Read Nzema Yiz 11 Bible Online

Yiz 11 - Nzema bible

Yiz 11

¹Nyamenle Sunsum ne manle membale Ɛdɛnkɛma Ɛzonlenlɛ Sua ne aduduleɛ anlenkɛ ne anloa. Na menwunle menli abulanwiɔ nee nnu wɔ anuhɔlɛ ne, Ezɛ ara Gyeeyazanaya nee Bɛnaya ara Pɛlataya, mɔɔ le maanle ne anu mgbanyinli la boka nwolɛ.

²Na Nyamenle zele me kɛ, “Sonla ra, menli ɛhye mɔ a bɔ maamɔvo kpɔkɛ na bɛtu suakpole ne azo amra folɛ ɛtane la.

³Bɛ edwɛkɛ se kɛ, ‘Ɔtɛdwule mekɛ mɔɔ yɛsisi azua a; suakpole ɛhye le kɛ danesɛne kpole bie, yɛɛ yɛmɛ yɛle fɛlɛ yɛwɔ nu.’

⁴Yemɔti ka Nyamenle nrɛlaleɛ ne tia bɛ, o sonla ra, ka Nyamenle nrɛlaleɛ ne.”

⁵Ɛdɛnkɛma Sunsum ne wolole me na ɔzele me kɛ menga kɛ, “Ɛdɛnkɛma se, O, Yizilayɛma, kɛ bɛ adwenle yɛ bɛ la ɛhye ɔ? Meze debie biala mɔɔ wɔ bɛ adwenle nu la.

⁶Bɛhu menli dɔɔnwo kpalɛ wɔ suakpole ye azo, na ye kpalɛ ne mɔ amuala azo ɛyɛ avunli ngome.

⁷“Yemɔti kɛ medame Awulae Nyamenle ne mese la ɛne: Bɛdabɛ mɔɔ bɛhu bɛ bɛgua kpalɛ ne mɔ azo la, bɛ avunli a le fɛlɛ ne, yɛɛ suakpole ye a le danesɛne kpole ne, na bɛmɛ, bɛbaye bɛ bɛavi suakpole ye azo bɛavinde.

⁸Bɛzulo dadeɛ nloa ewule; na kɛkala, mebamaa bɛawu dadeɛ nloa. Medame Awulae Nyamenle a mese a.

⁹Mebaye bɛ kɔsɔɔti meavinde na meaye bɛ meamaa nyɛvolɛ adea bɛ.

¹⁰Bɛbadɔ amolɛ nu wɔ konle nu; mebadea bɛ toonwo meahɔdwu Yizilayɛ ɛweɛne zo, na bɛanwu kɛ medame a mele Ɛdɛnkɛma a.

¹¹Suakpole ɛhye ɛnrɛyɛ bɛ danesɛne kpole, yɛɛ bɛdabɛ noko bɛnrɛyɛ nuhua fɛlɛ. Mebadea bɛ toonwo meahɔdwu Yizilayɛ ɛweɛne zo,

¹²na bɛanwu kɛ medame a mele Ɛdɛnkɛma a. Ɔluakɛ bɛanli me mɛla ne mɔ azo, yɛɛ bɛanli me ngyehyɛlɛ zo, na bɛli maanle maanle mɔɔ zuozua bɛ la maamɛla zo.”

¹³Mɔɔ me nloa wɔ zolɛ melɛka Nyamenle nrɛlaleɛ ne la, Pɛlataya mɔɔ ɔ ze a le Bɛnaya la wule. Ɛkɛ ne ala, membutule mutule nu, na mendeanle nuhua kpole kɛ, “O, Awulae Nyamenle, ɛbɔ Yizilayɛma ekyi mɔɔ ɛha la abo zo ɔ?”

¹⁴Ɛdɛnkɛma dendɛle hilele me.

¹⁵Ɔse, “Sonla ra, menli mɔɔ wɔ Gyɛlusalɛm la ɛlɛka ɛdawɔ nee ɛ gɔnwo mɔ mɔɔ wɔ nlɔnu la anwo edwɛkɛ kɛ, ‘Bɛdabɛ mɔɔ bɛhye bɛ bɛhɔ nlɔnu la wɔ moa; bɛ nee Ɛdɛnkɛma bɛ avinli ɛde; kɛkala, azɛlɛ ye ɛyɛ yɛ ɛdeɛ.’

¹⁶“Zɔhane ati ka kile bɛ kɛ, ‘Awulae Nyamenle ne se: Medame yɛɛ menvale bɛ mengɔle maanle zo moa moa na membɔle bɛ memkpondenle maanle maanle ne mɔ avinli a; noko me nee bɛ lua maanle biala mɔɔ bɛhɔ nu la anu.’

¹⁷Yemɔti ka kile bɛ kɛ, ‘Awulae Nyamenle ne se: Mebaboɔboa bɛ nloa meavi menli ne mɔ anu, na meaye bɛ meavi maanle maanle mɔɔ me nee bɛ hɔle nu la anu, meazia meara, na meava Yizilayɛ azɛlɛ ye meamaa bɛ.

¹⁸Saa bɛsia bɛba a, bɛbayeye ninyɛne ɛtane ɛtane nee bɛkyi debie biala mɔɔ wɔ azɛlɛ ne azo la amuala.

¹⁹ “ ‘Mebamaa bɛanyia ahonle fofolɛ na meamaa bɛ sunsum fofolɛ. Mebaye bolɛ ahonle ne wɔ bɛ nuhua na meamaa bɛ tieyɛ ahonle.

²⁰Bɛbazie me mɛla ne nee me ngyehyɛlɛ ne mɔ na bɛali zolɛ; bɛbayɛ me menli na meayɛ bɛ Nyamenle.

²¹Na bɛdabɛ mɔɔ bɛse bɛkɔ zolɛ bɛayɛ ninyɛne ɛtane ɛtane na bɛabɔ bɛkyi ɛbɛla la, mebamaa bɛ nyɛleɛ ne mɔ abɔ bɛ ti tɔ. Medame, Awulae Nyamenle yɛɛ mese a.’ ”

²² Tease abɔdeɛ ne mɔ akee bɔle bɛ ndɛba nu dule, ehwili ne mɔ li bɛ foa ko, na Yizilayɛ Nyamenle ne anyunlunyia ne zinzele bɛ nwo zo.

²³Na Ɛdɛnkɛma anyunlunyia ne vi suakpole ne azo yele ɔ nwo na ɔhɔzinzele boka ne mɔɔ wɔ suakpole ne aduduleɛ la azo.

²⁴Akee Nyamenle Sunsum ne vale me luale ɛnyelɛzodeɛnwunlɛ ne anu ziale rale Babelonia wɔ bɛdabɛ mɔɔ bɛhye bɛ bɛhɔ nlɔnu la avinli. Akee me nye zo tetele me.

²⁵Na menganle mɔɔ Ɛdɛnkɛma ɛye ɛhile me la amuala mengilele nlɔnuma ne.