Read Nzema Awo 1 Bible Online

Awo 1 - Nzema bible

Awo 1

¹Gyɛlusalɛm a ɛyɛ kɛnlanana zɛhae la! Suakpole mɔɔ anrɛɛ zolɛ le gbudugbudu, nea kɛ akee yeyɛ kɛ kunlanvolɛ raalɛ a, anrɛɛ ɔle kpole wɔ maanle maanle avinli! Azuamgbole nu suakpole ɛnɛ ɛyɛ akɛlɛ maanle.

²Aledwolɛ nu ɔsu nyane nyane, ɔ nye abo monle monle; agɔnwolɛma dɔɔnwo mɔɔ ɔlɛ la, ko bɔbɔ ɛmbikye ye ɛnkyekye ɔ rɛle. Ɔ gɔnwo mɔ nee ye lile egyele zo amanie, bɛ muala bɛyɛ ye kpɔvolɛma.

³Nyanehilelɛ nee akɛlɛzonlenlɛ ɛmaa Dwudama ɛhɔ nlɔnu; ɛnɛ bɛde maanle maanle avinli, bɛnnyia ɛleka bɛndo bɛ ti. Bɛ amaneɛnwunlɛ ne anu bɛ kpɔvolɛma zi bɛ zo ɛhɔhye bɛ.

⁴Zayɔn adenle zo ɛyɛ kɛnlanana, awie ɛmba ɛvoyia ne mɔ mɔɔ bɛhyehyɛ la ɛlilɛ. Ye nlenkɛ mgbole kɔsɔɔti ɛbubu, ye sɛlɛvolɛma di nyane. Bɛpia ye mbɛlɛra muala bɛhɔ, yɛɛ ɔdaye mumua ne ɔde alɔbɔlɛ nu.

⁵Ye kpɔvolɛma ɛvo ɔ nwo zo, bɛkpazi bɛdɛla ye, ɔboalekɛ Ɛdɛnkɛma ɛmaa yenwu amaneɛ wɔ ye ɛtane bebelebe ti; ɔ mra ne mɔ ɛgyakyi ye ɛhɔ, kpɔvolɛ ne ɛhye bɛ nuokɛ.

⁶Gyɛlusalɛm ɛminli ye anyunlunyia muala. Ye arelemgbunli ɛyɛ kɛ ahɛtɛboɛ nyinli mɔɔ ɛnnyia adidileka la; anwosesebɛ ɛnle bɛ ɛnriandilɛ nu, wɔ mɔɔ doa bɛ kye bɛ la anyunlu.

⁷Gyɛlusalɛm kakye ninyɛne ngɛnlɛma mɔɔ anrɛɛ mɔmoane le ye ɛdeɛ la. Mekɛ mɔɔ ye menli ne hɔdɔle kpɔvolɛma asa anu, na awie ɛnle ɛkɛ mɔɔ boa ye la, kpɔvolɛma golole ɔ nwo, zile ye amgbu kɛ yedɔ aze la.

⁸Gyɛlusalɛm yɛle ɛtane kpole, yemɔti ɔ nwo yɛle ɛtane; bɛdabɛ mɔɔ bɛbu ye la amuala kpole ye, ɔluakɛ bɛnwu kɛ ɔlɛ ɔ nwo zɔ, ɛhɛe, ɔdaye mumua ne ɔkponle, na ɔkakyi ɔ nye ɛbɔ nu.

⁹Ye ninyɛndane ne lale ali; yeandwenle ye azedɔlɛ nwo; yemɔti ye azedɔlɛ ne ɛyɛ kpole, ɔnlɛ awie ɛnkyekye ɔ rɛle. Ɔse, “O Ɛdɛnkɛma, nwu me anwunvɔne, na me kpɔvolɛ ne asa ɛha me!”

¹⁰Kpɔvolɛ ne ɛva ɔ sa ɛbɔ ye ninyɛne mɔɔ sonle bolɛ la anu; ɛhɛe, yenwu kɛ maanle maanle ne mɔ ɛva ye ɛleka nwuanzanwuanza ne aze; menli mɔɔ Ɛdɛnkɛma kyi bɛ la wolo ɛzonlenlɛ ayia ne anu.

