Read Nzema Gyɛ 7 Bible Online

Gyɛ 7 - Nzema bible

Gyɛ 7

¹Ɛdɛnkɛma zele Gyɛlɛmaya kɛ,

²“Kɔgyinla Ɛdɛnkɛma Ɛzonlenlɛ Sua ne anlenkɛ kpole ne anu, na bɔ edwɛkɛ ɛhye nolo kɛ: Bɛmɛ Dwudama mɔɔ dua nlenkɛ mgbole ɛhye mɔ anu ba Ɛzonlenlɛ Sua ye anu basonle medame Ɛdɛnkɛma la, bɛ muala bɛdie.

³Medame Tumivolɛ Ɛdɛnkɛma, Yizilayɛ Nyamenle, mese: Bɛnlea bɛ ndenle nu boɛ na bɛhakyi bɛ nyɛleɛ ne mɔ na menwɔmaa bɛkɛdɛnla ɛke.

⁴Bɛmmadie mɛlɛbɛla edwɛkɛ ɛhye mɔɔ se, ‘Ɛdɛnkɛma Ɛzonlenlɛ Sua ne ɛne, Ɛdɛnkɛma Ɛzonlenlɛ Sua ne ɛne!’ la bɛdi.

⁵“Ɔluakɛ saa nɔhalɛ nu bɛkakyi bɛ ndenle nee bɛ nyɛleɛ, saa nɔhalɛ nu bɛdi pɛlepɛle bɛmaa bɛ nwo ngoko,

⁶saa bɛansisi nyɛvolɛ, bɛansisi menli mɔɔ ɛnlɛ bɛ ze anzɛɛ ahunlanvolɛ mraalɛ, anzɛɛ bɛanga mogya mɔɔ ɛnze nwolɛ bie la bɛangua ɛke, yɛɛ saa bɛangɔnzonle nyamenle gyɛne gyɛne bɛanzɛkye bɛ nwo a,

⁷menwɔmaa bɛkɛdɛnla ɛke, wɔ azɛlɛ ne mɔɔ menvale memanle bɛ ze mɔ bɔkɔɔ la azo.

⁸“Bɛmɛ, bɛdie mɛlɛbɛla edwɛkɛ bɛdi, noko bɛnnyia zolɛ nvasoɛ.

⁹Bɛwua, bɛku menli, bɛto awuvolɛvalɛ mɛla ne, bɛdi amonle bɛbɔ adalɛ, bɛkpu ɛyɛlɛ bɛmaa bozonle Beeyale, bɛsonle nyamenle gyɛne gyɛne mɔɔ bɛnze bɛ la,

¹⁰na bɛaragyinla me nyunlu wɔ me Ɛzonlenlɛ Sua ye mɔɔ bɛfa me duma bɛfɛlɛ ye la anu, na bɛaze kɛ, ‘Bɛlie yɛ ngoane’ wɔ mekɛ mɔɔ bɛtɛgua zolɛ bɛtɛyɛ bɛkyi ninyɛne la.

¹¹ Bɛdwenle kɛ me Ɛzonlenlɛ Sua ye mɔɔ bɛfa me duma bɛfɛlɛ ye la le awulema fealeka ɔ? Mɔɔ bɛlɛyɛ la, medame mumua ne menwu ye.

¹² Bɛhɔ Hyaelo,[2] ɛleka mɔɔ menlumuale menyɛle kɛ bɛzonle me, na bɛhɔnlea kɛ menzile menyɛle ye wɔ me menli Yizilayɛma ɛtane ne ati la.

¹³Kɛmɔ bɛyɛ ɛhye mɔ amuala, medendɛ mehile bɛ fane dɔɔnwo na bɛandie, na menvɛlɛle bɛ la, bɛambua la ati, medame Ɛdɛnkɛma, mese:

¹⁴Debie mɔɔ menvale menyɛle Hyaelo Ɛzonlenlɛ Sua ne mɔɔ bɛfa me duma bɛfɛlɛ ye la, zɔhane ala yɛɛ mebava meayɛ sua ye mɔɔ bɛfa me duma bɛfɛlɛ ye, na bɛ ti zɔ ye nee azɛlɛ ne mɔɔ menvale memanle bɛ nee bɛ ze mɔ la a.

¹⁵Mebavoa bɛ, kɛmɔ menvoanle bɛ ze mɔ Yizilayɛma amuala la. Medame Ɛdɛnkɛma a mese a.”

¹⁶Ɛdɛnkɛma zele me kɛ, “Gyɛlɛmaya, mmasɛlɛ ɛmaa menli ɛhye mɔ anzɛɛ mmasu bɛ, yɛɛ mmakpa bɛ ti kyɛlɛ, ɔluakɛ menrɛdie.

¹⁷Ɛnnwu nyɛleɛ mɔɔ bɛlɛyɛ wɔ Dwuda azuamgbole ne mɔ azo nee Gyɛlusalɛm guabile ne mɔ azo la ɔ?

¹⁸ Ngakula ne mɔ soa ɛyɛne, mrenya ne mɔ fa wuda senle, yɛɛ mraalɛ ne mɔ fɔtɔ ɛdɔkɛ fa yɛ keeki maa bozonle raalɛ ne mɔɔ bɛfɛlɛ ye Anwuma Belemgbunli Raalɛ ne la. Eza bɛfa nza azubɔdeɛ bɛye ɛdɛne bɛmaa nyamenle gyɛne gyɛne bɛfa bɛka me ɛya.

