Read Nzema Yiz 14 Bible Online

Yiz 14 - Nzema bible

Yiz 14

¹Yizilayɛ mgbanyima bie mɔ radɛnlanle me nwo ɛkɛ.

²Na Ɛdɛnkɛma zele me kɛ,

³“Sonla ra, menli ɛhye mɔ ɛlie bɛ mmonle ne mɔ ɛdo nu kpole kpalɛ na ɔlɛmaa bɛ ɛtane ne mɔ azi bɛ nyunlu bile. Asoo ɔle kpalɛ kɛ menwɔmaa adenle menwɔmaa bɛkɛbiza me edwɛkɛ?

⁴“Yemɔti tendɛ kile bɛ na se bɛ kɛ: Medame Awulae Nyamenle, mese, Yizilayɛnli biala mɔɔ ɛva ye ahonle ɛmaa mmonle, yemaa ye ɛtane ɛzi ɔ nyunlu bile, na ɔkɛra Nyamenle kpɔmanvolɛ ne ɛkɛ ne la, medame Ɛdɛnkɛma mumua ne mebabua ye, ɔboalekɛ bɛ mmonle ne mɔ ɛzo somaa,

⁵amaa meado me sa mealie Yizilayɛma mɔɔ awozonlezonlenlɛ ti bɛhwe bɛ nwo bɛvi me nwo la.

⁶“Zɔhane ati ka kile Yizilayɛma kɛ, Awulae Nyamenle ne se: Bɛnlu bɛ nwo na bɛhwe bɛ nwo bɛvi bɛ mmonle ne mɔ nee bɛ bɛkyi nyɛleɛ ne mɔ anwo.

⁷“Mekɛ biala mɔɔ Yizilayɛnli anzɛɛ nyɛvolɛ mɔɔ de bɛ avinli la bie kɛde ɔ nwo kɛvi me nwo, ɔkɛhɔzonle awozonle, ɔkɛva ye ɛtane ɔkɛzi ɔ nyunlu bile, na akee ɔkɛhɔ Nyamenle kpɔmanvolɛ bie ɛkɛ kɛ ɔkabiza ɔ nwo wɔ me ɛkɛ ne la, medame Ɛdɛnkɛma mumua ne, mebabua ye.

⁸Mebava me nye meawula sonla zɔhane anyunlu na meamaa yeayɛ sɛkɛlɛneɛ nee ɛfenle wɔ menli anloa anu, na meaye ye meavi me menli ne anu; na bɛbanwu kɛ medame a mele Ɛdɛnkɛma a.

⁹“Na saa mɛlɛbɛla bie ba Nyamenle kpɔmanvolɛ zɔhane afoa nu, na ɔbuke ɔ nloa ɔka adalɛ nrɛlaleɛ biala a, ɛnee medame, Ɛdɛnkɛma a meyɛ a. Mebadea ye na meazɛkye ye meavi me menli Yizilayɛma avinli.

¹⁰Ahenle ne mɔɔ rale babiza ɔ nwo nee Nyamenle kpɔmanvolɛ ne, bɛ mu nwiɔ bɛ ndeanlɛ ne bayɛ ko, na bɛdabɛ bɛbali bɛ ndeanlɛ nwo ɛzonle,

¹¹amaa Yizilayɛma andwe bɛ nwo anvi me nwo, anluolua nu basabasa, na bɛanva mɛladonlɛ bɛanzɛkye bɛ nwo, amaa bɛayɛ me menli na medame meayɛ bɛ Nyamenle. Medame, Awulae Nyamenle a mese a.”

¹²Ɛdɛnkɛma zele me kɛ,

¹³“Sonla ra, saa maanle bie anu amra yɛ ɛtane tia me, bɛgyakyi me bɛkɔsonle nyamenle gyɛne, na meka kɛ metea maanle zɔhane, mefa ɛhɔne nee sane mebato maanle ne anu, na mɔɔ menli nee nane ɛlɛwu la,

¹⁴saa menli nsa ɛhye mɔ, Nowa, Daneɛle, yɛɛ Dwobu wɔ maanle ne anu bɔbɔ a, bɛ tenleneyɛlɛ kɛlie bɛdabɛ bɛ ngome ala ngoane. Medame Awulae Nyamenle a mese a.

¹⁵“Saa memaa nanemgbole ba azɛlɛ ne azo kɛ bɛzɛkye debie biala, memaa azɛlɛ ne tɔ mgbane, mɔɔ nanemgbole ne mɔ ati sonla biala ɛngola ɛngɔ zolɛ la a,

¹⁶meka, meka kɛ, saa menli nsa ɛhye mɔ bɔbɔ wɔ azɛlɛ ne azo a, medame Awulae Nyamenle, mese, bɛnrɛhola bɛ mra mrenya anzɛɛ bɛ mra mraalɛ ngoane die, kyesɛ bɛdabɛ bɛ ngome bɛ nwo ala. Maanle ne ɛdeɛ, ɔbadɔ mgbane.

¹⁷“Anzɛɛ saa metwe konle mebato maanle zɔhane anu, na memaa adenle kɛ bɛhu menli nee nyɛmoa mɔɔ wɔ nu la amuala a,

¹⁸meka, meka kɛ, saa menli nsa zɔhane wɔ maanle ne anu bɔbɔ a, medame Awulae Nyamenle, mese, bɛnrɛhola bɛnrɛlie bɛ mra mrenya anzɛɛ mraalɛ, kyesɛ bɛdabɛ bɛ ngome bɛ nwo ala.

¹⁹“Anzɛɛ saa mefa ewulenzane mebato maanle zɔhane anu, na mefa ɛya kɛ meku menli nee nyɛmoa mɔɔ wɔ maanle ne anu la a, meka, meka kɛ,

²⁰saa bɔbɔ Nowa, Daneɛle, yɛɛ Dwobu wɔ maanle ne anu a, medame Awulae Nyamenle, mese, bɛ nuhua biala ɛnrɛhola ɔ ra nrenya anzɛɛ raalɛ die. Bɛ tenleneyɛlɛ ne bahola alie bɛdabɛ bɛ ngome ala ngoane.”

²¹ Awulae Nyamenle ne se, “Na saa akee mefa me ndeanlɛ fane nna ɛhye mɔ: konle, ɛhɔne, nanemgbole mɔɔ di menli, yɛɛ ewulenzane megua Gyɛlusalɛmma anwo zo, kɛ mefa meaminli menli nee nyɛmoa abo zo ɛ!

²²Noko saa awie ka maanle ne anu na ɔfa mralɛ mrenya nee mraalɛ mɔɔ yelie bɛ la ɔba kɛ ɔfa bɛ yearahile wɔ, na ɛnea bɛ anwuma toonwo ɛdwu bɛ aze na ɛnwu bɛ nyɛleɛ a, munzule mɔɔ mefa meado Gyɛlusalɛm anwo zo la bakyekye ɛ rɛle bɔbɔ.

²³Saa ɛnwu bɛ nyɛleɛ nee bɛ ndenle mɔɔ bɛlua nu la a, mɔɔ mebayɛ la bakyekye ɛ rɛle; na bɛbanwu kɛ mɔɔ meyɛ la meanyɛ ye mgbane. Medame Awulae Nyamenle a mese a.”