Read Nzema Awo 4 Bible Online

Awo 4 - Nzema bible

Awo 4

¹Ezukoa nvutuke ne ɛlu, ezukoa nvutuke kpalɛ anye ɛhakyi. Ɛzonlenlɛ Sua ne awolɛ ne mɔ ɛkponde suakpole ye awɔdenle ne mɔ azo.

²Zayɔn mgbavolɛ mɔɔ di munli, mɔɔ sonle bolɛ kɛ ezukoa nvutuke la ɛnɛ ɛzɔho mbuakɛ mɔɔ nwovolɛ ɛnwo bɛ ɔ sa nu la.

³Ɛzonlɛ bɔbɔ noa bɛ mra nyɛfonlɛ, na me menli ne ɛdeɛ, bɛ ti ɛyɛ se, bɛyɛ bɛ nwo kɛ ɛsɛlɛ zo soholo.

⁴Bɛmaa ɛhɔne nee nzuhɔne ku bɛ nlɔma, ngakula ne mɔ su kɛ bɛdie aleɛ, noko awie ɛnnea bɛ nyunlu.

⁵Menli mɔɔ anrɛɛ di aleɛ kpalɛ la, ɛnɛ ɛhɔne ku bɛ gua guabile zo; bɛdabɛ mɔɔ anrɛɛ bɛde arelemgbunli azua nu la ɛnɛ gua fovolɛ zo.

⁶ Me menli ne ndeanlɛ ɛyɛ kpole ɛdɛla Sodɔm ɛdeɛ ne; yemɔ, bɛzɛkyele ye arɛlevilɛ nu, tɛ sonla a zɛkyele ye a.

⁷Ɛnee yɛ arelemgbunli anwo te tɛla ezukɔtweaba nee nyɛfonzule, bɛnyi ngɛnlɛma, bɛ nwo yɛ se; bɛ ngɛnlɛma le kɛ ezukoa bolɛ safaya.

⁸Akee bɛ nyunlu ɛlu kisii ɛdɛla sisikpunlike, bɛnnwu bɛ menli holɛ; bɛnwa bɛhakyi mbowule, bɛhete kɛ ɛyɛne.

⁹Menli mɔɔ dɔle konle nu la anwo dwole dɛlale bɛdabɛ mɔɔ ɛhɔne hunle bɛ la; ɛhɔne manle bɛhetele, ɛbɔ nu nzoleɛ bɔbɔ, bɛannyia bie.

¹⁰ Mraalɛ bɔbɔ mɔɔ se anwunvɔne la ɛdo bɛ kunlu mralɛ ɛli. Me menli ne ɛzɛkyelɛ manle bɛvale bɛ bɛhakyile aleɛ.

¹¹Ɛdɛnkɛma hilele ye ɛya kpole ne, na ɔwolale ye ɛya wuluwulu ne ɔguale; ɔdole senle wɔ Zayɔn, na ɔzɔle ɔyelale suakpole ne adiabo ne mɔ.

¹²Ewiade arelemgbunli anlie anli, azɛlɛ ye azo sonla biala anlie anli, kɛ kpɔvolɛma kɛhola kɛwolo Gyɛlusalɛm nlenkɛ mgbole ne mɔ anu.

¹³Nyamenle kpɔmanvolɛma ɛtane ne mɔ, nee sɛlɛvolɛma ninyɛndane mɔɔ bɛyɛle, kɛ bɛhanle tenlenema mogya bɛguale la ati yɛɛ ɛhye mɔ zile a.

¹⁴Bɛhakyile anyenzinlirama bɛluoluale gua ne mɔ azo; mogya ɛbia bɛ takaa mɔɔ awie ɛngola ɛnzɔ bɛ ndanlɛ nu a.

¹⁵Menli deanle zele kɛ, “Bɛvi ɛkɛ ne! Bɛ nwo ɛnde! Awie mmamaa ɔ nwo ka bɛ.” Yemɔti bɛvoanle bɛ bɛmanle bɛluoluale nu. Maanle maanle zele kɛ, “Yɛ nee bɛ ɛnrɛdɛnla bieko.”

¹⁶Ɛdɛnkɛma mumua ne a ɛkponde bɛ a; ɔnrɛbu bɛ bieko; yeambu sɛlɛvolɛma ne mɔ, yeanze mgbanyima ne mɔ anwunvɔne.

¹⁷Yɛ nye hale adenle zo, yɛhendɛle moalɛ mgbane; yɛzinzale yɛhendɛle maanle mɔɔ ɔdaye ɔnlɛ gyinlagyakɛ la.

¹⁸Menli vunvuanle yɛ gyakɛ abo zo mɔɔ ɛnee yɛngola finde a, yɛ awieleɛ bikyele, yɛ mekɛ dwule, ɔluakɛ yɛ awieleɛ ɛra.

¹⁹Menli mɔɔ voanle yɛ la anwo yɛ ndɛ tɛla anloma ɛkpɔtɛ; bɛvoanle yɛ awoka zo lɔ; bɛhɔle yɛ nwo nzia wɔ fienemgbole nu.

²⁰Mɔɔ Ɛdɛnkɛma ɛye ye ɛmaa yɛ, na ɔle yɛ ɛnwomenle la, bɛhye ye bɛ ɛhane nu. Yemɔ a yɛhanle ɔ nwo edwɛkɛ kɛ, “Saa yɛwɔ ɔ bo a, yɛnzulo maanle maanle ne mɔ” a.

²¹Bɛmaa bɛ nye ɛlie na bɛli fɛlɛko, O Yidɔmma mɔɔ de Ɛɛze azɛlɛ zo, na bɛ nyane kɔpo ɛdeɛ ne bara bɛ nwo zo; bɛbanlo, bɛabo, na bɛayeye bɛ nwo bɛagua zo.

²²Zayɔnoma, bɛwie bɛ tea wɔ bɛ ɛtane ne mɔ ati; ɔbaye bɛ yeavi nlɔnu; na bɛmɛ Yidɔmma, bɛbadea bɛ wɔ bɛ ɛtane ne mɔ ati, ɔbaza bɛ ninyɛndane ne mɔ yeagua zo.