛnee menli ne ɛnnyia aleɛ fee wɔ azɛlɛ ne azo.

⁷ Yemɔti Gyɛlusalɛm ɛlɔnema ne bule bane ne nɔɔzo na bɛpenle ɛkɛ bɛnriandile. Bɛbɔle bɛ ti Dwɔdan Bɔnza afoa nu. Bɛvale anlenkɛ kpole bie mɔɔ la bane nwiɔ ne avinli la anu, bɛluale belemgbunli tola ne anu bɛhɔle.

⁸Na Babelonia ɛlɔnema ne voanle Belemgbunli Zɛdikaya toonwo bɛhɔhyele ye wɔ Gyɛleko fienemgbole nu na ye ɛlɔnema ne bɔle asande.

⁹Bɛvale Zɛdikaya bɛrale Babelonia Belemgbunli Nɛbukadenɛza anyunlu, wɔ Relebela mɔɔ wɔ Heemate maanzinli nu la na ɔbuale ye ndɛne.

¹⁰Babelonia belemgbunli ne hunle Zɛdikaya amra mrenya ne mɔ wɔ ɔdaye Zɛdikaya ɔ nye zo, na eza ɔhunle Dwuda mgbanyima ne mɔ amuala wɔ Relebela ɛkɛ.

¹¹ Akee Nɛbukadenɛza dudule Zɛdikaya anye, ɔguale ye nwɔnzɔnwɔnzɔ na ɔvale ye ɔhɔle Babelɔn ɔhɔdole ye efiade. Zɛdikaya lale efiade ne toonwo ɔwule.

¹²Mɔɔ Babelonia Belemgbunli Nɛbukadenɛza lile ɛvolɛ bulu nee ngɔnla wɔ ebia ne azo la, ye siane nnu ne, kenle mɔɔ tɔ zo bulu la azo, ye sinzavolɛma Safohyenle Nɛbuzaladan vole Gyɛlusalɛm.

¹³ Ɔyelale Ɛzonlenlɛ Sua ne, belemgbunli suakunlu, yɛɛ Gyɛlusalɛm azua ne mɔ amuala; ɔyelale azua mgbole ne mɔ amuala.

¹⁴Babelɔn ɛlɔnema mɔɔ boka sinzavolɛma safohyenle ne anwo la gologolole bane ne mɔɔ bɛlie bɛbɔ Gyɛlusalɛm anwo bɛyia la guale aze.

¹⁵Na Sinzavolɛma Safohyenle Nɛbuzaladan hyele ehyianvolɛma ne bie mɔ nuokɛ, nee menli mɔɔ ɛnee ɛha la, yɛɛ ɔvale menli mɔɔ ɛnee ɛva bɛ nwo ɛmaa Babelonia belemgbunli ne la ɔhɔle. Eza ɔhyele dwinvolɛma mɔɔ hale ɛkɛ ne la bɛdabɛ noko ɔhɔle.

¹⁶Na Nɛbuzaladan gyakyile ehyianvolɛma ne bie mɔ ɛkɛ kɛ bɛyɛ vanye gyima na bɛzo ɛya.

¹⁷ Babeloniama ne mɔ bubule kɔbele mpila, kɔbele ehwili, yɛɛ kɔbele angola ne mɔɔ wɔ Ɛzonlenlɛ Sua ne anu la na bɛzoale bɛ muala bɛhɔle Babelɔn.

¹⁸Bɛzoale ɛzɛne, sofi, ahyɛnze kuloonwu, ɛyɛlɛkpunlɛ dwora ne mɔ, yɛɛ debie biala mɔɔ bɛvale kɔbele bɛyɛle na bɛfa bɛyɛ nzɛlɛlɛ wɔ Ɛzonlenlɛ Sua ne anu la amuala bɛhɔle.

¹⁹Eza bɛvale debie biala mɔɔ bɛva ezukoa nvutuke anzɛɛ dwɛtɛ fufule bɛyɛ la bɛhɔle. Bie mɔ a le kula ngyikyi, senlevalɛ ahyɛnze, ahyɛnze kuloonwu, ɛzɛne ne mɔ, kɛnlaneɛ mbaka, ɛyɛlɛkpunlɛ dwora, yɛɛ ɛdɛneyelɛ dwora ne mɔ.

²⁰Mpila nwiɔ ne, angola ne, kɔbele nlankɛ nyinli bulu nee nwiɔ ne mɔɔ angola ne gyi zo, yɛɛ kɔbele ninyɛne mɔɔ Belemgbunli Sɔlɔmɔn ɛyɛ ɛzie Ɛdɛnkɛma Ɛzonlenlɛ Sua ne anu la amuala le ninyɛne mɔɔ yɛ ɛnlomboɛ somaa a.

