Read Nzema Yiz 10 Bible Online

Yiz 10 - Nzema bible

Yiz 10

¹ Akee memanle me nye zo, na menwunle kɛ, wɔ deɛ ne mɔɔ ɛdo ɛbɛnra abɔdeɛ ne mɔ mɔɔ lɛ ndɛbalɛ la ati ne mɔ anwo la azo, debie bie mɔɔ le kɛ belemgbunli ebia, mɔɔ bɛva sanyia bolɛ ne mɔɔ bɛfɛlɛ ye safaya la bɛyɛ la gyi zolɛ anwuma.

² Nyamenle zele nrenya ne mɔɔ wula lenen tɛladeɛ ne la kɛ, “Kɔwolo ehwili ne mɔ mɔɔ wɔ tease abɔdeɛ ne mɔ abo la avinli na fula samɛnlankɛ ne bie kɔzande ye wɔ suakpole ne azo.” Ɔkɔ la me nye gyi ɔ nwo.

³Mekɛ mɔɔ nrenya ne kawolo ehwili ne anu la ɛnee tease abɔdeɛ ne mɔ gyigyi Ɛzonlenlɛ Sua ne nyiakɛ, na amungu ne rayile Ɛzonlenlɛ Sua ne akunlu alie nwo ɛkɛ.

⁴Ɛdɛnkɛma anyunlunyia ne vi tease abɔdeɛ ne mɔ ati zo hɔle Ɛzonlenlɛ Sua ne anu. Amungu ne rayile sua ne, na Ɛdɛnkɛma anyunlunyia ne yile alie nwo ɛkɛ ne manle ɔyɛle wienyi.

⁵Saa awie wɔ findezo alie nwo nehane na ɔte abɔdeɛ ne mɔ andɛba mɔɔ bɛlɛbɔ nu la ane a, ɔle kɛ Nyamenle Bedevinli ne ɛlɛtendɛ la.

⁶Nyamenle zele nrenya ne mɔɔ wula lenen tɛladeɛ ne la kɛ ɔhɔvula senle wɔ tease abɔdeɛ ne mɔ ehwili ne mɔ avinli na ɔhɔle la, ɔhɔgyinlanle ehwili ko anwo.

⁷Na tease abɔdeɛ ne mɔ ko vale ɔ sa bɔle senle ne mɔɔ wɔ tease abɔdeɛ nna ne mɔ avinli la anu vulale bie guale nrenya ne asa anu. Nrenya ne liele na ɔhɔle.

⁸Tease abɔdeɛ ne mɔ lɛ debie bie mɔɔ le kɛ sonla sa la wɔ bɛ ndɛba ne mɔ abo.

⁹ Meneanle la eza menwunle kɛ ehwili nna gyigyi abɔdeɛ ne mɔ anwo ɛkɛ, abɔdeɛ ko biala ehwili ko. Ehwili ne mɔ ta kɛ ezukoa bolɛ.

¹⁰Bɛ muala bɛzɔho bɛ nwo kɛ asɛɛ ehwili ko de ko noko anu.

¹¹Saa bɛtu bɛ bo kɛ bɛlɛkɔ a, bɛkola bɛkɔ bɛ tɛbanu nna ne mɔ anu biala mɔɔ bɛngakyi anzɛɛ bɛmpɛne bɛ nwo a.

¹² Ɛnyelɛ duodua ehwili kɛba ne mɔ nee nuhua mbulalɛ meɛbeanu ne mɔ amuala anwo, yɛɛ ehwili nna ne mɔɔ bɛlɛ la, biala anwo le ɛnyelɛ ngome.

¹³Na mendele kɛ bɛfɛlɛ ehwili ne mɔ “Akyima Ehwili.”

¹⁴ Tease abɔdeɛ ko biala anyunlu nna. Mɔɔ lumua la zɔho ɛnlankɛ nyinli, mɔɔ tɔ zolɛ nwiɔ la le sonla, mɔɔ tɔ zolɛ nsa la le awenade, yɛɛ mɔɔ tɔ zolɛ nna la le kɔleɛ.

¹⁵(Bɛdabɛ ko ne ala a menwunle bɛ wɔ Azule Kibaa ne anloa la.) Saa tease abɔdeɛ ne mɔ maa bɛ nwo zo

¹⁶kɛ bɛlɛkɔ a, ehwili ne mɔ sianle bɛ, yɛɛ saa bɛbɔ bɛ ndɛba anu bɛtu a, ehwili ne mɔ ɛnga aze.

¹⁷Saa bɛgyinla a, ɛnee ehwili ne mɔ ɛgyinla, yɛɛ saa bɛtu bɛ bo a, ɛnee ehwili ne mɔ ɛdu bɛ bo. Ɔluakɛ tease abɔdeɛ ne mɔ sunsum ne wɔ ehwili ne mɔ anu.

¹⁸Akee Ɛdɛnkɛma anyunlunyia ne vi Ɛzonlenlɛ Sua ne anuhɔlɛ ne yele ɔ nwo hɔzinzele tease abɔdeɛ nna ne ati zo anwuma.

¹⁹Na menwunle kɛ tease abɔdeɛ ne mɔ dɛlɛle bɛ ndɛba anu na bɛdule, ehwili ne mɔ boka bɛ. Bɛhɔgyinlanle Ɛdɛnkɛma Ɛzonlenlɛ Sua ne aduduleɛ anlenkɛ ne anloa, na Yizilayɛ Nyamenle anyunlunyia ne ɛheda bɛ nwo zo.

²⁰Bɛdabɛ ko ne ala a bɛle tease abɔdeɛ ne mɔ mɔɔ menwunle bɛ Yizilayɛ Nyamenle ne abo wɔ Azule Kibaa ne anloa la.

²¹Ko biala lɛ ɔ nyunlu nna, ɔ ndɛba nna, yɛɛ debie bie mɔɔ le kɛ sonla ɛsalɛ la wɔ bɛ ndɛba ne mɔ abo.

²²Bɛ nyunlu kile kɛ bɛdabɛ ko ne ala a menwunle bɛ wɔ Azule Kibaa ne anloa la. Ko biala maa ɔ nwo zo a, ɔkɔ ɔ nyunlu fɔɔnwo.