Read Nzema Gyɛ 9 Bible Online

Gyɛ 9 - Nzema bible

Gyɛ 9

¹Me kunlu a anrɛɛ me ti le nzubula na me nye monle le nzufeanvea, anrɛɛ menwɔzu me menli mɔɔ bɛhu bɛ la alehyenlɛ nee aledwolɛ.

²O anrɛɛ meanyia nyɛvolɛ azokoɛleɛ fienemgbole nu lɔ, amaa meahwe me nwo meavi me menli ne anwo. Ɔluakɛ bɛ kɔsɔɔti bɛle awuvolɛvalɛ mɛlatovoma, bɛle menli ngunzi.

³Adalɛ ɛhu bɛ kuu; nɔhalɛ biala ɛnle azɛlɛ ne azo, adalɛ ngome ɛyi bɛ tɛkɛɛ. Ɛdɛnkɛma se, “Me menli ne bɔ munzule la ɛnee bɛbɔ, yɛɛ bɛnze me.”

⁴Awie biala ɛnlea ɔ gɔnwo boɛ, ɔmmafa ɔ rɛle ɔwula ɔ diema biala nu, ɔluakɛ adiema biala le mɛlɛbɛla sonla, agɔnwolɛ biala yɛ ɔ gɔnwo anwo asiayɛ.

⁵Awie biala bɛlɛbɛla ɔ gɔnwo, yɛɛ awie biala ɛnga nɔhalɛ; adalɛ ɛzɔ bɛ nloa anu, yɛɛ bɛngyakyi bɛ ɛtane ne mɔ ɛyɛlɛ.

⁶Nzisi doa nzisi, yɛɛ adalɛ li adalɛ nzi. Ɛdɛnkɛma se, ye menli ne ɛkpo ye.

⁷Yemɔti Tumivolɛ Ɛdɛnkɛma se, “Bɛnlea, mebadu bɛ nu evinli ne na meazɔ bɛ meanlea, ɔluakɛ duzu bieko a ɔwɔ kɛ meyɛ a? Bɛle me menli.

⁸Bɛ tafinlima yɛ nla kɛ ɛda baka; dahuu bɛbɔ adalɛ; bɛtendɛ agɔnwolɛ nu bɛkile bɛ gɔnwo mɔ, noko bɛ ahonle nu, bɛdi ye ɛhunlɛ busia.

⁹Medame Ɛdɛnkɛma, mebiza kɛ: Ɔnle kɛ metea bɛ wɔ ninyɛndane ɛhye mɔ anwo ɔ? Ɔnle kɛ mesenra maanle mɔɔ le zɛhae la ɔ?

¹⁰“Bɛzu bɛye awoka ne mɔ awolɛ[3] na bɛye fienemgbole nu adidileka ne mɔ awolɛ; ɔboalekɛ bɛwe, yemɔti menli ɛngɔ nu. Ɛnɛ bɛnde nlankɛ ɛzunlɛ wɔ ɛkɛ, nloma nee ɛzonlɛ ɛnriandi ɛhɔ.

¹¹Mebamaa Gyɛlusalɛm ahakyi ewula edukue, ɔbahakyi ɛzonlɛ dabelɛ. Mebamaa Dwuda azuamgbole adɔ mgbane, awie ɛnrɛdɛnla ɛkɛ.”

¹²Nwane a ze nrɛlɛbɛ mɔɔ kɛhola kɛde ɛhye abo a? Nwane a Ɛdɛnkɛma ɛva ɛwula ɔ nloa kɛ ɔbɔ ye nolo a? Duzu ati a azɛlɛ ne ɛzɛkye ɛdɔ mgbane kɛ fienemgbole, mɔɔ yemɔti awie ɛmpe zolɛ a?

¹³Ɛdɛnkɛma buale kɛ, “Ɛhye ɛzi, ɔboalekɛ bɛkpo me mɛla mɔɔ meva memaa bɛ la, yɛɛ bɛandie me ne, bɛanli zolɛ.

¹⁴Bɛli bɛ ahonle nzi anzosesebɛ nu bɛzonle awozonle Beeyale ne mɔ, kɛmɔ bɛ ze mɔ hilele bɛ la.

