Read Nzema Gyɛ 6 Bible Online

Gyɛ 6 - Nzema bible

Gyɛ 6

¹O Bɛngyamanema, bɛnriandi bɛvi Gyɛlusalɛm! Bɛlie bɛ ngoane! Bɛwu aweɛne tendenle ne anu wɔ Tɛkowa na bɛkpɔnla sɛkɛlɛneɛ wɔ Bɛte Hakɛlɛm, ɔluakɛ munzule ɛkpuke sɔlɔ ɛlɛba arazɛkye ninyɛne.

²Suakpole Zayɔn ɛfifi kɛnlɛma, noko bɛbabɔ ye.

³Arelemgbunli bava bɛ ɛlɔnema ara ɛkɛ. Bɛbasisi bɛ ndanlɛ azua bɛabɔ suakpole ne bɛayia. Awie biala badɛnla ɛleka mɔɔ ɔkulo la.

⁴Bɛbaha kɛ “Bɛboɔboa bɛ nwo bɛhɔteta Gyɛlusalɛm; bɛteta ye ewiazo ketekete!” Menli ne babua kɛ, “Yekpa nwolɛ, aleɛ asɛɛ ɛdwo, sɛnzɛne ne ɛdɔ.

⁵Bɛdwazo bɛmaa yɛhɔteta bɛ ɛnɛ nɔe, na yɛbubu bɛ aranemgbole ne mɔ!”

⁶Kɛ Tumivolɛ Ɛdɛnkɛma se la ɛne: “Bɛpepɛ ye mbaka ne mɔ na bɛhuohua anwea suakpole Gyɛlusalɛm anwo bɛbɛnra bɛyia. Ɔwɔ kɛ bɛtea suakpole ɛhye azo amra, ɔluakɛ ɛsisilɛ ala a bɛsisi menli a.

⁷Kɛmɔ dahuu nzule gyi bula nu la, zɔhane ala a Gyɛlusalɛm dahuu sie amumuyɛ a; konle konle nee ninyɛnezɛkyelɛ ala a mete a, anwondolɛ nee nganlɛ ɛbobɔlɛ ala a menwu bɛ a.

⁸Gyɛlusalɛmma, bɛva ɛhye mɔ bɛdu bɛ nwo folɛ, anrɛɛ menwɔkpo bɛ menwɔmaa bɛ suakpole ne kɛyɛ suadu.”

⁹Tumivolɛ Ɛdɛnkɛma se, “Bɛkpokpo Yizilayɛma mɔɔ ɛha la kɛ vanye baka mɔɔ bɛwie ye ma kpolo la. Yemɔti kpɔla ye ngane ne mɔ azo bieko, kɛmɔ matevolɛ ɛlɛtete vanye ne a ɔyɛ la.”

¹⁰Membuale kɛ, “Saa meka edwɛkɛ ɛhye mefa mebɔ kɔkɔ a, nwane bɔbɔ a kɛdie me a? Bɛduodua bɛ nzo; ɛka edwɛkɛ a bɛndie. Ɛdɛnkɛma, ɛ nloa edwɛkɛ bɔbɔ yɛ bɛ ɛzelekɛ. Bɛ nye ɛnlie ɛ nloa edwɛkɛ ne anwo fee.

¹¹Yemɔti ɛya mɔɔ wɔva ye bɛ nwo la ɛwolowolo me, Ɛdɛnkɛma. Mengola ye me kunlu di.” Nzinlii Ɛdɛnkɛma zele me kɛ, “Wola me ɛya ne gua ngakula mɔɔ wɔ guabile ne mɔ azo, nee mgbavolɛ mɔɔ ɛyia la anwo zo. Bɛbahye kunli nee yelɛ, mgbanyinli nee mrelera bɛahɔ.

¹² Mebadea menli mɔɔ de azɛlɛ ne azo la. Yemɔti bɛbava bɛ azua, bɛ egyinli yɛɛ bɛ ye mɔ bɛamaa awie mɔ gyɛne.

¹³Ɔluakɛ ngakula nee mgbanyinli kɔsɔɔti ɛva ɛzie bɛ nyunlu kɛ bɛkpondɛ ezukoa awule nu. Nyamenle kpɔmanvolɛma nee sɛlɛvolɛma amuala sisi menli ne.

¹⁴ Bɛlɛmia me menli ne nganlɛ ne mɔ a bɛdoɔloa bɛ ala. Bɛse, ‘Yehɔ, yehɔ,’ wɔ mekɛ mɔɔ nganlɛ ne mɔ ɛtɛkɔle la.

¹⁵Asoo bɛkyi ninyɛne ɛhye mɔ ɛyɛlɛ yɛle bɛ nyiane? Kyɛkyɛ, yeanyɛ bɛ nyiane fee, bɛnze nyiane deɛ holɛ. Yemɔti bɛbawu kɛ menli mɔɔ ɛwu la. Kenle mɔɔ menwɔze kɛ metea bɛ la ɛnee bɛ awieleɛ ne ala ɛne. Medame Ɛdɛnkɛma a mese a.”

