Read Nzema Yiz 1 Bible Online

Yiz 1 - Nzema bible

Yiz 1

¹Wɔ ɛvolɛ abulasa ne anu, siane nna ne, ye kenle nnu ne azo, ɛnee medame, sɛlɛvolɛ Yizikeɛle, mɔɔ me ze a le Buzi la mewɔ Dwuuma mɔɔ bɛhye bɛ, bɛ nee bɛ ɛhɔ nlɔnu la avinli wɔ Azule Kibaa ne anloa. Na menwunle kɛ anwuma ɛbuke, na Nyamenle yele ɔ nwo hilele me.

² (Kenle ko ne, ɛnee bɛhyele Dwuda Belemgbunli Gyɛhɔyaken bɛhɔle nlɔnu wɔ Babelɔn la yeli ɛvolɛ nnu.)

³Na Ɛdɛnkɛma dendɛle hilele me wɔ Azule Kibaa ne anloa wɔ Babelonia azɛlɛ zo; eza mendele Ɛdɛnkɛma tumi ne wɔ me nu.

⁴Memanle me nye zo la, menwunle kɛ ahumu vi ɛbɔ nu afoa nu ɛlɛba. Ɛnee amungu ne le kpole kpalɛ na wienyi kpole bie ɛbɛnra ɛyia ye. Senle vi amungu ne anu ɛlɛtudu, na debie bie mɔɔ le kɛ kɔbele mɔɔ ɛlɛta la wɔ senle ne anu.

⁵ Akee menwunle debie bie mɔɔ zɔho tease abɔdeɛ la nna. Na kɛ bɛde la ɛne: bɛle kɛ menli la,

⁶noko ko biala anyunlu nna, yɛɛ ɔlɛ ndɛbalɛ nna.

⁷Bɛ gyakɛ tenletenle, yɛɛ bɛ gyakɛ taboa ne mɔ le kɛ ɛnlankɛ nyinli ndwɛlɛ la, na bɛta kɛ kɔbele mɔɔ bɛbolo nwolɛ la.

⁸Wɔ bɛ ndɛba nna nna ne mɔ mɔɔ duodua bɛ la abo, ko biala lɛ sonla ɛsalɛ nna. Ɛsalɛ ko wɔ ndɛbalɛ ko abo. Kɛ bɛ nyunlu nee bɛ ndɛba ne mɔ de la ɛne:

⁹Bɛ ndɛba ne mɔ kpulokpula zolɛ, yɛɛ bɛmaa bɛ nwo zo na bɛlɛkɔ a, bɛkɔ fɔɔnwo; biala ɛmpɛne ɔ nwo anzɛɛ ɛngakyi ɔ nwo.

¹⁰ Bɛ nyunlu ne mɔ kɛ de la ɛne: ko biala anyunlu nna; ɔ nyunlu ko le sonla nyunlu, ye fema zo le awenade nyunlu, ye bɛne zo le ɛnlankɛ nyinli nyunlu, yɛɛ ɔ nzi le kɔleɛ nyunlu.

¹¹Bɛmemanle bɛ ndɛba ne mɔ nwiɔ nwiɔ zo mɔɔ ko biala ɛdeɛ ko ati kpula ɔ gɔnwo mɔɔ bikye ye la ɛdeɛ ne ati, yɛɛ ndɛbalɛ nwiɔ nwiɔ ne mɔ mɔɔ ɛha la betɛbeta bɛ nwo.

¹²Ko biala tu ɔ bo a ɔkɔ ɔ nyunlu fɔɔnwo; ɛleka biala mɔɔ sunsum ne kɛva bɛ kɛdu kɛdenrɛ la, biala ɛmpɛne ɔ nwo.

¹³Wɔ tease abɔdeɛ nna ne mɔ avinli, debie bie mɔɔ ɛdɔlɔ guaanye kɛ senle samɛnlankɛ, na ɔle kɛ tɛkɛ mɔɔ ɛlɛsɔ la wɔ ɛkɛ, na ɔsɔ ɔkpɔsa tease abɔdeɛ ne mɔ anu. Ye senle ne ta kpole kpalɛ, yɛɛ ɛsɛnlɛmanye kpakye fi nuhua finde.

¹⁴Tease abɔdeɛ ne mɔ noko tudu agyakɛ kɔ ba kɛ ɛsɛnlɛmanye mɔɔ kɛkpakye la.

¹⁵Mɔɔ meneanle tease abɔdeɛ ne mɔ la, menwunle kɛ ehwili nna gyigyi bɛ nwo ɛkɛ, ko biala ehwili ko.