¹¹Ye ezuavolɛ ne kponle, mekɛ mɔɔ bɛkpondɛ aleɛ bɛali la; bɛfa bɛ anwoneɛ bɛdie aleɛ, amaa bɛ nwo agyinla bɛ. Sua bɔdenle ne ɛlɛtea, ɔse, “O Ɛdɛnkɛma, nea me, ɔluakɛ bɛkpo me.

¹²“Asoo ɔnvane bɛ nwo, bɛdabɛ mɔɔ bɛse ɛke la? Bɛdo bɛ nye bɛnlea saa nyane bie nee me ɛdeɛ ye mɔɔ ɛra me nwo zo la sɛ a. Ɛdɛnkɛma a manle anwubɛnyunlu ɛhye rale a wɔ mekɛ mɔɔ ɔvale ɛya kpole la.

¹³“Ɔzoanle senle vi anwuma; ɔmanle ɔwolole me mbowule nu; ɔzuale me ɛhane; ɔdole me aze; yegyakyi me ɛkɛ, me nye zo bulu alehyenlɛ muala.

¹⁴“Bɛkyekyele me ɛtane ne mɔ bɔlɛ; Ɛdɛnkɛma ɔdaye a ɔkyekyele a; ɔvale ɔhendanle me kɔme; ye ɛnlomboɛ manle mengolole. Awulae yele me manle me kpɔvolɛma, mɔɔ mengola bɛ nyunlu gyinla la.

¹⁵“Awulae honle tiale me ɛlɔnema anu katakyiema; ɔmanle ɛlɔnema ratetale me hunle me mgbavolɛ ne mɔ; Awulae ɛdi Dwudama kɛmɔ bɛtwihwi vanye ma wɔ nwanyeyɛlɛ melahyinli nu la.

¹⁶“Ɛhye mɔ ati a melɛsu, monle ɛbia me takaa la; ɔluakɛ menlɛ awie mɔɔ kyekye me rɛle a, awie bɔbɔ mɔɔ si me ahonle la; me menli ne ɛdɔ agyie, ɔluakɛ kpɔvolɛma ɛva me aze.

¹⁷“Zayɔn tende ɔ sa, noko moalɛ biala ɛmba; Ɛdɛnkɛma ɛdendɛ ɛtia Gyekɔbo, kɛ menli mɔɔ zuozua ye la ɛyɛ ye kpɔvolɛma. Gyɛlusalɛm ɛhakyi fovolɛ bie wɔ menli avinli.

¹⁸“Ɛdɛnkɛma di benle, ɔluakɛ medu ɔ nloa medo; maanle maanle kɔsɔɔti, bɛnlea nyane mɔɔ melɛnwu ye a; bɛhye me mbɛlɛra nee mgbavolɛ nuokɛ bɛhɔ.

¹⁹“Menvɛlɛle me kulovolɛma, na bɛbɛlɛbɛlale me; me sɛlɛvolɛma nee me mgbanyima wule suakpole ne azo, wɔ mekɛ mɔɔ bɛkpondɛ aleɛ bɛali na bɛanyia ngoane la.

²⁰“O Ɛdɛnkɛma, nea me na melɛnwu amaneɛ, me ɛkɛla ɛminli me nwo, me ahonle mɔɔ la me kunlu la ɛlɛte, ɔboalekɛ mede ɛ nwo atua kpole kpalɛ. Menli ɛhunlɛ ɛlɛsɔ yɔɔ wɔ guabile zo, sua nu bɔbɔ, ewule ɛlie ebia.

²¹“Bɛdele kɛ melɛkponle, noko awie ankyekye me rɛle. Me kpɔvolɛma amuala ɛde me amaneɛnwunlɛ nga; bɛdi fɛlɛko kɛ wɔdea me a. Maa kenle ne mɔɔ wɔhile la ɛrɛla na bɛdabɛ bɛyɛ kɛ medame la.

²²“Maa bɛ amumuyɛ nyɛleɛ ɛdwu ɛ nyunlu; ɛ nee bɛ ɛli, kɛmɔ ɛ nee me ɛli wɔ me mɛladonlɛ ne mɔ anwo la, ɔluakɛ mekponle mehyɛ, yɛɛ me ɛnwomenle ɛwie.”