Read Nzema Gyɛ 8 Bible Online

Gyɛ 8 - Nzema bible

Gyɛ 8

¹“Mekɛ zɔhane bɛbaza Dwuda arelemgbunli, Dwuda mgbanyima, ye sɛlɛvolɛma, ye Nyamenle kpɔmanvolɛma, yɛɛ Gyɛlusalɛm ezuavolɛ mbowule bɛagua zolɛ.

²Kɛ bɛkɛhuohua bɛ nloa bɛkɛzie bɛ la, bɛbado mbowule bɛazande azɛlɛ ne anwo. Bɛbagua ɛkɛ, amaa sɛnzɛne ne, siane ne, yɛɛ anwumaneamra kɔsɔɔti mɔɔ bɛhulole bɛ, bɛbɔle bɛ ti aze bɛmanle bɛ, bɛkpondɛle bɛ, bɛlile bɛ nzi na bɛzonlenle bɛ la anwu bɛ.

³Menli mɔɔ baha munzule abusua ekpulike ɛhye anu, mɔɔ wɔ ɛleka biala mɔɔ mevoa bɛ mehɔgua la bahulo kɛ bɛkɛwu tɛla kɛ bɛkɛdɛnla ngoane nu. Medame Tumivolɛ Ɛdɛnkɛma a mese a.”

⁴Ɛdɛnkɛma zele me kɛ, “Biza menli ne kɛ saa sonla tɔ aze a, ɔndwazo ɔ? Saa sonla fo adenle a ɔnzia ɔ nzi ɔ?

⁵Na duzu ati a akee menli ɛhye mɔ agyakɛ ɛzia bɔkɔɔ na bɛnzia bɛmba ɛ? Bɛdi adalɛ nzi; bɛngulo kɛ bɛsia.

⁶Megyele me nzo medie bɛ edwɛkɛhanlɛ, na biala ɛnga nɔhalɛ. Bɛ nuhua ko bɔbɔ ɛtɛnunle ɔ nwo wɔ ye amumuyɛ ne anwo; mɔɔ ɔka la a le kɛ, ‘Duzu a meyɛ a?’ Awie biala ati ɛmi nyɛleɛ mɔɔ ɔlɛyɛ la anu kɛ ɛkpɔnwɔ mɔɔ ɛlɛkɔ konle la.

⁷Akoso bɔbɔ mɔɔ lua anwomanyunlu la ze ye mekɛ; yɛɛ mɔlɔnoma, nyamenleakatiba, yɛɛ azuazuanloma ze bɛ mekɛ mɔɔ bɛsia bɛba a, noko me menli ne ɛnze medame Ɛdɛnkɛma me mɛla ne.

⁸Kɛ bɛsi bɛkola bɛka kɛ, ‘Yɛze nrɛlɛbɛ, yɛɛ yɛze Ɛdɛnkɛma mɛla ne’ ɛ? Bɛnlea, mɛla kɛlɛhɛlɛvolɛma adalɛ ɛhakyi mɛla ne.

⁹Nrɛlɛbɛvolɛma anyunlu bagua aze. Bɛ adwenle baha abɔ nu na bɛahye bɛ. Nea, bɛkpo medame Ɛdɛnkɛma me nloa edwɛkɛ; na duzu nrɛlɛbɛ bɔbɔ a bɛze a?

¹⁰ Yemɔti mebava bɛ ye mɔ meamaa mrenya fofolɛ, na meava bɛ egyinli ne mɔ meamaa menli mɔɔ bali bɛ nwo zo konim la, ɔluakɛ bɛ mgbanyinli nee bɛ ngakula kɔsɔɔti ɛlɛkpondɛ ezukoa anyebolo nu. Ɔvi Nyamenle kpɔmanvolɛma anwo zo mɔɔ badwu sɛlɛvolɛma anwo zo la, biala ɛnli nɔhalɛ.

