Read Nzema Yiz 12 Bible Online

Yiz 12 - Nzema bible

Yiz 12

¹Ɛdɛnkɛma dendɛle hilele me.

² Ɔse, “Sonla ra, ɛde menli anzosesebɛma mɔɔ ɛngyɛ na ade atua la avinli. Bɛlɛ ɛnyelɛ, noko bɛnnwu debie; bɛlɛ ɛnzonlɛ, noko bɛnde edwɛkɛ, ɔluakɛ bɛle atuadelɛma.

³“Yemɔti, sonla ra, kyekye bɔlɛ na yɛ kɛ sonla mɔɔ bɛhye ye bɛ nee ye ɛlɛkɔ nlɔnu la. Tɔ adenle zo alehyenlɛ nu mɔɔ awie biala anye dua wɔ kɛ ɛlɛkɔ nlɔnu la. Yɛ ɛ nwo kɛ sonla mɔɔ ɛlɛkɔ nlɔnu la na ɛvi ɛleka ko kɔ ɛleka fofolɛ. Bɛ nzo yɛ se, yɛɛ bɛde atua ɛdeɛ, noko wɔannea a bɛbade ɔ bo.

⁴Alehyenlɛ ne anu, ɛbaboɔboa wɔ ninyɛne ne mɔ anloa wɔ bɛ nye zo, na ye nɔsolɛ nu wɔadɔ adenle zo wɔ bɛ nye zo, kɛmɔ menli mɔɔ kɔ nlɔnu la yɛ la.

⁵Funvu bane ne anu fiti tɔ ɔ nzi wɔ bɛ nye zo ɛkɛ ne, na dua nuhua finde.

⁶Bɛ nye zo ɛkɛ ne ala, maa wɔ bɔlɛ ne zo to ɛ kɔme zo na tɔ awozinli ne anu kɔ. Keda ɛ nyunlu, amaa wɔannwu ɛleka mɔɔ ɛlɛkɔ la. Ɔluakɛ meva wɔ meyɛ sɛkɛlɛneɛ memaa Yizilayɛma.”

⁷Menyɛle mɔɔ Ɛdɛnkɛma zele me la. Alehyenlɛ ne anu, menkyekyele me bɔlɛ kɛ sonla mɔɔ ɛlɛkɔ nlɔnu la; nɔsolɛ nu menvale me sa menvunvunle bane ne anu menfitile mendɔle ɔ nzi, na bɛ nye zo ɛkɛ ne ala, menvale me bɔlɛ mendole me kɔme zo na mendɔle awozinli ne anu mengɔle.

⁸Aleɛ hyenle la Ɛdɛnkɛma dendɛle hilele me.

⁹Ɔse, “Sonla ra, se Yizilayɛ atuadelɛma akee ɛbiza wɔ kɛ, ‘Duzu a ɛlɛyɛ la?’

¹⁰Ka kile bɛ kɛ, ‘Awulae Nyamenle ne se, nyɛleɛ ɛhye fane kpanyinli ne mɔɔ ɛlɛbu Gyɛlusalɛm maanle ne nee Yizilayɛma mɔɔ wɔ zolɛ la amuala anwo.’

¹¹Ka kile bɛ kɛ, mɔɔ wɔyɛ la le sɛkɛlɛneɛ maa bɛ. Mɔɔ wɔyɛ la, zɔhane ala yɛɛ bɛbava bɛayɛ bɛ a. Bɛbahye bɛ nuokɛ bɛ nee bɛ ahɔ nlɔnu.

¹²Na belemgbunli ne mɔɔ sie bɛ la bava ye bɔlɛ ado ɔ kɔme zo nɔɔzo, na yeanriandi yeahɔ. Ɔbavunvu bane ne anu yeafiti yeadɔ ɔ nzi, na yealua nu yeahɔ. Ɔbaheda ɔ ti zo, amaa yeannwu azɛlɛ ne mɔɔ ɔlɛkɔ zolɛ la azo.

¹³ Na mebagua ye asawu meahye ye me ɛhane nu. Mebava ye meahɔ nlɔnu wɔ suakpole Babelɔn azo, wɔ Babelonia azɛlɛ zo, mɔɔ ɔdaye mumua ne ɔnrɛnwu ye a. Ɛkɛ ne yɛɛ ɔbawu a.