¹⁵Yemɔti bɛdie mɔɔ medame, Tumivolɛ Ɛdɛnkɛma, Yizilayɛ Nyamenle ne mebayɛ la: Mebamaa me menli ne mbaka ɛnwonle meamaa bɛali na meamaa bɛ nzule mɔɔ le pɔezen la bɛanlo.

¹⁶Mebakponde bɛ wɔ maanle maanle mɔɔ bɛdabɛ anzɛɛ bɛ ze mɔ bɔbɔ ɛtɛtele bɛ aluma ɛlɛ la azo; mebamaa ɛlɔnema ara bɛ nwo zo toonwo kɔkpula kɛ menwɔwie bɛ bo zo bɔ la.”

¹⁷Tumivolɛ Ɛdɛnkɛma se, “Bɛdwenle mɔɔ ɛlɛsisi la anwo! Bɛvɛlɛ mraalɛ mɔɔ su ye awolɛ la, mraalɛ mɔɔ to ɛzɛne edwɛne la.”

¹⁸Menli ne hanle kɛ, “Bɛmaa bɛrɛla ndɛndɛ, bɛrazu bɛvua yɛ, bɛye awolɛ bɛmaa yɛhwi monle, na yɛ nye abo ɛyɛ monle monle.”

¹⁹Ɔluakɛ ɛzunlɛ ɛde Zayɔn, na bɛlɛka kɛ, “Yɛwu o! Yɛbɔ anyiemgba bɔkɔɔ, ɔboalekɛ yɛvi azɛlɛ ne azo yɛdu, ɔboalekɛ bɛbubu yɛ azua ne mɔ.”

²⁰Bɛmɛ mraalɛ, bɛdie Ɛdɛnkɛma edwɛkɛ ne, bɛyɛ ɛnzonlɛ bɛdie ɔ nloa edwɛkɛ ne kpalɛ. Bɛhilehile bɛ mra mraalɛ awolɛyelɛ, na bɛhilehile bɛ gɔnwo mɔ ɛzɛne edwɛne.

²¹Ewule ɛlua yɛ nvɛnzɛlɛ ne mɔ anu ɛra yɛ azua nu; yehu ngakula mɔɔ wɔ awɔdenle ne mɔ azo nee mgbavolɛ mɔɔ wɔ ɛleka kpatawienyi ne mɔ la.

²²Se bɛ kɛ, Ɛdɛnkɛma se: “Azɛlɛ ne azo bayɛ avunli ngome kɛ nyɛmoa ebinli mɔɔ ɛyɛ totɔɔ wɔ ɛya avule ne mɔ anu la, kɛ ma mɔɔ bɛde bɛkyekye bɛ avile bɛgua, na menli ɛnle ɛkɛ mɔɔ soa la.”

²³Ɛdɛnkɛma se, “Nrɛlɛbɛvolɛma mmafa bɛ nrɛlɛbɛ ne tu bɛ nwo, anwosesebɛma mmafa bɛ anwosesebɛ ne tu bɛ nwo, yɛɛ sukoavolɛma mmafa bɛ anwonyia ne tu bɛ nwo.

²⁴ Saa awie ɛlɛtu ɔ nwo a, ɔdu ɔ nwo kɛ ɔze me na ɔte me edwɛkɛ bo, kɛ mame a mele Ɛdɛnkɛma a. Me ɛhulolɛ ne gyi kpundii, yɛɛ meyɛ mɔɔ le pɛpɛ nee fɔɔnwo. Ɛhye mɔ a sɔ me nye a. Medame Ɛdɛnkɛma a mese a.”

²⁵Ɛdɛnkɛma se, “Mekɛ ne ɛlɛba mɔɔ mebadea Yigyibitima, Dwudama, Yidɔmma, Amɔnoma, Mowabema, yɛɛ ɛsɛlɛ zo amra mɔɔ kpa bɛ nwoma azo enrinli la.[4] Menli ɛhye mɔ amuala ɛyɛ bɛ mrenyanu nzonlɛ, noko bɛnli ngyekyeleɛ ne mɔɔ kile kɛ bɛyɛ bɛ mrenyanu nzonlɛ la azo. Maanle maanle ɛhye mɔ nee Yizilayɛma biala ɛnli me ngyekyeleɛ ne azo.”