¹⁶Ehwili nna ne amuala zɔho bɛ nwo, na bɛyɛ bɛ kɛ asɛɛ ehwili vea ehwili nu, yɛɛ bɛ nwo ta kɛ ezukoa bolɛ.

¹⁷Saa bɛtu bɛ bo bɛlɛkɔ a, bɛtia bɛ gyakɛ nna ne mɔ azo bɛkɔ bɛ tɛbanu ɛleka biala mɔɔ bɛmpɛne bɛ nwo a.

¹⁸ Ehwili nna ne mɔ amuala dedɛ bɛ gyakɛ ahutukpunli mɔɔ mbaka anzɛɛ mbulalɛ beɛbea nuhua, yɛɛ egyakɛ kutukpunli ko biala anwo le ɛnyelɛ dɔɔnwo.

¹⁹Saa tease abɔdeɛ ne mɔ tu bɛ bo a, ɛnee ehwili ne mɔ ɛdu bɛ bo, saa bɛmaa bɛ nwo zo a, ɛnee ehwili ne mɔ noko ɛmaa bɛ nwo zo.

²⁰Ɛleka biala mɔɔ sunsum ne vale bɛ dule denrɛle la, bɛhɔle, yɛɛ ehwili ne mɔ hɔle bie, ɔluakɛ tease abɔdeɛ nna ne mɔ sunsum ne wɔ ehwili ne mɔ anu.

²¹Yemɔti saa tease abɔdeɛ nna ne mɔ tu bɛ bo, anzɛɛ gyinla, anzɛɛ maa bɛ nwo zo a, ehwili ne mɔ yɛ zɔhane ala. Ɔluakɛ tease abɔdeɛ ne mɔ sunsum ne wɔ ehwili ne mɔ anu.

²² Tease abɔdeɛ ne mɔ ati zo anwuma, ninyɛne ahutukpunli bie mɔɔ ta hyɛɛnye kɛ ezukoa bolɛ la hendɛhenda ɛkɛ.

²³Tease abɔdeɛ nna ne mɔ ɛdɛlɛdɛlɛ bɛ ndɛba ne mɔ nwiɔ nwiɔ anu mɔɔ ko kpula ɔ gɔnwo ɛdeɛ ne, yɛɛ bɛva nwiɔ bɛhedɛheda bɛ nwo na bɛgyigyi ninyɛne ahutukpunli ne mɔ mɔɔ ɛlɛta la abo.

²⁴ Mɔɔ bɛlɛkɔ la, mendele kɛ ɛnee bɛ ndɛba ne mɔ anu ɛlɛsu kɛ azule mɔɔ lua awolɛ nu, ɔle kɛ Tumivolɛ Nyamenle ne ɛlɛkulu la, na ɔle kɛ ɛlɔne kpole bie ɛlɛyɛ alɛra la. Mɔɔ bɛkɛgyinla la, ɛnee bɛgua bɛ ndɛba ne mɔ aze.

²⁵Saa bɛgyinla na bɛgua bɛ ndɛba ne mɔ aze a, ɛnelɛ vi ninyɛne ahutukpunli ne mɔ mɔɔ hendɛhenda bɛ ti zo la azo ba.

²⁶Wɔ ninyɛne ahutukpunli ne mɔ mɔɔ hendɛhenda bɛ ti zo anwuma la azo, debie bie mɔɔ le kɛ belemgbunli ebia, mɔɔ bɛva ezukoa bolɛ ne mɔɔ bɛfɛlɛ ye safaya la a bɛyɛle la gyi zolɛ, na debie bie mɔɔ le kɛ sonla la de nuhua.

²⁷Deɛ ne mɔɔ de ebia ne anu la anwuma toonwo mɔɔ badwu ɔ nze zo la ta kɛ kɔbele mɔɔ ɛlɛta la, na yeyɛ kɛ asɛɛ debie mɔɔ senle ɛbɔ ɛyia ye la; akee menwunle kɛ ɔvi ɔ nze zo toonwo mɔɔ badwu ye aze la le kɛ senle na wienyi kpole kpalɛ ɛbɔ ɛyia ye.

²⁸Wienyi ne le kɛ ezule mɔɔ ɛmunla la nyangondonle ne mɔɔ kɛdo la. Kɛ Ɛdɛnkɛma anyunlunyia ne sɔhovolɛ de la ɛne. Mɔɔ menwunle ɛhye la, membutule me nye aze, na mendele awie ane kɛ ɔlɛtendɛ.