²¹Mpila nwiɔ ne, ko biala anwo zo anwumahɔlɛ le mita mɔtwɛ yɛɛ ye kutukpunli le mita nnu nee ekyi. Bɛ kunlu kɔ kuloonwu yɛɛ bɛ sinlinyunlu ne le melimita abulasuu nee nnu. Bɛva kɔbele ne bie bɛyɛ debie mɔɔ anwo zo anwumahɔlɛ le mita nwiɔ nee ekyi la bɛzie ko biala azo. Bɛva kɔbele bɛyɛ debie mɔɔ zɔho akutue la bɛgyelegyela bɛ.

²³Kɔbele akutue mɔɔ gyela mpila ne mɔ mɔɔ gyigyi ninyɛne nwiɔ ne ko biala anwo la le ɛya ko, na saa ɛgyi aze na ɛnea a, ɛnwu nuhua abulahɔnla nee nsia.

²⁴Sinzavolɛma Safohyenle Kpanyinli Nɛbuzaladan hyele Sɛlɛvolɛ Kpanyinli Sɛlaya nee ye boavolɛ Sɛlɛvolɛ Zɛfanaya, yɛɛ Ɛzonlenlɛ Sua ne anu sonvolɛma nsa nuokɛ na ɔ nee bɛ hɔle.

²⁵Ɔhyele kpanyinli ne mɔɔ ɛnee nea ɛlɔnema amuala anwo zo, mgbanyima nsuu mɔɔ boka menli mɔɔ tu belemgbunli folɛ mɔɔ bɛ sa hanle bɛ suakpole ne azo, kpanyinli ne mɔɔ nea ɛlɔnema anwo zo la, kɛlɛhɛlɛvolɛ ne mɔɔ nea ɛlɔnema ninyɛne zo, yɛɛ menli abulasia bie mɔɔ bɛ sa hanle bɛ bɛhyele bɛ suakpole ne azo la.

²⁶Nɛbuzaladan vulale menli ɛhye mɔ hɔmanle Babelonia belemgbunli ne wɔ Relebela.

²⁷Na Babelonia belemgbunli ne hunle bɛ wɔ Relebela mɔɔ wɔ Heemate la. Yemɔti bɛhyele Dwudama nuokɛ bɛ nee bɛ vi bɛ maanle nu hɔle nlɔnu.

²⁸Menli mɔɔ Nɛbukadenɛza hyele bɛ hɔle nlɔnu la ɛ: mɔɔ ɔnyianle ɛvolɛ nsuu wɔ ebia ne azo la, ɔhyele Dwudama apenle nsa abulanwiɔ nee nsa:

²⁹ɔnyianle ɛvolɛ bulu nee mɔtwɛ la, ɔhyele Gyɛlusalɛmma ɛya mɔtwɛ abulasa nee nwiɔ;

³⁰ɔnyianle ɛvolɛ abulanwiɔ nee nsa la, ɔhyele Dwuuma ɛya nsuu abulanla nee nnu. Menli ne kɔsɔɔti le apenle nna ɛya nsia.

³¹Bɛhyele Belemgbunli Gyɛhɔyakɛn bɛhɔle nlɔnu wɔ Babelonia bɛhɔdole ye efiade la, ye ɛvolɛ abulasa nee nsuu, siane bulu nee nwiɔ ne, ye kenle abulanwiɔ nee nnu ne azo, bɛvale Yivelemɛlodake bɛziele Babelonia belemgbunli. Belemgbunli Yivelemɛlodake yɛle atiakunlukɛnlɛma

³²manle Gyɛhɔyakɛn dɛlale arelemgbunli mɔɔ ɔ nee bɛ wɔ nlɔnu wɔ Babelonia la amuala. Ɔyele Gyɛhɔyakɛn efiade, ɔvale ye ɔziele dibelɛ kpole mɔɔ tɛla arelemgbunli mɔɔ ɔ nee bɛ wɔ Babelonia maanle ne anu la.

³³Yemɔti Gyɛhɔyakɛn kpolole ye efiadedolɛ adɛladeɛ ne mɔ guale. Mekɛ mɔɔ ɔde aze la, ɔ nee Babelonia belemgbunli tɛnla ɛkponle ko anwo di debie.

³⁴Belemgbunli ne hilele ezukoa mɔɔ bɛva bɛmaa Gyɛhɔyakɛn kenle ko biala la. Bɛyɛle ye zɔhane toonwo ɔhɔkpulale mekɛ mɔɔ Gyɛhɔyakɛn wule la.