¹⁴Mebabɔ menli mɔɔ ɛbɔ ɛyia ye wɔ ye suakunlu ɛkɛ ne, mɔɔ tu ye folɛ yɛɛ ye ɛlɔnema kɔsɔɔti asande meahɔgua ɛleka kɔsɔɔti, na meamaa menli ahoto ahɔhu bɛ.

¹⁵“Saa mebɔ bɛ asande na mekponde bɛ wɔ maanle maanle avinli a, yɛɛ bɛbanwu kɛ medame a mele Ɛdɛnkɛma a.

¹⁶Noko mebamaa bɛ nuhua ekyi avi ɛsalɛ, mɔɔ bɛnrɛhu bɛ, yɛɛ ewulenzane nee ɛhɔne ɛnrɛmaa bɛnrɛwu, amaa bɛaha bɛ bɛkyi nyɛleɛ ne mɔ mɔɔ bɛyɛle la bɛahile maanle maanle mɔɔ bɛkɛhɔdo bɛ la, na bɛanwu kɛ medame a mele Ɛdɛnkɛma a.”

¹⁷Eza Ɛdɛnkɛma dendɛle hilele me.

¹⁸Ɔse, “Sonla ra, saa ɛdi aleɛ a fa anwowozolɛ di, yɛɛ ɛno nzule a fa anwowozolɛ nee sulosulo no.

¹⁹Ka kile maanle ne anu amra kɛ, ‘Edwɛkɛ mɔɔ Ɛdɛnkɛma ka ye wɔ menli mɔɔ de Gyɛlusalɛm nee bɛdabɛ mɔɔ bɛwɔ Yizilayɛ azɛlɛ zo la anwo la ɛne: Bɛbava sulosulo bɛali aleɛ, na bɛava arɛlebɔlɛ bɛanlo nzule, ɔboalekɛ bɛdabɛ mɔɔ bɛde azɛlɛ ne azo la ahɔdiawu ɛbɛla ne ati, bɛ azɛlɛ ne badɔ mgbane.

²⁰Bɛ azuamgbole mɔɔ azo ɛyɛ gbudugbudu la amuala bayɛ azuadu, na azɛlɛ ne azo ayɛ nyanyoo, na bɛanwu kɛ medame a mele Ɛdɛnkɛma a!’ ”

²¹Ɛdɛnkɛma dendɛle hilele me bieko.

²²Ɔse, “Sonla ra, ɛrɛlɛ ɛhye mɔɔ Yizilayɛma ta bu la a le duzu? Bɛse, ‘Mekɛ ne ɛzenlɛ ala a se a, noko bɛ ɛnyelɛzodeɛnwunlɛ ne ɛnyɛ zɔhane.’

²³Zɔhane ati ka kile bɛ kɛ, ‘Awulae Nyamenle ne se: Metua zɛhae ɛrɛlɛ ne, na bɛnrɛbu ye bieko ɛlɛ wɔ Yizilayɛ azɛlɛ zo.’ Na ka kile bɛ kɛ mekɛ ɛdwu mɔɔ ɛnyelɛzodeɛnwunlɛ biala ɔwɔ kɛ yɛ zɔhane a.

²⁴“Akee ɛnyelɛzodeɛnwunlɛ mgbane mgbane nee adalɛ abisadeɛ edwɛkɛ biala ɛnrɛvinde Yizilayɛma avinli bieko.

²⁵Medame Awulae Nyamenle, mebadendɛ, na edwɛkɛ biala mɔɔ mebaha la bayɛ zɔhane. Aze ɛzilɛ biala ɛnle ɛkɛ. Bɛmɛ atuadelɛma, mebaha me nloa edwɛkɛ, na ɔbayɛ zɔhane, yɛɛ ɔbazi bɛ mekɛ zo. Medame Awulae Nyamenle a mese a.”

²⁶Ɛdɛnkɛma zele me kɛ,

²⁷“Sonla ra, nea, Yizilayɛma se, ‘Debie mɔɔ bɛkɛye bɛkɛhile ye wɔ ɛnyelɛzodeɛnwunlɛ nu kazi la, ɛnee yehyɛ, yɛɛ ye Nyamenle nrɛlaleɛ mɔɔ ɔfa ɔbɛlɛ ye la, kayɛ zɔhane la, ɛnee yehyɛ.’

²⁸Yemɔti ka kile bɛ kɛ Awulae Nyamenle ne se, ‘Me edwɛkɛ ɛnrɛzi aze bieko. Edwɛkɛ biala mɔɔ medame menwɔha la bayɛ zɔhane. Medame Awulae Nyamenle a mese a.’ ”