Read Nzema Yiz 13 Bible Online

Yiz 13 - Nzema bible

Yiz 13

¹Ɛdɛnkɛma dendɛle hilele me. Ɔse,

²“Sonla ra, ka nrɛlaleɛ ɛhye kile Yizilayɛ Nyamenle kpɔmanvolɛma mɔɔ bɔ bɛ ti anu keha mɔɔ bɛdabɛ bɛkulo la. Ka kile bɛ maa bɛdie mɔɔ medame Ɛdɛnkɛma mese la.

³“Ka kile bɛ kɛ, Ɛdɛnkɛma se, ‘Munzule ɛha Nyamenle kpɔmanvolɛ ahoasea ne mɔ, mɔɔ ɛnnwu ɛhwee na bɛbɔ bɛ ti anu bɛka Nyamenle nrɛlaleɛ la.

⁴Yizilayɛma, bɛ Nyamenle kpɔmanvolɛma ɛyɛ kɛ fovolɛ zo ɛzonlɛ.

⁵Bɛtɛkɔneanle ɛleka ne mɔ mɔɔ ɛgologolo ɛgua la, yɛɛ bɛtɛdiele Yizilayɛma anwo bane, amaa Ɛdɛnkɛma kenle ne dwu na konle ba a bɛahola gyinla.

⁶Bɛbɔ adalɛ, yɛɛ bɛha adalɛ abisadeɛ edwɛkɛ; bɛse, “Ɛdɛnkɛma se,” wɔ mekɛ mɔɔ metɛsoanle bɛ la. Noko bɛ nye la kɛ mebamaa bɛ edwɛkɛ ne mɔɔ bɛha la ayɛ zɔhane.

⁷Asoo tɛ ɛnyelɛzodeɛnwunlɛ mgbane mgbane nee adalɛ abisadeɛ edwɛkɛ a bɛka mekɛ biala mɔɔ bɛkɛha kɛ “Ɛdɛnkɛma se,” wɔ mekɛ mɔɔ metɛkanle ɛhwee la?’

⁸“Yemɔti ka kile bɛ kɛ, Awulae Nyamenle ne se, ‘Kɛmɔ bɛ ɛnyelɛzodeɛnwunlɛ ne mɔ ɛnle nɔhalɛ na bɛbɔ adalɛ la ati, medame Awulae Nyamenle, mekpo bɛ.

⁹Mebadea bɛdabɛ bɛ Nyamenle kpɔmanvolɛma ne mɔ mɔɔ bɛtɛnwunle debie a, ɛnee bɛse bɛnwu debie na bɛbɔ adalɛ la. Bɛnrɛdia bɛ bɛnrɛboka Yizilayɛma anwo, yɛɛ bɛ nee bɛ ɛnrɛdu agyinla bɔbɔ. Bɛnrɛzia bɛnrɛhɔ bɛ maanle nu Yizilayɛ; na bɛbanwu kɛ medame a mele Awulae Nyamenle ne a.

¹⁰ “ ‘Kɛmɔ bɛbɛlɛbɛla me menli ne, na ɛleka mɔɔ anzonudwolɛ ɛnle la ɛnee bɛse anzonudwolɛ wɔ ɛkɛ, na menli ne die bane mgbane bie a ɛnee bɛmɛ Nyamenle kpɔmanvolɛma bɛhwi nwolɛ kalo la;

¹¹ka kile bɛdabɛ mɔɔ bɛtwi kalo ne la kɛ bane ne bagolo agua. Ezule kpole badɔ, ezuawolɛ mgbole bagua, na ahumu kpole adu,

¹²na saa bane ne bu gua a, ɛnee bɛ kalo ne mɔɔ bɛvale bɛhwile nwolɛ la hale nienwu?’

¹³“Zɔhane ati kɛ Awulae Nyamenle ne se la ɛne: Mebava ɛya na meamaa ahumu kpole adu, ezule badɔ kpole bie, na ezuawolɛ adɔ abubu bane ne.

¹⁴Mebabubu bɛ bane ne mɔ mɔɔ bɛhwi nwolɛ kalo la, na meagolo bɛ meagua, meamaa ye adiabo ne bɔbɔ anwenle zolɛ. Ye ɛbulɛ ne anu, ɔbahu bɛ, na bɛanwu kɛ medame a mele Ɛdɛnkɛma a.

¹⁵“Zɛhae yɛɛ mebava meayɛ bane ne nee bɛdabɛ Nyamenle kpɔmanvolɛma ne mɔ mɔɔ bɛannwu ɛhwee na bɛhanle Nyamenle nrɛlaleɛ bɛhilele Gyɛlusalɛmma kɛ bɛde anzonudwolɛ nu, na bɛhwile bane ne anwo kalo la. Medame Awulae Nyamenle a mese a!”

¹⁷Ɛdɛnkɛma zele kɛ, “Sonla ra, akee nea mraalɛ mɔɔ wɔ wɔ menli ne avinli, na bɛbɔ bɛ ti anu bɛka Nyamenle nrɛlaleɛ la. Ka nrɛlaleɛ ɛhye kile bɛ na se bɛ kɛ,

¹⁸medame Awulae Nyamenle, mese: Munzule ɛha bɛdabɛ mraalɛ mɔɔ bɛkpomgba ngonyia sɛbɛ bɛgyelegyela menli sa, na bɛbɔ bɛ nwolɛ duku, amaa bɛanyia tumi wɔ menli ngakyile nwo zo la. Asoo bɛfa bɛ ngonyia bɛahu me menli ne foa ko na bɛalie foa ko ngoane wɔ bɛdabɛ bɛ ezukoakpondɛlɛ ti?

¹⁹Bɛbɔ adalɛ bɛhile me menli ne mɔ mɔɔ kulo adalɛ la, bɛgua me nyunlu aze wɔ me menli ne anyunlu, bɛlie baale nee kpanwo, bɛhu menli mɔɔ ɔnle kɛ wu la, na bɛlie menli mɔɔ fɛta ewule la ngoane.

²⁰“Yemɔti medame Awulae Nyamenle, mese: Mekyi ngonyia sɛbɛ ne mɔ mɔɔ bɛfa bɛnyia menli nwo zo tumi la. Mebatete bɛ meavi bɛ sa, na meazianyizianyi menli mɔɔ bɛkyekye bɛ la meamaa bɛahɔ kɛ nloma.

²¹Mebadudu bɛ ti duku ne mɔ meagua, na mealie me menli ne meavi bɛ sa nu, mɔɔ ɛnee bɛnle bɛ tumi bo bieko a, na bɛanwu kɛ medame a mele Ɛdɛnkɛma a.

²²“Bɛva bɛ adalɛ ne mɔ bɛbɔ menli mɔɔ di boɛ, na mengulo kɛ bɛ nwo bu ɛbonle la arɛle; bɛzi amumuyɛnli ne adua bɛammaa yeangakyi ye ɛbɛla ɛtane ne yeanlie ɔ nwo ngoane.

²³Yemɔti bɛnrɛnwu ɛnyelɛzodeɛnwunlɛ biala yɛɛ bɛnrɛbɔ adalɛ munzule biala. Mebalie me menli ne meavi bɛ sa nu, na bɛanwu kɛ medame a mele Ɛdɛnkɛma a.”