Read Nzema Awo 3 Bible Online

Awo 3 - Nzema bible

Awo 3

¹Mame a mele sonla mɔɔ ɛnwu amaneɛ wɔ Nyamenle ɛyavalɛ bo a.

²Yehwili me, yeva me yera awozinli kabii mɔɔ wienyi ɛnle nu la anu;

³ye ndeanlɛ ne kɛ gyi me nwo zo ala ɛne wɔ alehyenlɛ biala anu.

⁴Yemaa menwa, yebubu me mbowule nu;

⁵yezie me nyane nee arɛlebɔlɛ kpole nu;

⁶yemaa meha awozinli nu kɛ mɔwuamra ala la.

⁷Yedo me efiade, yegua me anga, mengola menriandi;

⁸mesu mefɛlɛ kɛ ɔlie me, noko ɔndie me nzɛlɛlɛ;

⁹yehundo awolɛ yedua me ndenle, yemaa me ndenle ɛhyeɛhyea.

¹⁰Yeyɛ me nwo bedi mɔɔ ɛhɔ nzia, kɛ awenade mɔɔ ɛwie tɛ la;

¹¹ɔyele me ɔvile me adenle ne anu na ɔtetele me; yemaa meyɛ mgbane;

¹²ɔvale ye ɛda ne ɔzule me kɛ ɔto yeawɔ me.

¹³Ɔtotole ye ɛda ne mɔ ɔwowɔle me ahonle.

¹⁴Menli kɔsɔɔti sele me, alehyenlɛ biala bɛfa me bɛto edwɛne.

¹⁵Yemaa nyane ɛha me, me nloa anu ɛyɛ kɛ subo.

¹⁶Yehwi me nyunlu aze, yemaa me gye ɛwie kpolo.

¹⁷Menlɛ anzonudwolɛ, menze anyelielɛ deɛ holɛ.

¹⁸Yemɔti mese, “Me anyunlunyia ɛwie, yɛɛ menlɛ anyelazo bieko wɔ Ɛdɛnkɛma anu.”

¹⁹Kakye me nyanelilɛ nee me amaneɛnwunlɛ mɔɔ ɛyɛ me nloa anu kɛ subo nee bɔnyema la.

²⁰Me ɛkɛla dwenle nwo dahuu na ɔmaa medi nyane.

²¹Mekakye edwɛkɛ ɛhye, zɔhane ati melɛ anyelazo.

²²Ɛdɛnkɛma ɛhulolɛ kpundii ne ɛmbɔ aze, ye anwunvɔnezelɛ ne abo ɛndu ɛlɛ;

²³alehyenlɛ biala bɛle fofolɛ, wɔ nɔhalɛlilɛ ne le kpole.

²⁴Me ɛkɛla se, “Ɛdɛnkɛma le me afoa nu ɛdeɛ, yemɔti mebanyia anyelazo wɔ ye nu.”

²⁵Ɛdɛnkɛma le kpalɛ maa bɛdabɛ mɔɔ bɛsonle ye la, ɔle kpalɛ ɔmaa ɛkɛla mɔɔ kpondɛ ye la.

²⁶Ɔle kpalɛ kɛ sonla kɛzie ɔ ti koonwu kɛkpondɛ Ɛdɛnkɛma ngoanelielɛ ne abo zo;

²⁷ɔle kpalɛ kɛ sonla kɛgyɛnva ye gyɛnvayile ne ye mgbavolɛ nu.

²⁸Bɛmaa ɔva ye amaneɛnwunlɛ ne ɔmaa Ɛdɛnkɛma, na ɔzie ɔ nwo diinyi;

²⁹bɛmaa ɔhwi ɔ nloa aze, ɔkɛyɛ kɛ anyelazo wɔ ɛkɛ;

³⁰ɔmaa bɛbo ye bɛdua ye ɛzunlɛ, na ɔli ye aholoba ne ɔ kunlu.

³¹Awulae ɛnrɛkpo sonla bɔkɔɔ,

³²ɔtea ye, noko ɔse anwunvɔne, kɛmɔ ye ɛhulolɛ kpundii ne kpole de la,

³³ɔluakɛ ɔnle ye ɛhulolɛ kɛ ɔkɛhile sonla nyane.

³⁴Sonla mɔɔ bɛdo ye efiade la nyanelilɛ,

³⁵sonla ɛsisilɛ wɔ Anwuma Anwumanli ne anyunlu,

³⁶yɛɛ sonla mgbɔvodɛne ɛbualɛ, Awulae ɛnlie ɛndo nu.