¹¹ Bɛlɛmia me menli ne mɔ nganlɛ ne mɔ a bɛdoɔloa bɛ ala. Bɛse, ‘Yehɔ, yehɔ,’ wɔ mekɛ mɔɔ nganlɛ ne mɔ ɛtɛkɔle la.

¹²Asoo bɛkyi ninyɛne ɛhye mɔ ɛyɛlɛ yɛle bɛ nyiane? Kyɛkyɛ, yeanyɛ bɛ nyiane fee, ɔluakɛ bɛnze nyiane deɛ holɛ. Yemɔti bɛbawu kɛ menli mɔɔ ɛwu la. Kenle mɔɔ menwɔze kɛ metea bɛ la, ɛnee bɛ awieleɛ ne ala ɛne. Medame Ɛdɛnkɛma a mese a.”

¹³Ɛdɛnkɛma se, “Mengulole kɛ menwɔboɔboa bɛ nloa, na menwunle kɛ bɛle kɛ vanye baka, anzɛɛ feege baka mɔɔ ma ɛnle zolɛ la, bɛ nya ne mɔ bɔbɔ ɛnwosonwoso, yɛɛ mɔɔ menvale memanle bɛ la ɛkpa bɛ ti.”

¹⁴Nyamenle menli ne bizale kɛ, “Duzu ati a yɛtɛte ɛke a? Bɛdwazo bɛmaa yɛhɔ azuamgbole ne mɔ mɔɔ bɛbɔ nwolɛ bane la azo yɛhɔwu yɛgua ɛkɛ. Ɛdɛnkɛma yɛ Nyamenle ne ɛbua yɛ ewule fɔlɛ kɛ yɛwu; yemaa yɛ pɔezen nzule kɛ yɛnlo, ɔboalekɛ yɛyɛ ɛtane yɛtia ye.

¹⁵Yɛ nye lale anzonudwolɛ adenle, na yeanyɛ boɛ; yɛ nye lale anwonzalɛ adenle, na bɛnlea, sulosulo a rale a.

¹⁶Yɛte kpɔvolɛma mgbɔnwɔ ne mɔ abonyi nu anwoma wɔ Dan. Saa bɛ mgbɔnwɔ nyinli ne mɔ su tea nu a azɛlɛ kpusu. Yɛ kpɔvolɛma ɛra bazɛkye azɛlɛ ne nee debie biala mɔɔ wɔ zolɛ la, bɛra bɛbabɔ suakpole ne, bɛabɔ menli mɔɔ wɔ zolɛ la abo zo.

¹⁷“Bɛnlea, memaa nwɔlɛ bɔna mɔ mɔɔ awie ɛngola bɛ sili kye la arakeka bɛ. Medame Ɛdɛnkɛma a mese a.”

¹⁸Me nyanelilɛ ɛbo zo, yemaa menyia ahonle ewule.

¹⁹Bɛdie, ɔvi maanle ti mɔɔ kɔdwu ɔ bo la, mete kɛ me menli ne ɛlɛsu kɛ, “Anzɛɛ Ɛdɛnkɛma ɛnle Zayɔn ɔ? Zayɔn belemgbunli ne ɛnle ɛkɛ ɔ?” Ɛdɛnkɛma buale kɛ, “Duzu ati a bɛgua ananze mmonle bɛzonle bɛ bɛva bɛha me ɛya ɛ? Duzu ati a bɛzonle nyamenle gyɛne gyɛne bɛva bɛha me ɛya ɛ?”

²⁰Me menli ne su se kɛ, “Ɛlobɔ ne ɛze, bɛwie bɛyɔba ne bu, noko bɛtɛdiele yɛ ngoane.”

²¹Me ahonle ɛhwe, ɔboalekɛ bɛbodɛboda me menli ne; melɛdi nyane, me adwenle ɛha ɛbɔ nu bɔkɔɔ.

²²Asoo ayile biala ɛnle Geleade? Asoo ninsinli biala ɛnle ɛkɛ? Duzu ati a akee bɛtɛyɛle me menli ne ayile a?