¹⁹Ɛnee mame a bɛka me ɛya a? Kyɛkyɛ, bɛdabɛ bɛ ngome a bɛlɛsie bɛ nwo munzule bɛagua bɛ nyunlu aze a.

²⁰Yemɔti medame Awulae Nyamenle, mese: Mebawola me ɛya ne meagua Ɛzonlenlɛ Sua ye azo. Mebawola meagua menli nee nyɛmoa nwo zo, ɛbɔ nu mbaka nee azɛlɛ ye azo bɛyɔba zo. Me ɛya ne bazɔ kpole kpalɛ mɔɔ awie ɛnrɛhola ye nua a.”

²¹Tumivolɛ Ɛdɛnkɛma, Yizilayɛ Nyamenle ne se, “Yizilayɛma, bɛva bɛ ɛyelalɛ azubɔdeɛ ne mɔ bɛboka bɛ azubɔlɛ ne mɔ na bɛli nane ne.

²²Ɔluakɛ me nee bɛ ze mɔ vi Yigyibiti rale la, meanga ɛyelalɛ azubɔdeɛ nee azubɔlɛ nwo edwɛkɛ biala meangile bɛ.

²³Mɔɔ menzele bɛ la ɛne, ‘Bɛdie me ne na mebayɛ bɛ Nyamenle, na bɛdabɛ bɛayɛ me menli. Eza bɛlua ndenle mɔɔ mehile bɛ la anu, amaa bɛ ɛbɛla awie bɛ boɛ.’

²⁴Noko bɛanli me edwɛkɛ ɛdeɛ ne mɔɔ menganle la azo, yɛɛ bɛambu ye bie; bɛdabɛ bɛlile bɛ ahonle ɛtane nzi bɛyɛle mɔɔ bɛdabɛ bɛ kunlu dwo la, na bɛzɛkyele bɔbɔ bɛdɛlale dɛba ne.

²⁵Ɔvi kenle mɔɔ bɛ ze mɔ vi Yigyibiti azɛlɛ zo rale toonwo mɔɔ yeradwu ɛnɛ la, mezoa me sonvolɛ kpɔmanvolɛma wɔ bɛ ɛkɛ alehyenlɛ biala,

²⁶noko bɛandie me, anzɛɛ bɛangyea bɛ nzo bɔbɔ. Akee bɔbɔ bɛyɛle anzosesebɛ kpole kpalɛ bɛdɛlale bɛ ze mɔ.

²⁷“Yemɔti, Gyɛlɛmaya, ɛbaha edwɛkɛ ɛhye mɔ kɔsɔɔti wɔahile bɛ bɔbɔ ɛdeɛ, na bɛnrɛdie wɔ. Ɛbavɛlɛ bɛ, na bɛnrɛdɛne wɔ zo.

²⁸Na ɛbaha wɔahile bɛ kɛ: Ɛhye a le maanle ne mɔɔ anyɛ tieyɛ ammaa Ɛdɛnkɛma bɛ Nyamenle ne la. Bɛngulo kɛ bɛfo adenle a bɛtwi bɛ nyunlu. Nɔhalɛ ɛwie. Awie biala ɛnga nɔhalɛ.

²⁹“Gyɛlusalɛmma, bɛye awolɛ; bɛkpa bɛ ti na bɛvuandi enrinli ne bɛgua. Bɛdo ɛzɛne edwɛne wɔ awoka ne mɔ azo, ɔboalekɛ medame, Ɛdɛnkɛma, meva ɛya, na mekpo me menli ne.

³⁰“Ɔluakɛ Dwudama ɛyɛ ɛtane ɛtia me. Bɛzie bɛ bɛkyi ninyɛne ne mɔ wɔ Ɛzonlenlɛ Sua ne mɔɔ bɛfa me duma bɛfɛlɛ ye la anu, bɛva evinli bɛha ye.

³¹ Wɔ Henɛm Bɔnza ne anu, bɛzi azukponle na bɛdo ye Tofɛte, amaa bɛayela bɛ mra mrenya nee bɛ mra mraalɛ bɛabɔ azu wɔ senle ne anu. Meanze bɛ kɛ bɛyɛ ɛhye, yɛɛ yeamba me adwenle nu bɔbɔ.

³²Yemɔti bɛnlea, mekɛ ɛlɛba mɔɔ bɛnrɛvɛlɛ ye Tofɛte anzɛɛ Henɛm Bɔnza bieko a. Bɛbavɛlɛ ye Ahunleɛ Bɔnza, ɔluakɛ bɛbazie avunli ɛkɛ. Bɛnrɛnyia ɛleka bɛnrɛzie avunli kɛ ɛkɛ ne ala.

³³Na menli ne avunli bayɛ anwomanyunlu nloma nee azɛlɛ ye azo nanemgbole aleɛ, bɛnrɛnyia awie ɛnrɛvoa bɛ.

³⁴ Azɛlɛ ne bahakyi ɛsɛlɛ. Wɔ Dwuda azuamgbole ne mɔ azo nee Gyɛlusalɛm gua ne mɔ azo, anyelielɛ, fɛlɛkolilɛ, yɛɛ atɔfolɛ o, awie ɛnrɛde bie ɛlɛ. Azɛlɛ ne badɔ mgbane.