³⁷Nwane a ɛha ɛmaa yeyɛ zɔ a? Kyesɛ Awulae ɔdaye yehyehyɛ ye zɔ.

³⁸Asoo tɛ Anwuma Anwumanli ne edwɛkɛ zo yɛɛ kpalɛ nee ɛtane dua ba a?

³⁹Duzu ati a sonla mɔɔ de ngoane nu la kɛdendɛ ɔ nzo abo wɔ ye ɛtane ne mɔ anwo ndeanlɛ nwo ɛ?

⁴⁰Bɛmaa yɛnlea yɛ ɛbɛlabɔlɛ nu boɛ, na yɛzia yɛrɛla Ɛdɛnkɛma ɛkɛ.

⁴¹Bɛmaa yɛmaa yɛ sa nee yɛ ahonle zo yɛmaa Nyamenle wɔ anwuma

⁴²kɛ, “Yɛyɛ ɛtane, yɛde atua, na O Ɛdɛnkɛma, ɛtɛfale ɛtɛkyɛle yɛ.

⁴³“Wɔva ɛya wɔvoa yɛ ndinlizo, wɔanze anwunvɔne, ɛlɛku yɛ;

⁴⁴wɔva amungu wɔheda ɛ nwo, yemɔti ɛnde yɛ nzɛlɛlɛ biala.

⁴⁵Wɔdo yɛ kɛ ewula wɔgua maanle maanle avinli.

⁴⁶“Yɛ kpɔvolɛma amuala bɔ yɛ aholoba;

⁴⁷yɛ nye zo ɛda yɛ, yɛ nyunlu ɛyɛ ahuma, ɛzɛkyelɛ nee munzule ɛva yɛ aze.

⁴⁸Me nye la monle nu, ɔboalekɛ bɛbɔ me menli ne abo zo.

⁴⁹“Menrɛgyakyi monle ɛhwinlɛ,

⁵⁰kɔkpula kɛ Ɛdɛnkɛma kɛdo ɔ nye kɛnlea aze na ɔkɛnwu kɛ,

⁵¹mɔɔ ɛzi suakpole ne azo mbɛlɛra nwo zo la ɛmmaa mengola me nwo sɔ.

⁵²“Me kpɔvolɛma ɛhye me kɛ anloma, bɛkpɔ me mgbane gyɛne ne ala;

⁵³bɛvuandinle me anyewɔzo bɛdole kuma nu, na bɛtotole awolɛ bɛbɔle me.

⁵⁴Nzule bule me nwo zo, na menganle kɛ, ‘Mewu!’

⁵⁵“Menzunle menvɛlɛle wɔ, O Ɛdɛnkɛma, wɔ kuma ne abo lɔ.

⁵⁶Ɛdele me modolɛ kɛ, ‘Mmatuodua ɛ nzo, mmakpo kɛ ɛnrɛdie me ɛzunlɛ, ɛnrɛlie me.’

⁵⁷Menvɛlɛle wɔ la ɛbikyele me, ɛzele me kɛ, ‘Mmasulo!’

⁵⁸“O Awulae, wɔlie me ti, wɔlie me ngoane.

⁵⁹O Ɛdɛnkɛma, wɔnwu mɔɔ amumuyɛma ɛyɛ me a; bua edwɛkɛ ne maa me.

⁶⁰Wɔnwu bɛ nzenralɛ mɔɔ bɛli me la amuala, wɔnwu adwenle ɛtane mɔɔ bɛva ye me nwo la.

⁶¹“O Ɛdɛnkɛma, wɔde kɛ bɛzi bɛgolo me nwo la. wɔnwu adwenle ɛtane biala mɔɔ bɛva ye me nwo la.

⁶²Alehyenlɛ kɔsɔɔti me kpɔvolɛma kɔ me ti akpamo.

⁶³Nea bɛ azedɛnlanlɛ nee bɛ ɛdwazolɛ nu bɔbɔ, bɛfa me bɛto edwɛne.

⁶⁴“O Ɛdɛnkɛma, tea bɛ wɔ mɔɔ bɛyɛ la anwo.

⁶⁵Maa bɛ ahonle ɛsolo, na maa munzule ɛdo bɛ.

⁶⁶O Ɛdɛnkɛma, dua wɔ ɛya ne azo foa bɛ, na bɔ bɛ bo zo fi aleɛabo.”