¹⁶Ɛdɛnkɛma zele ye menli ne kɛ, “Bɛgyinlegyinla ndenle ne mɔ azo na bɛnlea. Bɛbizebiza mɔmoane ndenle ne mɔ, ɛleka mɔɔ adenle kpalɛ kpalɛ ne la la. Bɛlua nuhua na bɛkɛnyia anzonudwolɛ.” Na bɛbuale kɛ, “Kyɛkyɛ, yɛnrɛlua nuhua fee.”

¹⁷Memanle bɛ sinzavolɛma na menganle kɛ, “Bɛdie aweɛne tendenle ne kɔkɔbɔlɛ ne!” Na bɛhanle kɛ, “Yɛnrɛdie!”

¹⁸Yemɔti Ɛdɛnkɛma zele kɛ, “Bɛdie, bɛmɛ maanle maanle, maanlema mɔɔ ɛyia nu, na bɛnwu mɔɔ bara me menli ne anwo zo la.

¹⁹Tie, O azɛlɛ! Adwenle ɛtane ɛtane mɔɔ me menli ne bɔ la ati, melɛmaa munzule ara bɛ nwo zo, ɔboalekɛ bɛandie me ne, yɛɛ bɛkpo me mɛla ne.

²⁰Kɛ meyɛ ɛyɛlɛ ne mɔɔ bɛ nee ye vi Hyiba ɛrɛlɛ me la ɛ? Anzɛɛ kɛ meyɛ aleɛdonlɛ ninyɛne evuanlɛ mɔɔ bɛ nee bɛ vi maanle zo moa moa ɛrɛlɛ me la ɛ? Menrɛlie bɛ ɛyelalɛ azubɔdeɛ ne mɔ, yɛɛ bɛ azubɔlɛ ne mɔ ɛnzɔ me nye.”

²¹Ɛdɛnkɛma se, “Bɛnlea, mebamaa menli ɛhye mɔ adu koti adu agua aze; selɛ o, mralɛ o, agɔnwolɛma anzɛɛ menli mɔɔ bɛ nee bɛ zuozua bane la o, bɛ kɔsɔɔti bɛ bo zo baminli.”

²²Ɛdɛnkɛma zele me kɛ, “Menli vi sɔlɔ maanle nu ɛlɛba. Maanle anwosesebɛ kpalɛ bie ɛlɛboɔboa ɔ nwo nee konle vi moa moa ara.

²³Bɛdedɛ ɛda nee atwɛ mɔ; bɛ ti yɛ se yɛɛ bɛnze anwunvɔne. Saa bɛdede bɛ mgbɔnwɔ ne mɔ azo a, bɛ nganeɛ kulu kɛ nyevile. Bɛboɔboa bɛ nwo bɛwie; bɛlɛba bɛ nee Gyɛlusalɛmma araho.”

²⁴Gyɛlusalɛmma se, “Yɛde nrɛlaleɛ ne, yɛ sa nu ɛtuto. Arɛlebɔlɛ nee nyane ɛkyekye yɛ kɛ raalɛ mɔɔ ɛvo awolɛ zo la.

²⁵Bɛmmakɔ ɛbɔ nu yɛɛ bɛmmaduolua ademgbole ne mɔ anu, ɔluakɛ yɛ kpɔvolɛma ɛwie sia; ɛleka biala ɛyɛ ɛzulolɛ.”

²⁶Ɛdɛnkɛma zele ye menli ne kɛ, “Bɛheda ɛrele na bɛva nzonle bɛbɔ bɛ nwo. Bɛzu bɛye awolɛ kpalɛ kɛ bɛsu ralɛ nrenya kokye mɔɔ ɛwu la, ɔboalekɛ sɛkyevolɛ ne mɔɔ bazɛkye bɛ la barateta bɛ arɛlevilɛ nu.

²⁷Gyɛlɛmaya, meyɛ wɔ ezukoa dwinvolɛ; sɔ me menli ne nea, kɛmɔ dwinvolɛ si twi bulalɛ nwo nea ye deɛ holɛ la. Nea na nwu bɛ ndenle ne mɔ.

²⁸Bɛ muala bɛte atua anzosesebɛ nu; bɛ nee alane asiayɛma a tu a. Bɛyɛ se kɛ kɔbele nee bulalɛ. Bɛ ɛbɛla ɛzɛkye.

²⁹Dwinvolɛ senle ne ɛlɛsɔ kpole, senle ne ɛdɔlɔ woonwu, noko mbulalɛ ne mɔ ɛngolo na mɔɔ ɛnle kpalɛ la avi nu. Ɔle ɛvɛlɛ mgbane kɛ ɛkɛha kɛ ɛyɛ me menli ne boɛ, ɔluakɛ bɛtɛyele amumuyɛma ne bɛtɛfile bɛ avinli.

³⁰Bɛfɛlɛ bɛ dwɛtɛ fufule ebinli, ɔluakɛ medame Ɛdɛnkɛma, mekpo bɛ.”